YOHANES 20

Kubul᷊i ko takoae taho e

(Mat. 28:1-8; Mrk. 16:1-8; Luk. 24:1-12)

1Mborong masunaughi su mal᷊ukaru misa, i Maria Magdalena natamai nakoa sarang kubul᷊i. I sie nakawua watu l᷊ahumping u kubul᷊i seng naenso bou mohongu kubul᷊i e'e. 2Inau i sie nutumal᷊ang nundea si Simon Petrus dang tumatuhu ko ikindaghi I Yesus, dingang nangul᷊i si sire, “Mawu seng nial᷊a bou kubul᷊i, dang ia wugha minsang suapa i sie nipil᷊o.”

3Bou e'e i Petrus dingang tumatuhue ko wal᷊inge e'e nakoa sarang kubul᷊i. 4I sire rua katal᷊ange, kateho tumatuhu kowal᷊inge e'e namal᷊iu kasahawue bou i Petrus, dang i sie nurating horo su kubul᷊i. 5I sie nundal᷊inge sarang l᷊al᷊ung u kubul᷊i dingang nakawua heka sapu e'e kapapil᷊o su se'e, kateho i sie ta nusumu. 6I Simon Petrus nutumuhu bou l᷊ikure, mbuhue turusi nusumu su l᷊al᷊ung u kubul᷊i e'e. I sie nakawua heka sapu mapapilo su se'e, 7arawe heka ko mal᷊aiki su timbo I Yesus seng tarie su sindihange kateho magagul᷊ung si sane. 8Bou e'e tumatuhu ko nurating horo su kubul᷊i nusumu l᷊ai. I sie nakawua dingang nangimang. 9(Sarang tempo e'e i sire mang mborong ta nakahingang apa ko kawawohe su ral᷊ung u Buki Susi himoneu I Sie mambeng muwangung bou papate.) 10Bou e'e manga tumatuhu I Yesus e'e napul᷊e.

I Yesus nutingkaandaghi watangeng-E si Maria Magdalena

(Mat. 28:9-10; Mrk. 16:9-11)

11I Maria Magdalena karariasi kasangie su tingo ngu kubul᷊i. Mborong kasangie, i sie nundal᷊inge sarang l᷊al᷊ung u kubul᷊i, 12bou e'e nakawua Malaekati darua dingang u pakeange mawira. I sire e'e ko kakangiang su l᷊inau tampau badang I Yesus, singkatau su l᷊inau timbo-E, dang singkatau l᷊ai su l᷊inau laer-E. 13Manga Malaekati e'e nukina, “Mama, apa we makasangi?”

I Maria nusumimbahi, “Mawu ku seng pia ko nangal᷊a, dang ia wugha minsang I Sie nipilo su apa.”

14Suapang mbuae nangul᷊i kere e, i sie nuwihu sarang l᷊ikure dang nakawua si Yesus kararisi su se'e. Kateho i sie wugha ngu e'e ko I Yesus. 15I Yesus nukina si sie, “Mama apa we makasangi? Mama kapundeae si sai?”

I Maria nanika e'e ko mul᷊al᷊ahal᷊i u kobong, inau i sie nangul᷊i, “Amang, boko i amang nangal᷊ing I Sie bou i'i, tul᷊ung ko habari si sia suapa i amang namilo si Sie, tadeau ia makapangal᷊a si Sie.”

16I Yesus nangul᷊i si sie, “Maria!”

I Maria nuwihu si Yesus bou e'e nangul᷊i su bahasa ngu Ibrani, “Rabuni!” (Mangal᷊enge “Meteri”.)

17I Yesus nangul᷊i si sie, “Kumbahang muhinggo si Sia, watu u Ia mborong ta natarai sarang koa I Yamang. Kateho tamai ko sarang manga ana u simbau-Ku, dang puhabari si sire ko i'i Ia makoa sarang koa I Yamang-Ku dang I Yamangu, Mawu Ruata-Ku dang Mawu Ruata ngu.”

18Kute i Maria natamai nuhabari su manga tumatuhu I Yesus ko i sie seng nakawua Mawu dang Mawu seng bou nangul᷊i u kaul᷊i e'e si sie.

I Yesus nutingkaandaghu watangeng-E su manga tumatuhu-E

(Mat. 28:16-20; Mrk. 16:14-18; Luk. 24:36-49)

19Su misa e'e l᷊ai, suapang seng mahuwi, manga tumatuhu I Yesus nukomol᷊i su wal᷊e simbau tukari kaul᷊ie makakunsi, watu u i sire mataku su manga mangangawasangu Yahudi. Singkahiwiu I Yesus nusumongo dang nurumarisi su tal᷊oara i sire dingang nangul᷊i, “Sal᷊amati si kumu.”

20Bou nangul᷊i kere e, I Sie nangandaghi l᷊imang-E dingang u sundihang-E si sire. Su tempo ngu nakawua Mawu, i sire mangkate kal᷊iaghe. 21Bou e'e I Yesus sau nangul᷊i paghisa si sire, “Sal᷊amati si kumu. Kere I Yamang seng nundoi u Ia, kere l᷊ai Ia sarung mundoi i kumu.” 22Bou e'e I Sie naniu sinangong-E si sire dingang nangul᷊i, “Tarima ko Roh u Mawu Ruata. 23#Mat. 16:19, 18:18Boko i kumu mangonggo u ampunge su dosa ngu manga singkatau, Mawu Ruata l᷊ai mangonggo u ampung si sie. Boko i kumu ta mangonggo u ampung su singkatau, Mawu Ruata l᷊ai ta mangonggo ampunge si sie.”

I Yesus dingang i Tomas

24I Tomas (ko i sigho si “Ana Hindua”), singkatau bou i sire mapulo dua tumatuhu I Yesus, tarie dingang i sire kowal᷊inge su tempo I Yesus nusumongo. 25Kute manga tumatuhu I Yesus kowal᷊inge nangul᷊i si Tomas, “i kami seng nakawua Mawu!”

Kateho i Tomas nusumimbahi, “Boko ia mborong ta nakawua l᷊inau paku su l᷊imang-E, dang mborong ta mutahou tal᷊imboro ku i'i su l᷊inau paku e'e dang borong ta mutaho l᷊imaku su sundihang-E, ia mang borong tawe mo mangimang sarang singkodo.”

26Singkamisa bou e'e manga tumatuhu I Yesus sau ene su tampa e'e, dang i Tomas l᷊ai ene. Apang tukari kaul᷊ie makakunsi. Kateho I Yesus nusumongo dang nurumarisi su tal᷊oara i sire dingang nangul᷊i, “Sal᷊amati si kumu.” 27Bou e'e I Yesus nangul᷊i si Tomas, “Tuhungete l᷊ima-Ku, dang tahoe tal᷊imboro ngu si'i. Ul᷊uhe l᷊ima ngu dang taho e susundihang-Ku, kumbahang mborong l᷊ai masal᷊o kateho pangimangte!”

28I Tomas nangul᷊i si Yesus, “O Mawuku dang Ruataku!”

29Kute I Yesus nangul᷊i si sie, “Watu u i kau nakawua si Sia kute i kau mangimang? Karal᷊uasi su taumata ko mangimang maneng i sie ta nakawua si Sia!”

Ol᷊ang u Buku i'i

30Mborong l᷊ai maul᷊i manga ko makal᷊aherang ko wal᷊inge ko nikoa I Yesus su tingo ngu manga tumatuhu-E, kateho seng ta nikawohe su l᷊al᷊ungu buki i'i. 31Arawe kaul᷊ie i'i niwohe, tadeau i kumu mangimang#20:31: mangimang: pirambau wohe horo: tatapi mangimang. himoneu I Yesus ko Ratu ngu mananal᷊amati, Ahusu u Mawu Ruata, dang watu u mangimang si Sie, i kumu makahombang puwawiahi.

Currently Selected:

YOHANES 20: LAISXN

Highlight

Copy