YOHANES 19

1Bou e'e i Pilatus nusumu mbuhue nangoro taumata pul᷊uwaghi si Yesus. 2Manga sardado nukoa simbau makota bou wul᷊anta u kau, mbuhue nipasang su timbo I Yesus. Bou e'e I Sie nil᷊ohokang i sire juba ko bung. 3Bou e'e pakapira i sire natamai nusumandighi si Sie dingang kapangul᷊i, “Kaumuri ratu ngu tau Yahudi!” Bou e'e i sire nameru si Sie.

4Bou e'e i Pilatus nusau nusumuwang paghisa dingang nangul᷊i su taumata maul᷊i e'e, “Tuhungete! Ia mupasuwang I Sie sarang koa i kumu, tadeau i kumu matitong ia mang ta nakarea sal᷊a sarang manga simbau si Sie.” 5Kute I Yesus nusumuwang dingang makotang-E wul᷊anta dang dingang jubang-E ko bung. I Pilatus nangul᷊i si sire, “Tuhungete taumata e'e.”

6Su tempo manga tumbonangu imam dingang u manga mundadiaga e'e nakawua si Yesus, i sire nukumiha, “Ghantongte I Sie! Ghantongte I Sie!”

I Pilatus nangul᷊i si sire, “Al᷊ae I Sie, dang ghantongte ngi kumu, ia ta nakarea pusasal᷊a sarang manga simbau si Sie.”

7Apang taumata ngu Yahudi e'e nusumimbahi, “Tumuhu atorang i kami, I Sie mambeng i hukung pakapate watu u I Sie nangaku ngu watangeng-E Ahusu u Mawu Ruata.”

8Su tempo i Pilatus nakaringihi si sire nangul᷊i kere'e i sie kasaungewe nataku. 9Kute u i sie nusau nusumu su l᷊al᷊ung u Istana dang suapang I Yesus nipasu sarang dal᷊unge, i Pilatus nukina si Sie, “Asal᷊u bou apa?”

Kateho I Yesus ta nusumimbahi. 10Inau Pilatus sau nagul᷊i, “I Kau mandiri mudidato dingang ku? Katitongte ia pia kawasa ku mul᷊iu-Ngi Kau dang kawasa munggantong I Kau!”

11I Yesus nusumimbahi, “Boko Mawu Ruata ta nunggil᷊e u Kawasa e'e si kau, i kau mang takoae kawasa sarang singkodo si Sia. Watu'u e'e taumata ko nanarakangu Ia si kau, napal᷊iu ko l᷊abo dosange bou i kau.”

12Suapang i Pilatus nakaringihi e'e, i sie mundea sarang tadeau mamilo si Yesus. Kateho manga tau Yahudi kakihae, “Boko i Tuang mamilo I Sie, i Tuang wal᷊inge ringang i Kaisar! Taumata ko mangaku ngu watangenge ratu, i sie mundoka si Kaisar!”

13Suapang i Pilatus nakaringihi manga didato e'e, i sie numbawa si Yesus pasuwang bou e'e i sie nukumangiang su kadera ngu pangadilang su tampa ko i susigho lante watu. (Su bahasangu Ibrani arenge Gabata.)

14Su tempo e'e seng masandighi pukul᷊i mapul᷊o dua kal᷊ihae, l᷊ou suhoro u putatinaungang u Paska. I Pilatus nangul᷊i su manga taumata e'e, “I'i Ratu ngi kumu!”

15I sire mang kumiha, “Pate I Sie! Pate I Sie! Ghantong te i Sie!” I Pilatus nukina, “Apa ko ia mambeng punggantong ratu ngi kumu?”

Manga tumbonang u imam nusumimbahi, “Kitang i Kaisar ratu ngi kami!” 16Kute i Pilatus nanarakang I Yesus si sire pakighantong. I sire nangal᷊a si Yesus, bou e'e numbawa si Sie natamai.

I Yesus nighantong

(Mat. 27:32-44; Mrk. 15:21-32; Luk. 23:26-43)

17I Yesus nusumuwang dingang namikul᷊i salip-E sarang tampa isigho, “Tampa u rarang timbo.” (Su bahasa ngu Ibrani isigho Golgota.) 18Pai se I Sie nighantong. Nuhindo I Sie pia l᷊ai duang katau kowal᷊inge nighantong; singkatau su kuihi, singkatau su kuaneng dang I Yesus sutal᷊oarae. 19I Pilatus nangoro putaingu wohe i'i su salipi Yesus: “I Yesus bou Nasaret, ratu ngu tau Yahudi”. 20Maul᷊i tau Yahudi nubasa wohe e'e, watu'u tampa I Yesus nighantong e'e masandighu soa. Wohe e'e u su l᷊al᷊ung u bahasa ngu Ibrani, Latin, l᷊au Yunani. 21Manga tumbonang u imam nangul᷊i si Pilatus, “Ariwe wohe ‘Ratu ngu tau Yahudi’, kateho wohe e, ‘Taumata i'i nangul᷊i, Ia Ratu ngu tau Yahudi.’ ”

22Kateho i Pilatus nusimimbahi, “Ko seng Daku niwohe, tatapi e kawawohe.”

23Suapangu manga sordado e'e mbuae nunggantong I Yesus, i sire nangal᷊a pakeang-E. Pakeang e'e nipahia pa: pusingkatau nakarea pusimbahageang. I sire nangal᷊a l᷊ai jubang-E. Juba e'e takoa e ghaghepe – nikauhi bou rasie sarang bawae. 24#Mzm. 22:19Manga sordado e'e nangul᷊i simbau dingang kowal᷊inge, “Juba i'i kumbahang papotokang i kite. Maite i undi ngi kite panantukang i sai ko botonge makarea.” Hal᷊i e'e nariadi tadeau maganapi apang ko kawawohe su l᷊al᷊ung u Buki Susi, e'e ko:

“I sire nupapahia u pakeang-Ku,

dingang nangundi ngu juba-Ku.”

Dang tingari manga sordado e'e nukoa kere'e.

25Su sindihangu kou salipi I Yesus pia i mama ngi Yesus kararisi, anau singkatau ngi mamang-E kowawine, i Maria kawingi Klopas, l᷊au i Maria Magdalena. 26Su tempo I Yesus nakawua si mamang-E l᷊au tumatuhu-E ko i kindaghi-E kararisi se'e, I Sie nangul᷊i si mamang-E, “Mama, e'e ana i mama.”

27Bou e'e I Yesus nangul᷊i su tamatuhu-E e'e, “E'e i mama ngu.” Nanita mangkeng bou e'e tumatuhu e'e nanarima i mama-Ngi Yesus patana su wal᷊enge.

Kapapate-Ngi Yesus

(Mat. 27:45-56; Mrk. 15:33-41; Luk. 23:44-49)

28 # Mzm. 22:16, 69:22 I Yesus matitong himoneu orasi i'i kaul᷊ie seng naganapi, dang tadeau apang ko kawawohe su l᷊al᷊ungu Buki Susi mang mariadi, I Sie nangul᷊i, “Ia narou.”

29Su se'e pia wohosi simbau napene u anggori mahingisi. Inau pia bunga huso simbau nil᷊awu su l᷊al᷊ung u anggori e'e, dang nituhi su kau hisop, mbuhue nitogori su wiwihi Yesus. 30I Yesus nanemang anggori e'e bou e'e nangul᷊i, “Seng naganapi!”

Bou e'e I Sie nangangku u timbo-E dingang u namal᷊usi.

I Yesus nitika

31Apang mangangawasa ngu Yahudi tawe mo manga mayat u taumata nighantong e'e tatapi kaghaghantong su kau salipi su l᷊ou ngu Sabati, nangilebe paghisa i'i Sabati e'e l᷊ou putatinaungang ko nahae. Watu'u l᷊ou pughantongang I Yesus natarang su horou l᷊ou Sabati e'e, inau i sire tau Yahudi muparamisi si Pilatus guna ngu mamare l᷊aeru manga taumata ko nighantong dang mupal᷊intu u manga mayati e'e bou kau salipi. 32Kute manga sordado e'e natamai dang kahorokange namare l᷊aeri sire rua ko nighantong dingang I Yesus. 33Su tempo i sire nurating I Yesus, i sire nakawua I Yesus seng nate. Inau i sire seng ta namare l᷊aer-E. 34Kateho singkatau bou tal᷊oara u manga sordado e'e, nanika sindihang I Yesus dingang u ral᷊eang; dang singkakonda nusoang daha dingang u ake.

35Taumata ko nakawua sisane hal᷊i ko nariadi e'e, ko i sie makoa mul᷊ahabaru hal᷊i e'e, tadeau i kumu mangimang.#19:35: mangimang: pirambau wohe horo: tatapi mangimang Dang kasaksiange e'e mang tingari, dang i sie matitong himoneu e'e tingari. 36#Kel. 12:46; Bil. 9:12; Mzm. 34:21Hal᷊i e'e nariadi tadeau maganapi apang ko kawawohe su ral᷊ung u Buki Susi, ko kal᷊ahabari, “Takoae sarang simbau bou duhing-E sarung ibare.” 37#Za. 12:10; Kl᷊h. 1:7Su l᷊al᷊ung u Buki Susi l᷊ai mawawohe: “I sire sarung makawua si Sie ko seng nitika i sire”.

Pul᷊al᷊uwing I Yesus

(Mat. 27:57-61; Mrk. 15:42-47; Luk. 23:50-56)

38Bou e'e i Yusuf bou Arimatea nuparamisi si Pilatus tadeau i sie mangal᷊a badang I Yesus. (I Yusuf ko tumatuhu si Yesus ko borong ta mutingkal᷊ahe, watu'u i sie mataku u manga mangangawasangu Yahudi.) I Pilatus nupakawala ngi sie inau i sie natamai nangal᷊a badang I Yesus. 39#Yoh. 3:1-2I Nikodemus, ko l᷊inau horo mbuae nusumongo huwi sarang koa I Yesus, natamai l᷊ai dingang i Yusuf. I Nikodemus numbawa rampa mur l᷊au gaharu – i kahabari kaul᷊ie manga til᷊umpul᷊o sukilonge. 40I sire rua e'e nangal᷊a badang I Yesus wuhue nipikung u heka sapu singkapikung dingang u rampa mawungi e'e tumuhu tundungu pul᷊al᷊uwingu tau Yahudi. 41Su tampa I Yesus nighantong pia simbau taman. Su l᷊al᷊ung u taman e'e pia kubul᷊i ko wuhu simbau, ko borong ta nipul᷊uwingang u taumata. 42Watu'u kubul᷊i e'e masandighi, dang seng masandighi manitau l᷊ou Sabati kute i sire nul᷊uwing I Yesus su se'e.

Currently Selected:

YOHANES 19: LAISXN

Highlight

Copy