YOHANES 15

I Yesus pungu Anggori ko kahingang

1I Yesus sau nangul᷊i, “Ia i'i pungu anggori ko kahingang, dang I Yamang-Ku mututal᷊ung sasuange. 2Apang lelange ko su Punge ko ta muwua, potokang-E, dang apang lelange ko pia wuange, gaghingang raunge dingang tal᷊uaheng-E, tadeau wuange manamba lebe maul᷊i. 3I kumu seng mabursi ual᷊ingu tintiro ko seng nitintiro si kumu. 4Katana e pakasimbau dingang-Ku dang Ia l᷊ai mang matatana simbau dingang i kumu. Lelange sisane ta makapuwua, sul᷊ikuri sie matatapi su punge'e. Kere'e l᷊ai i kumu kitang botonge muwua, boko tatapi masimbau dingang-Ku.

5Ia i'i pungu anggori, dang i kumu kaul᷊ie lelange. Taumata ko tatapi musimbau dingang-Ku dang Ia dingang e, sarung muwua maul᷊i; watu'u sul᷊ikuri u Ia, i kumu ta makakoa manga apa. 6Taumata ko ta matatapi masimbau dingang-Ku, sarung irume musul᷊ung u lelang, bou e'e mahango. Manga lelang ko kere'e sarung ikomol᷊i i hunu su l᷊al᷊ung u putung, buhue itutung. 7Boko i kumu tatapi masimbau dingang-Ku dang tatintiro-Ku matana sural᷊ung u naung i kumu, pundote si Yamang apang ko i kao i kumu; ndoue'e sarung daringihang. 8Boko i kumu muwua maul᷊i, I Yamang-Ku ipakawantughi; dang dingang u kere'e i kumu tinga-tingari makoa tumatuhu-Ku. 9Musul᷊ung kere I Yamang kumindaghi u Ia, kere'e l᷊ai Ia kumindaghi i kumu. Pakatatapi i kumu muwiahi kere taumata ko Daku i kukindaghi. 10Boko i kumu muparal᷊eng u apang parenta-Ku, i kumu tatapi satia su kakindaghi-Ku, musul᷊ung u Ia tatapi satia su kakindaghi Yamang watu'u muparal᷊eng apang parentang-E.

11Kaul᷊ie i'i Daku ihabari si kumu, tadeau ral᷊iaghi-Ku ene su l᷊al᷊ung u naung i kumu dang ral᷊iaghi kumu masuku. 12#Yoh. 13:34, 15:17; 1Yoh. 3:23; 2Yoh. 5Ko i'i parenta-Ku: pukakindaghi ko simbau dingang u ko wal᷊inge, musul᷊ung kere Ia kumindaghi i kumu. 13Taumata ko makindaghi u manga ghawenge e'e ko taumata munggil᷊e u puwawiahe si sire. 14I kumu manga ghawe-Ku, boko i kumu tumuhu apang ko Daku iparenta si kumu. 15Ia seng ta mukui l᷊ai si kumu l᷊ang, watu'u l᷊ang wugha ngu apang koateng u mawunge. Ia mukui si kumu ghawe, watu'u kaul᷊ie ko seng Daku nikaringihi bou I Yamang, seng mbuae Daku nihabari si kumu. 16Wal᷊inge i kumu namil᷊e si Sia, ko Ia namil᷊e si kumu, dang nundoi i kumu paral᷊eng tadeau puwua pakaul᷊i – apang wuange ko ta mawawinasa. Kute Yamang sarung mangonggo si kumu manga apang ko pundokang i kumu si Sie sural᷊ungu areng-Ku. 17Ko i'i parenta-Ku si kumu: Pukakindaghiko singkatau dingang u ko wal᷊inge.”

I kumu ipubinsi u dunia

18“Boko i kumu ipubinsi u dunia, tinaungete himoneu Ia seng kahorokange nipubinsi u dunia. 19Kiko i kumu koau dunia, dunia sarung kumindaghi kumu kere koae. Kateho Ia seng namil᷊e si kumu bou dunia i'i, inau i kumu l᷊ai seng wal᷊inge koau dunia. E'e sabapie i kumu i pubinsi u dunia. 20#Mat. 10:24; Luk. 6:40; Yoh. 13:16Tinaungete apang ko seng mbua Daku nihabari si kumu, ‘L᷊ang ta nangil᷊ebe l᷊abo bou mawunge.’ Boko i sire seng mbuae nutingkai si Sia; i sire l᷊ai sarung mutingkai si kumu. Boko i sire tumuhu tintiro-Ku, i sire l᷊ai sarung tumuhu su tintiro ngi kumu. 21Kaul᷊ie'e sarung koateng i sire si kumu, watu'u i kumu ko tumatuhu-Ku, watu'u i sire wugha-Ngi Sie ko nundoi u Ia. 22Kiko Ia ta nusumongo dang ta nuhabaru kaul᷊ie si sire, i sire ta nubardosa. Arawe i'i isire mang takaoae alasange l᷊ai guna ngu dosa ngi sire. 23Taumata ko mubinsi u Ia, i sie l᷊ai mubinsi Yamang-Ku. 24Kiko su tal᷊oara i sire Ia ta nukoa mang hal᷊i koborong ta nikoa u taumata ko wal᷊inge, i sire ta nubardosa, arawe orasi i'i i sire seng nakawua apang hal᷊i ko Daku nikoa, dang i sire nubinsi u Ia dang l᷊ai i Yamang-Ku. 25#Mzm. 35:19, 69:5Kateho mang seng mambeng kere'e, tadeau maganapi apang ko mawawohe su ral᷊ungu Buki u Torati i sire, e'e ko: ‘I sire mubinsi u Ia takoae punguange.’

26Ia sarung mundoi si kumu Mutatul᷊ung ko asal᷊e bou I Yamang. I Sie e'e ko Roh ko sarung mupakal᷊ahe kabanarang u hal᷊i u Mawu Ruata. Boko I Sie musumongo, I Sie sarung mangonggo u kesaksiang hal᷊i u Ia. 27Dang i kumu l᷊ai mambeng mangonggo u kesaksiang u hal᷊i u Ia, watu i kumu seng tuwei muhundingang u Ia mborong bou titae.

Currently Selected:

YOHANES 15: LAISXN

Highlight

Copy