YOHANES 14
14
I Yesus ko l᷊al᷊eng sarang koa I Yamang
1I Yesus nangul᷊i si sire, “Kumbahang naung u maghawang. Pangimangte#14:1: Pangimangte: arako i kumu pangimang. su Mawu Ruata, dang pangimangte l᷊ai si Sia. 2Su wal᷊eng Yamang-Ku maul᷊i tampa katanakeng. Ia matamai sarang pai e'e tadeau manadia ngu tampa guna ngi kumu. Ia ta mangul᷊i kere'e si kumu, kiko e'e wal᷊inge kere'e.#14:2: Su wal᷊eng … wal᷊inge keree: arako su wal᷊e-Ngi Yamang-Ku pia maul᷊i tampa katanakeng; kiko e'e wal᷊inge kere apa Ia sarung mangul᷊i si kumu himoneu Ia matamai sarang pai e'e guna ngu manadia tampa i kumu? 3Bou Ia matamai manadia ngu tampa guna ngi kumu, Ia sau musul᷊e mangal᷊a si kumu, tadeau su apang tampa ko Ia ene se'e, i kumu l᷊ai ene se'e. 4Sarang tampa ko Daku tamaiang i kumu matitong dal᷊enge.”
5Bou e'e i Tomas nangul᷊i si Yesus, “Mawu, i kami wugha sarang apa dal᷊engang-U Mawu, kirapawe i kami matitong u l᷊al᷊enge?”
6I Yesus nusumimbahi, “Ko Ia l᷊al᷊eng tadeau sarang makatitong u Mawu Ruata dang makatarima u puwawiahi. Takoae sarang manga singkatau ko makasongo sarang ko I Yamang, kamangkeng u ta l᷊umiu bou Ia. 7Kiko i kumu matitong u Ia, seng nal᷊ahe l᷊ai i kumu matitong#14:7: Kiko i kumu matitong u Ia … nal᷊ahe l᷊ai i kumu matitong: pirambau wohe horo: Watu u i kumu seng makakiral᷊a si Sia … i kumu sarung makakiral᷊a. I Yamang-Ku. Ii i kumu seng matitong I Sie, dang seng makawua si Sie.”
8Kute i Filipus nangul᷊i si Yesus, “Mawu, tiboko si kami Yamang e'e, tadeau i kami mal᷊uasi.”
9Arawe I Yesus nusumimbahi, “Filipus seng kere e kal᷊iwuenge Ia mahundingang i kumu, dang i kau mang wugha ngu Ia? Taumata ko seng nakawua si Sia, seng nakawua si Yamang. Kirapawe i kau mang mborong mangul᷊i, ‘Tiboko Yamang si kami’? 10Filipus i kau mborong ta mangimang, himoneu Ia simbau dingang I Yamang, dang I Yamang simbau dingang-Ku? Apang ko Daku niul᷊i si kau, wal᷊inge Daku nihabari bou badang-Ku sisane. I Yamang ko seng nasimbau dingang-Ku, ko I Sie mukoa kaul᷊i e'e. 11Pangimangte si Sia, himoneu Ia nasimbau dingang I Yamang dang I Yamang nasimbau dingang-Ku. L᷊au u mutingkadio, pangimangte su apang ko seng Daku nikoa. 12Mang tingari didato-Ku i'i: Taumata ko mangimang si Sia, sarung mukoa apa ko seng Daku nikoa, – I sie katewe sarung mukoa ko mborong l᷊ai nangilebe l᷊abo – watu u Ia makoa sarang koa I Yamang. 13Dang l᷊ai manga apang ko pundokang i kumu su l᷊al᷊ung areng-Ku e'e sarung Daku ikoa guna ngi kumu, tadeau I Yamang i pakawantughi ual᷊ingu Ahus-E. 14Manga apa l᷊ai ko pundokang i kumu#14:14: Manga apa l᷊ai ko pundokang i kumu: pirambau wohe horo: manga apa ko pundokang i kumu si Sia. su l᷊al᷊ungu areng-Ku, sarung Daku koateng.”
I Yesus nudiandi ngu Roh u Mawu Ruata
15“Boko kumu kumindaghi u Ia, i kumu sarung mu paral᷊eng u apang parenta-Ku. 16Ia sarung mundo si Yamang, dang I Sie sarung mangonggo si kumu Mutatul᷊ung kowal᷊inge, ko sarung matana dingang i kumu sarang kal᷊iwuenge. 17I Sie e'e Roh u Mawu Ruata ko sarung mul᷊ahe kabanarang u Mawu Ruata. Dunia ta makatarima I Sie, watu'u ta nakawua arako ta nakakil᷊ara si Sie. Kateho i kumu nakakil᷊al᷊a si Sie watu u I Sie natana dingang i kumu dang sarung masimbau#14:17: dang sarung masimbau: pirambau wohe horo: dang masimbau dingang i kumu.
18Ia ta manintang i kumu kere kasisi, Ia sau musul᷊e sarang koa i kumu. 19Seng kate singkodo l᷊ai temponge dunia seng ta musau makawua si Sia. Arawe i kumu sarung makawua si Sia. Dang watu'u Ia wiahi, i kumu l᷊ai sarung muwiahi. 20Boko l᷊ou e'e masongo i kumu sarung matitong himoneu Ia nasimbau dingang I Yamang, i kumu nasimbau dingang u Ia, dang Ia nasimbau dingang i kumu.
21Taumata ko manarima uapang parenta-Ku dang muparal᷊engu e'e, ko I Sie kumindaghiu Ia. I Yamang-Ku sarung kumindaghiu taumata ko kumindaghiu Ia. Ia l᷊ai sarung kumindaghiu taumata e'e dang mul᷊ahe u watangeng-Ku si sie.”
22I Yudas (wal᷊inge i Yudas Iskariot) nukina si Yesus, Mawu, “Nakurawe Mawu mupakal᷊ahe u watangeng-U si kami dang wal᷊inge su dunia?”
23I Yesus nusumimbahi, “Taumata ko kumindaghi u Ia, sarung tumuhu tintiro-Ku. Yamang-Ku sarung kumindaghi i sie. I Yamang dingang u Ia, sarung sumongo si sie dang matana dingange. 24Taumata ko ta kumindaghiu Ia, ta tumuhu tintiro-Ku. Tintiro ko nikaringihi kumu e'e, wal᷊inge bou Ia, kateho bou I Yamang ko nundoiu Ia.
25Kaul᷊i e'e Daku ihabari si kumu pariwe Ia mborong ene dingang i kumu. 26Arawe Roh u Mawu Ruata, mutatul᷊ung ko sarung i roi I Yamang su l᷊al᷊ungu areng-Ku, ko I Sie sarung manintiro ngu kaul᷊ie si kumu dang mangonggo u tinaung si kumu kaul᷊ie ko seng bou Daku nihabari si kumu.
27Purarame Daku itintang si kumu. Purarame bou Ia sisane-Ku Daku i onggo si kumu. Ko Daku ionggo e'e wal᷊inge kere ko nionggo u dunia si kumu. Kumbahang maghawang dingang kumbahang mataku. 28I kumu seng nakaringihi Ia nangul᷊i, ‘Ia sarung matamai, kateho Ia sarung sumongo sau sarang koa i kumu’. Boko i kumu kumindaghiu Ia, i kumu sarung l᷊umiaghi Ia makoa sarang koa I Yamang, watu'u I Yamang borong nangil᷊ebe kol᷊abo bou Ia. 29Ia muhabari e'e si kumu su orasi i'i, suhoro u kaul᷊ie tamai e'e mariadi, tadeau boko sarung mariadi, i kumu sarung mangimang. 30Ia seng ta makapudidato maul᷊i l᷊ai dingang i kumu, watu'u seng temponge mangangawasangu dunia i'i musumongo. Kateho i sie ta makapangawasa si Sia. 31Kateho kaul᷊i e'e mang mambeng mariadi tadeau dunia makapundang humoneu Ia kumindaghi Yamang dang mukoa kaul᷊iu ko niparenta-Ngi Yamang si Sia.
Ho, maite i kite matamai bou i'i.”
Currently Selected:
YOHANES 14: LAISXN
Highlight
Share
Copy
Want to have your highlights saved across all your devices? Sign up or sign in
2014 Indonesian Bible Society (Lembaga Alkitab Indonesia)
