YOHANES 13

Yesus nanguhasi l᷊aeru manga Tumatuhu-E

1Silou su horo u l᷊ou ngu L᷊ou ngu Paskah, I Yesus matitong himoneu ko seng temponge I Sie manintangu dunia i'i guna ngu musul᷊e sarang koa Yamang. I Sie kumindaghi apang taumata ko taghuaneng-E su dunia, dang tatapi I Sie kumindaghi i sire sarang panginsuenge.

2I Yesus dingang u tumatuhu-E kakange huwi. Setang seng mu pasu kao e su l᷊al᷊ung u naung i Yudas ana i Simon Iskariot tadeau pusingking si Yesus.#13:2: Setang … pusingking si Yesus: arako Setang seng nanantu himoneu i Yudas ana i Simon Iskariot sarung mukianati si Yesus. 3I Yesus matitong himoneu Yamang seng nanarakangu kaul᷊iu kawasa si Sie. I Sie matitong l᷊ai himoneu I Sie nusumongo bou Mawu Ruata dang sarung musul᷊e su Mawu Ruata. 4Watu u e'e I Sie nurumarisi, mul᷊ua jubang-E, dang nundeho u handuki su kal᷊uwaeng-E. 5Bou e'e I Sie nutuang u ake su l᷊al᷊ung u basi simbau, wuhue nanita nanguhasi l᷊aeru u manga tumatuhu-E dang nimue dingang u handuki ko marareho sukal᷊uwaeng-E. 6Suapang i sie nurating i Simon Petrus, ko nangul᷊i, “Mawu, seng tumanie we Mawu manguhasi l᷊aeriku?”

7I Yesus nusimimbahi, “Su orasi i'i kau ta nakahingang apang ko daku koateng i'i, arawe i kau mang sarung makahingang.”

8“Kumbahang, Mawu” angkung i Petrus si Yesus. “Kumbahang-bahang Mawu manguhasi l᷊aeri-ku!”

Arawe I Yesus nusimimbahi, “Boko Ia ta manguhasi si kau, i kau ta makahombang bahageang dingang-Ku.”

9I Simon Petrus nangul᷊i, “Boko kere e, Mawu, kumbahang kitang u l᷊aeriku, kateho l᷊ai l᷊ima dingang u timbo ku l᷊ai!”

10I Yesus nangul᷊i si Petrus, “Taumata ko seng mbuae nundeno, seng burisi kaul᷊ie, I sie seng ta wahal᷊uase u borong sau uhaseng; su l᷊ikuru l᷊aere e.#13:10: Su l᷊al᷊ung u pirambau wohe horo takoae: su l᷊ikuru l᷊aere. I kumu i'i seng burisi, kateho wal᷊inge kaul᷊ie.” 11I (Yesus seng matitong ko i sai sarung musingking si sie, hakiwe I Sie nangul᷊i, “I kumu seng burisi kateho wal᷊inge kaul᷊ie.”)

12 # Luk. 22:27 Suapang I Yesus mbuae nanguhasi l᷊aeri sire, I Sie sau nul᷊oho jubang-E dang sau nukumangiang. Buhue I Sie nungul᷊i si sire, “Kate i kumu nakahingang apang Daku nikoa wuhu i'i si kumu? 13I kumu mukui si Sia Guru dingang u Mawu. Dang tingari kere e. 14Boko Ia Mawu dingang u Guru ngi kumu seng manguhasi l᷊aeru, i kumu l᷊ai mambeng mupapanguhasi l᷊aeri kumu. 15Ia munggil᷊eu tul᷊ara i'i si kumu tadeau i kumu sarung mukoa apang ko seng Daku nikoa si kumu. 16#Mat. 10:24; Luk. 6:40; Yoh. 15:20Mang tingari niul᷊i-Ku i'i: Singkatau l᷊ang ta nangil᷊ebe l᷊abo bou Mawunge; dang singkatau raroi ta nangil᷊ebe l᷊abo bou taumata ko nundoi si sie. 17Boko i kumu seng matitong kaul᷊i i'i, karal᷊uasi si kumu boko i kumu mukoa e'e.

18 # Mzm. 41:10 Apang ko Daku niul᷊i i'i tarange bal᷊ingewe si kumu kaul᷊ie. Ia matitong i sai-sai ko seng Daku nipil᷊e. Arawe apang ko mawawohe su ral᷊ungu Buki Susi, mambeng mariadi, ‘Su taumata ko kumang dingang-Ku, sarung mundoka si Sia.’ 19Hal᷊i e'e Daku ihabari si kumu su orasi i'i, suhoro u mariadi, tadeau boko hal᷊i e'e sarung mariadi, i kumu sarung mangimang Ko Ia i sie ko susigho IA ENE. 20#Mat. 10:40; Mrk. 9:37; Luk. 9:48, 10:16Mang tangari niul᷊i-Ku i'i: I sai manarima u taumata ko Daku niroi, manarima u Ia. Dang i sai manarima u Ia, manarima I Sie ko nundoiu Ia.”

I Yesus nuhabari hal᷊i u pusasingking su watangeng-E

(Mat. 26:20-25; Mrk. 14:17-21; Luk. 22:21-23)

21Suapang I Yesus bou nangul᷊i kere'e, I Sie dingang nakapundang nasusa naung-E. Bou e'e I Sie nangul᷊i, “Mang tingari didato-Ku i'i: Singkatau bou tal᷊oara i kumu sarung musingking si Sia.”

22Manga tumatuhu-E nutatuhung singkatau dingang u kowal᷊inge dingang u kal᷊aherang watu u wugha minsang sai pandung-E. 23Tumatuhu ko ikukindaghi I Yesus kakangiang su simbukang I Yesus. 24I Simon Petrus nukumire si sie, tadeau i sie pukina si Yesus ko i sai pandung-E.

25Kute manga tumatuhu e'e nutingkasandighi si Yesus, dingang nukina, “Mawu ko i sai i sie?”

26I Yesus nusumimbahi, “Taumata ko Daku pungonggol᷊ang u boroti ko Daku i l᷊awu su ral᷊ung u wohosi, i sie taumatange.” Kute I Yesus nangal᷊a boroti simpoto, nil᷊awunge su ral᷊ung u wohosi, wuhue nionggo-E si Yudas ana i Simon Iskariot 27Takoae l᷊iwuenge i Yudas nanarimau boroti e'e, setang dingang nusumu su ral᷊ungu naunge. Bou e'e I Yesus nangul᷊i si sie, “Pakaehongte koa apang ko i koau.” 28I sire apang kangiang kakange se'e, takoae sarang singkatau ko nakahingang watu u I Yesus nangul᷊i kere e si Yudas. 29Pia ko nanika I Yesus nuparenta si Yudas pul᷊uang manga apa guna ngu sal᷊iwang e'e, arako pangonggo u doi singkodo su tau ko susa – watu'u i Yudas ko mul᷊al᷊ahinggo doi ngu kasi i sire.

30Suapang i Yudas nundae boroti e'e, i sie apiru nusumuwang. L᷊ou seng narundung.

Parenta ko wuhu

31Suapang i Yudas natamai, I Yesus nangul᷊i, “Orasi i'i Ahusu Taumata seng nipakawantughi, dang bou I Sie Mawu Ruata nipakawantughi. 32Boko Mawu Ruata nipakawantughi su ral᷊ung I Sie, I Sie l᷊ai sarung nipakawantughu Mawu Ruata ual᷊ingu I Sie sisane. Nangilebe l᷊ai Mawu Ruata seng maehong mupakawantughi I Sie. 33#Yoh. 7:34Manga ana-Ku, Ia seng ta mal᷊iwue l᷊ai dingang i kumu. I kumu sarung mundea si Sia, kateho kere seng Daku nihabari su manga mangangawasangu Yahudi, kere l᷊ai seng Daku niul᷊i si kumu, sarang tampa ko Daku i tamaiang, i kumu takoae ko makarating. 34#Yoh. 15:12, 17; 1Yoh. 3:23; 2Yoh. 5Parenta ko wuhu Daku ionggo si kumu, Pukakindaghi singkatau dingang u kowal᷊inge, kerewe Ia kumindaghi i kumu kere e l᷊ai i kumu mambeng pukakindaghi. 35Boko kumu mukakindaghi, kaul᷊iu taumata kaul᷊ie matitong himoneu i kumu ko tumatuhu-Ku.”

Nubueti himoneu I Petrus sarung nusunial᷊i I Yesus

(Mat. 26:31-35; Mrk. 14:27-31; Luk. 22:31-34)

36I Simon Petrus nukina si Yesus, “Mawu, Mawu makoa sarang apa?” I Yesus nusumimbahi, “Sarang tampa Daku dal᷊engang, i kau ta makatuhu si Sia su orasi i'i. I kau hindo makatuhu si Sia samuri.”

37I Petrus sau nukina, “Mawu nakurawe su orasi i'i ia ta makatuhu su Mawu? Ia sadia mate guna ngu Mawu!”

38I Yesus nusumimbahi, “Tingari i kau sadia mate guna ngu Ia? Katitongte, suhoro manu kumuku, i kau seng pakatilu mangul᷊i himoneu i kau wughangu Ia!”

Currently Selected:

YOHANES 13: LAISXN

Highlight

Copy