YOHANES 16

1Kaul᷊i e'e Daku ipakatitong si kumu tadeau i kumu kumbahang musunial᷊i. 2I kumu sarung ipasuwang bou manga wal᷊e pukakal᷊iomanengang. Dang sarung sumongo temponge taumata ko mamate si kumu sarung manika u i sie mutatahamawu su Mawu Ruata. 3E'e koateng i sire si kumu watu u i sire borong wugha-Ngi Yamang dingang u Ia. 4Arawe orasi i'i e'e Daku ihabari si kumu, tadeau boko e'e sarung mariadi, i kumu makatinaung himoneu Ia seng mbua nuhabaru e'e si kumu.”

Pul᷊ahal᷊i u Roh u Mawu Ruata

“Hal᷊i i'i ta Daku ipakatitong si kumu mborong bou titae, watu'u Ia mborong mahundingang i kumu. 5Arawe orasi i'i Ia sarung matamai makoa sarang koa I Sie ko nundoi u Ia, dang takoae sarang manga singkatau bou i kumu mukina Ia makoa sarang apa. 6Katewe orasi i'i naung i kumu sarung masusa, watu'u Ia nangul᷊i hal᷊i e'e si kumu. 7Arawe Ia muhabaru ko nuhino si kumu: seng kapiange si kumu, boko Ia matamai; watu u boko Ia ta matamai, Mutatul᷊ung e'e sarung ta sumongo sarang koa i kumu. Arawe boko Ia matamai, Ia sarung mundoi I Sie sarang koa i kumu. 8Boko I Sie masongo, I Sie sarung mupakal᷊ahe su dunia mangal᷊engu dosa, bou hal᷊i ko mutatahino, dang bou hal᷊i u hukuma ngu Mawu Ruata. 9I Sie sarung mul᷊ahe, himoneu ko ta mangimang si Sia e'e ko dosa; 10himoneu Ia nuhino, watu'u Ia makoa sarang koa I Yamang dang i kumu seng ta sarung makawua si Sia sau; 11dang himoneu Mawu Ruata seng manita muhukung, watu'u mangangawasangu dunia i'i seng nihukung.

12Maul᷊i l᷊ai ko hinongu Daku ihabari si kumu, kateho su orasi i'i ikumu mborong ta makatarima. 13Arawe boko Roh e'e sumongo, I Sie ko mul᷊ahe u kabanarangu hal᷊i u Mawu Ruata, I Sie sarung mangaha ikumu tadeau makatitong u kaul᷊iu kabanarang. I Sie ta sarung mudidato bou watangeng-E sisane, kateho muhabaru apang ko seng mbuae nikaringih-E, dang I Sie sarung muhabari si kumu apang ko sarung mariadi su l᷊ou samuringe. 14I Sie sarung mupakawantughu Ia, watu u apang ko nihabar-E si kumu, nitarima-E bou Ia. 15Kaul᷊i apang ko ene si Yamang e'e ko koa-Ku. E'e sabapie Ia mangul᷊i si kumu himoneu apang ko i habaru Roh si kumu, e'e nitarima-E bou Ia.”

Kasasusa dingang u ral᷊iaghi

16“Seng kate singkodo l᷊ai temponge i kumu seng ta sarung makawua si Sia, dang l᷊ai kate singkodo temponge i kumu sarung sau makawua si Sia.”

17Pirangkatau manga tumatuhu I Yesus nanita nukakina i singkatau dingang kowal᷊inge, “Ko apa pandunge I Sie nungul᷊i si kite: ‘Kate singkodo tempo l᷊ai i kumu seng sarung ta makawua l᷊ai si Sia, dang l᷊ai kate singkodo tempo i kumu sarung makawua si Sia?’ Apa l᷊ai mangal᷊ange dingang u: ‘Ia makoa sarang koa I Yamang’?” 18I sire mukina turusi, “Ko apa mangal᷊enge, kate ‘singkodo’ tempo? I kite ta nakahingang I Sie kapudidatonge hal᷊i u apa!”

19I Yesus matitong i sire mo makina si Sie. Inau I Sie nangul᷊i, “Kanini Ia nangul᷊i, ‘Kate singkodo tempo, i kumu ta makawua si Sia, dang l᷊ai kate singkodo tempo i kumu sarung makawua si Sia.’ Ko e'e purarendehi kumu?

20Pangimangte; i kumu sarung sumangi dang mukahuang; kateho dunia surung l᷊umighi. Naung i kumu sarung masusu kateho susa ngu naungu e'e sarung muwal᷊u makoa karal᷊uasi. 21Boko singkatau kowawine seng masandighi temponge mahinding, pundang mabuha, watu'u seng temponge i sie mutatahang. Arawe suapang anae e'e mal᷊iu, kowawine seng ta makatinaung turue watu'u e l᷊iaghe singkatau dario kodio nusumongo su dunia. 22Kere'e l᷊ai dingang i kumu: orasi i'i naung i kumu masusa, arawe Ia mang sarung sau musombang i kumu, kuteu i kumu sarung mal᷊uasi; dang takoae sarang singkatau ko makapangal᷊a kal᷊al᷊uasie'e bou naung i kumu.

23Su l᷊oue'e, i kumu seng mangiro l᷊ai mukina manga apa si Sia. Pangimangte: Apa ko pundokang i kumu si Yamang su l᷊al᷊ung u areng-Ku; e'e sarung i onggo I Yamang si kumu.#16:23: Apa ko pundokang i kumu si Yamang su l᷊al᷊ung u areng-Ku; e'e sarung i onggo I Yamang si kumu: pirambau wohe horo: Boko i kumu mundo manga apa si Yamang, I Sie sarung mangonggo u e'e si kumu su areng-Ku. 24Sarang orasi i'i ikumu borong ta nundo manga apa su l᷊al᷊ung u areng-Ku. Pundote, kuteu i kumu sarung manarima tadeau ral᷊uasi kumu masuku.”

Kal᷊auntung su dunia

25“Kaul᷊i i'i Daku i habari si kumu su l᷊al᷊ung u papinintu. Arawe sarung pia temponge, Ia seng ta mupake u l᷊ai papinintu, kateho seng mangul᷊i mal᷊ahe si kumu bou hal᷊i I Yamang. 26Su tempo e'e i kumu sarung mundo si Yamang su ral᷊angu areng-Ku: Katitongte, Ia ta sarung mundo bo I Yamang guna ngi kumu, 27watu'u Yamang sisane kumindaghi i kumu. I Sie kumindaghi i kumu watu'u i kumu kumindaghi u Ia, dang mangimang himoneu Ia nusumongo bou Mawu Ruata. 28Tingari asal᷊i-Ku bou I Yamang, dang seng nusumongo su l᷊al᷊ung u dunia. Arawe orasi i'i Ia manintang u dunia sau musul᷊e sarang koa I Yamang.”

29Bou e'e manga tumatuhu I Yesus nangul᷊i si sie, “Ii Mawu seng nangul᷊i mal᷊ahe dang seng ta nupake u papinintu, 30dang i kami matitong himoneu Mawu matitong u kaul᷊ie. Seng ta wal᷊uasu manga singkatau mukina u manga apa su Mawu. Watu'u e'e i kami mangimang Mawu nusumongo bou Mawu Ruata.”

31I Yesus nusimimbahi si sire, “Kute i kumu seng mangimang su orasi i'i? 32Tinaungete! Temponge sarung musumongo, dang mang seng nasongo i kumu sarung i pukaesi. I kumu sarung mapul᷊e sarang wal᷊e ngu i kumu singkatau-singkatau dang manintang u Ia sisane ku. Kateho Ia wal᷊inge sisane ku watu'u I Yamang mahundingang u Ia. 33Kaul᷊ie i'i Daku i habari tadeau i kumu makahombang purarame watu'u nasimbau dingang u Ia. Su dunia i kumu sarung mutatahang sinsara. Kateho pakatatapi naung i kumu! Ia seng nakawata u dunia!”

Currently Selected:

YOHANES 16: LAISXN

Highlight

Copy