Markus 9

1Yesus 'o kanau, “Ni ngaku mode-mode'e 'Ari demo-demo nena-ne: Taninga sigolona 'age rema ngowa'a ga'a 'aḏi 'ahu-'ahu moju re 'aḏi oḏi'i Ma Jou'ongu Madutu 'o parenta Rai kuasa.”

'U simulia Yesus

(Mat. 17:1-13; Luk. 9:28-36)

2Wangere rarama palisi'i i'a, Yesus 'o gasa ananga nga ḏu'ange: 'a Petrus, 'a Yakobus re 'a Yohanes. Ananga 'aḏi masai'i re mabere ie toma kie kau'u rimoi. Yesus 'ai rupa 'i ngali ra ananga nga ḏu'ange manga biono:#2Ptr. 1:17-18 3'Ai juba 'i dadi buḏo jama-jamanga. Matengo i'a mai ua toma dungia nena-ne 'aḏi 'uju singadolo 'i buḏo ma tero so'o gena-ge. 4Gena ḏua, ananga 'aḏi oḏi'i Yesus 'o ma'u kanau rea Elia re 'a Musa. 5Sababu gena-ge, Petrus 'o kanau i'a ra Yesus, “Rabi#9:5 “Rabi” toma demo Yunani “Guru” di'a ngowa'a ga'a 'o sayanga ma jingi'i, rousu madutu ngene 'ane-ne. Jobilaha ngomi mi side'oso ninga suyu'u ḏu ro'ange. Ḏu moi di'a Jou, ḏu moi di'a Musa re ḏu moi di'a Elia ḏi'i.” 6Petrus pa'i 'o kanau ḇato, mada'a unanga 'o waro ua 'oru ga'a 'o kanau sababu unanga re 'ai ḏagilomu nga muḏiḏi 'aḏi heranga woḏi singadolo ya waro manga gagare riwara!

7Togumu i'a, kakamo 'uci ya'u sao re toma kakamo gena-ge ma dara 'aḏi 'isene iḏingi enanga ma betongo so'o ne: “Unanga nena-ne, 'Ari Ngowa'a Nau'u ta dadalara. Ni 'isene Unanga!”#Mat. 3:17; Mrk. 1:11; Luk. 3:22; 2Ptr. 1:17-18 8Wakutu 'aḏi tatamo kuwiḏa re kuḇali, kage-kage ngowa'a nange-ge re 'aḏi cua ḏua; sisoi'i tala pa'i 'a Yesus matengo ḇato. 9Wakutu ananga 'aḏi 'uci da'u kie tala, Yesus 'o sipo-poma ra ananga, “Awa ni sijarita ra guna ḇato mangale 'oru ga'a ni oḏi'i nange-ge singadolo Ngoi, Manusia ma Ngowa'a Nau'u, dadunu to 'ahu moju toma ngowa'a senge-sengene manga sigolona.”

10Ananga ya mete'e 'Ai bererongo gena-ge, mada'a ananga 'aḏi ma'u sano matengo re matengo ma maksudu 'oru Yesus 'o kanau nange-ge: “Dadunu To 'ahu moju toma ngowa'a senge-sengene manga sigolona.”

11Ḏua ananga 'aḏi sano ra Yesus, “I'a sa'olo guru-guru 'agama 'aḏi kanau mangale nabi Elia balasu 'o sapolo siḏa, kara 'O Kristus#9:11 bolo “ 'O Mesias” - ma tero toma bu-bula'a 12. 'o sapolo.”#Mal. 4:5; Mat. 11:14

12Yesus 'a sangoro, “Mode-mode'e, nabi Elia ḏuanga i'a 'o sapolo siḏa di'a 'o sidiai 'ori i'a mo-moini di'a 'O Kristus. Na'o so'o gena, i'a sa'olo 'i silefo toma Boku 'Ofi-'Ofi ma dara mangale Ngoi, Manusia Ma Ngowa'a Nau'u, balasu sanga sangisara repe re ngowa'a 'aḏi dawongo ua Ngoi? 13Mada'a, Ngoi to siajele ra ngini nena-ne: 'A Elia#9:13 Yesus 'ai maksudu: 'A Elia ma tero sa'olo 'a Yohanes tukanga baptis. 'o sapolo ḏua re ngowa-ngowa'a 'aḏi 'a'a cira ra unanga mete'e ananga manga mau ḇato. Gena-ge 'i ma tero toma Boku 'Ofi-'Ofi 'i silefo pasala ḏua mangale unanga.”

Yesus 'o si-la ngowa 'olo matengo 'o roh ma jira 'u dungosama

(Mat. 17:14-21; Luk. 9:37-43a)

14Wakutu 'a Yesus, Petrus, Yakobus re 'a Yohanes 'aḏi 'uci ḏua da'u kie tala, ananga 'aḏi oḏi'i ngowa'a repe re 'aḏi malomu tai me-mete'e ma lelegu. Toma ngowa'a repe manga sigolona gena-ge, guru 'agama nga muḏuo i'a 'aḏi ma'u sangoro ra Yesus 'ai me-mete'e ma lelegu. 15Ngowa'a repe gena-ge 'aḏi oḏi'i Yesus, ḏua 'aḏi heranga rema roanga, kara 'aḏi lalara re 'aḏi jau i'a Unanga. 16Yesus 'o sano Tai me-mete'e, “Ngini ni ma'u sangoro 'oru re 'o guru-guru 'agama gena-ge?”

17Toma ngowa'a repe manga sigolona, 'age rema ngowa'a matengo 'o masiajele, “Guru, ngoi to gasa 'ari ngowa'a ra Guru. Unanga 'o mou sababu 'o roh ma jira 'u dungosama. 18Wakutu unanga 'ai si-siḏi 'i sapolo 'a sibau-bau'u 'ai lese toma tana'a, 'ai sopu'u 'i pa'ala, 'ai ngiḏi 'i kirioto, ḏua 'ai lese cokutu 'i yoḏu'u. Ngoi to golo'o Tani me-mete'e ya dusu'u roh ma jira gena-ge, mada'a ananga nga'unu ua ya dusu'u.”

19Ḏua Yesus 'o kanau i'a ra ananga, “Ngini mode-mode'e ngowa-ngowa'a ga'a ni ngaku Ngoi ua! Singadolo ma di'ara ngau moju, Ngoi balasu to tegoro marimoi ra ngini?! Singadolo ma di'ara ngau moju, Ngoi to sidodai 'Ari 'akala ḇanyo ra ngini?! Gasa ino ngowa 'olo gena-ge!” 20Gena ḏua, ananga 'aḏi gasa i'a ngowa 'olo gena-ge ra Yesus.

Wakutu roh ma jira 'i waro Unanga gena-ge 'a Yesus, enanga 'i 'a'a ngowa 'olo gena-ge 'ai lese 'i ḏaba-ḏaba'a singadolo 'o ruba lulu ie toma tana'a re 'ai sopu'u 'i pa'ala.

21Ḏua Yesus 'o sano toma ngowa 'olo gena-ge 'ai ḇaḇa, “Ma di'ara sa'olo ḏua, enanga 'i 'a'a so'o nena-ne?”

Ma ḇaḇa 'a sangoro, “Wakutu unanga 'o ce-ceka'a i'a moju! 22Ma jelele ḏua, roh ma jira gena-ge mau 'u sisengene unanga: soi rai o'o i'a 'o ruba toma u'u ma dara, soi rai o'o i'a 'o ruba toma ḇanyo ma dara. Na'o Jou no nga'unu No si'a'a 'ori i'a ḇato, No sijumu dadalara ra ngomi re No riono ngomi!”

23Yesus 'o sangoro, “I'a sa'olo no aje, ‘Na'o Jou no nga'unu?’ Mo-moini nyengara 'i dadi ra guna ḇato na'o ni ngaku Ngoi!”

24Kage-kage, ma ḇaḇa 'o kanau 'a siduga-duga, “Jou, ngoi to ngaku mada'a 'ari ngo-ngaku 'i te'e ua! Riono ngoi, la 'ari ngo-ngaku lebe te'e.”

25Wakutu Yesus 'o oḏi'i ngowa'a manga repe 'aḏi sapolo ḏi'i, Unanga 'o sikanga roh ma jira gena-ge, “Roh popongolo re roh mou, masupu toma ngowa 'olo nena-ne re osama rawara ra unanga!”

26Roh ma jira gena-ge 'i poa'a re 'i 'a'a ngowa 'olo gena-ge 'ai lese 'i ḏaba-ḏaba'a lai siḏi kara 'i masupu. Ngowa 'olo gena-ge 'ai lese ma tero sa'olo maiyeti singadolo ngowa'a mo-moini 'aḏi kanau, “Unanga ro sengene!” 27Mada'a Yesus 'u riono re 'a gu'u 'ai giama kara 'u simomi'i ngowa 'olo gena-ge, ḏua unanga ro momi'i.

28Pasala i'a, wakutu Yesus toma wala re pa'i 'Ai me-mete'e ḇato, ananga 'aḏi sano, “I'a sa'olo ngomi mi dusu'u yoḏu'u roh ma jira gena-ge?”

29Yesus 'a sangoro, “Roh ma jira so'o nena-ne wa dusu'u reo 'oru ḇato 'i yoḏu'u; balasu wo manyiata.”#9:29 'Age toma kartasi lo-lolo lelegu 'i silefo so'o ne: “balasu wo manyiata re puasa.”

Yesus dadunu 'o kanau mangale 'Ai se-sengene

(Mat. 17:22-23; Luk. 9:43b-45)

30Yesus re 'Ai me-mete'e 'aḏi sisoi'i tala ngi'i gena-ge re ya dowanga manga ḏo-ḏagi 'aḏi tola'a i'a toma daeraha Galilea. Yesus 'o oḏu'u ngowa'a ya waro Unanga 'ai ngi'i 31sababu Unanga mau doto'o 'Ai me-mete'e. Unanga 'o kanau, “Ngoi, Manusia Ma Ngowa'a Nau'u, sipula'a toma manusia ma kuasa. Re Ngoi ananga Ri sisengene, mada'a toma wangere ma soi ro'ange, Ngoi dadunu to 'ahu moju!”

32'Ai me-mete'e 'aḏi sahe ua Yesus 'ai do-doto'o, mada'a ananga ya sano ua sababu 'aḏi mojongo.

'A guna lebe la-lamo'o i'a ra Ma Jou'ongu Madutu 'ai momina?

(Mat. 18:1-5; Luk. 9:46-48)

33Yesus re 'Ai me-mete'e 'aḏi ngadolo toma limau Kapernaum. Ngadolo toma wala, Yesus 'o sano Tai me-mete'e, “Ngini ni ma'u rubutu 'oru toma ngo'omo ma golona nange-ge?”

34Ananga ya sangoro ua, sababu toma ngo'omo ma golona nange-ge, ananga ma'u rubutu mangale 'a guna lebe la-lamo'o i'a.#Luk. 22:24 35Yesus 'o maḏegoro tala kara 'O 'aro'o 'Ai me-mete'e nga nyagi moi re nga muḏiḏi re 'O kanau i'a ra ananga, “ 'A guna ḇato mau lebe la-lamo'o i'a, unanga gena-ge balasu dadi lebe ceka'a ma tero sa'olo falalomu matengo ga'a de-de'oso ngowa'a mo-moini.”#Mat. 20:26-27, 23:11; Mrk. 10:43-44; Luk. 22:26

36Gena ḏua, Yesus 'o 'oro ngowa 'olo matengo re 'O side-de'oso ngowa 'olo gena-ge tamanga biono. Yesus 'o sibo'olo ngowa 'olo gena-ge re kanau i'a Tai me-mete'e, 37“ 'A guna ḇato ga'a dawongo ngowa 'olo so'o nena-ne sababu unanga gena-ge 'o mete'e Ngoi, unanga gena-ge ma tero ḏi'i 'o dawongo Ngoi. Re pa'i Ngoi ḇato ua, mada'a 'o dawongo Unanga ga'a 'O cumutu Ngoi.”#Mat. 10:40; Luk. 10:16; Yoh. 13:20

'A guna ḇato malawana ngene ua, ananga gena-ge marimoi ra ngene

(Luk. 9:49-50)

38Ḏua 'a Yohanes 'o kanau ra Yesus, “Guru, ngomi mi oḏi'i re mi 'isene matengo 'o dusu'u roh ma jira 'a terongo Jou 'ani lomanga. Dadi ngomi simaha ua unanga sababu unanga ra ngene ua.”

39Mada'a Yesus 'o kanau, “Awa ngini ni simaha ua unanga sababu matengo ua nga'unu 'a'a ga'a hera-heranga terongo 'Ari lomanga re 'o kanau 'ori i'a ma jira mangale Ngoi. 40Sababu 'a guna ḇato 'o malawana ngene ua, unanga gena-ge marimoi ra ngene.#Mat. 12:30; Luk. 11:23 41Ni ngaku mode-mode'e 'Ari demo-demo nena-ne: 'A guna ḇato 'o pula'a ngini ka'e pa'i ḇanyo ḇato sababu ngini mete'e Kristus, ḏuanga i'a mode-mode'e 'u sanga manga ngogele ra Ma Jou'ongu Madutu.”#Mat. 10:42

Yesus 'ai do-doto'o mangale ḏosa

(Mat. 18:6-9; Luk. 17:1-2)

42“Mada'a na'o 'a guna ḇato 'o sigasa ngowa-ngowa'a ma pake ua ma tero sa'olo ngowa 'olo nena-ne, singadolo ananga 'aḏi ngaku Ngoi riwara, Ma Jou'ongu Madutu 'o sihukumu unanga gena-ge lebe tubuso i'a. Jobilaha maḏi la-lamo'o 'i siḏobe tai camala, kara siupa'a unanga toma ngoloto. 43Na'o ngini ninga giama kaci moi 'i sigasa ngini ni madaga'a ḏosa; ni tola'a giama gena-ge! Jobilaha, reninga giama pa'i kaci moi ḇato ni 'ahu ra Ma Jou'ongu Madutu, reo reninga giama kaci ḏiḏi ni osama toma naraka ma dara ga'a u'u malejanga kama sora riwara.#Mat. 5:30 [44I'a da'a no sanga sangisara kama togumu ua.] 45Re Na'o ngini ninga rou kaci moi 'i sigasa ngini ni madaga'a ḏosa; ni tola'a rou gena-ge! Jobilaha, reninga rou pa'i kaci moi ḇato ni 'ahu ra Ma Jou'ongu Madutu, reo reninga rou kaci ḏiḏi sanga upa'a toma naraka ma dara. [46I'a da'a no sanga sangisara kama togumu riwara.] 47Re ngini ninga la'o kaci moi 'i sigasa ngini ni madaga'a ḏosa, ni cuḇulenge 'o la'o gena-ge! Jobilaha, ngini ni osama nyo-nyoimi ra Ma Jou'ongu Madutu 'ai Pareta reninga la'o kaci moi ḇato, reo reninga la'o kaci ḏiḏi ni osama toma naraka ma dara.#Mat. 5:29 48I'a da'a no sanga sangisara kama togumu riwara.#Yes. 66:24

49Ngowa'a ga'a sanga sangisara sababu mete'e Ngoi ḏuanga i'a 'o dadi 'ofi-'ofi ra Ma Jou'ongu Madutu ma tero sa'olo ninga jou-jou 'i dadi 'ofi-'ofi ra Ma Jou'ongu Madutu na'o sigare g̱asi.#Im. 2:13

50G̱asi 'i la-la, mada'a na'o enanga 'i rasa riwara. Sanga ua, 'i dadunu rasa moju? Ngini balasu ni dadi sa'olo g̱asi: ni 'ahu ma'u 'aro'o la matengo re matengo.”#Mat. 5:13; Luk. 14:34-35

Currently Selected:

Markus 9: SNT

Highlight

Copy