Markus 10
10
Yesus 'o doto'o mangale ma'u to-tola'a
(Mat. 19:1-12; Luk. 16:18)
1Gena ḏua, Yesus 'o sisoi'i tala ngi'i gena-ge re 'o tagi so'o toma daeraha Yudea re daeraha da'a Ḇanyo Yordan kaci moi. Ngowa'a repe 'aḏi sapolo moju 'U sigoloḏi Yesus re 'O doto'o ananga sa'olo biasa.
2Ngowa'a Farisi nga muḏuo i'a 'aḏi sapolo ḏi'i disa Yesus 'ai sala. Ananga 'aḏi sano, “Mete'e nanga 'agama ma hukumu, nau'u oḏu'u 'ai were'a, nyengara bolo ua?”
3Yesus 'o sangoro, “Musa 'o pula'a parenta 'oru ra ngini?”
4Ananga 'aḏi kanau, “ 'A Musa 'o nyengara, mada'a nau'u balasu 'o lefo surata tola'a si.”#Dad. 24:1-4; Mat. 5:31
5Yesus 'o kanau i'a ra ananga, “ 'A Musa 'o lefo 'atoranga gena-ge sababu ninga 'akala re sinyingara lai te'e. 6Mada'a ma mulaingi i'a, ‘Ma Jou'ongu Madutu 'o sidadi manusia, ananga gena-ge na-nau'u re we-were'a.’#Do. 1:27, 5:2 7‘Sababu gena-ge, na-nau'u 'o sisoi'i tala 'ai ḇaḇa re 'ai ngina re 'o marimoi tai were'a, kara ananga nga muḏiḏi 'aḏi dadi rimoi.’#Do. 5:2 8Dadi, ananga nga muḏiḏi riwara, mada'a raḏi dadi rimoi.#Do. 2:24 9Sababu gena-ge 'oru ga'a Ma Jou'ongu Madutu re 'a sirimoi, manusia wa sito-tola'a yoḏu'u.”
10Gena ḏua, ananga 'aḏi osama toma wala moju re Yesus 'ai me-mete'e 'aḏi sano ra Unanga mangale 'au nange-ge. 11Yesus 'o kanau i'a ra ananga, “Na'o nau'u oḏu'u were'a re 'o molo'ara we-were'a lelegu, unanga gena-ge 'o tinikai tai were'a ma siḏa.#Mat. 5:32; 1Kor. 7:10-11 12So'o gena ḏi'i, were'a mo mato-tola'a tami nau'u re mo molo'ara na-nau'u lelegu, munanga gena-ge mo tinikai tami nau'u ma siḏa.”
Yesus 'o sibarakati ngowa 'olo
(Mat. 19:13-15; Luk. 18:15-17)
13'Age rema ngowa-ngowa'a 'aḏi gasa manga ngowa 'olo ra Yesus, la Unanga 'a siteru 'ai giama re 'O sibarakati ananga. Mada'a 'Ai me-mete'e 'aḏi ḇangata ngowa'a gena-ge. 14Yesus 'o oḏi'i so'o gena, Unanga 'o ngamo 'ai me-mete'e, “Sieanga i'a ḇato, ngowa 'olo nena-ne 'aḏi sapolo ra Ngoi. Awa ni dola'aku ananga, sababu ngowa'a ga'a 'aḏi dadi ma tero sa'olo ngowa 'olo-ngowa 'olo nena-ne, pa'i ananga gena-ge nyengara 'aḏi osama nyo-nyoimi ra Ma Jou'ongu Madutu 'ai Pareta. 15Ni ngaku mode-mode'e 'Ari demo-demo nena-ne: 'A guna ḇato 'o sapolo ra Ma Jou'ongu Madutu ma tero ua sa'olo ngowa 'olo nena-ne, unanga 'o osama nyo-nyoimi yoḏu'u ra Ma Jou'ongu Madutu 'ai Pareta.”#Mat. 18:3 16Unanga 'o kanau gena-ge togumu i'a, 'O sibo'olo re 'A siteru 'Ai giama toma ngowa 'olo-ngowa 'olo manga sae'e ma re'u matengo re matengo kara 'O sibarakati ananga.
Ngowa'a rema-enanga 'o sano Yesus mangale 'ahu kasingado-ngadolo i'a
(Mat. 19:16-30; Luk. 18:18-30)
17Wakutu Yesus 'a dowanga 'ai ḏo-ḏagi, 'age rema ngowa'a matengo 'o la-lalara ino re 'o maḏipolono ra Yesus re 'o sano, “Guru ga'a No la madutu, ngoi balasu to 'a'a sa'olo, la to sanga 'ahu kasingado-ngadolo i'a?”
18Yesus 'o sangoro, “I'a sa'olo ngana no kanau Ngoi to la madutu! Matengo i'a mai ua 'o la madutu, ḏuga-ḏuga Ma Jou'ongu Madutu ḇato. 19Ngana no waro ḏua Ma Jou'ongu Madutu 'ai parenta-parenta: ‘No sisengene ngowa'a awa, no to-tori'i awa, no tinikai awa, no dadi sakisi sa-sakala awa, no sihaga ngowa'a awa, re no silamo'o 'ani ḇaḇa re ngina.’ ”#Sup. 20:12-16; Dad. 5:16-20
20Ḏua unanga 'o kanau, “Guru, parenta mo-moini gena-ge ngoi reta mete'e wakutu ngoi to ngowa 'olo i'a moju singadolo 'orasa nange-ne.”
21Yesus 'u tatamo i'a re 'o dadalara dadi 'o kanau, “Rimoi moju balasu no si'a'a. No maḏibo re na wu'unu 'ani 'ori i'a rana mo-moini, ma pipisi na sibalangu toma ngowa-ngowa'a ma dinga'unu ua. Dadi ngana no sanga 'ori i'a rana toma soroga. Togumu i'a, no sapolo re no mete'e Ngoi. 22Unanga 'a 'isene Yesus 'o kanau so'o gena, 'ai 'akala re sinyingara 'i rapo'o. Ḏua unanga 'a sisoi'i tala ngi'i gena-ge rai 'akala re sinyingara 'i kangela sababu unanga ngowa'a rema-enanga madutu.”
23Ḏua Yesus 'o kanau Tai me-mete'e, “Kangela masala ngowa'a rema-enanga 'aḏi osama nyo-nyoimi ra Ma Jou'ongu Madutu 'ai Pareta!”
24'Ai me-mete'e 'aḏi matai heranga ya 'isene Yesus 'o kanau so'o gena-ge. Mada'a Yesus dadunu 'o kanau, “ 'Ari ngowa-ngowa'a, kangela masala osama nyo-nyoimi ra Ma Jou'ongu Madutu 'ai Pareta. 25Lebe gapanga 'o 'unta rimoi 'i osama toma j̱aiti ma duso'o reo ngowa'a rema-enanga 'aḏi osama nyo-nyoimi ra Ma Jou'ongu Madutu 'ai Pareta.”
26Sababu Unanga 'o kanau so'o gena-ge, 'Ai me-mete'e 'aḏi heranga masala re 'aḏi ma'u kanau matengo re matengo, “Na'o so'o gena, 'a guna nga'unu sanga salamata?!”
27Yesus 'o tatamo ananga re 'O kanau, “Toma manusia 'i osama 'akala ua, mada'a ra Ma Jou'ongu Madutu so'o gena-ge ua. Ra Ma Jou'ongu Madutu, mo-moini 'i osama 'akala.”
28Ḏua Petrus 'o sano, “Ngomi remi sisoi'i tala mo-moini, la mi mete'e Jou!”
29Yesus 'o sangoro, “Ni ngaku mode-mode'e 'Ari demo-demo nena-ne: 'A guna ḇato ra sisoi'i tala 'ai wala, 'ai iḏanga re biḏanga, 'ai ḇaḇa re 'ai ngina, 'ai ngowa-ngowa'a, bolo 'ai guḏa sababu unanga 'o mete'e Ngoi re 'o singadolo Habari Roanga, 30unanga gena-ge ḏuanga i'a 'o dawongo maḏibo siḏuolo latu moi toma 'orasa nange-ne (wala, iḏanga re biḏanga, ngina, ḇaḇa, ngowa-ngowa'a re guḏa mada'a unanga 'o sanga sikisa ḏi'i) re toma 'orasa biono unanga gena-ge 'o sanga 'ahu kasingado-ngadolo i'a.
31Mada'a ngowa'a repe ga'a nange-ne 'aḏi dadi ngowa'a la-lamo'o, ḏuanga i'a 'aḏi dadi ngowa'a ma pake ua. Re ngowa'a repe ga'a nange-ne 'aḏi dadi ngowa'a ma pake ua, ḏuanga i'a 'aḏi dadi ngowa'a la-lamo'o.”#Mat. 20:16; Luk. 13:30
Yesus 'o siajele ma soi ro'ange mangale 'Ai se-sengene
(Mat. 20:17-19; Luk. 18:31-34)
32Yesus re 'Ai me-mete'e re ngowa'a repe, ananga 'aḏi tagi so'o toma limau Yerusalem. Yesus 'o siḏa-siḏa toma biono re 'Ai me-mete'e mo-moini manga 'akala re sinyingara 'i kangela re ngowa'a repe tu-tuu'u toma ḏuḏunu 'aḏi basono mojongo. Gena ḏua, Yesus 'o 'aro'o pa'i 'Ai me-mete'e re 'O masiajele ra ananga mangale 'oru 'i dadi ra Unanga masiretene toma biono i'a. 33Yesus 'o kanau, “ 'Isene! Ngene nange-ne wo si'a toma limau Yerusalem. I'a da'a, Ngoi, Manusia ma Ngowa'a Nau'u, ḏuanga i'a sipula'a toma 'imam-'imam ma sae'e re 'o guru-guru 'agama. Re Ngoi ananga Ri singe-ngeta'a hukumu sengene. Gena ḏua, Ngoi sipula'a ḏi'i toma ngowa-ngowa'a Yahudi ua! 34Ananga 'aḏi je-jengere, 'aḏi obi'i, 'aḏi sipo re salib Ngoi. Mada'a toma wangere ma soi ro'ange, Ngoi dadunu to 'ahu moju.”
Yohanes re 'a Yakobus manga go-golo'o
(Mat. 20:20-28)
35Ḏua 'a Zebedeus 'ai ngowa-ngowa'a nau'u, 'a Yohanes re 'a Yakobus, 'aḏi sapolo ra Yesus re 'aḏi kanau, “Guru, ngomi mi mau Jou no 'a'a 'ori i'a rimoi ra ngomi.”
36Yesus 'o sano, “Ngini ni mau 'oru Ngoi to si'a'a re ngini?”
37Ananga sangoro, “Wakutu Jou no dadi 'Olana rani mulia toma soroga, nyengara ngomi mi tegoro Tani kuwiḏa re kuḇali.”
38Yesus 'o kanau ra ananga nga muḏiḏi, “Ngini ni sahe ua 'oru ga'a ni golo'o! Nga'unu bolo ua ni ka'e Tari sawo'o ga'a Ngoi balasu ta ka'e re ngini ni basono susa re sangisara mamete'e ra Ngoi?!”#Luk. 12:50
39Ananga ya sangoro, “Ngomi ma nga'unu.”
Ḏua Yesus dadunu 'o kanau ra ananga, “Mode-mode'e ḏuanga i'a, ngini ni ka'e Tari sawo'o re ngini ni basono susa re sangisara ma tero sa'olo Ngoi reta basono ḏi'i.
40Mada'a mangale 'a guna 'o tegoro Tari giama ma kuwiḏa bolo Tari giama ma kuḇali, gena-ge Ngoi 'ari haku ua ta sitantukanga. Ma Jou'ongu Madutu ra sitantukanga 'a guna tegoro toma ngi'i-ngi'i gena-ge.”
41Wakutu 'ai me-mete'e nga nyagi moi ya 'isene, ananga 'aḏi ruta ra Yohanes re 'a Yakobus. 42Dadi Yesus ya'u 'aro'o ananga mo-moini re 'O kanau, “Ngini ni waro mangale bangsa-bangsa manga sae'e ga'a 'aḏi nana'o ua Ma Jou'ongu Madutu, ananga gena-ge 'aḏi sikangela manga rayata. Re ngowa'a la-lamo'o 'aḏi simau-mau manga rayata, la ya mete'e manga parenta.#Luk. 22:25-26 43Mada'a ngini ni 'a'a so'o gena awa. Siḏibo ḏi'i 'a guna ḇato mau 'o dadi ngowa'a la-lamo'o taninga sigolona, unanga balasu 'o dadi falalomu. 44Re 'a guna ḇato mau 'o dadi sae'e taninga sigolona, unanga balasu 'o dadi budaka di'a ngowa'a mo-moini.#Mat. 23:11; Mrk. 9:35; Luk. 22:26 45Sababu kalaha Ngoi nena-ne Manusia ma Ngowa'a Nau'u, Ngoi to sapolo di'a ngowa-ngowa'a 'aḏi de-de'oso Ngoi ua. Mada'a Ngoi to sapolo di'a To de-de'oso ngowa-ngowa'a re Ta sidoa'a 'Ari 'ahu di'a To tuusu ngowa'a repe tamanga ḏosa.”
Bartimeus 'ai la'o hafu, Yesus 'u si-la
(Mat. 20:29-34; Luk. 18:35-43)
46Yesus re 'Ai me-mete'e re ngowa'a repe 'aḏi ngadolo toma limau Yeriko. Wakutu ananga mo-moini 'aḏi sa'i ya sisoi'i tala limau gena-ge, 'aḏi oḏi'i ngowa'a ma la'o hafu matengo 'ai lomanga 'a Bartimeus ('a Timeus 'ai ngowa'a). Unanga 'o tegoro toma ngo'omo ma 'uḏu re 'o golo-golo'o. 47Unanga 'o 'isene Yesus ngowa'a Nazaret 'o mete'e ino ḏua Bartimeus 'o 'aro'o siduga-duga, “Yesus, 'Olana Daud 'ai ju'uda,#10:47: 'Olana Daud 'ai ju'uda ma tero sa'olo Daud 'ai Ngowa'a Nau'u. Na sijumu 'Ani 'akala re sinyingara ma la-la ra ngoi!”
48Ngowa'a repe 'aḏi ḇangata unanga, “No masiogoro!” Mada'a unanga 'o 'aro'o ganapu siduga-duga, “Jou, 'Olana Daud 'ai ju'uda, Na sijumu 'Ani 'akala re sinyingara ma la-la ra ngoi!”
49Ḏua Yesus 'o matogumu re 'o kanau, “ 'Aro'o unanga ino.”
Dadi ananga 'aḏi kanau i'a toma ngowa'a hafu gena-ge, “Na site'e tala ni 'akala re sinyingara, no made'oso ie, Yesus 'o 'aro'o.”
50Ngowa'a hafu gena-ge 'a upa'a 'ai juba re 'o jau-jau 'o made'oso kara 'o tagi i'a ra Yesus.
51Ḏua Yesus 'o sano, “Ngana no mau 'oru ra ngoi?”
Ngowa'a hafu gena-ge 'a sangoro, “Ya Guru, ngoi to mau to oḏi'i.”
52Yesus 'o kanau, “No tagi ḇato. Sababu no ngaku ngoi, ngana reno la.”
Toma 'orasa gena-ge ḏua, ngowa'a hafu gena-ge 'o oḏi'i re 'o mete'e Yesus.
Currently Selected:
Markus 10: SNT
Highlight
Share
Copy
Want to have your highlights saved across all your devices? Sign up or sign in
2015 © Indonesian Bible Society
