Markus 11

Yesus 'o osama limau Yerusalem

(Mat. 21:1-11; Luk. 19:28-40; Yoh. 12:12-19)

1-2Wakutu ananga 'aḏi co-cori toma limau Yerusalem, ananga 'aḏi osama toma limau Betfage re limau Betania sie toma Polono Zaitun ma gagoro. Gena ḏua, Yesus 'o soma'a 'Ai me-mete'e nga muḏiḏi 'aḏi siḏa re 'O kanau, “Ni siḏa i'a re ni osama toma gamu da'a re ni oḏi'i keledai ma ngowa rimoi gena-ge ya palene soi moi i'a mai nyangu, ngowa'a ya piri'u. Re ngini ni pasala ma gumi re na gasa ino 'ane. 3Na'o matengo i'a 'o sano ra ngini, ‘I'a sa'olo ngini na pasala keledai gena-ge?’ ni sangoro, ‘Ma Jou 'a paralu, re Unanga 'a ca-caiti siḏibo.’ ”

4'Ai me-mete'e nga muḏiḏi nange-ge 'aḏi tagi, re ya sanga i'a keledai ma ngowa rimoi toma ngo'omo ma 'uḏu, ma gumi ya sipiri'u toma ngalana ma ngasu'u. Ḏua ananga ya pasala keledai gena-ge. 5Ngowa-ngowa'a 'aḏi made-de'oso toma ngi'i gena-ge 'aḏi sano ra ananga, “Ni si'a'a 'oru? I'a sa'olo ni pasala keledai ma ngowa gena-ge?”

6Ananga ya sangoro ma tero sa'olo 'a Yesus 'o kanau ra ananga nange-ge. Ḏua ngowa-ngowa'a gena-ge 'aḏi sieanga i'a ananga ya tuda keledai gena-ge. 7Wakutu 'aḏi ngadolo ra Yesus ananga ya siwangini toma keledai ma ḏuḏunu remanga juba. Ḏua, Yesus 'o mabalene toma keledai ma ngowa gena-ge. 8Ngowa'a manga repe ya sisela manga juba toma ngo'omo. 'Age rema ngowa'a ma lelegu ḏi'i ananga 'aḏi siare 'o ate ma umanga rema so'a-so'a 'aḏi gasa toma guḏa ino. 9Ngowa-ngowa'a 'aḏi tagi siḏa-siḏa re 'aḏi tu-tuu'u, mo-moini 'aḏi kanau siduga-duga,

“Puji re silamo'o Ma Jou'ongu Madutu!#Nya. 118:26

Sibarakati Unanga ga'a 'o sapolo rea Ma Jou'ongu Madutu 'ai lomanga!

10Sibarakati 'Ai Pareta 'i sapolo da'u ra Ma Jou'ongu Madutu tala - ma tero sa'olo 'Olana Daud, nanga ete re dotumu, 'ai pareta.

Puji re silamo'o Ma Jou'ongu Madutu toma Gau'u!”

11Ma ḏo-ḏogumu, Yesus 'o ngadolo toma limau Yerusalem re 'O osama ra Ma Jou'ongu Madutu 'ai Wala. Toma ngi'i gena-ge, Unanga 'o tailako sigoloḏi. Mada'a sa'i ri lobi'i, dadi Unanga re 'Ai me-mete'e nga nyagi moi re nga muḏiḏi, ananga 'aḏi ḏibo toma limau Betania.

Yesus 'a sisasi ate 'ara

(Mat. 21:18-19)

12Ma ḇiḇini ino da-daini i'a moju, wakutu ananga 'aḏi tagi re 'aḏi supu toma limau Betania, Yesus basono 'o sawini. 13Toma giḏanga, Unanga 'o oḏi'i ate 'ara ḏu moi ma so'a lai ruana. Dadi, Unanga 'o tagi i'a toma ate gena-ge mau 'a oḏi'i rema sowo'o bolo ua. Mada'a, Unanga 'o ngadolo toma ate gena-ge, 'o oḏi'i ma sowo'o rimoi i'a mai ua, pa'i ma so'a ḇato,#11:13 Biasa, na'o ate 'ara rema so'a, 'age sowo'o ceka'a i'a ḏi'i. sababu wakutu gena-ge enanga ma 'orasa sowo'o nyangu. 14Ḏua, Yesus 'o kanau i'a toma ate gena-ge, “Mulaingi nange-ne re si'a, matengo i'a mai ua 'a oromo riwara ate nena-ne ma sowo'o!”

'Ai me-mete'e ya 'isene Yesus 'o kanau gena-ge.

Yesus 'o dusu'u ngowa'a 'aḏi mawu'unu re matibo ra Ma Jou'ongu Madutu 'ai Wala ma soana

(Mat. 21:12-17; Luk. 19:45-48; Yoh. 2:13-22)

15Gena ḏua, ananga 'aḏi ngadolo toma limau Yerusalem, Yesus 'o tagi ḏi'i ra Ma Jou'ongu Madutu 'ai Wala. Toma wala gena-ge ma soana, Unanga 'o dusu'u ngowa'a 'aḏi mawu'unu re matibo. Unanga 'a sipagara ngowa-ngowa'a singali-ngali pipisi manga meja, re 'A siruba ngowa-ngowa'a mawu'unu namo dara manga bako-bako. 16Re matengo ua Unanga ya'u sieanga i'a 'aḏi gasa 'oru ḇato re 'aḏi i'a ino supu re 'o osama ra Ma Jou'ongu Madutu 'ai Wala ma soana. 17Gena ḏua, Yesus 'o doto'o ngowa-ngowa'a toma ngi'i gena-ge re 'o kanau, “Ra Ma Jou'ongu Madutu 'ai Boku ma dara, 'i silefo ḏua Ma iḏingi so'o ne: ‘ 'Ari Wala gena-ge, bangsa mo-moini ya silomanga manga manyiata ma wala.’ Mada'a ngini ni si'a'a ngowa'a to-tori'i manga ngi'i!”#Yes. 56:7; Yer. 7:11

18Wakutu 'imam-'imam ma sae'e re guru-guru 'agama ya 'isene Yesus 'o kanau so'o gena, ananga mulaingi 'aḏi disa ngo'omo mau sisengene Unanga. Ananga manga 'akala re sinyingara 'i go-goḏi, sababu ngowa'a mo-moini 'aḏi nyanyaḏi masala ya 'isene 'Ai do-doto'o.

19Sa'i ri lobi'i, Yesus re 'Ai me-mete'e, ananga ya sisoi'i tala limau gena-ge.

Do-doto'o mangale ate 'ara

(Mat. 21:20-22)

20Ma ḇiḇini ino da-daini i'a, wakutu ananga 'aḏi tola'a i'a toma ate 'ara gena-ge, ananga ya oḏi'i ate gena-ge ri sengene; da'u ma tubu singadolo dau ma cimi. 21Ḏua Petrus 'a si'elingi 'au nyigo Yesus 'a sisasi ate 'ara gena-ge re 'o kanau i'a ra Yesus, “Rabi,#11:21 “Rabi” toma demo Yunani “Guru” di'a ngowa'a ga'a 'o sayanga ma jingi'i. Na oḏi'i ate 'ara ga'a Na sisasi, enanga gena-ge ri sengene!”

22Yesus 'a sangoro, “Ni ngaku ḇato ra Ma Jou'ongu Madutu. 23Ni ngaku mode-mode'e 'Ari demo-demo nena-ne: Ngowa'a mo-moini ga'a 'aḏi ngaku mode-mode'e Ma Jou'ongu Madutu re sitaka-taka ua 'oro ḇato 'aḏi kanau; enanga gena-ge 'i dadi. 'A guna ḇato 'o kanau, ‘Kie nga'unu 'i lage re 'i eta'a toma ngoloto!’ Togumu i'a, mode-mode'e enanga 'i lage re 'i eta'a toma ngoloto!#Mat. 17:20; 1Kor. 13:2 24Sababu gena-ge, Ngoi to siajele ra ngini nena-ne: 'Oru ḇato 'o manyiata re 'o ngaku mode-mode'e Ma Jou'ongu Madutu 'o pula'a ḏua, enanga gena-ge 'i dadi ra unanga. 25Re na'o ngini ni manyiata, mada'a ninga 'akala re sinyingara 'i sanangi ua ra matengo i'a, siḏa-siḏa na si'apongo ngowa'a matengo gena-ge, la ninga Ḇaḇa da'u toma soroga 'A singi-ngiranga ḏi'i ninga ḏosa-ḏosa. #Mat. 6:14-15 [ 26Na'o ngini ni si'apongo ua ngowa'a lelegu, ninga Ḇaḇa da'u toma soroga 'A singi-ngiranga ua ḏi'i ninga ḏosa-ḏosa.]”

Yahudi manga bi-biri'i 'aḏi sano mangale Yesus 'ai kuasa

(Mat. 21:23-27; Luk. 20:1-8)

27Ananga dadunu 'aḏi maḏibo toma limau Yerusalem. Wakutu Yesus 'o tagi sigoloḏi ra Ma Jou'ongu Madutu 'ai Wala, 'imam-'imam ma sae'e, guru-guru 'agama re Yahudi-Yahudi manga sae'e 'aḏi sapolo ra Yesus. 28Ananga 'aḏi sano, “No sanga kuasa le'a ino, re 'a guna 'o pula'a kuasa ra ngana singadolo nga'unu no 'a'a mo-moini so'o nena-ne?”

29Yesus 'a sangoro, “Ngoi ḏi'i mau to sano ra ngini. Na'o ni sangoro 'ari so-sano, kara ta siajele 'a guna 'o pula'a kuasa singadolo ta si'a'a so'o nena-ne. 30'A Yohanes tukanga baptis, unanga gena-ge 'o sanga 'ai kuasa ra guna ino? Ra Ma Jou'ongu Madutu bolo toma manusia ino?”

31Ḏua 'imam-'imam ma sae'e re Yahudi manga sae'e 'aḏi ma'u kanau tamanga sigolona. Ananga 'aḏi kanau, “Na'o ngene wo sangoro, ‘ 'A Yohanes gena-ge 'o sanga kuasa ra Ma Jou'ongu Madutu ino,’ ḏua Unanga 'o sano ‘I'a sa'olo ngini ni ngaku 'a Yohanes ua?’ 32Re na'o wo kanau, ‘Unanga 'o sanga kuasa toma manusia ino,’ 'i kangela ḏi'i.” Sababu ananga 'aḏi mojongo ngowa'a repe sababu ngowa'a mo-moini 'aḏi ngaku Yohanes gena-ge 'o dadi nabi.

33Dadi ananga 'aḏi sangoro, “Ngomi ma waro ua.”

Ḏua Yesus 'o kanau ra ananga, “Na'o so'o gena, Ngoi mai ta siajele ua ra ngini mangale Ngoi to sanga kuasa ra guna ino, singadolo nga'unu ta si'a'a mo-moini gena-ge.”

Currently Selected:

Markus 11: SNT

Highlight

Copy