Markus 8

Yesus 'o pula'a oromo ngowa'a nga cala rata

(Mat. 15:32-39)

1-2Toma 'orasa gena-ge, 'age rema ngowa'a repe masala 'aḏi malomu. Ananga gena-ge, manga dofoma 'i moini ḏua. Ḏua Yesus 'o 'aro'o 'Ai me-mete'e re 'O kanau i'a ra ananga, “Tari 'akala re sinyingara 'i baolo dadalara toma ngowa'a repe, sababu wangere ro'ange ḏua ananga 'aḏi mete-mete'e Ngoi, dadi manga dofoma 'i moini ḏua. 3Na'o Ngoi to soma'a ananga 'aḏi maḏibo remanga sawini, toma ngo'omo ma golona 'aḏi beberete, sababu ngowa'a mamuni'a tegoro toma giḏanga.”

4Yesus 'ai me-mete'e 'aḏi sangoro, “Sanga ngo-ngoromo le'a ḇato, nga'unu sipula'a oromo toma ngowa'a repe nena-ne? Sababu ngi'i nena-ne 'i tiwongo ino?”

5Yesus 'o sano, “ 'Age roti ngai muḏuo i'a ra ngini?”

Ananga ya sangoro, “Ngai tumudingi.”

6Ḏua Yesus 'o soma'a ngowa'a repe 'aḏi tegoro toma tana'a. Gena ḏua, Unanga 'a 'oro roti ngai tumudingi gena-ge re 'O sibere ie murasa ma la ra Ma Jou'ongu Madutu. Ḏua Unanga 'a poti-poti roti gena-ge, kara 'O sipula'a Tai me-mete'e di'a ya sibalangu toma ngowa'a repe. Re 'Ai me-mete'e ya siḏagi mo-moini gena-ge. 7Ananga remanga nyao'o ngai muḏuo i'a mada'a i'a 'alusu. Yesus 'o sibere ie murasa ma la ra Ma Jou'ongu Madutu ḏi'i, kara 'O soma'a 'Ai me-mete'e ya sibalangu nyao'o gena-ge ra ananga mo-moini. 8-9Ngowa'a repe 'aḏi oromo singadolo 'aḏi wunusu. Ananga ḏa nga cala rata. Togumu i'a, 'Ai me-mete'e ya lomu ma jingianga, pipigu tumudingi roma-romanga. Ḏua Yesus 'o soma'a ngowa'a repe gena-ge 'aḏi maḏibo, 10kara Yesus re 'Ai me-mete'e, 'aḏi mabalene toma oti si'a toma daeraha Dalmanuta.

Ngowa-ngowa'a Farisi 'aḏi golo'o Yesus 'o 'a'a didina'o heranga

(Mat. 16:1-4)

11Ngowa'a Farisi nga muḏuo i'a mau 'aḏi disa Yesus 'ai sala. Sababu gena-ge 'aḏi sapolo ra Yesus re 'aḏi sano Unanga.#Mat. 12:38; Luk. 11:16

Ananga 'aḏi golo'o Yesus 'o 'a'a didina'o da'u diwanga tala, la ananga ya waro Unanga gena-ge mode-mode'e 'o sapolo da'u ra Ma Jou'ongu Madutu tala.

12Yesus 'a iḏala 'ai sangagara re 'a sangoro, “I'a sa'olo ngowa-ngowa'a toma 'orasa nena-ne ni golo'o Ngoi to 'a'a didina'o heranga? Ni ngaku mode-mode'e 'Ari demo-demo nena-ne: Didina'o heranga rimoi i'a mai ua To pula'a ra ngini!”#Mat. 12:39; Luk. 11:29

13Ḏua Yesus re 'Ai me-mete'e 'aḏi sisoi'i tala ngowa'a Farisi gena-ge re 'aḏi mabalene toma oti, kara 'aḏi si'a da'a toma talaga kaci moi.

Herodes re ngowa-ngowa'a Farisi manga do-doto'o

(Mat. 16:5-12)

14Wakutu Yesus 'ai me-mete'e 'aḏi palene toma oti, ananga ya sidaioranga manga ngo-ngoromo; 'aḏi gasa pa'i 'o roti ngai moi. 15Yesus 'o si'elingi ananga, “Ni ma'istiari mangale Herodes re ngowa'a Farisi manga ragi.”#Luk. 12:1

16Ḏua Yesus 'ai me-mete'e, ananga 'aḏi ma'u kanau matengo re matengo, “Unanga 'o kanau so'o gena, sababu ngene nanga roti 'i cua.”

17Yesus to waro ḏua mangale ananga 'aḏi ma'u kanau matengo re matengo. Sababu gena-ge, Unanga 'o sano ra ananga, “I'a sa'olo, ngini ni ma'u kanau mangale roti 'i cua?! Ngini ni waro ua re ni sahe nyangu maksudu 'Ari ga'a hera-heranga gena-ge?! Ninga 'akala re sinyingara lai te'e!” 18Ngini reninga la'o — i'a sa'olo ni oḏi'i ua? Ngini reninga ngau'u — i'a sa'olo ni 'isene ua? Re ni 'elingi riwara 'Ari ga'a hera-heranga nange-ge.#Yer. 5:21; Yeh. 12:2; Mrk. 4:12 19Wakutu roti ngai romotoa ta pinga-pingana di'a ngowa'a nga cala romotoa, ngini ni lomu ma bai'i pipigu muḏuo?

Ananga ya sangoro, “Pipigu nyagi moi re romoḏiḏi.”

20Yesus dadunu 'o sano, “Wakutu ngoi ta pinga-pingana roti di'a ngowa'a nga cala rata, ngini ni lomu ma bai'i pipigu muḏuo?”

Ananga ya sangoro, “Pipigu tumudingi.”

21Yesus 'o kanau, “Na'o so'o gena, i'a sa'olo ni sahe nyangu ḏi'i mangale Ngoi to sapolo da'u ra Ma Jou'ongu Madutu tala?”

Yesus 'o si-la ngowa'a hafu matengo toma limau Betsaida

22Ananga 'aḏi ngadolo toma limau Betsaida. 'Age rema ngowa'a nga muḏuo i'a 'aḏi gasa ino ngowa'a hafu matengo ra Yesus re 'aḏi golo'o 'a siteru 'ai giama, la ngowa'a gena-ge 'o la. 23Ḏua Yesus 'a gu'u 'ai giama 'u tuda sisupu toma limau ma ḏuḏunu. Gena ḏua, 'A obi'i ngowa'a hafu gena-ge 'ai la'o kaci ḏiḏi re 'A siteru 'Ai giama ra unanga 'ai la'o, kara 'O sano, “Na oḏi'i nyengara ḏua, bolo nyangu?”

24Ngowa'a gena-ge 'o oḏi'i i'a toma biono re 'o kanau, “Ya, ngoi to oḏi'i ngowa'a 'aḏi tagi-tagi, mada'a sa'olo 'o ate.”

25Yesus dadunu 'a siteru 'Ai giama toma ngowa'a hafu gena-ge 'ai la'o. Ḏua ngowa'a gena-ge 'ai la'o ri la, re oḏi'i ri tarangi. 26Yesus 'o sipo-poma unanga, “Maḏibo tani wala, mada'a no mete'e ḏuḏunu re no siajele awa ra guna ḇato Ngoi to si-la ngana!”

Petrus 'o ngaku 'a Yesus gena-ge 'O Kristus

(Mat. 16:13-20; Luk. 9:18-21)

27Yesus re 'Ai me-mete'e, ananga 'aḏi tagi toma gamu-gamu toma daeraha Kaisarea Filipi. Toma ngo'omo ma golona, Yesus 'o sano ra ananga, “Ngowa'a 'aḏi aje Ngoi ne 'a guna?”

28Ananga ya sangoro, “ 'Age mamuni'a 'aḏi kanau Jou 'a Yohanes tukanga baptis, 'age mamuni'a 'aḏi kanau Jou 'a Elia, re 'age mamuni'a ḏi'i 'aḏi kanau Jou nabi ma lelegu.”#Mrk. 6:14-15; Luk. 9:7-8

29Yesus dadunu 'o sano, “Mada'a na'o mete'e ngini masiretene nena-ne, Ngoi ne 'a guna?” Petrus 'a sangoro, “Jou 'O Kristus.”#Yoh. 6:68-69

30Ḏua Yesus 'o sipo-poma ananga, “Ni siajele awa ra guna ḇato mangale Ngoi.”

Yesus 'o siajele mangale 'Ai sangisara re 'Ai se-sengene

(Mat. 16:21-28; Luk. 9:22-27)

31Gena ḏua, Yesus mulaingi 'o doto'o 'Ai me-mete'e mangale Unanga, Manusia ma Ngowa'a Nau'u, balasu sanga sangisara ma repe, Yahudi manga bi-biri'i, 'imam-'imam ma sae'e re guru-guru 'agama, ananga 'aḏi dawongo Unanga ua re balasu wu sisengene. Mada'a toma wangere ma soi ro'ange, Unanga dadunu 'o 'ahu moju. 32Dadi Yesus 'a gogono riwara, mada'a Unanga 'a siajele Tai me-mete'e. Ḏua Petrus 'o taba'a Yesus 'ai giama re 'aḏi masai'i i'a, kara 'o ḇangata Yesus.

33Mada'a Yesus 'o magelelo i'a re 'O tatamo 'Ai me-mete'e re 'U ḇangata 'a Petrus, “ 'Iblisi, tagi i'a da'a! Fikirana gena-ge manusia manga fikirana. Ma Jou'ongu Madutu 'ai fikirana ua.”

34Gena ḏua, toma ngi'i gena-ge Yesus 'o 'aro'o ngowa'a repe (ma'u mete'e ra Unanga re 'Ai me-mete'e). Ḏua Unanga 'o kanau i'a ra ananga, “ 'A guna ḇato mau 'o mete'e Ngoi, balasu 'a mete'e 'ai mau masiretene riwara#8:34 Enanga ma ngale: Mete'e Ma Jou'ongu Madutu 'ai 'akala ma mau ḇato. re balasu 'o doiti 'ai salib,#8:34 Enanga ma ngale: Matengo i'a 'o ḏu-ḏuanga ḏua sengene sababu 'o mete'e Yesus. kara mete'e Ngoi tau-taunu.#Mat. 10:38; Luk. 14:27 35Sababu 'a guna ḇato ga'a 'o kadiarata pa'i 'ai 'ahu toma dungia nena-ne, unanga gena-ge 'o sanga ua 'ahu kasingado-ngadolo i'a. Mada'a 'a guna ḇato 'o mete'e 'ai mau masiretene riwara sababu 'o mau mete'e Ngoi re di'a Habari Roanga ra Ma Jou'ongu Madutu ino, unanga gena-ge ḏuanga i'a 'o sanga 'ahu kasingado-ngadolo i'a.#Mat. 10:39; Luk. 17:33; Yoh. 12:25 36Sababu ma 'utungu 'i cua na'o ngowa'a matengo 'o sanga 'ori i'a rana mo-moini toma dungia nena-ne ma dara, mada'a 'o sanga ua 'ahu kasingado-ngadolo! 37Sidogo ḏi'i, Sababu 'ori i'a rana mo-moini toma dungia nena-ne ma dara 'i sipula'a ua 'ahu kasingado-ngadolo i'a!

38Toma dungia nena-ne, 'i romanga reo ngowa'a 'aḏi 'isene Ma Jou'ongu Madutu ua? 'A guna ḇato 'o mara'a mangaku mete'e Ngoi re 'ari do-doto'o; Ngoi to mara'a ḏi'i mangaku unanga gena-ge 'Ari me-mete'e wakutu Ngoi, Manusia ma Ngowa'a Nau'u, dadunu to sapolo moju mamete'e Rari Ḇaḇa ma kuasa re mala'ekata-mala'ekata 'Ofi-'Ofi.”

Currently Selected:

Markus 8: SNT

Highlight

Copy