LUKA 8

Abakhasi abalondana nende Yesu

1Inyuma we yako hatititi Yesu yabir'ra mumataala amakali nende amati nakambanga Amang'ana Amalahi ako Bwami bwa Nyasaye. Abechi likhumi nababili balondana n'naye. 2Khandi abakhasi nalebe aba Yesu yali niyahinia mwo ebisieno nende okhubahonia obutekhele balondana n'naye. Nabo bali Mariamu (owalangwa Magadalena) owahinibwa mwo ebisieno bine nabitaru,#Mat. 27:55-56; Mk. 15:40-41; Lk. 23:49 3Joani mukha Kuza, owali omuhenji wabatiyi ba Herode, nende Susana, ma nende abakhasi bandi abenji abarumikhilanga emiandu chiabwe abene okhukhonya Yesu nende abechi baabe.

Olukano lwomumitsi

(Mat. 13:1-9; Mk. 4:1-9)

4Omukanda omukhongo kwali nikwebunjikhanga ne abandu bali nibetsanga khu Yesu okhurula mumataala akabukhan'ne. Ne nababool'la olukano luno. 5“Omumitsi yatsia okhumitsa imwo yiye. Olwa yali namiitsanga imwo mumukunda, ndala yakwa khunjila, ne abandu nibachisena, ma amanyonyi nikachibootsa. 6Eyindi yakwa khulwanda ne olwa yamela yamala niyoma bwangu sichila liloba siliali nende isindil'la tawe. 7Imwo yindi yakwa mubitsakha biamahwa, ma amahwa nikakhula n'nayo halala ne nikachimiina. 8Ne imwo yindi yakwa mumaloba amalahi, nemela, nekhula ma niyama ebiamo hali emia.” Niyakhamala okhuboola yaka yahanzuukha naboola, “Oli namarwi akokhuhul'la, ahulile.”

Lichoomo lietsingano

(Mat. 13:10-17; Mk. 4:10-12)

9Abechi bareeba Yesu esifune siolukano yilwo. 10Nababool'la, “Inywe mwahebwa okhumanya obusiilia bwa amabiso ko Bwami bwa Nyasaye, nebutswa khubandi bosi ketselanga mutsingano, kho bahenge ne baralola, bahul'le nebutswa baramanyilisia.#Isaya 6:9-10

Yesu yenoosia olukano lwom'mitsi

(Mat. 13:18-23; Mk. 4:13-20)

11“Esifune siolukano yilwo nsiesino: imwo neling'ana lia Nyasaye. 12Imwo eyakwa khunjila emanyianga yabo abahul'langa ling'ana; nebutswa Setani yetsanga ma ahinia ling'ana liatsana mumioyo chiabwe khe balekhe okhusubila khase bakhahonibwa. 13Imwo eyakwa khulwanda emanyianga yabo abahul'langa ling'ana ma balibukula nobusangali. Nebutswa silieyinikhanga mubo kupu tawe, basubilanga khulwa amatukhu matititi, nebutswa olwe inyinga yokhutemwa yitsanga nibakwa okhurula khubusubili. 14Ne imwo eyakwa mumahwa emanyianga yabo abahul'langa, nebutswa olwa bachenda mutsinjila tsiabwe, okhuhendela obuhinda nende obulahi bwesibala bibaminanga ne sibali abanyala okhwama habwene tawe. 15Imwo eyakwa mumaloba amalahi ni yabo abahul'langa ling'ana, nibalitila nemioyo emilahi echiatooto, ma baama ebiamo mukhwefwila.

Etaya eyafunikhilwa musipaala

(Mk. 4:21-25)

16“Abulaho omundu ohambianga etaya ma afuunikhakhwo esipaala nohomba achira muusi mwesitanda, nebutswa achiretsanga khumesa kho olwa abandu benjila ne balola obulafu.#Mat. 5:15; Lk. 11:33 17Okhuba libulaho liosi eliabiswa elirakhabisukhe tawe nohomba eliamambiswi elirakhamanyikhe ma lilarule habulafu.#Mat. 10:26; Lk. 12:2 18Kho mwelinde obwa muhul'langa, okhuba uyo oli n'nabio niye ometelwanga nebutswa orali nesindu kata sitititi esiapaalanga ali n'nasio yakhanulwe.”#Mat. 25:29; Lk. 19:26

Nyina Yesu nende abaana babwe

(Mat. 12:46-50; Mk. 3:31-35)

19Nyina Yesu nende abaana babwe betsa khuye nebutswa sibaali abanyala okhwola khuye tawe khulwo omukanda. 20Yamala nabool'lwa, “Mamawo nende abaana benywe basinjiye esioba, benyanga bakhulole.” 21Yesu nakalusia, “Mama wanje nende abaana befwe ni yabo abahul'langa ling'ana lia Nyasaye ma bakhola akaliboolanga.”

Yesu yalenjesia imbumbuyeka

(Mat. 8:23-27; Mk. 4:35-41)

22Litukhu elala Yesu yaniina muliaro halala nende abechi baabe ma nababool'la, “Chende khwambukhe inyanza khutsie injelekha.” Ma nibachiaka oluchendo. 23Olwa bali nibatsitsanga Yesu nachiaka okhukona tsindoolo. Imbutsa ingali yamala nechiaka okhuhungutsa ma eliaro liabwe nilichiaka okhwitsulamwo amaatsi, ma nibaba khusibi esikali. 24Abechi nibatsia okhumubuusia nibaboola, “Omwami, Omwami, khutibanga!” Ma nabuukha nakondekhela omuyeka nende ebikubuli biamaatsi nibikhalisia, ma khwaliho okhulenjela okhukali. 25Nababool'la, “Obusubili bwenywe buli hena?” Ma nibaria okhusila. Nibachenya nibabool'lana, “Niwina omwene uyu, alakanga omuyeka nende amaatsi ma bimuhul'la?”

Yesu yahonia omundu webisieno

(Mat. 8:28-34; Mk. 5:1-20)

26Yesu nende abechibe bambukha inyanza muliaro liabwe niboola musibala sia Gerasi esili oluchelekha lweinyanza ya Galilaya. 27Olwa Yesu yali niyekhele khuluchinga okhurula muliaro, omundu mulala okhurula mwitaala owali nebisieno yakaana n'naye. Khuluhono olurambi omundu uyo siyayebiikhanga tsingubo tawe, ne siyamenyanga munyumba tawe. Yamenyanga mubilindwa. 28Olwa yalola Yesu, yahanzuukha nakwa imbeliwe naboola. “Oli nasina n'nase, Yesu, Omwana wa Nyasaye Oweikulu Okhusila? Khusaayanga oranyasia tawe.” 29Yaboola mbwo sichila Yesu yali nalachile omwoyo kwesifwabwi okhurula muye. Hali khasotso kwamutilanga, ne kata niyabohwangwa nende eminyol'lo yachikatulanga ma es'sieno simukhunga nisimuhenjisie musitsiimi. 30Yesu namureeba, “Eliira lilio niwe wina?” Naye nakalusia “Eliira lianje ni Ligioni”; okhuba ebisieno ebinji biali nibienjila muye. 31Ebisieno nibireba Yesu alekhe okhubilaka okhutsia mubilindwa.

32Esiayo esikali esie tsimbitsi siali ahembi habwene yaho nisiayanga hasikulu. Ebisieno nibimuhomba Yesu abihuchil'le binjile mutsimbitsi yitsio ma naye nabihuchilil'la. 33Ma ebisieno nibirula mumundu uyo ne nibinjila mutsimbitsi. Esiayo siosi sielukha nisiselengera nisikwa munyanza, ma nisitibila mwo.

34Olwabandu abali nibayanga tsimbitsi balola akali nikekhol'le, belukha, nibakalandia mwitaala nende mumichitsi. 35Abandu bamala nibatsia okhulola akali nikekhol'le, ne nibanyoola omundu owebisieno biali nibirul'le mwo niyekhaye habilenje bia Yesu, niyebikhile ma nakungumile; ma nibaria okhusila. 36Ne yabo abali nibakalutsi babenoosia singa owali nebisieno yahonibwa. 37Ma abandu bosi abesibala sia Gerasi nibamuhomba okhurula musibala siabwe, sichila batilwa nende oburi obukali, ma niyenjila muliaro narula yo. 38Omundu owebisieno biali nibirul'le mwo yamuhomba abe n'naye halala. Nebutswa Yesu yamukaya naboola, 39“Kalukha ingo oboole aka Nyasaye akhukholeye.” Ma omundu uyo natsia nalandianga mwitaala liosi kosi aka Yesu amukholeye.

Omukhaana wa Jairo nende omukhasi owatila khulusiche lweingubo ya Yesu

(Mat. 9:18-26; Mk. 5:21-43)

40Olwa Yesu yakalukha khuluchelekha lweinyanza, omukanda kwabandu kwamwinjisia nobusangali, sichila bosi bali nibamulindanga. 41Ne omundu yetsaho owalangwa Jairo, owali omwemeli wesinakoki yabwe. Nakwa hasi habilenje bia Yesu ma namusaaya atsie munyumba mumwe, 42sichila omukhaana uwe omutelwa, owemihika likhumi nende chibili, yali nafwitsanga.

Olwa Yesu yali natsitsanga yo abandu beminan'na khuye okhusila. 43Ne omukhasi mulala owali naratsanga amatsahi, khulwemihika likhumi nende chibili yali mumukanda kwabandu yikwo; ne yali niyamal'la biosi ebia yali n'nabio khubalesi, ne abulaho owanyala okhumuhonia. 44Omukhasi uyo yalonda Yesu munyuma ma natila khulusiche lweingubo yiye, ne okhuratsa khwamatsahi kaake nikhukhalisia. 45Yesu naboola, “Niwina oundil'lekhwo?” Bosi nibaboola abulaho omundu omutil'le khwo. Ma Petero naboola, “Omwami omukanda kwabandu nomwinji khuibe.” 46Nebutswa Yesu yaboola, “Omundu undil'lekhwo, sichila manyile tsingufu tsirul'le khwise.” 47Olwomukhasi uyo yalola mbu siyali onyala okhwekoyokoyia tawe, yetsa natechelanga, niyelumba imbeli wa Yesu. Namanyia imbeli wabandu bosi esifune esiachila namutila nende singa obwa yali nahon'ne bwangubwangu. 48Yesu namubool'la, “Omukhaana wanje, obusubili bubwo bukhuhonisie, otsie nomulembe.”

49Olwa yali nasil'loma, omurumwa yetsa okhurula munyumba yomwemeli wesinakoki naboola, “Omukhaanawo ufwiye. Oranyasia Omwibaali khandi tawe.” 50Nebutswa Yesu yakahul'la ma nabool'la Jairo, “Oraria tawe, subila busubila, ne yetsa okhuhona.” 51Olwa yoola munyumba, siyahuchil'la omundu wosi okhwinjila n'naye tawe narali Petero, Yohana, Yakobo nende abebuli bomukhaana uyo. 52Abandu bosi bali nibalakayanga, nibekhuula khulwo okhufwa khwomwana uyo. Ne Yesu nababool'la, “Muralakaya tawe, sichila omwana uyu siafwiye tawe, nebutswa akonanga.” 53Nabo nibamutsekhel'la sichila bali nibamanyile ufwiye. 54Nebutswa Yesu yamutila omukhono ma naboola, “Buukha omwana wanje!” 55Omwoyo kukwe nikukalukha muye, nabuukha bwangubwangu. Yesu nabalaka mbu bamuhe esiokhulia. 56Abebuli baabe bachenya, nebutswa Yesu nabakaya barakhabool'lakhwo omundu wosi akali nikekhol'le yako tawe.

Currently Selected:

LUKA 8: EBAIBO

Highlight

Copy