LUKA 9

Yesu yaruma Abechi likhumi nende babili

(Mat. 10:5-15; Mk. 6:7-13)

1Yesu yalanga abechi baabe likhumi nende babili halala ma nabahelesia tsingufu nende obunyali bwokhuhinia ebisieno biosi nende okhuhonia obulwaye. 2Ma nabaruma batsie okhukamba Obwami bwa Nyasaye nende okhuhonia obulwaye. 3Nababool'la, “Olwa mutsia murakhabukule khwo esindu tawe, kata indabusi, kata omutata kwomusumi, kata ebiokhulia, kata efetsa, nohomba kata likoti liakhabili.#Lk. 10:4-11; Ebikh. 13:51 4Inyumba yosi eya namwinjisibungwemwo, mumenyemwo okhwola olwa mwakharule mwitaala yimwo. 5Ne nibabula okhumwinjisia olwa namurule mwitaala yimwo mubungulule olukukhi oluli mutsindubar'ro tsienywe bube oburibuli khubo.” 6Abechi barula nibayeyema mumataala, nibakamba Amang'ana Amalahi, ne nibahonia abandu habundu hosi.

Obuhendi bwa Herode khu Yesu

(Mat. 14:1-12; Mk. 6:14-29)

7Olwo omuruchi Herode yahul'la kosi akali nikekholanga, naba nende esihenda mwoyo sichila abandu abalala bali nibaboolanga mbu Yohana Omubaputisi usimukukhile okhurula mubafu.#Mat. 16:14; Mk. 8:28; Lk. 9:19 8Abandi bali nibaboolanga mbu Elija ulolekhele, ne abandi nabo nibaboola ni mulala khubaroobi bakhale osimukukhile. 9Herode naboola, “Yohana ndamukhalaka omurwe, ni mundu sina uyu owambul'langa amang'ana yaka khuye?” Naba nende obuha bwokhumulola.

Yesu yalisia abasaatsa etsielefu tsirano

(Mat. 14:13-21; Mk. 6:30-44; Yoh. 6:1-14)

10Abechi bakalukha nibabool'la Yesu kosi akabali nibakhol'le. Yesu yababukula natsia n'nabo sibeka mwitaala elilangwa Betsisaida. 11Nebutswa olwemikanda chiabandu chiamanya, chiamulonda. Yesu yabenjisia ma nababool'la ako Bwami bwa Nyasaye, nahonia abali nobuha bwokhuhonibwa. 12Olwe eliuba liachiaka okhuyela, abechibe likhumi nababili batsia khuye nibamubool'la, “Sebula abandu batsie mumataala nende mumichitsi banyoole ebiokhulia nende ahokhukona, sichila hakhuli hano nomusitsiimi.” 13Nebutswa Yesu yababool'la, “Inywe mubahelesie ebiokhulia.” Nabo nibamukalusia, “Sikhulikhwo nesindu siosi tawe nichirali emikaati chirano nende tsisutse tsibili. Fwana khutsie okhukula ebiokhulia khulwa abandu yaba bosi.” 14Bali nibaliho abasaatsa abahela etsielefu tsirano. Ma Yesu nabool'la abechibe, “Yikhasie abandu mubitunduma biamakhumi karano karano.” 15Abechi nibakhola mbwo, ma nibekhasia abandu bosi. 16Ma Yesu nabukula emikati chirano yichio nende tsisutse tsibili nahenga mwikulu, nakhupila Nyasaye embwo, namekania ma nahelesia abechi baabe babakabul'le. 17Bosi balia ma nibekura ma abechi nibatol'lesia ebitonye ebiasikala nibitsula ebitinyilo likhumi nende bibili.

Petero yaribula Yesu singa Masihi

(Mat. 16:13-19; Mk. 8:27-29)

18Litukhu elala Yesu yali nasaayanga yenyene, ne abechi baabe bali ahembi. Ma nabareeba, “Abandu baboolanga ise nise wina?” 19Nabo nibamukalusia, “Abalala baboolanga niwe Yohana Omubaputisi, abandi baboolanga niwe Elija, ne abandi baboolanga ibe oli mulala khubaroobi bakhale osimukukhile.”#Mat. 14:1-2; Mk. 6:14-15; Lk. 9:7-8 20Ma nabareeba, “Nenywe muboolanga nise wina?” Petero nakalusia, “Ibe niwe Masihi wa Nyasaye.”#Yoh. 6:68-69

Yesu yal'loma khukokhusal'la nende okhufwa khwe

(Mat. 16:20-28; Mk. 8:30—9:1)

21Ma Yesu nabakaya barakhabool'lakhwo omundu wosi amang'ana yako tawe. 22Ma khandi nababool'la, “Khatimba Omwana wo Mundu asal'le okhusila ma asulwe nende abakhulundu, abesaalisi abakhongo nende abebaali ba Malako. Yakherwe, nebutswa inyuma wamatukhu kataru yakhasimukusibwe.”

23Ma nabool'la abandu bosi, “Omundu wosi niyakhenya okhuba omulondi wanje, okhwola yekaye omwene, yetukhe omusalapa kukwe sielitukhu ma yanonde.#Mat. 10:38; Lk. 14:27 24Okhuba omundu owenya okhuhonia obulamubwe yakhabukosie, nebutswa owakhakosie obulamubwe khulwanje, yakhabuhonie.#Mat. 10:39; Lk. 17:33; Yoh. 12:25 25Ni bukhala sina omundu naba niyakhanyoola esibala siosi ne nakosia obulamu bubwe nohomba ye omwene okhutiba? 26Omundu naba niyasimbila ise omurwe nohomba amang'ana kanje, Omwana wo Mundu naye yakhamusimbile omurwe olwaliitsa mubukhongo bubwe, nende mubukhongo obwa Samwana, nende obwa bamalaika abatsienukhu. 27Mubool'langa tooto mbu baliho abalala hano abarakhafwe tawe okhwola olwa balilola Obwami bwa Nyasaye.”

Yesu yakalukhana likondo lilie

(Mat. 17:1-8; Mk. 9:2-8)

28Amatukhu munane nikabir're inyuma wamang'ana yaka, Yesu yabukula Petero, Yohana nende Yakobo, natsia n'nabo musikulu okhusaaya.#2 Pet. 1:17-18 29Olwa yali nasaayanga, likondo lilie liakalukhana, ne tsingubotsie nitsiba tsindafu okhusila nitsing'inang'ina. 30Ne abandu babili nibalolekhaho nibal'lomanga n'naye. Bali Musa nende Elija, 31abalolekha nibali nende obukhongo bwomwikulu, nibal'loma nende Yesu khukokhufwa khukhwe okhwa yenya okhuhesia lichoomo lia Nyasaye mu Yerusalemu. 32Petero nende abasie bali mbali mutsindoolo tsingali, nebutswa olwa bahembukhil'la balola obukhongo bwa Yesu nende yabo babili abali nibasinjiye n'naye. 33Olwa abandu babili yabo bali nibabukhananga nende Yesu, Petero yamubool'la, “Omwami, nobulahi okhusila mbu khube hano. Khwombokhe amahindu kataru, elala libe elilio, elala elia Musa ne elindi elia Elija.” Siyamanya aka yaboolanga tawe.

34Olwa Petero yali nasiboola yako, lilumbesi lietsa nilibafuunikha; ma abechi nibaria muno olwelilumbesi lietsa khubo. 35Omwoyo kwarul'la mwilumbesi tsana nikuboola, “Uyu niye Omwana wanje owandeela; mumuhulilenje.”#Isaya 42:1; Mat. 3:17; 12:18; Mk. 1:11; Lk. 3:22 36Olwo omwoyo yikwo kwamala okhul'loma, Yesu yalolekha nali yenyene. Abechi basiling'ana khu kosi akali nikekhol'le. Sibabool'lakhwo omundu wosi mumatukhu yako khukabali nibalutsi tawe.

Yesu yahonia omusiani owali nende Es'sieno

(Mat. 17:14-18; Mk. 9:14-27)

37Litukhu elialondakhwo olwa bali nibekhele okhurula khusikulu tsana, omukanda omukhongo kwabandu kwakan'na Yesu. 38Omundu mulala mumukanda yikwo yahanzuukha naboola, “Omwibaali khuhombanga ohenge omwana wanje sichila no mwana wanje omutelwa. 39Es'sieno simufumilanga, ma yayula ne nisimusambakasia ne olufilo nilurula mumunwa. Sitsilil'langa okhunyasia oluhono, sisimulekhanga bwangu tawe. 40Mombele abechi baabo basihinie, nebutswa sibanyal'le tawe.” 41Yesu naboola, “Inywe lisuba elirali nobusubili eliebera, ndakhabe n'nenywe nimwefwilanga okhwola lina?” Ma nabool'la omundu uyo, “Leera omwanawo hano.” 42Olwomwana uyo yali natsitsanga khu Yesu, es'sieno siamukoka hasi, nisimusambakasia. Nebutswa Yesu yakondekhela omwoyo kwesifwabi yikwo, nahonia omwana uyo, ma namuhana khu samwana. 43Abandu bosi bachenya muno khulwo obukhongo bwa Nyasaye.

Yesu yal'loma khandi khukokhufwa khukhwe

(Mat. 17:22-23; Mk. 9:30-32)

Abandu bali nibasichenya khu kosi aka Yesu yali nakholanga, ne nabool'la abechi baabe, 44“Murakhebil'le aka nyenya okhumubool'la kano tawe. Omwana wo Mundu atsitsanga okhurebwa mumakhono kabandu.” 45Nebutswa abechi sibamanya esifune siamang'ana yako tawe. Liabiswa khubo kho babule okhulimanyilisia, ne baria okhumureeba khuka mang'ana yako.

Niwina oli omukhongo?

(Mat. 18:1-5; Mk. 9:33-37)

46Obuhingani bwabukhila mubechi, niwina mubo owanobe omukhongo okhuyomba abandi bosi.#Lk. 22:24 47Yesu yamanya akabali nibapaalanga ma nabukula omwana omutu namusinjisia khusibafu sie 48nababool'la, “Omundu wosi niyakhenjisia omwana uyu muliira lianje aba niyenjisianga ise, ne wosi ounyinjisianga ise, yenjisinjia uyo owaruma. Okhuba oli omutu khwinywe mwesi, niye omukhongo.”#Mat. 10:40; Lk. 10:16; Yoh. 13:20

Oramufukulanga nowolubeka lwenywe

(Mk. 9:38-40)

49Yohana naboola, “Omwibaali, khwalutsi omundu nahinianga ebisieno muliira lilio, nikhumukaya sichila sialondananga n'nefwe tawe.” 50Nebutswa Yesu namubool'la, “Murakhamukaya tawe, sichila oramufukulanga tawe nowolubeka lwenywe.”

Abasamaria basuula okhwinjisia Yesu

51Olwa amatukhu kokhubukulwa khwa Yesu okhutsia mwikulu kali ahembi okhwola, yalola mbu atsie Yerusalemu. 52Yamala naruma abarumwa bamwekholel'le, nibatsia nibenjila mwitaala elia Basamaria, bamunyool'le habundu hokhukona. 53Nebutswa abene taala sibayenya okhumwinjisia tawe sichila yali natsitsanga Yerusalemu. 54Kho abechi baabe, Yakobo nende Yohana olwa balola mbwo, nibaboola, “Omwami, wenyanga khulache omul'lo kurule mwikulu kwitse kubamulule?”#2 Abar. 1:9-16 55Nebutswa naye nasukhana ha bali nabakondekhela. 56Naboola simumanyile imbila eyo Mwoyo owamulondangakhwo tawe. Okhuba Omwana wo Mundu siyaitsa atibie obulamu bwabandu nebutswa abuhonie.#9:56 Amahandiko kandi amakhulu kametangakhwo okhuboola ma nibatsia mwitaala lindi.

Abakhoya okhuba abalondi ba Yesu

(Mat. 8:19-22)

57Olwa bali nibali khuluchendo omundu mulala yabool'la Yesu, “Nakhulonde hosi aha notsie.” 58Yesu namubool'la, “Ebibwe bili namako kabio, ne amanyonyi kali nebitsu biako, nebutswa Omwana wo Mundu abula kata ahokhuhulukhila nokhweyalisia.”

59Nabool'la omundu oundi, “Nonda.” Nebutswa uyo naye naboola, “Omwami, mbuchilil'la nzie okhuyabila Papa wanje mbelio.” 60Yesu namubool'la, “Lekha abafu bayabile abafu babwe abene, nebutswa ibe tsia olandie ako Bwami bwa Nyasaye.”

61Ne omundu undi namubool'la, “Nakhulonde, nebutswa umbuchilil'le sebulane nende abomunyumba yanje mbelio.”#1 Abar. 19:20 62Yesu namubool'la “Wosi ofumilanga imbako yokhulima ma akhupa amasemo inyuma siakwan'ne mu Bwami bwa Nyasaye tawe.”

Currently Selected:

LUKA 9: EBAIBO

Highlight

Copy