LUKA 7

Yesu yahonia omurumikhili wetswoni

(Mat. 8:5-13)

1Olwa Yesu yali namal'le okhuboola amang'ana yako kosi khubandu, yatsia Kaperinaumu. 2Omurumikhili wetswoni nalebe, owa yali niyayanza, yali nalwala nali ahembi okhufwa. 3Olwetswoni yahul'la aka Yesu, yaruma khuye abakhulundu ba Bayahudi okhumusaaya yetse okhuhonia omurumikhiliwe. 4Olwa boola khu Yesu bamuhomba buuli nibaboola, “Omundu uyu akwan'ne omukhol'le singa obwa akhusaayile. 5Wayanza oluyia lwefwe ma kata omwene wakhwombokhela esinakoki yefwe.”

6Yesu yamala natsia n'nabo. Olwa yali nali ahembi okhwola, etswoni yamurumila abalina okhumubool'la, “Omwami, oranyakhana tawe. Okhuba singwan'ne ibe unzitsile munyumba mwanje tawe. 7Niko akachil'le nindola sindi onyala okhwitsa khuibe omwene tawe; haana butswa ling'ana ne omurumikhili wanje alahona. 8Okhuba ise khandi ndi omundu owabikhwa inyuma wobunyali, ma ndi nende abasikari inyuma wanje. Mbool'langa mulala ‘Tsia’, ne atsia; ne oundi ‘Yitsa’ naye niyetsa; khandi mbool'langa omurumikhili wanje, ‘Khola yili’ ma akhola.” 9Yesu yachenya olwa yahul'la mbwo, nasukhana nabool'la omukanda okwali nikumulondanga, “Mubool'langa sili okhunyoolakhwo obusubili singa buno, kata mu Isiraeli mwosi.” 10Abali okhurumwa olwa bakalukha ingo wetswoni banyoola omurumikhili tsana nahon'ne.

Yesu yasimukusia omwana womulekhwa

11Inyuma khwo hatititi, Yesu yatsia mwitaala elialangwa Naini, nali nende abechibe ma nende omukanda omukali. 12Ne olwa yoola butswa musilibwa sielitaala, abandu barul'la mwo nibachingile om'bili kwomusiani, owali omwana omutelwa womukhasi omulekhwa. Abandu abenji abomwitaala bali nende omukhasi uyo. 13Olwo Omwami yamulola, yamubool'la, “Oralakaya tawe.” 14Niyesunda ahembi n'naye, ma natsia natila khwisanduku liomufu ma abandu abali nibalichingile nibasinjila. Yesu naboola, “Omusiani, khubool'langa buukha.” 15Owali nafwiye yekhala nachiaka okhul'loma. Ne Yesu namuhana khunyina. 16Oburi bwabahamba bosi, nibetsoomia Nyasaye, nibaboola, “Omuroobi omukhongo ubuukhile mwifwe. Nyasaye witsile okhuhonia abandu baabe.” 17Amang'ana yako kalanda musibala sie Buyahudi siosi nomumbeka tsindi.

Abarumwa okhurula khu Yohana Omubaputisi

(Mat. 11:2-19)

18Olwa abechi ba Yohana bamubool'la amang'ana yaka kosi, yalanga babili khubo, 19ma nabaruma khu Mwami bamurebe, “Ibe niwe owaboolwa owitsanga nohomba khulindil'le oundi?” 20Olwa abechi babili yabo boola khu Yesu bamubool'la, “Yohana Omubaputisi akhurumile khukhurebe noli niwe owa yaboola witsanga nohomba khulindil'le oundi?” 21Olwene yilwo Yesu yahonia abandu abenji abali nobulwaye, nende tsifu nende ebisieno khandi nahaana okhulola khubali nibabofula. 22Nakalusia abarumwa ba Yohana nababool'la “Tsie, mubool'le Yohana aka mulutsi khandi nende aka muhuliye. Ababofu balolanga ne abalema bachendanga, yabo abali nobuchele basiywanga, abasilu bahul'langa, abafwa basimukusibwanga, ne abatakha bakambilwanga Amang'ana Amalahi.#Isaya 35:5-6; 61:1 23Noweikhabi omundu orali na honzoni khwise.”

24Olwa abarumwa ba Yohana bali nibatsiye, Yesu yachiaka okhubool'la emikanda aka Yohana. “Olwa mwatsia musitsiimi mwenyanga okhulola sina? Mwenyanga okhulola obunyasi butswa obunuywanga nomuyeka? 25Kho mwatsia okhulola sina? Mwenyanga okhulola omundu owebikhile tsingubo tsindahi? Abandu abebiikhanga tsingubo tsindahi nibalia obwale, bamenyanga mutsinyumba tsiabaami. 26Mbool'le, inywe mwatsia okhulola sina? Mwatsia okhulola omuroobi nohomba? Yee, mubool'langa mbu mwalola uyu oyombele omuroobi. 27Yohana uyu niye owa Amahandiko Amatsienukhu kaboolanga, ‘Ndakharume omurumwa wanje imbeliwo, mbu akhulombele injila.’#Mal. 3:1 28Mubool'langa, Mubaana babandu bosi sialikhwoho omukhongo okhuyomba Yohana Omubaputisi tawe. Kata mbwo oli omutu mu Bwami bwa Nyasaye nomukhongo okhuyomba Yohana.”

29Abandu bosi halala nende abasololi bobusuru olwa bamuhulila bahuchil'la obulunji bwa Nyasaye, ma bali nibabaputiswa nende Yohana.#Mat. 21:32; Lk. 3:12 30Nebutswa Abafarisayi nende abebaali ba Malako basula obuloosie bwa Nyasaye khubwabwe ma sibabaputiswa nende Yohana tawe.

31Yesu natsilil'la okhuboola, “Ndakhafwanania abandu belisuba yili nende sina? Nabandu bambila sina abene yaba? 32Bafwana singa ababuukha abekhaye musiiro. Omukanda mulala kuhanzukhilanga okundi nikuboola, ‘Khumwembeye tsinyembo tsiebisel'lo ne simusin'ne tawe, khumwembeye tsinyembo tsiesibeela ne simulakayile tawe.’ 33Yohana Omubaputisi yetsa ne siyalachila khwo obusuma nohomba okhunywa ewaini tawe, ne inywe nimuboola, ‘Ali nes'sieno!’ 34Omwana wo Mundu niyetsa nalachilanga ne nanywa, nimuboola, ‘Lole omundu omulangu khandi omunywi uyu, omulina wabasololi bobusuru nende aboni.’ 35Kata mbwo obuchesi bwa Nyasaye bumanyibwanga okhuba obulunji nende yabo bosi ababuhuchil'langa.”

Yesu yatsia munyumba mwa Simoni Omufarisayi

36Omufarisayi mulala yalanga Yesu atsie okhulia munyumba mumwe. Yesu natsia munyumba yimwo ma niyekhala khubiakhulia. 37Mwitaala yimwo yalimwo omukhasi owamenyanga obulamu bwetsimbi. Olwa yahul'la mbu Yesu ali munyumba yo Omufarisayi uyo, yabukula echupa ya amafura akahunyanga esuswa#Mat. 26:7; Mk. 14:3; Yoh. 12:3 38niyetsa nasinjila inyuma wa Yesu ahembi nebilenjebie, nalakaya nasaaba ebilenje bia Yesu nende amasika kaake. Ma niyeya ebilenje bia Yesu nende liswi liokhumurwe kukwe, nabitsunzuna ma nabibakha amafura tsana. 39Omufarisayi owamulanga olwa yalola yaka ne napaala mumwoyokwe, “Omundu uyu alaba nali omuroobi tooto yakhamanyile omukhasi uyu noweimbila sina, mbu nowetsimbi.”

40Yesu nabool'la Omufarisayi uyo, “Simoni, ndi nende ling'ana elia nyenya okhukhubool'la.” Ne Simoni naye namukalusia naboola, “Yee omwibaali, boola.” Yesu naboola, 41“Omuhambia libere nalebe yali nabandu abali namakobi babili. Mulala yali nelikobi etsidinari#7:41 Etsidinari Edinari ndala ehelana nomurungo kwomukholi womukhono okwelitukhu elala. etsimia tsirano, ne oundi etsidinari amakhumi karano. 42Olwa baramwa okhurunga amakobi kabwe, omundu uyo yabalekhela bombi. Niwina mubo owakhayanza omundu uyo okhusila?” 43Simoni namukalusia naboola, “Mbaalanga nowalekhelwa tsinyinji.” Yesu namubool'la “Oli habwene.” 44Ma nasukhana khumukhasi uyo ne nabool'la Simoni, “Ololanga omukhasi uyu? Olwa nyinjiye munyumba mwo siumbeye khwo amaatsi kokhwesaaba ebilenje bianje tawe; nebutswa omukhasi uyu usaabile ebilenje bianje nende amasika kaake ne nabieya nende liswi lilie. 45Ibe siwali okhunyinjisia nende okhunzunzuna tawe, nebutswa ye okhurula olwa nyinjiye sialekhele khwo okhutsunzuna ebilenje bianje tawe. 46Ibe siumbakhile khwo amafura khumurwe kwanje tawe, nebutswa ye umbakhile ebilenje bianje amafura. 47Niko akachil'le nikhubool'la, obuyanzi obwinji obwa amanyisie bumanyianga mbu tsimbi tsitsie tsinyinji tsilekheywe. Nebutswa uyo owalekhelwa tsindititi amanyianga obuyanzi obutititi butswa.”

48Ma Yesu nabool'la omukhasi uyo, “Tsimbi tsitsio tsilekheywe.” 49Ne abali nibekhaye n'naye khubiokhulia nibachiaka okhurebana, “Uyu nimundu wambila sina onyala okhulekhela abandu tsimbi?” 50Nebutswa Yesu yabool'la omukhasi uyo, “Obusubili bubwo bukhuhonisie; tsia nomulembe.”

Currently Selected:

LUKA 7: EBAIBO

Highlight

Copy