LUKA 6

Lireebo khukelitukhu lie Sabato

(Mat. 12:1-8; Mk. 2:23-28)

1Yesu yali nabir'ranga mumikunda chiobule khwitukhu lie Sabato. Abechi baabe nibachiaka okhunoka ebiangala biobule nibafulungusisia mumakhono nibalia.#Okhuka. 23:25 2Abafarisayi abalala nibabareeba, “Busina mukholanga akomusilo mwitukhu lie Sabato?” 3Yesu nabakalusia, “Musili okhusomakhwo aka Daudi yakhola halala nende abasie olwa bali neinzala?#1 Sam. 21:1-6 4Yenjila munyumba ya Nyasaye nabukula emikati echiahanwa khu Nyasaye ma nalia khandi nahakhwo abandu baabe. Ne nomusilo khumundu wosi okhulia khwo emikati yichio nibarali abesaalisi bonyene.”#Abal. 24:9 5Ma Yesu namalila nokhuboola, “Omwana wo Mundu niye Omwami we Sabato.”

Yesu yahonia omundu owomukhono kwanyela

(Mat. 12:9-14; Mk. 3:1-6)

6Mu Sabato yindi Yesu yatsia musinakoki niyebaala. Omundu yalimwo owomukhono kukwe omusaatsa kwali nikwanyela. 7Abebaali ba Malako nende Abafarisayi benyanga banyoole esifune esiokhumwinjil'la#6:7 esiokhumwinjil'la No okhumusitaaka., ma nibalindil'la balole niyakhahonia mwitukhu lie Sabato. 8Nebutswa Yesu yamanya amakani kabwe, nabool'la omundu womukhono kwanyela, “Sinjila, wesunde hakari womukanda.” Omundu uyo natsia nasinjila hakari. 9Ma Yesu nababool'la, “Murebanga, nomusilo okhukhola amalahi mwitukhu lie Sabato nohomba okhukhola amabi? Okhuhonia obulamu nohomba okhwira?” 10Yabahenga bosi ma nabool'la omundu tsana, “Nyiila omukhonokwo.” Ne naye nakhola mbwo, ne omukhonokwe nikuhona. 11Basinyikha okhusila ma nibabool'lana obwa nabakhol'le Yesu.

Yesu yela abechi likhumi nende babili

(Mat. 10:1-4; Mk. 3:13-19)

12Olwene yilwo Yesu yatsia khusikulu okhusaaya, ma namalayo obutukhu bwosi nasaayanga khu Nyasaye. 13Olwa bwasia, yalanga abechi baabe, niyela mwo likhumi nababili aba yakulikha abarumwa: 14Simoni (owa yakulikha Petero), nende Anderea omwana wabwe, Yakobo nende Yohana, Filipu nende Batsolomayo, 15Matayo nende Tomasi, Yakobo omwana wa Alufayo, nende Simoni (owalangwa Selote#6:15 Owalangwa Selote Omundu owayanza esibala sisie owehinia kata okhusifwila.), 16Yudasi omwana wa Yakobo, nende Yudasi Isikariote owamala nasiemana Yesu.

Yesu yebaala nahonia abandu

(Mat. 4:23-25)

17Olwa Yesu yali niyekhele okhurula khusikulu halala nende abarumwa baabe, yasinjila habundu ahel'lekhe. Omukanda omukhongo okwabechi baabe nende abandu abenji abarula Ebuyahudi yosi nende Yerusalemu ma nende khutsinjinga tsia Turo nende Sidoni, bosi betsa okhumuhulila nende okhuhonibwa tsifu tsiabwe. 18Khandi yahonia bosi abali nemioyo chiesifwabwi. 19Abandu bosi batemanga okhumutiila khwo, sichila obunyali bwarulanga khuye, nibubahonia bosi.

Tsikhabi nende esibeela

(Mat. 5:1-12)

20Yesu yahenga abechi baabe ma naboola,

“Muli neikhabi inywe abatakha,

sichila obwami bwa Nyasaye nobwenywe

21“Muli neikhabi inywe abali neinzala luno;

sichila mwakhekure.

“Muli neikhabi inywe abalakayanga luno;

sichila olweinyuma mwakhatsekhe.

22“Muli neikhabi nyinga abandu bamubihil'lwanga, nibamusula, nibamunyeka, nende okhubihia amera kenywe, khulwo Mwana wo Mundu.#1 Pet. 4:14 23Sangale mwitukhu yilio, mwetuute khulwo obusangali, sichila omukabwa kwenywe omukali kuli mwikulu. Okhuba nimbwo abakuka babwe bakhol'la abaroobi.#2 Aketsi. 36:16; Ebikh. 7:52

24“Nebutswa Mulitsiboolelwa inywe abahinda,

sichila mumal'le okhunyoola obuhuluukhi bwenywe.

25“Mulitsiboolelwa inywe abekuranga luno,

sichila olweinyuma mwakhahul'le inzala.

“Mulitsiboolelwa inywe abatsekhanga luno,

sichila mwakhabeelele nimulakaya.

26“Mulitsiboolelwa olwa abandu bosi bamuralanga obulahi,

sichila abakuka babwe bakhol'la abaroobi bobubehi akene yako.

Okhuyanza Abasuku

(Mat. 5:38-48; 7:12)

27“Nebutswa mubool'langa inywe abambul'langa; Muyanze abasuku benywe, mukhol'le yabo abamubihil'lwanga obulahi, 28mubalamile ikhabi yabo abamulamanga esilamo siobubi, mubasaayile abamunyekanga. 29Omundu naba nakhukhupaka oluhi khuluseya, omusukhanichisie oluseya lundi khandi akhupake khwo; Omundu nabukula likoti, omulekhele lisati khandi. 30Omundu wosi nakhusaba esindu omuhelesie, ne omundu naba nakhunuula emianduchio oramubanza tawe. 31Mukhol'le abasienywe akamwenyanga nabo bamukhol'le.#Mat. 7:12

32“Nimuba nimwakhayanza abandu abamuyanzanga bonyene, neikhabi sina eyamwakhanyoola? Kata abetsimbi bayanzanga yabo aba bayanzanga. 33Ne nimuba nimukhol'la obulahi yabo abamukhol'langa obulahi bonyene, neikhabi sina eyamwakhanyoola? Kata abetsimbi bakholanga mbwo. 34Ne nimuba nimwakhahambia libere khu yabo aba munaayanga mwakhatoolakhwo injelesio, neikhabi sina eyamwakhatoola? Kata abetsimbi bahambianga libere khubetsimbi basiabwe, khe babakaluchisie singa mbwo. 35Tawe, nebutswa muyanze abasuku benywe, ma mubakhol'lenge obulahi. Muhambie libere sila okhunaya okhukaluchisibwa, nilwo olwa mwakhanyoole amatani amenji ma mwakhabe abaana ba Nyasaye Oweikulu Okhusila. Okhuba ye nomulahi khu abarali nende embwo nende khubabi. 36Mube abetsimbabasi singa Papa wenywe ali owetsimbabasi.

Okhukhalachila abandi

(Mat. 7:1-5)

37“Murakhalachila abandi esiina, kho Nyasaye alekhe okhumukhalachila esiina; murakhalachila abandi obubi, kho Nyasaye arakhamukhalachila obubi tawe; mulekhele abasienywe, kho Nyasaye amulekhele. 38Muhaane khubasienywe, ne Nyasaye yakhamuha omuchelo omulahi, okwikar'rwe, okusungusilwe ma okubungulukhile. Omuchelo okwa murumikhilanga okhuchel'la mwo abasienywe nikwo okwa Nyasaye yakhamuchel'lemwo.”

39Yesu Nababool'la olukano luno, “Omubofu siyakhanyala okhwemel'la omubofu wasie tawe. Nakhola mbwo bombi bakhakwa mubuko.#Mat. 15:14 40Omwechi siayomba omwibaali we tawe, nebutswa omwechi wosi niyakhamala ameko kaake ne ahelana nende omwibaaliwe.#Mat. 10:24-25; Yoh. 13:16; 15:20

41“Busina ohenganga oluswaswi oluli mumoni yomwana wenywe nebutswa siololanga omukul'lo okuli mumoni mwo tawe. 42Nohomba, wakhabool'la mbwena omwana wenywe, ‘Mwana wefwe, lekha khuhinie oluswaswi mumoni mumwo,’ ne siololanga omukul'lo okuli mumoni mumwo tawe? Omukalama ibe, orange ohinie omukul'lo mumoni mumwo, khe olole bulahi okhuhinia oluswaswi oluli mumoni yomwana wenywe.

Omusaala nende ebiamo biakwo

(Mat. 7:16-20; 12:33-35)

43“Omusaala omulahi sikwamanga ebiamo ebibi tawe, nohomba omusaala omubi sikwamanga ebiamo ebilahi tawe. 44Siomusaala kumanyikhanga khulwe ebiamo ebia kwamanga. Sionyala okhunoka amakhuyu khumahwa tawe, nohomba sionyala okhunoka emisabibu khumarakalu tawe.#Mat. 12:33 45Omundu omulahi ahinianga akali amalahi mwibiikhilo lilie lilahi elio mumwoyo kukwe; nebutswa omundu omubi ahinianga amabi. Okhuba ako omwoyo kwasilana n'nako niko akomunwa kuboolanga.#Mat. 12:34

Omwombokhi omuchesi nende omuhingwa

(Mat. 7:24-27)

46“Busina munanganga ‘Omwami, Omwami,’ ne simukholanga akamubool'langa tawe? 47Wosi owitsanga khwise, nahulila amang'ana kanje, ne nakakhola, ndakhamumanyia obwa afwana. 48Afwana nende omundu owombokha inyumbaye, nayaba hasi okhusila, nara omuse khulwanda. Olwe ikhumaatsi yarul'lamwo, omuchel'la kwelumba khunyumba tsana nebutswa sikwachitechesia tawe, sichila yali niyombokhwa obulahi. 49Nebutswa omundu wosi ohul'langa amang'ana kanje ne narakalonda, afwana nende omundu owombokha inyumba hasi sila okhuyaba omuse. Olwomuchel'la kwelumbakhwo yamala ekwe bwangu – ne okhukwa khwayo khwali okhukali okhusila.”

Currently Selected:

LUKA 6: EBAIBO

Highlight

Copy