MATIUS 28

I Yesus po'ule'mo tinumuu'

(Mrk. 16:1-10, Luk. 24:1-12, Yoh. 20:1-20)

1Salatan sinaa nu Sabat ilapasmo, i sinaa nu Duminggu subu-subu hondo, i Maria Makdalena ka' i Maria anu sangga'at aijo' nambamo nontoa kubulan aijo'. 2Monti-montiik kino luulu'mo anu daka' hondo. Samian na Malaikat nu Tumpu nintatau' lengkat mae i suluga' lantas nolingginakon batu pinongkulubi aijo', ka' sinumuhang i buannyo. 3Ohupnyo nu Malaikat aijo' sumo kilat ka' pakeannyo pute' hondo. 4Suludadu anu nonjagai kiijo' nabuhukmo hondo sampe aha i lakatnyo sumo mian anu natemo.

5Malaikat aijo' notatae hi to bou-boune aijo', “Boli mabuhuk! Kusumbu' komiu molio i Yesus anu sinalibmo aijo'. 6Ia madi'mo ko anu i aiya. Ia po'ule'mo tinumuu', sumo anu Tinaeakon-Nyomo u'utu mae. Imbo' ka' toa na tampat-Nyo pinompomale'an Ia. 7Palia-lia' uuka mamba, ka' opoto'iakon hi anu saja' mombatuki Ia, ‘Ia po'ule'mo tinumuu' ka' tempo' uuka Ia nambamo i moona nokiijo' i Galilea. I kiijo' mae komiu montoaje Ia!’ O inau', apaa na anu tinaloakonkumo hi komiu.”

8To bou-boune aijo' malia-lia' nompala'i kubulan aijo'. Kalana mongoa'i buhuk tiba lame' nogogalo'anmo, aha nopadeka' ka' nompoto'iakon han aijo' hi aha anu saja' mombatuki Yesus.

9Monti-montiik i Yesus tinokamo nonsingkaboti to bou-boune haha aijo' ka' notatae, “Tabea'!” Lantas aha tinoka nongohani Ia, lapas aitu nontanggogolimo tengke-Nyo ka' nonsombah Ia. 10“Boli mabuhuk,” koonyo i Yesus hi aha, “Lako' poto'iakon hi to utu-utus-Ku da aha mamba mokiijo' i Galilea; i kiijo' mae aha montoaje Aku.”

Suludadu anu monjagai nambamo nompoto'i

11Hau-haunyo to bou-boune haha aijo' namba, aha to pia-piangkuka na suludadu anu nonjagai kubulan aijo' ninsusule'mo i kota', ka' nompoto'i hi Kapala nu to Ima-imam iwi-iwi' apaa na anu jinadimo. 12Kapala nu to Ima-imam aijo' binasale' tiba to pola-polaya' nu Yahudi, lantas nombee'i doi manjoo' hondo hi suludadu anu monjagai aijo', 13ka' notatae, “Komiu tionyo montaloakon, saba' anu saja' mombatuki Yesus aijo' tinokamo pihi-pihi, ka' nombuling mayat-Nyo tempo'nyo hau-haunyo komiu hoyot. 14Ka' de i gubernur mohongo han aijo', osale'ije mami na ia da komiu madi' opoposia.”

15Saba' suludadu anu monjagai aijo' nongala doi aijo' ka' nombau sumo anu pinoto'imo hi aha. Kalana aijo, sisik aijo' daagi' saja' togilele hi mian nu Yahudi sampe sinaa aiya.

I Yesus nanintoamo hi anu saja' mombatuki Ia

16 # Mat. 26:32, Mrk. 14:28 Sampulu' ka' sa'angu' na anu saja' mombatuki Yesus aijo' namba nokiijo' i bungkutnyo nu Galilea, sumo anu pinalentahkonmo i Yesus hi aha. 17Salatan aha nontoamo i Yesus kiijo' mae, aha tinolodadupumo nonsombah Ia, panyo daagi' ko anu i kiijo' hi aha bata-bata. 18I Yesus nongohani aha ka' notatae, “Iwi-iwi' na kuasa i suluga' ka' i dunia aiya binee'mo hi beleng-Ku. 19#Kis. 1:8 Kalana aijo' lako'mo hi iwi-iwi' na bansa ka' songko-songko na dunia potimbali na aha anu saja' mombatuki Aku. Opalamandikan na aha ka' o sanggo na sanggo nu Tuuma, ka' Anak, ka' Roh nu Tumpu Allah. 20O' ajan na aha mohongo-hongo iwi-iwi' apaa na anu Pinalentahkon-Kumo hi komiu. Ka' o inau', Aku saja' monjagai komiu sampe sinaa imihinyo mae.” 110

Currently Selected:

MATIUS 28: LAILOE

Highlight

Copy