MARKUS 1

Sisikon i Yohanes anu Mompalamandikan

(Mat. 3:1-12, Luk. 3:1-18, Yoh. 1:19-28)

1Aiyamo na Lele Ma'ima' anu mongkona i Yesus Kristus, Anak nu Tumpu. 2#Mal. 3:1 Lele Ma'ima' aijo' lengkat pe'e sumo anu tinulis i Nabi Yesaya, sumo uuka,

“ ‘Aiyamo na posaihon-Ku,’ koonyo nu Tumpu;

‘Aku monsai ia imoona, Beleyum i mihije,

da ia mombau kajalananum.’

3 # Yes. 40:3 Daagi' ko mian molo-moloboo' i padang bone',

‘Posadiamo na jalan hi Tumpu;

pohatakon na to jala-jalan anu Nu tului.’ ”

4Sumo anu tinulis aijo', sumo aitumo na i Yohanes i lubat mae i padang bolaa. Ia nompalamandikan mian ka' nompotokakon lele lengkat mae hi Tumpu. “Komiu tionyo mombabali'i dosa-dosa'um ka' tionyo o palamandikan, da Tumpu mongampuni komiu,” sumo aitu na koonyo i Yohanes. 5Iwi-iwi' na mian anu nolengkat mae i kampung Yudea ka' i kota Yerusalem namba nohongo i Yohanes. Aha nongakui to dosa-dosa' nu aha, ka' i Yohanes nompalamandikan aha i Kaunyo nu Yordan.

6 # 2Raj. 1:8 I Yohanes nompake pakean bulu nu unta. Pombutu'nyo atina'mo kilit, ka' anu nukaan kihi-kihi', ka' juu' nu uani'. 7Ia noleleakon sisik aiya, “Lapasje na aku, ka' toka na mian anu lebe daka' molingkudui aku. Ka' matiduku mombukai segot nu sapatunyo pe'e, aku madi' pantas. 8Aku mompalamandikan komiu nu uee, panyo ia mompalamandikanje komiu nu Roh nu Tumpu.”

I Yohanes nompalamandikan i Yesus

(Mat. 3:13-17, Luk. 3:21-22)

9Tempo'nyo aitu i Yesus tinoka lengkat mae i Nazaret, i tano' nu Galilea, ka' i Yohanes nompalamandikan Ia i Kaunyo nu Yordan. 10Salatan i Yesus i lubat lengkat i uee aijo', Ia nontoa langit tinabuka' ka' Roh nu Tumpu nintatau' mae sumo tomonsi' malapati' i buan nu ubak-Nyo. 11#Kej. 22:2, Mzm. 2:7, Yes. 42:1, Mat. 3:17, 12:18, Mrk. 9:7, Luk. 3:22 Lapas aitu i hongonyo potatae nu Tumpu nontaeakon, “Beleyum na Anak anu Ku kalibosi. Beleyum na anu momposanang kinyonyoangku.”

I Yesus sinobaan nu Ibilis

(Mat. 4:1-11, Luk. 4:1-13)

12Lau-laus lapas aitu Roh nu Tumpu nomboa i Yesus i padang bolaa. 13Patompulu' na sinaa Ia jinojoong i kiijo', sinobaan nu Ibilis. To bina-binatang anu ma'ela' suele kiijo' tiba Ia, ka' to mala-malaikat anu mongkalibosi Ia.

I Yesus nolaga aha opat na anu saja' mongikan

(Mat. 4:12-22, Luk. 4:14-15, 5:1-11)

14Salatan i Yohanes tinalungku', i Yesus namba nokiijo' i Galilea, ka' noleleakon Lele Ma'ima' lengkat hi Tumpu i kiijo' mae. 15#Mat. 3:2 Koo-Nyo, “Tumpu malia'mo montampu'uni mompalentah. Balatobatmo bolimo mombau dosa-dosa'um, ka' opalesayamo na Lele Ma'ima' anu lengkat mae hi Tumpu!”

16Salatan i Yesus i lumajang i biwi nu Dowiwi Galilea, Ia nontoa ua'aha na anu saja' mongikan, aitumo i Simon ka' utus ise'nyo i Andreas. Aha hau-haunyo mompagala ikan i dowiwi aijo' nu buani'. 17I Yesus notatae hi aha, “Batuki na Aku. Aku mongajan komiu mombuani' mian.” 18Lau-laus aha nompala'i buani' nu aha, ka' nombatuki Yesus.

19I Yesus i lumajang lau-laus, ka' nontoa mule' ua'aha na mian moto utus anu sangga'at, aitumo i Yakobus ka' i Yohanes, to ana-anak i Zebedeus. Aha kiijo' i uno nu duangan, ka' hau-haunyo mompoko'ima'i buani' nu aha. 20I Yesus lau-laus nolaga aha. Ka' aha nompala'i tuuma nu aha i uno nu duangan tiba te mian anu tinamboannyo. Lantas aha namba nombatuki Yesus.

Mian anu sinoku'on nu roh ma'idek

(Luk. 4:31-37)

21I Yesus ka' anu saja' mombatuki Ia tinoka i kota Kapernaum. Tempo' po'ule'mo sinaa nu Sabat, i Yesus ninsoop i uno nu laigan pogalejaan, ka' nontampu'uni nongajan. 22#Mat. 7:28-29 To mia-mian anu nohongo, binangang i balu-balu'-Nyo nu Ia nongajan. Kalana Ia mongajan ko kuasa-Nyo, madi' sumo to gulu-gulu' agama.

23Tempo'nyo aitu anu sinoku'on nu roh ma'idek ninsoop i uno nu laigan pogalejaan, ka' noloboo', 24“O Yesus, mian nu Nazaret, Beleyum mongka'oho' mombau apaa hi kami? Beleyum toka da monsilakai kami? Kusumbu' ihe na Beleyum: Beleyumo na posaihon anu Susi' lengkat mae hi Tumpu Allah!”

25“Hokot!” sinegaan i Yesus na roh aijo', “Posabatmo lengkat hi mian aiya!”

26Sahingga roh ma'idek aijo' nompada-padahakon mian aijo' hoso-hoson, lapas aitu nosabat lengkat hi mian aijo' ka' noloboo'. 27Iwi-iwi' na mian binangang hondo, ka' sinailapas aha notatae samian ka' sangga'at, “Ibeh apaa na aiya? Sa'angu' na pokinde' anu sala'je! Tiba palentah ka' kuasanyo, Ia mompalentah to roh-roh ma'idek nosabat, ka' aha nohongo Ia!”

28Sahingga lele mongkona i Yesus tinogilelemo lia-lia' i songko-songko na tano' nu Galilea.

I Yesus nompa'alin da'isan na mian

(Mat. 8:14-17, Luk. 4:38-41)

29I Yesus ka' anu saja' mombatuki Ia, nompala'imo laigan pogalejaan aijo', ka' namba i laigan i Simon ka' i Andreas. I Yakobus ka' i Yohanes namba suele ka' aha. 30Monian tina nu bengkele' i Simon hau-haunyo nusihabi i kamale'an. Tempo'nyo i Yesus ka' anu saja' mombatuki Ia ninsoopmo i laigan aijo', pinoto'imo hi Yesus na han aijo'. 31Sahingga i Yesus namba hi tina nu bengkele' i Simon ka' nontoongi limanyo, ka' nonsampusi ia nobula. Panasnyo na'alinmo ka' ia mule' nontampu'unimo nomposadiai kapalaluan nu aha.

32Mamalom salatan sinaa makakinsapmo, to mia-mian nomboa hi Yesus iwi-iwi' na mian anu masakit, ka' anu sinoku'onmo nu roh ma'idek. 33Songko-songko na miannyo i kota aijo' nosa'angu'mo i ahop nu laigan aijo'. 34Lantas i Yesus nompa'alinakon da'isan na mian anu mongoa'i sansala nu ngangahan na panyakit, ka' nolaa' mule' manjoo' na roh ma'idek. Ia madi' nompobee' to roh-roh ma'idek aijo' motatae, kalana aha monsumbu' ihe na Ia.

I Yesus nongajan i Galilea

(Luk. 4:42-44)

35Dodododopnyo, daagi' subu-subu hondo i Yesus nobula ka' nompala'i laigan. Ia namba nokiijo' i tampat anu liing i sambiha' nu kota, ka' binalado'a i kiijo' mae. 36Panyo i Simon ka' to sanga-sangalunyo namba nolio Ia. 37Ka' salatan aha nompahakabot Ia, aha notatae, “Iwi-iwi' na mian hau-haunyo molio kita Tuuma.”

38Panyo i Yesus nontaami, “Imbo' da kita molausakon lumambananto i kota-kota sangga'at anu mompaha ohani aiya. Aku tionyo mombee'i sisik nu Tumpu kiijo' mae, kalana aijo'mo na patujungku toka mae.”

39 # Mat. 4:23, 9:35 Kalana aijo' i Yesus namba noyaya, songko-songko i Galilea, ka' nombee'i sisik nu Tumpu i to lai-laigan pogalejaan, ka' nolaa' to roh-roh ma'idek.

I Yesus nompa'alin samian anu ko panyakit kilit

(Mat. 8:1-4, Luk. 5:12-16)

40Samian na anu ko panyakit kilit anu talalo okabuhuk tinoka hi Yesus. Mian aijo' natidupu ka' notatae, “De Tuumangku mongka'oho', Tuumangku timbali nompa'alin aku.”

41I Yesus nolibos hi mian aijo'. Jadi, Ia nompanya mian aijo' ka' Ia notatae, “Aku mongka'oho', pa'alinmo!” 42Tempo'nyo aijo' panyakit aijo' imadi'mo ka' na'alinmo. 43Lantas i Yesus nonsai ia namba tiba pokinde' aiya, 44#Im. 14:1-32 “Jaga, boli o sisik mau mule' hi he, panyo lako'mo hi imam, ka' poita na ia da mompototu'u saba' beleyum na'alinmo. Lantas bau pina'alinanum aijo', palasombahkon na koloban sumo anu pinalentahkon i Musa, salaku bukuti' hi aha to mia-mian, kalana beleyum totu-totu'u na'alinmo.”

45Panyo mian aijo' namba, ka' lau-laus saja' nonsisik anu jinadi aijo' iyayamae sampe i Yesus ola ninsoop hoko-hokot i kota. Ia ola jinojoong i sambiha' nu kota i tampat anu liing. Mau sumo aijo' mian saja' toka hi Ia, lengkat iyayamae.

Currently Selected:

MARKUS 1: LAILOE

Highlight

Copy