MARKUS 2

I Yesus nompa'alin samian anu lupe

(Mat. 9:1-8, Luk. 5:17-26)

1Ilapas tino pia-pianasinaa i Yesus ninsusule'mo i Kapernaum. Sahingga tinogilelemo na lele, taalu' Ia daagi' hau-haunyo i laigan. 2Lantas da'isan na mian tinoka. Aha sinihuk kiijo' mae sampe madi'mo kino tampat. I sabatan pe'e nobuke'mo nogogensotanmo na mian. Lantas i Yesus nompotoka hi aha lele lengkat mae hi Tumpu Allah. 3Hau-haunyo Ia notatae, aha opat na mian nolemban mae samian anu lupe binoanyo hi Yesus. 4Panyo kalana mian talalo da'isan, aha madi' noko ala nati ohani hi Ia. Jadi, aha nombukai atop i buannyo, pataknyo kiijo' na i Yesus. Lapas aijo', aha nonguluakon mian lupe aijo' tiba ampasnyo. 5Salatan i Yesus nontoa kinodaka' na palesaya nu aha, Ia notatae hi mian lupe aijo', “Anak-Ku, dosa'um ingampunanmo.”

6To pia-piangkuka na gulu' agama hau-haunyo suha-suhang i kiijo' nontampu'unimo nompotutugakon i uno nu kinyonyoanyo, 7“Baani hondo na mian aiya motatae sumo aijo'! Ia nompopo'ambangmo Tumpu. Ihe na timbali mongampuni dosa', de misa' Tumpu?”

8Tempo' aitu mule' sinumbu' i Yesus na pikilan nu aha. Lantas Ia notatae, “Kadaka' komiu mompotutugakon sumo aitu i uno nu kinyonyoaum? 9Iya na lebe dengke: montaloakon, ‘Dosa'um ingampunanmo,’ kabai montaloakon ‘Bulamo, hangkat na ampasum ka' lajangmo’? 10Panyo tempo' uuka, Aku momponyata'mo hi komiu saba' i dunia aiya Anak nu Mian ko kuasa mongampuni dosa'.” Lantas i Yesus notatae hi mian lupe aijo', 11“Pobulamo, hangkat na ampasum ka' pinsusule'mo!”

12Ia tinuminjo ka' nalia-lia' nongala ampasnyo, lantas nosabat sinakisian nu aha iwi-iwi'. To mia-mian haha aijo' binangang ka' nompuji' Tumpu. Koonyo nu aha, “Ma'isa toho' kita nontoa anu jinadi sumo aiya!”

I Yesus nolaga i Lewi

(Mat. 9:9-13, Luk. 5:27-32)

13I Yesus ninsusule' mule' i biwi nu Dowiwi Galilea. Da'isan na mian tinoka hi Ia, ka' Ia nongajan aha. 14Hau-haunyo i Yesus i lumajang nokiijo', Ia nontoa samian na anu saja' montage hasin, sanggonyo i Lewi, anak i Alfeus, hau-haunyo suha-suhang i Kanton nu Hasin “Batukimo na aku”, koonyo i Yesus hi ia. Sahingga i Lewi tinuminjo ka' nombatuki Yesus.

15Tempo'nyo i Yesus hau-haunyo mongkaan i laigan i Lewi, tinokamo da'isan na anu saja' montage hasin, ka' to mia-mian anu o anggap madi' ma'ima' nu mian da'isan, mongkaan hingga-hinggat tiba i Yesus ka' anu saja' mombatuki Ia. Sabab da'isan na aha anu nombatukimo i Yesus. 16To pia-piangkuka na gulu' agama gampa nu aha mian nu Farisi nontoa i Yesus mongkaan hingga-hinggat tiba anu saja' montage hasin ka' to mia-mian anu osangka madi' ma'ima' aijo'. Jadi aha nompokilawa hi anu saja' mombatuki Yesus, “Kadaka' gulu'um mongkaan hingga-hinggat tiba anu saja' montage hasin ka' to mia-mian anu madi' ma'ima' aijo'?”

17I Yesus nohongo pompokilawa nu aha aijo', lantas nontaami, “Mian anu sehat, madi' palalu Dokoten; panyo la ahi' mian anu masakit. Aku toka misa' da molaga mian anu monsangka butongnyo na'ima'mo, panyo mian anu monsangka butongnyo madi' talakana'.”

Mompo'ileeki puasa'

(Mat. 9:14-17, Luk. 5:33-39)

18Daagi' ko sa'angu' na tempo' anu saja' mombatuki Yohanes anu Mompalamandikan ka' to mia-mian nu Farisi hau-haunyo puasa'. Lantas daagi' ko mian tinoka hi Yesus ka' nompokilawa, “Kadaka' anu saja' mombatuki Yohanes anu Mompalamandikan ka' anu mombatuki mian nu Farisi bapuasa', panyo anu mombatuki Kita Tuuma i madi'?”

19I Yesus nontaami, “Tempo' nu bau-bauon po'osoan, apaa to mia-mian anu ilaga madi' mongkaan? De boting mo'ane daagi' hingga-hinggat ka' aha, tantu aha mongkaan. 20Panyo tokaje na tempo'nyo boting mo'ane aijo' o'alamo lengkat kiijo' hi aha. Tempo'je aijo', atina'je ka' aha madi' mongkaan.

21Madi' ko mian anu montamban baju' anu manau'mo tiba dedelian nu anu bu'ou. Sabab hude pontamban aijo' timbali mombeak baju' aijo', sahingga beaknyo timbali lebe daka'. 22Sumo aitu mule', madi' ko anu molambe' anggur bu'ou i uno nu polambe'an anu pininmo. Kalana anggur bu'ou aijo' na monsaduakon sahingga polambe'an aijo' mobiha'. Imihinyo mae ohu-ohua' na anggur aijo' mobubus. Anggur anu bu'ou tionyo olambe'akon i polambe'an anu bu'ou suele!”

Mompokilawa mongkona sinaa nu Sabat

(Mat. 12:1-8, Luk. 6:1-5)

23 # Ul. 23:25 Daagi' ko sansinaan i sinaa nu Sabat, tempo'nyo i Yesus notulu i sa'angu' na ale' nu gandum, anu saja' mombatuki Ia nontampu'unimo nompadak gandum. 24Lantas to mia-mian nu Farisi notatae hi Yesus, “Kadaka' anu saja' mombatuki Komiu molanggai hukum nu agamanto, nombaumo anu nupoliwa' nu sinaa nu Sabat?”

25-26 # 1Sam. 21:1-6 #Im. 24:9 I Yesus nontaami, “Ma'isa toho' komiu nombasa', apaa na anu binau i Daud, tempo'nyo i Abyatar hau-haunyo nokalaja tinimbali imam daka'. Tempo'nyo i Daud ka' to mia-miannyo no'ohop, ka' madi' ko anu okaan, ia ninsoop i Laigan nu Tumpu Allah, ka' nongkaan roti anu sinombahkonmo hi Tumpu. Ka' roti aijo' binee'nyo hi to mia-miannyo. Padahan de koonyo nu agamanto, ola to ima-imam na timbali mongkaan roti aijo'.” 27Lantas i Yesus notatae mule', “Sinaa nu Sabat binau bau kapentingan nu mian; misa' mian bau sinaa nu Sabat. 28Jadi, Anak nu Mian mongkuasai sinaa nu Sabat.”

Currently Selected:

MARKUS 2: LAILOE

Highlight

Copy