MATIUS 27
27
I Yesus binoamo hi Pilatus
(Mrk. 15:1, Luk. 23:1-2, Yoh. 18:28-32)
1Subu-subu hondo, iwi-iwi' na Kapala nu to Ima-imam, ka' polaya' nu Yahudi nombaumo sa'angu' na kaputusan da o pateimo na i Yesus. 2Aha nompungu Ia, ka' nomboa Ia, lantas nombee'mo hi Pilatus, gubernur pamalentahan nu Roma.
Kinapatean i Yudas
(Kis. 1:18-19)
3 #
Kis. 1:18-19
Salatan i Yudas anu nongkabisa'i aijo' nontoa i Yesus binee'anmo hukuman, ia nompele-pele'mo. Lantas ia nonsule'akonmo tolumpulu' na doi salaka aijo' hi Kapala nu to Ima-imam ka' to pola-polaya' nu Yahudi. 4Ia notatae, “Aku binala dosa'mo, nongkabisa'imo mian anu madi' ko sala'nyo, sahingga Ia i hukum nate!”
Panyo aha nontaami, “Kami madi paduli itina'? Aijo' ulusan miu!”
5I Yudas nolumbu'akon doi i uno nu Laigan nu Tumpu, lantas namba ka' nonsegotmo butong, ka' natikalayo'.
6Kapala nu to Ima-imam nontoluk doi aijo' ka' notatae, “Doi aiya, doi nu baso'. Koonyo nu atulan nu agama, doi aiya madi' timbali oposoop i uno nu tampat ponguna'an doi i Laigan nu Tumpu.” 7Salatan nosa'angu'mo na pikilan nu aha, pinakemo nu aha na doi aijo' bau pinongoli tano' anu osanggohi Tano' nu anu Mombau Kuhon Tano'. Tano' aijo' opake bau pongkubulan to mia-mian anu i santano'an. 8Mokonyo aijo' sampe sinaa aiya, tano' aijo' sinanggohan, “Tano' Baso'”.
9 #
Za. 11:12-13
Kalana aijo', tinimbalimo apaa na anu tinaeakon nu Nabi Yeremia, aijo'mo, “Aha nontalima tolumpulu' na doi salaka, aijo'mo na oli nu anu sinetujuanmo nu bansa Israel salaku pinombayan Ia. 10Ka' doi aijo' pinakemo nu aha bau pinongoli Tano' nu anu Mombau Kuhon Tano', sumo anu pinalentahkon nu Tumpu hi belengku.”
I Pilatus nompalesamo palakala i Yesus
(Mrk. 15:2-5, Luk. 23:3-5, Yoh. 18:33-38)
11Tempo'nyo i Yesus nangadapmo hi Pilatus, gubernur nu lipu' aijo', i Pilatus nompokilawa, “Pa' Belento Tomundo' nu mian Yahudi?”
“Sumo itina'mo potataeum”, tinaaman i Yesus. 12Panyo tempo'nyo Kapala nu to Ima-imam ka' to pola-polaya' nu Yahudi nontaloakonmo posala' anu manjoo' hondo kona hi Yesus, Ia madi' montaami apa-apaa.
13Kalana aijo' i Pilatus notatae hi Ia, “Te Belento madi' mohongo iwi-iwi' posala' nu aha hi Belento aijo'?”
14Panyo i Yesus madi' nontaami mau pe'e santaa', sahingga gubernur aijo' binangangmo hondo.
I Yesus binee'an hukuman mate
(Mrk. 15:6-15, Luk. 23:13-25, Yoh. 18:39–19:16)
15De tempo'nyomo Molame'akon Paskah, gubernur biasanyo mompolapas samian anu tinalungku' montuluti pongka'oho' nu mian da'isan. Ihe na anu nu pile'i nu aha. 16Tempo'nyo aitu daagi' ko samian na i hukum anu talasanggo, Sanggonyo i Yesus Barabas. 17Jadi, tempo'nyo mian da'isan sinilimu'mo, i Pilatus nompokilawamo hi aha, “Ihe na anu oka'oho' miu, da ku lapasakon hi komiu? I Yesus Barabas kabai i Yesus anu osanggohi i Kristus?” 18I Pilatus notatae sumo aijo', kalana ia monsumbu' saba' anu mongkuasai Yahudi nombee' i Yesus hi aha, kalana aha madi' sanang na kinyonyoa nu aha.
19Tempo'nyo aitu i Pilatus hau-haunyo sinumuhang i kulusi, anu pomputusian palakala, bengkele'nyo nompotuun potuunon sumo uuka hi ia, “Boli beleyum matigalo' i palakala hi mian anu madi' ko kosala'nyo aijo', sabab kalana Ia, aku kino ipion ma'idek sinaa aiya.” 20Panyo Kapala nu to Ima-imam ka' to pola-polaya' nu Yahudi sabole-bole monsale'i mian da'isan da mompoita hi Pilatus, da i Barabas opobebas ka' i Yesus na o hukum mate. 21Lantas gubernur aijo' po'ule' nompokilawa hi aha, “Aha ua'aha na mian aijo', ihe na oka'oho' miu ku pobebasakon hi komiu?”
“I Barabas,” tinaaman nu aha.
22“Desumo aitu, apaa na kubau hi Yesus anu osanggohi Kristus?” i Pilatus nompokilawa hi aha.
“Salibmo na Ia!” tinaaman nu aha iwi-iwi'.
23“Panyo apaa na anu ma'idek binau-Nyo?” pinokilawa i Pilatus.
Lantas aha noloboo' lebe mahoson mule', “Salibmo na Ia!”
24 #
Ul. 21:6-9
Ahennyo i Pilatus tinonginau', saba' ia madi'mo timbali moko ala mombau apa-apaa, ka' to mia-mian haha aijo' ugaat motomuhukmo. Jadi ia nongala uee lantas i ahop nu mian da'isan aijo', ia nombaso'imo limanyo ka' notatae, “Aku madi' mangaku ko sala'nyo i kapatean nu mian aiya! Aijo' ulusan miu!”
25Iwi-iwi' na mian da'isan aijo' nontaami, “Ii', pojohokmo da kamimo na montanggung ka' to ana-anak mami hukuman lantalan la silakamo!”
26Lapas aijo' i Pilatus nompolapasmo i Barabas hi aha, ka' aha nonsaimo mian nompohos i Yesus; ka' nombee' Ia da o salib.
To Sulu-suludadu nongkabiangimo i Yesus
(Mrk. 15:16-20, Yoh. 19:2-3)
27Lapas aijo' to Sulu-suludadu i Pilatus nomboamo i Yesus ninsoop i laigan daka' nu gubernur, ka' iwi-iwi' na pasukan sinilimu'mo nontiikubi Yesus. 28Aha nongukat baju' i Yesus, ka' nompopake hi Ia juba' buhitnyo mingkamumu'. 29Aha noombau sa'angu' na makota kandang anu ko hii'nyo, ka' pinosoku' i ubak i Yesus. Lapas aitu aha nompotoong sangkau na tokon pinotoong-Nyo i lima, i sasu koanan-Nyo, lantas tinolodadupu na aha i ahop-Nyo ka' nompopo'ambang Ia. “Soosa' Tomundo Mian nu Yahudi!” na koonyo nu aha. 30Aha nontupe'i Ia, ka' nongala tokon aijo', lantas nombongkuk Ia i ubak-Nyo. 31Lapas aha nompahaikakon Ia, aha nongukat juba' buhitnyo kamumu', lantas po'ule' nompopake posi baju'-Nyo. Lapas aitu, Ia binoa nosabat da o salibmo.
I Yesus sinalibmo
(Mrk. 15:21-32, Luk. 23:26-43, Yoh. 19:17-27)
32I totonga' nu jalan, aha nompahakabot tiba samian anu lengkat mae i Kirene, sanggonyo i Simon. Aha nompakisa mian aijo' monsimbu salib i Yesus. 33Lapas aitu, aha tinoka i sa'angu' na tampat sanggonyo Golgota anu alati'nyo, “Tampat nu Popoake”. 34#Mzm. 69:22 I kiijo' aha nompo'inumi Yesus anggur anu ginalo'an nu pou'. Panyo salatan i Yesus nontumi'mo anggur aijo', Ia madi'mo nongka'oho' nonginum.
35 #
Mzm. 22:19
Lapas aijo' aha nonsalibmo Ia ka' nombagi-bagimo baju'-Nyo ingonde na nombagi. 36Lapas aijo' aha sinumuhang monjagai Ia i kiijo'. 37I buan nu ubak-Nyo, aha nompokona tulisan anu momposala' aijo'mo: “Aiyamo na i Yesus, Tomundo nu Mian Yahudi.” 38Hingga-hinggat tiba Ia, aha nonsalib suele tololang ua'aha; samian i sasu koanan, samian mule' i sasu kowi-Nyo.
39 #
Mzm. 22:8, 109:25 To mia-mian anu notulu i kiijo' kinolilo-lilok na ubak ka' nongambangi i Yesus. 40#Mat. 26:61, Yoh. 2:19 Aha notatae, “Beleyum na anu mongka'oho' mohobo'akon Laigan nu Tumpu, ka' nompotinjo ola i uno nu tolunsinaa! De Belento Anak nu Tumpu, pintau'mo mae i salib atina' ka' oposalamat na butong-Um!”
41Sumo aitumo mule' na Kapala nu to Ima-imam ka' to gulu-gulu' agama tiba to pola-polaya' nu Yahudi mompopo'ambang i Yesus. Aha notatae, 42“Ia momposalamatakon mian sangga'at, padahan posi butong-Nyo, Ia madi' moko ala momposalamat! De Ia tomundo nu Israel, sahanyo Ia uuka mintau'mo lengkat mae i salib aijo', atina'je ka' kami mongka'oho' palesaya hi Ia. 43#Mzm. 22:9 Ia palesaya hi Tumpu ka' notatae, tukoonyo Ia Anak nu Tumpu. Soba imbo' da otoanto pa' Tumpu timbali momposalamat Ia uuka.”
44To tolo-tololang anu sinalib tiba Ia, aijo' suele mompopo'ambang Ia sumo aijo'.
I Yesus sinilakamo
(Mrk. 15:33-41, Luk. 23:44-49, Yoh. 19:28-30)
45Sonsu-sonsu'un na sinaa, kopinnyo totolu' na jam, songko-songko na lipu' tinimbali pinikat. 46#Mzm. 22:2 Jam totolu' mamalom, i Yesus noloboo' notatae daka-daka', “Eli, Eli lama sabakhtani?” alati'nyo, “O Tumpu Ku, o Tumpu Ku, kadaka' Belento nompala'imo Aku?”
47To pia-piangkuka na mian kiijo' nohongo loboo'nyo, ka' notatae, “Ia molaga i Elia!” 48#Mzm. 69:22 Samian anu kiijo' hi aha nopadeka' lia-lia' namba nongala bunga gahanggan, lantas i lobongnyo i anggur malosing. Lapas aitu pinosusuknyo i tuntung nu kau' ka' pinotepesnyo i biwi Yesus.
49Panyo to mia-mian sangga'at notatae, “Tanda'i pe'e, imbo' da otoanto, pa' i Elia toka momposalamat Ia!”
50Lapas aitu i Yesus noloboo' mule' daka-daka', lantas nompopupusmo nyawa-Nyo.
51 #
Kel. 26:31-33
Lalanse' anu pinosegot i uno nu Laigan nu Tumpu, nobeak tinimbali ohua', lengkat i buannyo tinoka i aluknyo. Dunia ginayu'an, ka' to bungku-bungkutnyo nu batu nobiha-biha'. 52To kubu-kubulan tinabuka', ka' manjoo' na mian anu pinalesayamo hi Tumpu anu natemo po'ule' pinotumuu'. 53Aha nosabat lengkat i to kubu-kubulan, salalan i Yesus po'ule'mo tinumuu' lengkat i kapateannyo, ka' aha ninsoopmo nokiijo' i Yerusalem, ka' kiijo' mae da'isan na mian montoamo aha.
54Kapala nu pasukan nohingga-hinggat tiba to sulu-suludadu anu hau-haunyo monjagai Yesus, inabuhukmo hondo salatan nongoa'imo luulu' ka' iwi-iwi' anu jinadimo aijo'. Aha notatae, “Totu'u, Ia aiya Anak nu Tumpu!”
55 #
Luk. 8:2-3 I kiijo' suele manjoo' na to bou-boune anu hau-haunyo montanggalakon mae. Ahamo na anu nombatukimo i Yesus nontulungi Ia lengkat pe'e mae i Galilea. 56Anu kiijo' hi aha aitumo i Maria Makdalena, Maria tinanyo i Yakobus ka' i Yusuf, ka' tinanyo nu to ana-anak i Zebedeus.
I Yesus i lamunmo
(Mrk. 15:42-47, Luk. 23:50-56, Yoh. 19:38-42)
57Pihi aijo' tinokamo na samian anu kaya lengkat mae i Arimatea, sanggonyo i Yusuf. Ia suele anu saja' mombatuki Yesus. 58Ia namba hi Pilatus ka' nomoita mayat i Yesus. Lantas i Pilatus nompalentahkon da mayat i Yesus obee'akon hi ia. 59Jadi i Yusuf nongalamo mayatnyo ka' sinaputnyo nu hude lenan anu bu'ou. 60Lantas aitu, ia nompo'una' mayat i Yesus i uno nu kubulan posi anunyo anu binaunyo i uno nu sa'angu' na bungkutnyo nu batu. Lapas aijo', ia nolingginakonmo batu daka' bau pongkulubi bau pontumban bolo' aijo', lantas ia namba. 61I Maria Makdalena, ka' i Maria anu sangga'atan jinojoong ka' sinumuhang kiijo' nongahopi kubulan aijo'.
Anu monjagai kubulan
62Dodododopnyo sina-sinaa, i sinaa nu Sabat, Kapala nu to Ima-imam ka' to mia-mian nu Farisi namba hingga-hinggat nangadap hi Pilatus 63#Mat. 16:21, 17:23, 20:19, Mrk. 8:31, 9:31, 10:33-34, Luk. 9:22, 18:31-33 ka' notatae, “Kita Tuan, kami tinonginau'mo tempo'nyo mian anu baleko' aijo' daagi' tumuu', Ia toho' notatae, ‘Sailapas tolunsinaa, Aku po'ule'mo tumuu'.’ 64Kalana aitu, palentahkon na mian anu monjagai kubulan aijo' ima-ima' sampe sinaa ko itolunnyo, da anu saja' mombatuki Ia madi' timbali montomang mayat-Nyo lantas motatae hi to mia-mian tukoonyo po'ule'mo pinotumuu' lengkat i kasilakannyo. Ka' akan anu imihinyo aijo, lebe ma'idek ka' lebe molingkudui anu i moonanyo.”
65“Komiu daagi' ko suludadu ponjagai,” koonyo i Pilatus hi aha, “Lako'mo jagai na kubulan aijo' totu-totu'u.”
66Lantas aha namba i kubulan, nonsegen batu pontumbannyo ka' nompojoong anu monjagai i ahopnyo, da boli ko anu mohenggo kubulan aijo'.
Currently Selected:
MATIUS 27: LAILOE
Highlight
Share
Copy
Want to have your highlights saved across all your devices? Sign up or sign in
