MAREKÙT 12

“Ap aike anggur yabu serogo welagaukwa,” ìlùk, oba lìrogo yogoisasike wene

(Mat.21:33-46; Luk.20:9-19)

1At Yesùt en wene atì'nogo yogoisasikesik he, hobuk wene aike oba lìrogo mel yogoisasike:

“Ap aike eyabumo anggur awì yasike. Yasikesik he, leget wùtìk, eken sagalogo amusu keralhì logogun oba kweang habulhìk, ineileken logogun oba laleka pelatìk, isike. Isikesik he, ap aike serogo logouagalùk hisalùk he, ebe o wele'ma atoma lagaike. 2Lagaikesik werek kolek, eken ìtenem palharek oba higit asi agaikomo re, ap eyabu esewerek mene a'nogo nen it ap serogo logouagalùk hisasike mene amanogo nen anggur eken aike palogo wogosuagalùk, atitigeke mene aike inoba lakhei wagaike. 3Lakhei wagaikomo, it ap amanogo inoba wagaike mene re, ebe tùgì warogo eken paletì'lek welegat apotkwe lakhesukwa. 4Lakhesukwama lagaikomo re, hobuk atitigeke mene aike inoba lakhei wagaikomo wagaike mene re, it en ekalì warogo tùgì ùkùloak kageik-kagauk hogo wasukwa. 5Atì'nogo hagasukwama re, hobuk atitigeke mene aike lakhei wagaikeat. Wagaikomo re, ebe motogat wasukwa. Wasukwama re, hobuk at atitigeke mene aike inebe logolegat it ap amanogo inoba laksa wagaikomo wagaukwama re, it en he, he'nakit tùgì warogo hisìgìk, he'nakit inebe motok inoatìk, isukwa. 6Atì'nogo heleleng hogo inoasukwama re, at eyabu esewerek mene a'nogo aput etaùken hutik mene omakeat atì nek agaikomo re, at en he,

An naput yìat inoba lakhoumo re, inane agauk hogo hai warogo wanugun o, ìlùk akasikesik he, ebe hobuk inoba lakhei wagaikeat. 7Lakhei wagaikomo waganem, it ap yabu serogo welagaukwa mene amanogo nen, it-it ìkì logolìk he, mel isukwa:

Ap arì opase obùlù'mo yabu esewerek asigin mene a'nogo ebe waga a'lì. Halok yabu yì nirat esewerek asuok en he, ebe wasuok o, ìlùk isukwasik, 8ebe hakhìlìk wasukwasik he, werek anggur yabumo nen legeta'ma wulaksasukwa. 9Atì'nogo hagasukwa atì nen he, ap kain eyabu esewerek mene atì nìkì'nogo hagasigin akegep. At ebe wìrìk he, mel hagasigin. It ap atì inebe motogat warogo potsìlìk he, inobùlù'mo yabu anggur yabu a'nogo serogo logouagalùk ap hùnogoat mene menhisegeinat o. 10#Mzm.118:22-23 Hit en Ala ane helal yì'nogo waganogo hesukwama etage salhì'lek welagep nogo? It en he:

It ap tukang o helep mene wùtarek mene

nen he, o ebe wùtì logolìk he,

Helep yì weak, ìlùk heraksasukwa mene atì

obùleat ya'lagama o.

11Ati'nogo haga'laga atì, ninopase Ala Etagepogot

enat hagate o, ìlùk nineileken hogosik he,

Egi! ìlùk hogoratì lago,

ìlùk helal waganogo hesukwa mene atì etage salhì lagep lek nogo? Salhì lagebat o,” ìlùk yogoisasike. 12Atì'nogo yogoisasikomo, it an he, mel isukwa:

“Wene oba lìrogo ike atì, nit hesigat yogonisike hìgì,” ìlùk, hùthasukwa. Hùthasukwasik he, Yesùt ebe hakhouogolùk isukwa meneat he, apùnì logolek amanogo inayùk en herakhùlùk pùgùlhukwa.

“Uang pemerintah hesik kìno ikenem wogisasak a? lek a,” ìlùk hinok Yesùt oba wanhukwa wene

(Mat.22:15-22; Luk.20:20-26)

13Hobuk he, it ap kaintek amanogo nen he, Yesùt eil warogo ane igin oba eken hìlìk ùkùm oba houogolùk, it en it ap Parisi mene aike mel, it ap Herotet werekwe mene aike mel, inom en Yesùt anema wanuagalùk oba laksa wagaukwa. 14Laksa wagaukwama, wagaukwasik he mel yogosukwa:

“Noe. Hat hoabùt he, wene eberogoat enek ìkì logolìk, apùnì inelokoken oba nek isìlìk, aike helokoma hisìgìk, aike hapotma hisìgìk egetek lek. We, inebe hayùk legat logolìk he, Ala a'la nen,

Apùnì tì'nogo hagatì logouak, ìlùk akikerek mene eberogoat enek yakùlnisìkì lagen atì nit ninelu o. Halok he, nit Yahuri mene hagatorek higit hogo, uang pemerintah hesik, kain etagepogot Kaisat wogosusak elok a? Mea a. Wogotì logouok a? Kamo ìkì logouok a,” ìlùk hinok wanhukwama, 15at Yesùt en,

“Inane lagak hogo yogoneta,” ìlùk inoabùt enagat palhikesik he, mel yogoisasike:

“An noabùt paluogolùk egep atì nenahalok. Uang perak yabu ineki omake hesik hagatenem ineki oko wogisagarek a'nogo mene aike neileken hak en he, wani lani o,” ìlùk yogoisasikomo, 16wolok wagaukwama, at Yesùt en he, mel yogoisasike:

“Yì sa ebe hagarek oba etage helal waganek werek akegep,” ìlùk yogoisasikomo it en he:

“Arì Kaisat at o,” ìlùk yogosukwama, 17at Yesùt en he, mel yogoisasike:

“Kaisat mene halok he, Kaisat at wogotìk, Ala mene halok he, Ala at wogotìk, ìkì logoino o,” ìlùk yogoisasikomo re, it en he,

“Egi! Nayùk e,” ìlùk hogorasukwa.

Ap Saluki mene nen, apùnì wa'larik en ineluk asugun hesik Yesùt oba hinok wokhasukwa wene

(Mat.22:23-33; Luk.20:27-40)

18Hobuk he, it ap Saluki mene nen,

“Apùnì wa'larik ineluk asugun lek,” ìlùk egarek mene aike Yesùt oba wagaukwa. Wagaukwasik he, at oba hinok wokhìkì logolìk he, mel yogosukwa:

19 # Ul.25:5-6 “Noe. At Musa nen mel yakùlnisasike:

Ap aike againapùrì taginapì'le'ma agwe soge

hebùlùk ebe wa'laga halok he, obùlù'mo omalik

aike taginabuagalùk he, he soge atì ap atì

agorat wanusak o,

ìlùk, yakùlnisasikesik, helal waganogo hesikomo werek o. 20Atì'nogo isike mene were'ma re, ap inebe 7 nen inopase omakeat en tago welagaukwa. Logolìk, inoe makusa mene atì agwe wanhikesik, againapùrì taginapi'le'ma wa'lagaikeat. 21Wa'lagaikomo re, agot opolik mene atì nen he soge atì wanhìkesik againapùrì taginapì'le'ma wa'lagaikeat. Wa'lagaikomo re, hobuk inagot inopolik mene atì nen atì'nogoat hagasike. 22Atì'nogo it ap inebe 7 nen inagainapùrì taginapì'le'ma wa'larik enek wagaukwama re, hobuk elùgùn kobok, he atì ebe wa'lagaikeat. 23Halok, it ap inebe 7 nen atì, he omakeat mene atì wanìk wagaukwasi'mo re, hobuk Ala nen apùnì warek mene inelugurinapenem it atì ineluk aga logolìk, he atì sa hak agwe asigin akegen,” ìlùk Yesùt oba hinok wokhasukwama, 24at en he, mel yogoisasike:

“Hit he, Ala ane helal waganek atì mel, Ala omame atì mel, hinokot logolìk, hinane kolo egep atì. 25Apùnì warek mene Ala nen inelugurinabìk oba nen, hìmì ikìgìk, it aike ìgìsìgìk, ìkì logogun motok lek o. We, it malaikat pogot oba mene welagaikarek atì hakeat logogun o. 26#Kel.3:6 Apùnì wa'lari'mo Ala nen inelugurinabigin, ìlùk wene Musa nen helal wanhike mene a'nogo etage salhì'lek welagep nogo? At Musa e sebelek eroma lagaikesi'mo, Ala nen mel yogosike:

Aberaham ho, Isak ho, Yakùp ho, inopase Ala anat o,

ìlùk yogosikomo helal wanhike mene a'nogo etage salhì'lek welagep nogo? Etage salhesebat o. 27At Ala re, apùnì warek mene inopase hùk. Ineluk mene inopase o. Atì'nogo meneat he, hit hinane kolo motok egep atì,” llilk yogoisasike.

“Ala nen ninasuk wasike wene esin he, pìre atemat,” ìlùk yogosike wene

(Mat.22:34-40; Luk.10:25-28)

28Wene atì'nogo inom iko kolek he, it ap Ala ane helal waganek esewerek mene amanogo omakeat aike wagaikesik asuk hologo welagaikesik, a'la nen mel akasike:

“It ap yì Yesùt oba hinok wokhagama re, at en wene oko higit hogo yogoisike hìgì,” ìlùk a'la akasikesik mel yogosike:

“Noe. Wene Ala nen ninasuk wasike wene a'nogo wene ebe hùko esin he, kì isike akegen,” ìlùk hinok Yesùt oba wanhìke. 29#Ul.6:4-5 Hinok oba wanhikomo, at Yesùt en mel yogosike:

“Wene atì esin he, Musa nen mel isike:

Hit ap Yahuri mene yì hinasuk holini! Ninopase

Etagepogot he, Ala aligat o.

30Halok he, hinetaùken mel, hinoabùt mel, hina'la mel, hinomame mel, omakeat arìk ninopase Ala

Etagepogot ebe atìat hinetaùken hutik logoino o,

ìlùk yogoisasike mene, wene esin he, atìat o. 31#Im.19:18 Nen, wene atì a'ma negen he, mel isike akìgì:

Hinokawerek hinebe hinetaùken hutik

welagasep atì hak he, it apùnì aike hinom

welagasep mene atì hinetaùken hutik logoino o,

ìlùk wene pìre isike atemat esin o. Wene ninasuk wasike mene aike weregat meneat he, abelma negen enek o,” ìlùk yogosike. 32#Ul.4:35 Yogosikomo, at Ala ane helal waganek esewerek mene a'nogo nen he, mel yogosike:

“Ì noe. Wene hìgìrat egen hìgì.

At Ala ebe omakeat, aike lek,

ìlùk eberogoat egen. 33#Hos.6:6 Halok he, at Ala ako warogo ebe abireke etumo loletìk, yì mene tì mene at hesik hisìgìk, ìkì logousak mea negen mene re, ninetaùken mel, nina'la mel, ninomame mel, omakeat arìk, at Ala ebe ninetaùken hutik logolìk he, it apùnì aike ninom welagorek mene ninokawerek ninebe hake ninetaùken hutik logousak atì esinat o,” ìlùk yogosikomo, 34at Yesùt a'la nen he:

“Ap yì ataùken werek mene nen ike hìgì,” ìlùk akasikesik he, mel yogosike:

“Hat he, Ala awe a'ma horogat kusak welagen hìgì,” ìlùk yogosikomo it apùnì amanogo nen hobuk Yesùt oba wene hinok wanu inayùk agaike.

“At Karìsùt atì, ebe sa akegep,” ìlùk yogoisasike wene

(Mat.22:41-46; Luk.20:41-44)

35Atì'nogo hagasukwama re, hobuk at Yesùt en Ala awi wùrì'mo wene yakùlisìkì logolìk mel yogoisasike:

“It ap Ala ane helal waganek esewerek mene amanogo nen he,

Karìsùt Ala nen ayoko hìlìk lakhei wesigin isike a'nogo, ebe Taùt en tagokwe mene o, ìlùk ìlì'lùgì atì re, nìkì'nogo halok ìli'lùgì akegep. 36#Mzm.110:1 At Taùt Ala Areagun a'la logolìk, okawerek en mel isike:

Ala Etagepogot en an noe Etagepogot yogotì logolìk he,

Apùnì hat haselei mene amanogo hesok en al

lebelogo hisanok en, an nen oan hoba hisa

wagì'lek werek kolek, hat an nera'lu neki

ebekwe hebe kain logoinok,

ìlùk Ala nen Karìsùt yogosike, ìlùk Taùt en isike. 37At Taùt okawerek en Karìsùt ebe hesik,

An noe Etagepogot,

ìlùk isike meneat he, hit en,

Karìsùt atì Taùt en tagokwe mene o, ìlùk nìkì'nogo nen usak akegep. Atì'nogo usak mea o,” ìlùk yogoisasike. Wene atì'nogo yakùlisikenem it apùnì logolek amanogo, at ane holhlì logolìk he, ina'la hai hakìkì lagaukwa.

“It ap Ala ane halal waganek esewerek mene nen weagathinabinogo,” ìlùk yogoisasike wene

(Mat.23:1-36; Luk.20:45-47)

38Apùnì apik amanogo ina'la hai hakiko kolek he, at Yesùt en wene mel yogoisasike:

“It Ala ane helal waganek esewerek mene atì nen weagathinabinogo ìlùk, hit hinoabùt hebelogo logoino o. It ina'la walok en hagatarek he, yì. Inasu uatek mene laberalùk pasar oko wanhare'ma atoma apùnì nen inane agauk hogo hai warinabuagalùk lagìk, 39o apùnì Yahuri mene sapan egarek oba tùlem yegelogo hù'lasi kìgìk, apùnì pesta hùko isago nikenem it ap kaintek hùlagaikarek oba yegelogo hù'lagìk, ìkì logou walok welagaikarek atì. 40Atì'nogo logolìk, hìmì soge mene inawì wùrìk mel, inagarok mel, sebelìkì logolìgat he, apùnì nen inasuk holìk,

It hano, akoagalùk sapan uan-aban lìthalùk lagaikarek atì'nogo hagatì'lek logoilepma re, Ala nen ùkùm hamùlùgat inoba hìlìk logoilep. Mene re, atì'nogo hagatarek atì nen, ùkùm ekin mene inoba hìlìk weagarinabigin o,” ìlùk yogoisasike.

It apùnì ineilmo wùlalhak mene mel, he soge eilmo lek mene mel, inom en uang Ala hesik hisasukwa wene

(Luk.21:1-4)

41Wene atì'nogo yogoisasikesik he, at Yesùt ebe hù'lagaikesik hùrek logolìk, peti uang Ala hesik a'la hisagarek mene teik he'na were'ma re, apùnì logolegat en uang hìlìk laganem yerisek welagaike. Apùnì ineilmo wùlalhak mene logolegat en uang apigat hìlìk lagaukwa. 42Atì'nogo hìlìk lagaukwa meneat he, at he soge agarok lek mene aike wagaikesik he, uang sen mene omakeat hou hak he, motok hamùlùk mene pìre hùlùk lagaike. 43-44Atì'nogo hìlìk laganem he, at Yesùt en agoromì ane wanhì lagaukwa mene amanogo waisasikamo wagaukwama re, mel yogoisasike:

“It apùnì obogat atì inagarok api'mo oba hilarogo hisaga atì, hamùlùgat negenat o. Meneat he, at he soga eilmo lek mene atì nek he, apùrùk oko palogo masak mene obogat hisike atì nek he, motok apik negenat hisike o, ìlùk eberogoat yogohisìgì,” ìlùk yogoisasike.

Currently Selected:

MAREKÙT 12: LAIDNI

Highlight

Copy