MAREKÙT 11
11
Yesùt hogorato kolek o Yerusalem kisike wene
(Mat.21:1-11; Luk.19:28-40; Yoh.12:12-19)
1Atì'nogo lagaukwasik, at Yesùt agoromì ane wanhì lagaukwa mene amanogo inom, kota Yerusalem kuogolùk horok hogo asi lagasukwasik, tom Saitun a'ma o sili aike etage Petpage, aike etage Petania atoma higit asi lagasukwasik he, at Yesùt agoromì ane wanhì lagaukwa amanogo inebe pìre aike wene warogo alebagìk laksasike. 2Atì'nogo laksìkì logolìk he:
“O sili hinelokoma a'li lani o. Arat lagep halok he, oan kìkì logolìk wam keledai eak mene apùnì apot oba hù'laganem wogisek lagì'lek mene hele kopì kelik were'ma hineileken hogoin a'naga. Nen, arat hineileken hegep halok he, kopì kelik atì hikalogo wolok we'no. 3Atì'nogo hele hikalhenem, it apùnì atoma mene aike nen he:
Warn kopì hikalhiì lagep atì, nenahalok, ìlùk wene palhe halok he, mel yogoisano:
Ninoe Etagepogot a'nogo nen wam yì mene lek en wolok lùogolùk hikalhiì lago. At en wam yì apotkwe heageagat lakhei wesigin o, ìlùk yogoisano,” ìlùk wene warogo laksasike. 4Laksasikomo lagaukwa re, wam isike a'nogo eak mene aike o aike kwe ebekalem wùrì'mo kwe ouma kagarek oba, kwe pìtma, ape kopì kelik were'ma ha lagaukwasik he, kopì hikalhukwa. 5Hikalhenem he, it apùnì atoma metek welagaukwa mene nen he, mel yogoisasukwa:
“Wam keledai eak mene yì nahalok kopì hikalhì lagep,” ìlùk wene palhenem, 6it en he, at Yesùt en,
“Wene tì'nogo yogoisano,” ìlùk isike hagat yogoisasukwama, it en he:
“Ì o,” ìlùk heraksasukwa. 7Heraksasukwama re, wam keledai eak mene a'nogo Yesùt oba wolok wagaukwasik he, inasu etakwe laberek mene nokologo wam apot oba talogo hesukwama re, Yesùt ebe wam apot oba hù'lagaike. 8Apot oba hù'lagaikesik laganem it apùnì logolek amanogo he'nakit inasu etakwe laberek mene nokologo kwe ebekwe talogo hìlìk lagìk, it he'nakit en eka yabukwe mene pali lìlìk ebekwe talogo hìlìk lagìk, isukwa. 9#Mzm.118:25-26 Atì'nogo hìlìk laga logolìk, at Yesùt ebe tùlemethìlìk, it aike ebalebagìk, it aike opolik hobugagìk, laga logolìk he, inane hùkorogo mel ìlìk lagaukwa:
“Noe wa! wal wa!” ìlùk u hak,
“Hosana!” ìlìk laga logolìk,
“Ninopase Etagepogot Ala nen lakhagei wagen yì, at enat hanothabuak o. 10Hageat ninopa Taùt awe a'ma welagaukwa hak, Ala nen ninoe yì awe a'ma hinìlìk hano'ninabuak o. Ala esin pogot oba welagarek mene, nopase wa!” u hak,
“Hosana!” ìlùk a'mit sup hogo ìlìk ìlìk, 11o Yerusalem kisukwa. Kisukwasik he, at Yesùt ebe Ala awì wùrì'mo kisikesik yì mene tì mene obogat eileken peneto kolek, o arat hi isikomo, agoromì inebe 12 nen amanogo inom o Petania wùlìbi wagaukwa.
Yesùt en e ara ero aike homan hesike wene
(Mat.21:18-19)
12O Petania wùlìbi wagaikasik nogo ìlùk, hùenkwe kìkì logolìk he, Yesùt sùpùrùk nele agaike. 13Sùpùrùk aik hesikomo re, e ara ero aike eka muli were'ma eileken walegat en lakhasike. Eileken lakhalùk:
“Eken ugu a? Lek a,” ìlùk, ha lagaike mene, o atem higit he, e ara eken ito le'ma nogo nen he, eka nek muli were'ma ha lagaike mene, eken aike ìtì'lek. We, eka nek muli were'ma ha lagaikesik, 14mel yogosike:
“Hat e yì re, hùlì yogotak en pìkìt hobuk heken apùnì aike nen nìkì logoinogo. Ìtùn,” ìlùk yogotenem it agoromì ane wanhì lagaukwa mene amanogo inasuk holhukwa.
Yesùt Ala awì wùrì'mo kìlìk tegelhike wene
(Mat.21:12-17; Luk.19:45-48; Yoh.2:13-22)
15At Yesùt lak o atoma nen o Yerusalem kisukwa. Kisukwasik he, at Ala awì wùrì'mo kisike hak he, it apùnì atoma kìlìk logolìk oko wanhìk, palhik, ìkì lagaukwa mene mùk hogo mak hogo wulaksìgìk, it aike uang e talek oba hìlìk okoti lagaukwa mene mel, it aike e talogo inebe hùrek logolìk sùe pel hake mene oko wanhì lagaukwa mene mel, e talek mene atì abel eten-haten hogo potsìgìk, ìlùk lagaike. 16Atì'nogo hagasikesik he, apùnì aike nen yì mene tì mene wolok Ala awì wùrì'mo o sili oake sikip hogo lasak lek ìlùk wene palhike. 17#Yes.56:7; Yer.7:11 Wene palhikesik, it apùnì amanogo inasuk watì logolìk, mel yogoisasike:
“At Ala nen ìkì logolìk he,
An nawì wùrìk yì hesik apùnì nen ìkì logolìk he,
Yì apùnì tì apùnì inùkùl etage lopok sapau ìkì logogun oba o, ìlùk ìkì logogun,
isike mene helal waganek werek a'nogo lek? Atì'nogo ìlùk helal waganek werek meneat he, hit en he, it ap apùnì inagarok ineki abusak telogo helagarek mene inawì negen wùrogo hisìkì lagep yì rì!” ìlùk inekalì warogo inasuk wasike. 18Inasuk watenem, it ap Ala esewerek inogogì kaintek inom, Ala ane helal waganek esewerek mene inom en wene atì inasuk holhukwasik he, Yesùt wasuogolùk weim abok isukwa. Weim abok isukwa atì re, Yesùt en wene yakùlisikenem apùnì logolegat at ane holhìk hogoratì lagaukwa atì nen, at ebe inayùk arik he, wasuogolùk isukwa atì. 19Atì'nogo iko kolek, o arat hi isikomo re, Yesùt agoromì inom o Yerusalem en wùlìbi wagaukwa.
Yesùt en e ara ero oba lìrogo yogoisasike wene
(Mat.21:20-22)
20Yesùt lak atì'nogo wùlìbi wagaukwasik nogo ìlùk hùenkwe ohealegat inapotkwe e ara a'nogo eroma higit kìkì logolìk, ineileken hìthasukwa re, omaken inom motok pùk agaikomo hasukwa. 21Hasukwasik, Yesùt en e ara yogosike mene a'nogo, at Peterùt a'la eberik he, mel yogosike:
“Noe. E ara homan hegen a'nogo arat pùk agama yì heileken han o,” ìlùk yogosikomo, 22at Yesùt en he, it mel yogoisasike:
“Hit he, hinetaùken Ala Oba hìpìrìk logoino. 23Sa nen a'la wenesùgì uan horo ebetì'lek, we,
An igin yì higit hogoat haga'lasigin, ìlùk etaùken Ala oba hìpìrethìlìk,
Tom yì he'nok hogo i laut yekele'ma pong hogo lan o, ilùk igin halok he, at igin mene higit hogoat Ala nen hagasigin o, ìlùk eberogoat yogohisìgì. 24Atì'nogo hagaterek atì nen he, hit en yì mene tì mene Ala kìno yogotì logolìk, hina'la nen,
Arat wo'nisikomo, ìlùk akegep halok wokhisegeinat o, ìlùk yogohisìgì. 25Hit aike melarìk sapan ìkì logolìk he, weak hagatep mene ninopase Ala pogot oba mene nen sagalogo legetsoagalùk, apùnì nen hit weagathinapa mene hit en eken inoba hìlìk welagep halok he, atì sagalogo heraksano. [26Atì'nogo meneat he, hit en eken inoba hìlìk welagep mene atì sagalogo legetsìgì'lek hina'la weak welagep halok he, hit weak hagatep mene atì ninopase Ala pogot oba mene nen sagalogo legetsegein legat o,]” ìlùk yogoisasike.
“Yesùt, hat nena mene esewerek agatik hagatì lagen,” ìlùk anema wanhukwa wene
(Mat.21:23-27; Luk.20:1-8)
27At Yesùt en wene atì'nogo yogoisalùk he, hobuk o Yerusalem kisukwa. Kìlìk he, at Yesùt Ala awì wùrì'mo a'nogo o silikwe lagìk, wagìk, ikenem he, it ap Ala esewerek mene inogogì kaintek amanogo mel, Ala ane helal waganek esewerek mene amanogo mel, inalùgetek amanogo mel, inom oba wagaukwa. 28Wagaukwasik he, mel yogosukwa:
“Hat nena mene esewerek agatik, yì hagatìk, tiì hagatìk, ìkì lagen. Nen, ap sa nen,
Yì'nogo hagatì logoino, ìlùk esewerek logouagalùk menhagaikomo hagatì lagen,” ìlùk yogosukwama, 29at Yesùt en he:
“An hogo re, hinok omakeat aike wokhisagat. Hinok wanhenem hit en sekek hogo yogonetep halok he, an nen hogo re, atì mene esewerek agarìk hagatì lagì o, ìlùk, pak hogo yogohisegeinat o. 30Ma re, at Yohanet en apùnì ima pelaginapì lagaike a'nogo re, Ala pogot oba mene nen yakùlesikomo pelaginaplì lagaike a? Ì a, at he, apùì kweangma mene nen yakùlesukwama pelaginapì lagaike a. Yogone'ni ta!” ìlùk yogoisasikomo, 31it-it ìkì logolìk he, mel isukwa:
“Nit en he, Ala pogot oba mene nen yakùlesikomo pelaginapì lagaike, ìlùk yogosumo re, at en he,
Halok he, hit en Yohanet ane eberogoat ìlùk hùthìgì'lek welagagip atì nenahalok, ìlùk nit yogonisanogo,” isukwasik he, 32it apùnì obogat en,
“Yohanet atì Ala aneat yogonisìkì lagaike,” ìlùk ebe hùthìkì lagaukwasi'mo nogo nen he, apùnì inayùk en mel isukwa:
“Nit en he,
Apùnì nen yakùlesukwama pelaginapì lagaike, ìlùk yogosumo, meaat o,” ìlùk isukwasik he, 33hobuk Yesùt mel yogosukwa:
“Wene atì nit ninokot o,” ìlùk yogosukwama, at Yesùt en he, mel yogoisasike:
“Halok he, an nen hogo re,
Ati mene esewerek agarìk hagatì lagì, ìlùk hit yogohisegein legat o,” ìlùk yogoisasike.
Currently Selected:
MAREKÙT 11: LAIDNI
Highlight
Share
Copy
Want to have your highlights saved across all your devices? Sign up or sign in
