LUKAT 9

Yesùt en agoromì inebe 12 en amanogo inasuk warogo laksasike wene

(Mat.10:5-15; Mrk.6:7-13)

1Atì'nogo yogoisìlìk he, at Yesùt en agoromì ane wanhì lagaukwa mene inebe 12 nen amanogo atogosi wesuagalùk waisasikomo wagaukwama re, it en yì mokareke tì mokareke oabùt weak mene apùnì ina'la kìlìk were'ma henogo wulaksìgìk, yì ou tì ou inoba werek halok hagarinapìk, ìlìk loagalùk he, omame wogisasikesik esewerek hagarinapìke. 2Atì'nogo hagarinapikesik he, it en Ala awe a'ma hinegein wene a'nogo yogoisìgìk, ou inoba werek mene hagarinapìk, ìlìk loagalùk laksasike. 3Laksìkì logolìk he, mel yogoisasike:

“Hit he, ebekwe mene hesik yì mene tì mene aike motok wolok lagùp o. Hinarìgelùk mel, hinasu yì mene tì mene wokhisikenem kalugun mene mel, sùpùrùk mel, uang mel, nen hinasu laberogoin mene pìretek mel, aike motok wolok lagùp o. 4Nen, hit o aike laganem, wokhinapo halok he, atomaat logopik, o ninmo lùogolùk halok, atoma nenat wùlìbi wìrìk lano. 5Nen, it apùnì o aike nen hinebe wokhinapì'lek halok he, hebisalùk wùlìbi waga logolìk he, it o atoma mene ina'la hùthoagalùk he, hinesok ìlìngeken hesalogo pelaksalùk wùlìbi we'no,” ìlùk, inasuk warogo laksasikomo, 6it agoromì amanogo lagaukwa. Laga logolìk he, o atoma o sili lopok hano wene a'nogo yogoisìgìk, o ya ta ou hagarinapìk, ìlìk lagaukwa.

Kain Herotet oake palagaike wene

(Mat.14:1-12; Mrk.6:14-29)

7Atì'nogo hagarìk nìkì lagaukwama, at Herotet o Kalilea tokwe kain etagepogot welagaike mene atì, wene atì obogat asuk holhìke. It apùnì aike nen he:

“Yohanet watama wa'laga a'nogo eluk agasik niko atì,” ìlùk ìkì lagaukwa. 8Nen, it aike nen he:

“At Elia a'nogo weinam agasik niko,” ìgìk, it aike nen be:

“It ap holoat Ala ane yogoisìkì lagaukwa mene amanogo aike eluk agasik niko o,” ìgìk, ìkì lagaukwama re, ap kain Herotet a'nogo oake palagaike. 9Oake palarik logolìk he, mel isike:

“Yohanet a'nogo, an nenat alokop tek hogo watì. Meneat he, at aike nen atì'nogo hagarì'logo ìlùk, abok nasuk holhì atì, sa nen hagarì'logo,” ìlùk, Yesùt ebe eileken hagalùk walhìkì lagaike.

Yesùt en apùnì inebe 5.000 mene sùpùrùk seik-peik hogo wogisasike wene

(Mat.14:13-21; Mrk.6:30-44; Yoh.6:1-14)

10It ap Yesùt en inayoko hìlìk laksasike mene amanogo lìlìk inapotkwe wagaukwasik he,

“Nit en yì'nogo hagato, tì'nogo hagato,” ìlùk pìlìngpalang hogo Yesùt yogosi wagaukwa. Atì'nogo yogosi wagaukwama re, at en it wogisek inalepma kek hogo o sili etage Pesaìra atì lagaike. 11Atoma inalepma kek hogo lagaukwa meneat he, apùnì nen he,

“At Yesùt a'nogo o atoma laga o,” ìlùk ikenem, apùnì apik inasuk holhukwasik he, inebe logolegat opolik lagaukwa. Lagaukwama re, at Yesùt en hai warogo woginapikesik he, Ala awe a'ma hisikerek wene a'nogo yogoisìgìk, inoba ou werek mene hagarinapìk, isike. 12Atì'nogo hagarinapo kolek, o mo arat kobok i lagaikomo re, at agoromì inebe 12 nen amanogo oba wagaukwasik he, mel yogosukwa:

“Nit yoma apùnì inareng le'ma welago yì re, apùnì yoma inapùrùk nìkìk, nogo ìgìk, uak en he, o yoma esakokwe o sili hùkokwe hamùlùkkwe laksan o,” ìlùk yogosukwa. 13Atì'nogo yogosukwama, at Yesùt en he, mel isike:

“Hit enat melagisani o,” ìlùk yogoisasike. Atì'nogo yogoisasikomo, it en he, mel yogosukwa:

“Nit he, sùpùrùk horoti mene 5 nen, nen, ikan he, pìre nek werek yoma re, nit en apùnì yoma hesik aike oko palisa loagalùk ìkì lagen?” ìlùk yogosukwa atì, 14apùnì inebe ap hùgì re, 5.000 hake werek en isukwa. Atì'nogo yogosukwama, at Yesùt an agoromì amanogo yogoisìkì logolìk he,

“It aroma inebe 50 logothìgìk palìk loak en, yogoisani,” ìlùk yogoisasike. 15Atì'nogo yogoisasikomo, at en isike hagat,

“Eki palìk lani,” ìlùk yogoisasukwama, inebe obogat hù'larik lagaukwa. 16Arat hù'larik lagaukwama re, at Yesùt en sùpùrùk horoti mene 5 nen aremnogo mel, ikan pìre aremnogo mel, ekim wanhikesik he, eileken pogot oba lìakhìlìk, Ala hai warogo re, sùpùrùk mel, ikan mel, aremnogo kùrogo, at agoromì amanogo nen apùnì apik amanogo sùpùrisoagalùk he, wogisasike. 17Arat sùpùrisasukwama, inebe obogat inalabut ning hogo nasukwama re, titelagaike mene mùl ugu 12 en kalogo hesukwa.

Peterùt en, “Hat hebe Karìsùt at o,” ìlùk pak hogo Yesùt yogosike wene

(Mat.16:13-19; Mrk.8:27-29)

18Ineki aike sapùl he, Yesùt aligat sapan ikenem, at agoromì ane wanhì lagaukwa mene amanogo oba wagaukwa. Wagaukwama, at en inoba hinok wanhì logolìk he, mel yogoisasike:

“Apùnì apigat en an nebe hesik nabok ìkì logolìk he, sa ìlì'lùgì nogo,” ìlùk yogoisasikomo, it en he, mel yogosukwa:

19“It aike nen he,

Yohanet ima pelaginapì lagaike mene a'nogo ìgìk, it aike nen he,

Elia ìgìk, it aike nen he,

It ap holoat Ala ane yogoisìkì lagaukwa mene amanogo mene aike eluk agasik werek o, ìgìk, ìlì'lùgì o,” ìlùk yogosukwa. 20Atì'nogo yogosukwama, at Yesùt en mel yogoisasike:

“It en atì'nogo ìlì'lùgì meneat he, hit enek he, an nebe hesik sa ìkì lagep nogo,” ìlùk yogoisasikomo at Peterùt en he, mel yogosike:

“Hat hebe re, Karìsùt, nit telninabuagalùk Ala nen lakhei wesigin ìlùk abok yogonisasike a'nogoat o,” ìlùk yogosikomo, 21at Yesùt en he, it agoromì amanogo obogat mel yogoisasike:

“An nebe hesik ike atì re, apùnì aike motok yogoisagùp o,” ìlùk inasuk wasike.

At Yesùt en he, “Yì ùkùm tì ùkùm noba hìlìk noasugun o,” ìlùk emakum yogoisasike wene

(Mat.16:21-28; Mrk.8:31–9:1)

22Inasuk atì'nogo wasikesik he:

“An abat ta'lasi wagagi a'nogo, it ap inalùgetek mel, it ap Ala esewerek mene inogogi kaintek mel, Ala ane helal waganek esewerek mene mel, inom en, an nebe inabìt arìk, yì aik tì aik apigat haga'nabìk, nebe noasugun o. Noasumo re, nebe neki pìre warek logopik, aike nen he, Ala nen nelugu'nabigin o,” ìlùk, yogoisasike. 23Atì'nogo yogoisasikesik, wene aike it apùnì obogat mel yogoisasike:

“Sa nen an nopolik nìkì logoigìlùk halok he, okawerek hesik hagaterek mene,

Nabìt, ìlùk hebisalùk he, e ba menhisìlìk inoatarek mene atì, ageiyo meneat ninhùp-nanhùbat wolok he, an nopolik nìkì logoìgìlùk wesuak o. 24Nen, sa nen,

An nebe neluk logousak walok, ìlùk, ebe elele helegein halok he, wa'larik nong akegein o. Meneat he, an hesik wa'lasigin halok he, ebe telegein o. 25Nen, sa nen, yì mene tì mene kweangma mene obogat ese asigin meneat he, okawerek ebe hesik weak akìlìk nong asigin halok he, aike sabùrike usak nogo? Motok lek o. 26Sa nen,

An Yesùt agot, ìgìk, an nane atì yogoisìgìk, apùnì ineilhanem pak hogo u re, ekalì halok he, an abat ta'lasi wagagi mene yì nen hogo re hobuk an nebe hogo'napìk, nopase hogoratìk, malaikat Ala aligat hesik yoko pelaksa wagarek mene amanogo hogorinapìk, iko kolek waga logolìk he,

At yì an nagot, ìlùk nane pak hogo u nekalìat asigin o. 27Nen, hit merek welagep yoma mene aike wa'lagì'lek logolìk, Ala awe a'ma hisegein mene a'nogo hisikenem hineileken hogoin o, ìlùk eberogoat yogohisìgì,” ìlùk yogoisasike.

Yesùt tom oba lagalìk were'ma elokoken hùnogoat haga'lagaike wene

(Mat.17:1-8; Mrk.9:2-8)

28At Yesùt en wene atì'nogo arat yogoisasikesik he, nogo ineki 8 hake ìlùk en, Peterùt mel, Yohanet mel, Yakobùt mel, wogisek sapan igìlùk tom aike ba lagasike. 29Lagalìk he, sapan ikenem he, at Yesùt elokoken hùnogoat haga'laga logolìk asu elokoken motok kut arìk, eilhabùt hake yararathesike. 30Atì'nogo haga'laga kolek, ap inebe pìre, Musa mel, Elia mel, Yesùt inom weneane ikenem, 31inebe hogorinabusak hakeat weinam agaukwasik were'ma, ineileken isasukwa. Nen, weneane isukwa atì re, at Yesùt welagì'legat Ala nen isike higit hogoat o Yerusalem wa'lasigin wene ìkì lagaukwa. 32Atì'nogo iko kolek, at Peterùt agaiya'lak aremnogo inom nogo ineil agaikomo nogo isukwasik enat, ineluk agaukwasik Yesùt ebe amùlìt apik yararathikenem, ap inebe pìre aremnogo Yesùt inom were'ma ineileken isasukwa. 33Atì'nogo hagasukwama, ap inebe pìre aremnogo Yesùt atoma hebùlùk lùogolùk ikenem he, Peterùt en Yesùt yogotì logolìk, mel yogosike:

“Noe! Nit o yoma hano welago hìgì. Halok, nit en o sabu hìnagan, hat hesik aike, Musa hesik aike, Elia hesik aike wùthikogoin o,” ìlùk atì'nogo isike atì re, wene nìkì'nogo mene ìkì lagì he, hùthìgì'legat yogosike atì. 34Atì'nogo yogoto kolek aremnogoat, ohena sebelinabi wagaikomo, inebe ohena a'la logolìk inayùk motok agaukwa. 35Atì'nogo inayùk agaukwama, at Ala ane ohena a'nogo a'la nen mel yogoisasike:

“An naput weteberogo menhesìgì mene ebe arìat o. Halok, at ane holek logoino o,” ìlùk yogoisasike. 36Atì'nogo yogoisasike atì, ane kopok hogo, ineileken hìthasukwa re, at Yesùt aligat were'ma hasukwa. Atì'nogo haga'lagaikomo ineileken hasukwasik, wene haga'lagaike mene atì, atì sat en apùnì aike yogoisìgì'lek ina'laat welagaukwa.

Mokareke oabùt weak mene yekerek aike a'la kìlì'mo, Yesùt en henogo wulaksasike wene

(Mat.17:14-18; Mrk.9:14-27)

37Hùenkwe re, Yesùt agoromì inom tom oba nen pi waganem he, apùnì motok apik esa logolek Yesùt oba wagaukwa. 38Wagaukwasik, at aike it inekele'ma nen he, ane hùkorogo Yesùt mel yogosike:

“Noe! An naput omakeat tago mene yìnaga heileken hìthanogolùk hea wagì o. 39At atì mokareke oabùt weak mene a'la kikeresik he, eki esok senep pùk-pùk hagatì logolìk wesilagap apelekwe hopo-hopo hagatìk, ngai ìlìk ìlìk kweangma tukwak hogo pelapìk, ìkì logolìk he, yekerek atì a'la nen mokareke oabùt weak mene atì hela wùlùbùhùgat logolìk ebe weagathìlì'logo. 40Atì'nogo hagaterek atì nen, hat hagoromì hane wìlì'lùgì mene nen henogo wulabuagalùk yogoisìgì meneat he, it en atì'nogo hagasusak mea haga'laga,” ìlùk yogosike. 41Atì'nogo yogosikomo, at Yesùt en it apùnì logolek amanogo mel yogoisasike:

“Yì sani! Hit apùnì o yogotak welagep mene yì re, hinetaùken noba hìpìrethìgì'lek logolìk, nong akìkì lagep yoma rì! An nepe morogo neki mìren oba ninom logogun nogo!” ìlùk yogoisasikesik he, ap a'nogo mel yogosike:

“Haput arì wolok eme o,” ìlùk yogosike. 42Yogasikomo, yekerek a'nogo Yesùt oba horok hago wolok waga kolek aremnogoat mokareko oabùt weak mene a'nogo nen yekerek a'nogo kweangma tukwak hogo potsikenem he, eki esok senep pùk-pùk hagasike. Atì'nogo hagasikomo, at Yesùt en mokareke oabùt weak mene a'nogo wenagasikesik he, yekerek a'nogo hano hagarogo opase wogosike. 43Atì'nogo wogosikomo apùnì amanogo obogat ineileken hasukwasik he,

“Ala omame motok apik atì nayùk e,” ìlùk hogorasukwa.

Yesùt en, “An noasugunat o,” ìlùk, alep yogoisasikesik en, hobuk aike yogoisasike wene

(Mat.17:22-23; Mrk.9:30-32)

It apùnì amanogo obogat, at Yesùt en yì hagatìk, tì hagatìk, hagatì lagaike mene amanogo hesik he:

“Egi!” ìlùk, hogorato kolek he, at en agoromì ane wanhì lagaukwa mene amanogo mel yogoisasike:

44“An wene yogohisegein yì hanorogo hùthìkì logoni o. An abat ta'lasi wagagi a'nogo ap en yoko lìlìk it aike nen noasuagalùk ineki ba hanugun o,” ìlùk yogoisasike meneat he, 45wene atì it hùthanogo ìlùk Ala nen inetaùken ohena hake salogo hesikomo, it hùthìgì'lek logolìk, mel isukwa:

“Wene atì kì'nogo mene hesik yogonisegen,” ìlùk hinok wokha inayùk en he, kamo isukwa.

Yesùt agoromì nen, “Kain he, hat nogo? An o,” inane sagalhukwa wene

(Mat.18:1-5; Mrk.9:33-37)

46Atì'nogo werek kolek, it Yesùt agoromì ane wanhì lagaukwa mene amanogo nen ìkì logolìk, at aike nen he,

“Kain hetagewerek hat nogo? An o,” ìgìk, inane sagalhukwa. 47Inane atì'nogo sagalhukwa mene, Yesùt en ina'la akasukwasik isukwa mene enagat hùrisasikesik, yekerek magakelak mene aike waganogo era'lu hei wagaikesik be, 48it amanogo wene mel yogoisasike:

“Hit hinekele'ma yoma at etage lek maben mene atìat ebe kain etagewerek asigin atì nen he, sa nen yekerek yì an hesik wanhe halok he, anat wo'nabigin o. Nen, sa nen an wo'napo halok he, at lakhani wagaike mene a'nogoat wanigin o,” ìlùk yogoisasike.

Yesùt en, “Sa nen, hit wenakhisìlì'logo lek halok he, at ebe hit werekwe meneat o,” ìlùk yogoisasike wene

(Mrk.9:38-40)

49Atì'nogo yogoisikenem, at Yohanet en he, mel yogosike:

“Noe! Ap aike mokareke oabùt weak mene apùnì ina'la kìlìk were'ma hat hetage palogo henogo wulaksikenem nineileken hogosik he, at atì nit ninom nìkì lago lek mene atì nen,

Hat atì'nogo hagate hùk o, ìlùk wenagato,” ìlùk atì'nogo yogosikomo, 50at Yesùt en he, mel yogosike:

“Hit en atì'nogo wenagasusak lek o. Sa nen hit wenakhisìlì'logo lek halok he, at atì hit werekwe meneat o,” ìlùk yogoisasike.

Apùnì o Samaria mene nen Yesùt ebe wanhì'lek heraksasukwa wene

51Atì'nogo yogoisìlìk he, at Yesùt ebe Ala nen pogot oba lìakhousak arat higit asi wagaikomo re, at a'la nen,

O Yerusalem pigin, ìlùk ning hogo wenesùgì lakhìlìk he, kwe wanhìke. 52At oan pìkì logolìk, ap aike yoko alebagìk pelaksasike. Pelaksasikomo, it amanogo pisukwasik Yesùt elokoma yì mene tì mene nomologo houogolùk, o Samaria sili aike hamùlù'mo kisukwa. 53Atì'nogo kisukwama re, apùnì o Samaria mene nen,

At Yesùt o Yerusalem pìgìlùk pi waga, ìlùk oabùt enagat palhukwasik he, at ebe wanhì'lek heraksasukwa. 54Atì'nogo heraksasukwama, at ane wanhì lagaukwa mene ap Yakobùt ho, Yohanet ho, ineileken isìlìk he, mel yogosukwa:

“Ninoe! Hat en hano akegen halok he, inebe inoasuagalùk pogot oba nen etu pelakhei wesuak en he, kìno yogosuok he a?” isukwa. 55Atì'nogo isukwama, at Yesùt elokwe hebek hogo wogisìlìk he,

“Atì'nogo hagasusak lek o,” ìlùk wenagisasike. 56Atì'nogo wenagisalùk he, o hùnogoma aike lagaukwa.

Ap aike nen, “Yesùt opolik nìkì logogun,” ìlùk yogosukwa wene

(Mat.8:19-22)

57At Yesùt agoromì inom kwe laganem, at ap aike nen Yesùt yogotì logolìk, mel yogosike:

“Noe. Hat komakwe lagen halok he, an hopolik motok nìkì logogin o,” ìlùk yogosike. 58Atì'nogo yogosikomo, at Yesùt en mel yogosike:

“Lo yeke atì re, awì wùrìk akola welagarek o. Nen, sùe purogo nikerek mene atì re, atì'nogoat awì wùrìk welagaregat. Atì'nogo meneat he, an abat ta'lasi wagagi mene atì nek he, nogo ìkì logousak oba nawì wùrìk he, motok lek o,” ìlùk yogosike. 59Atì'nogo yogosikesik, ap hùnogoat mene aike mel yogosike:

“Neperak nìkì logouok en nopolik eme o,” ìlùk, yogosike meneat he, ap a'nogo nen, mel yogosike:

“Eige, noe! An nopase wa'lagasik werek yìnaga tak kweangma sali lak en he, hat en,

Ì o. Lan, ìlùk yogone'nogolùk yogohetì o,” ìlùk yogosike. 60Atì'nogo yogosikomo, at Yesùt en he, mel yogosike:

“Warek mene halok, it apùnì inebe warek mene hake werek atì nenat salinapì logouak en he, hat Ala awe a'ma hisikerek wene atì, o yì awì tì awì yogoisìlìk nìkì logoino o,” ìlùk yogosike. 61Atì'nogo yogosikomo, ap hùnogoat mene aike nen, at Yesùt yogotì logolìk he, mel yogosike:

“Noe! Hat hopolik nìkì logogin na'la akìgìrì'mo re, lùok en, noe nagot tak hai warinabi lak en he, la'nageinogolùk yogoheti o,” ìlùk yogosikomo, 62at Yesùt en he, mel yogosike:

“It apùnì, inebe lopok yabu wanuogolùk sìge wolok lìlìk, yabu ebe hukagaresigat he, hobuk inelokwe lagak hogo inapotkwe la'lasi wìrì'lùgì halok he, Ala awe a'ma hisikere'ma atoma kusak motok lek o,” ìlùk yogosike.

Currently Selected:

LUKAT 9: LAIDNI

Highlight

Copy