LUKAT 10
10
Yesùt en ap inebe 70 nen, inayoko hìlìk laksasike wene
1Atì'nogo yogoisasikesik he, ninoe Etagepogot en ap inebe 70 nen weteberogo hisìlìk he, at okawerek ya ta o sili lopok lagalùk a'la akasike obakwe lopok, it atì tak alebagìk inebe pìretek lopogothìgìk laksasike. 2Atì'nogo laksìkì logolìk he, mel yogoisasike:
“Eken ugu apik arat wekelagasik werek meneat he, apùnì eken ebe palusak mene inebe hamùlùgat o. Ati nen he, ap eyabu Esewerek mene a'naga nen, apùnì eken palusak mene aike laksoak en he, at ayoko hìkì logoino o,” ìlùk yogoisasike. 3Atì'nogo yogoisasikesik he,
“Hit lani o. An nen hit he, hinoabùt wam topa wam oabùt hake mene it apùnì inoabùt yeke lo yeke oabùt weak mene hake mene inekele'ma heak hogo lakhikegein o. 4Nen, hit he, uang su a'la kalek mene inom, yì mene tì mene wokhisikenem su kalogo wolok lasak mene inom, sepatu aike su kalogo inom, aike wolok motok lagùp o. Nen, ebekwe laga logolìk, apùnì aike hinane abìrogo hai warinabìk lagùp o. 5Nen, apùnì inaua kìkì logolìk he,
Hinebe yoma Ala nen hanothinabuak o, ìlùk hai warinabìk kìno. 6Hai warinabìk kumo, inoabùt hanorinabusak mene halok he, Ala nen hanorinabiginat o. Atì'nogo meneat he, it aike inoabùt atì'nogo lek halok he, haik warinapep mene hinane oak wanino. 7It apùnì hit wokhinabusak mene were'ma kegep halok he, atomaat hinom logoino. Logolìk, it apùnì yabu woksikenem ineki oko yì mene tì mene wogisagaregat o, ìlùk, it en yì mene tì mene noagalùk wokhisiko halok he, atìat nìkì logoino. O ya hokom hogo lagìk, ta hokom hogo lagìk, nìkì logogùp o. 8O kota aike kikenem, hai warogo wokhinabugun obaat, it en sùpùrùk wokhisogoin mene atìat nìkì logoino. 9O kota atoma logolìk, it aike inoba ou werek halok, hit en hagarinapì logolìk he,
Ala nen awe a'ma hinegein a'nogo yogotak arat hikegein o, ìlùk yogoisìkì logoino. 10Meneat he, o kota aike hit kugun oba atoma nen hai warogo wokhinapo lek halok he, hinebe wùlìbi wìrìk ebekalem asi lìlìk he, mel ino:
11Nit hit hinaua logolìk kweang alolongeke ninesok oba labulaga mene yì, hit weak ìlùk hineilhanem horogo potsogo yì. Hina'la nen,
Ala awe a'ma hinegein a'nogo yogotak arat hinegein, ìlùk, hanorogo hùthìkì logoino, ìlùk yogoisano. 12Hobuk o wùrep oba re, it apùnì o Sorom mene atoma Ala nen ùkùm inoba hìlìk weagarinabigin meneat he, se negenat o. Meneat he, it apùnì kota hit wokhinapì'lek herakhikogoin mene atì, Ala nen ùkùm ekin mene inoba hìlìk motok weagarinabigin o, ìlùk, yogohisìkì lagì o,” ìlùk yogoisasike.
Yesùt en apùnì wenagisasike wene
(Mat.11:20-24)
13Atì'nogo yogoisasikesik, hobuk apùnì obogat mel yogoisasike:
“Hit apùnì o Korasim mene mel, o Pesaìra mene mel, apùnì nen hagasusak lek mene an nen elalinat, hit ninom logolìk hagatì lagì a'nogo, o Tìrùt Siron atoma hagatì logoilema re, it apùnì o atoma mene inoabùt hebelarik he, heang hìlìk hagatarek hak, inasu weak mene laberìgìk, wul hesi inùkùl oba yùgùlìgìk, ìkì logolìk he, weak hagatì lagaukwa mene atì hebisìlìk, inoabùt hageat hebela'lep meneat he, hit he, atì'nogo hagasusak hinabìt atì nen weagathinabigin o! 14Hobuk o elùgùn oba Ala nen ùkùm inoba hìgìk, kotìk, igin atì sat he, it apùnì o Tìrùt Siron atoma mene ùkùm inoba hìlìk se negen inoasigin meneat he, hit enek he, motok ekin hogo negen hinoasigin o. 15Nen, hit apùnì o Kaperenagùm mene yì hina'la nen he,
Ala nen pogot oba lìakhinìlìk esinethinegein, ìlùk hogorakìkì lagep a? Motok lek o. We, apùnì wa'la'lùk lagaikare'ma atoma motok pelakhikegein o,” ìlùk yogoisasike. 16Atì'nogo yogoisìlìk he, at agoromì ane wanhì lagaukwa mene amanogo mel yogoisasike:
“It apùnì nen hit hinane holì'lùgì halok he, an naneat holì'lùgì o. Nen,
Ninabìt, ìlùk herakhikaga halok he, anat herakhanha o. Nen, an herakhanha halok he, an lakhani wagaike mene a'nogo ebeat heraksaga o,” ìlùk atì'nogo yogoisìlìk he, laksasike.
It ap inebe 70 nen amanogo inapotkwe wagaukwa wene
17Hobuk it ap inebe 70 nen laksasike mene amanogo ina'la hai hakìlìk, inapotkwe wagaukwasik he, mel yogosukwa:
“Ninoel Nit en mokareke oabùt weak mene atì, hat hetage palogo yogotenem he, ninane esuk holhì laga o,” ìlùk yogosukwama, 18at Yesùt en he, mel yogoisasike:
“Ibilit atì eilhabùt yegelogo lakhei wagarek hak, pogot oba nen pi waganem neileken hasigi o. 19Halok he, lakhani! Walo mel, lìlìm mel, hinesok en al lebelogo potsìgìk, Ibilit ninom weim palek mene a'nogo omame legetsìgìk, hagatì logouageip ìlùk, an nomame wokhisìgìrik esewerek hagathinapì o. Esewerek hagathinapìrì'mo, yì mene tì mene aike nen weagathinabigin motok lek o. 20Atì'nogo meneat he, it mokareke inoabùt weak mene nen hit hinane holharek atì ba, hina'la hai hùkagùp o. At he, hinetage pogot oba helal waganek werek atì hesik enek he, hina'la hai hakìkì logoni o,” ìlùk yogoisasike.
At Yesùt a'la hai hakìkì logolìk Ala hai wasike wene
(Mat.11:25-27, 13:16-17)
21Atì'nogo yogoisasikesik atì sat he, Yesùt a'la Ala Areagùn were'ma nogo nen he, a'la hai hakìkì logolìk opase Ala mel yogosike:
“Ala nopase e. Pogot kweang esewerek harat o. Wene obogat atì, it apùnì ina'la kagalek mene mel, yì wene tì wene inelu mene mel, inelu asinogo ìlùk hinakhìlìk he, it inoabùt yekerùgì ketago mene hake nek he, pak hogo yogoisegen atì re, hat ha'la walok akegen meneat yogoisegen atì nen hai wathapì lagì, nopase!” ìlùk yogosike. 22Atì'nogo yogosikesik, it apùnì amanogo mel yogoisasike:
“An nopase nen yì mene tì mene obogat esewerek logouagalùk wo'nesike. Ala aput atì sa ìlùk apùnì obogat inokot meneat he, an nopase aligat enek elu welagarek. Ati hak he, an nopase Ala atì sa, ìlùk apùnì obogat inokot meneat he, aput an naligat enek nelu welagìrek o. Nen, Ala aput an nenat na'la akìlìk en, nopase ebe apùnì aike inelu asuagalùk nane pak hogo yogoisegein mene hùgì atìat inelu agaikarek o,” ìlùk, yogoisasike. 23Atì'nogo yogoisìlìk he, agoromì ane wanhì lagaukwa mene amanogo inalepma kek hogo wogisek lìlìk elokwe hebek hogo wogisìlìk he, mel yogoisasike:
“Hit hineileken hasak meneat arat hìkì lagep mene yì, hina'la hai hakìkì logoni. 24It ap Ala ane yogoisìkì lagaukwa mene mel, kaintek inetagepogot mene mel, inebe logolegat hit hineileken hìkì lagep mene atì,
Nineileken helo e, ina'la akìkì lagaukwa meneat he, ineileken hìgì'lek welagaukwa. Nen, wene hinasuk holhì lagep mene atì,
Ninasuk holilo e, ìlùk, ina'la akìkì lagaukwa meneat he, inasuk holhì'legat welagaukwa,” ìlùk yogoisasike.
Ap Samaria mene oabùt hano ìlùk oba lìrogo yogoisasike wene
25Wene atì'nogo yogoisìkì lagaikomo re, hobuk ap Ala ane helal waganek yakùlisìkì lagaike mene aike Yesùt oabùt paligìlùk oba wagaikesik he, mel yogosike:
“Noe. An neluk motok logoik en he, noabùt nìkì'nogo hagatì logoik he,” ìlùk yogosikomo, 26at Yesùt en he, mel yogosike:
“Wene Ala nen ninasuk wasike wene a'nogo helal nìkì'nogo waganek were'ma etage salhì lagen,” ìlùk yogosikomo, 27#Im.19:18; Ul.6:5 ap a'nogo nen he, mel yogosike:
“At Musa nen he,
HinetaĂąken mel, hinoabĂąt mel, hinomame mel,
hina'la mel, omakeat arìk, ninopase Ala
Etagepogot ebe atìat hinetaùken hutik logoino o.
Nen, aike re,
Hit hinokawerek hinebe hinetaĂąken hutik
welagesep atì hak he, it apùnì aike hinom
welagasep mene atì hinetaùken hutik logoino o,
ìlùk isikomo helal waganek werek,” yogosike. 28Atì'nogo yogosikomo, at Yesùt en he, mel yogosike:
“Ati wene higit hogoat egen o. Hat hoabùt wene egen atì hagat higit hogo hagatì logogin halok he, heluk motok logogin o,” ìlùk yogosikomo, 29at ap a'nogo a'la nen he,
“Yesùt en,
Ap atì hano hagaterek mene, ìlùk akoak,” ìlùk, mel yogosike:
“Apùnì ninom welagorek mene netaùken hutik logousak atì, inebe sani,” ìlùk atì'nogo yogosikomo, 30at Yesùt en he, mel yogosike:
“Ap aike o Yerusalem en o Yeriko pisike. Pigìlùk ebekalem pikenem he, ap ineki abusak wìlìk negarek mene nen ap a'nogo hakhìlìk he, tùgì motok tamuk-tamak hogo wa'lasusak negen warogo atomaat potsasukwasik, agarok yì mene tì mene helalùk lagaukwa. 31Helalùk lagaukwasi'mo nen, ap aike Ala esewerek mene aike kwe atìkwe pigìlùk pisike hak he, ap a'nogo warek were'ma eileken hasike meneat he, kwe ogalogo hebùlùk pìkìrat pisike. 32At pisike hagat, ap ùkùl etage Lewi mene aike kwe atìkwe pìkì logolìk, ap a'nogo warek were'ma eileken hasike meneat he, kwe ogalogo hebùlùk pìkìt pisikeat. 33It atì'nogo hagasukwa meneat he, ap o Samaria mene aike kwe atìkwe pigìlùk pisike hak he, ap warek a'nogo were'ma eileken hìlìk etawì agaike. 34Etawì arìk he, ebe horok hogo era'lu lìlìk he, ogat libik-taluk hogo wasukwa mene amanogo anggur eken amusu inom, hùnogoat mene amusu aike inom, oumo bakwe wathìlìk he, eka yelogo, at ako keledai apot oba lìakhìlìk he, o apùnì oko palogo nogo egarek oba hei lagaikesik he, serogo nogo isike. 35Serogo nogo ìlùk he, hùenkwe re, ap a'nogo nen he, ap o atì esewerek mene uang perak mene pìre wogotì logolìk he, mel yogosike:
Ap yì serogo logoino. Serogo logolìk he, hat mene yì mene tì mene wogotì logogin mene, oko wokhetì yì lek aga halok he, an hobuk wìrìk oko wokhesigin o, ìlùk yogosike,” ìlùk, Yesùt en ap Ala ane halal waganek esewerek mene a'nogo yogosike. 36Atì'nogo yogorìk he, wene aike mel yogosike:
“It ap yogot wanharek mene nen ap wasukwa mene atì, Ala nen.
Apùnì hinom welagasep mene hinetawìrogo logousak, ìlùk isike a'nogo higit, ap inebe hìnagan atì, sa hak en etawìrasike akegen,” ìlùk atì'nogo yogosikomo, 37ap a'nogo nen he, mel yogosike:
“Ap atì warek were'ma ap aike wagaikesik etawì nen lebethasike atìat o,” ìlùk yogosikomo, at Yesùt en mel yogosike:
“Halok he, hat atì'nogo hagarìk lan o,” ìlùk yogosike.
YesĂąt en Mareta Maria eperak yogoisasike wene
38Atì'nogo yogorìk he, hobuk at Yesùt agoromì ane wanhì lagaukwa mene amanogo inom lagaukwasik, o sili aike kisukwa. O atoma he aike etage Mareta welagaike. At en he,
“Yesùt an naua ki wesuak,” ìlùk ayoko hesikesik wanhike. 39At Yesùt, he Mareta atì agot etage Maria eperak were'ma kisikomo, he Maria a'nogo Yesùt awe a'ma logolìk ane asuk hologo welagaike. 40Meneat he, at Mareta nen,
“Ap pok wagasi'mo,” ìlùk aganeke seget apik isatìk, weratìk, hagatì lagaikesik wìrìk he, Yesùt yogotì logolìk he, mel yogosike:
“Noe. An naligat hat hesik hagatì logouagalùk, an nagot yì lebe'nììgì'lek hebanhe yì hano akegen a? Lebe'nea wesuak en he, yogoom o,” ìlùk yogosikomo, 41-42at Yesùt en he, mel yogosike:
“Mareta. Hat he, yì mene tì mene hesik halabut hìrogo seget apik hagatì lagen hìgì. Meneat he, wene omakeat mene hagasusak werek kolegat he, hat en yì mene tì mene hagatì lagen. Hagot Maria yì re, wene hano mene omakeat atìat weteberogo eserakikesi'mo re,
Heraksan ìlùk yogosusak motok mea o,” ìlùk yogosike.
Currently Selected:
LUKAT 10: LAIDNI
Highlight
Share
Copy
Want to have your highlights saved across all your devices? Sign up or sign in
