LUKAT 11
11
Yesùt en, “Sapan yì'nogo hagatì logousak,” ìlùk agoromì yakùlisasike wene
(Mat.6:9-13, 7:7-11)
1Ineki aike sapùl he, at Yesùt o ninmo logolìk, sapan ìkì lagaike. Sapan arat isikomo nen he, at agoromì ane wanhì lagaukwa amanogo mene aike nen he, mel yogosike:
“Noe. At Yohanet en, at agoromì ane wanhì lagaika mene sapan hagatì logouagalùk yakùlisìkì laga atì hak he, nit hogo atì'nogoat sapan ìkì logouagalùk aike yakùlnisan o,” ìlùk yogosikomo, 2at Yesùt en he,
“Hit sapan uogolùk halok he, yì'nogo ìkì logoino:
Ninopase.
Hat hokawerek hetage esinethìkì logouagalùk haga'ninabi me o.
Nit ninebe hat hawe a'ma logouagalĂąk hina me o.
3Nit ninapùrùk ninhùkwe-nanhùkwe nìkì logousak mene, elok hogoat wo'nisìkì logoino.
4It apùnì nit weak haga'ninabì'lùgì mene inebe
lopok nit en sagalogo legetsogo atì nen, nit en
weak hagatì lago mene hat en sagalogo legetsano.
Weak hagasuagalĂąk nina'la kagaliginmo atoma
herakhinìgì'lek pìkìrat wo'nisek laga logoino,
ìlùk sapan ìkì logoino,” ìlùk yakùlisasike.
5-6Atì'nogo yakùlisasikesik he, agoromì ane wanhì lagaukwa mene amanogo mel yogoisasike:
“Ap hit mene aike hùbeken tùlem agaiyak oba lìlìk yogotì logolìk he.
Nagaiyak e! An nagaiyak aike wele'ma lagalùk en he, noba ha'larìk lagalùk wagasik werek mene re, sùpùrùk melagasusak mene lek en, hat en sùpùrùk horoti werago mene hìnagan halok aike wo'nom o, ìlùk, yogoto halok he, 7at agaiyak a'nogo ouma nen ane wulabek he,
An nagainapùrì ninom kwe yagathìlìk nogo arat ogosi'mo re, ninelu'-ninalak hogo hagate hùk. Nabìt. Nit nogo ikenem an neluk arìk wokhesusak he, mea o, ìlùk atì'nogo yogosusak akegep? 8Lek o. At atì a'la nen,
Nagaiyak mene nen kìno ìlì'logo, ìlùk melagì'lek kamo usak meneat he, at kìno ìkì logolìk ekalì agì'lek ane anìnùogo yogotì logoumo, at melarìk he, at en kìno igin mene higit hogoat wogosiginat akìgì. 9-10Ati hak, an wene aike yogohisak. It apùnì inebe lopok en Ala kìno yogotenem he, at en inebe lopok wogisikerek enek atì. Nen, it aike inebe lopok en yì mene tì mene at oba heratenem inebe lopok he, herakagarek enek atì. Nen, it aike inebe lopok en kwe ane papagathikenem he, at en inebe lopok kwe hùrisikerek enek atì. Ati nen he, hit en Ala kìno yogotì logoino o. Yogotì logoumo wokhisegeinat o. Hano mene at oba heratì logoino. Heratì logoumo, herasugunat o. Kwe ane papagathìkì logoino. Papagathìkì logoumo, at en kwe hùthikegeinat o. 11Hit aike hinagainapùrì nen,
Ikan nele, iko halok he, inopaselak en ikan wogisìgì'lek obùlù'mo walo mene wogisegesep nogo? 12Ì a, at he,
Sùeken nele, iko halok he, lìlìm hake mene wogisegesep nogo a? Legat o. 13Hit hinoabùt weak hagatesep meneat he, inagainapùrì atì hano mene wogisagarek hinelumo re, hano mene wogisegesep atì. Ati hake, hinopase Ala pogot oba mene yogotì logolìk,
Hareagan atì wo'nisan o, ìlùk, kìno yogotep halok he, wokhisegein lek nogo? Wokhisegeinat o,” ìlùk yogoisasike.
“At Yesùt atì Peelsepùl oba loukse'ma hagarìk niko,” ìlùk isukwa wene
(Mat.12:22-30; Mrk.8:20-27)
14Ineki aike sapùl he, at Yesùt en ap aike a'la mokareke oabùt weak mene kisikomo ane motok lek agaikesik welagaike mene ap atì a'la nen henogo wulakhesikomo re, ane huak hogo isike. Atì'nogo isikomo apùnì apik en he,
“Egi! Nayùk e,” ìlùk hogorasukwa. 15Atì'nogo hogorasukwa meneat he, it aike nen, mel isukwa:
“At Yesùt atì mokareke inoabùt weak mene inoe kain etage Peelsepùl a'nogo omame ba mokareke at agoromì negen inoabùt weak mene apùnì ina'la kìlìk were'ma henogo wulaksìlì'logo,” ìlùk ikenem, 16it aike nen, at Yesùt oabùt paluogolùk he, mel yogosukwa:
“Hat hebe Ala nen lakhagei wagama wagen halok he, nit en hùthagagùkwe, hat en elalin mene aike hagasin he,” ìlùk yogosukwa. 17Atì'nogo ìkì lagaukwama, at Yesùt it ina'la akasukwa mene enagat hùrisìlìk he, mel yogoisasike:
“Kaintek inetagepogot inagoromì inawe a'ma hagisek welagaikarek obakwe lopok, it-it inom mìkìlogo hùlìthakìlìk, inom weak logogun halok he, maben asugun o. Nen, ap inebe lopok inagainapùrì inom hùlìthakìlìk inom weak logogun halok he, atì'nogo weak asugunat o. 18Mene re, hit en an yogonetì logolìk he,
Mokareke inoabùt weak mene inoe etage Peelsepùl atì hoba louksek were'ma at omame ba mokareke oabùt weak mene aike apùnì ina'la kìlìk were'ma henogo wulaksìkì lagen, ìlùk yogonetì lagep atì, at Ibilit atì okawerek agoromì inom hùlìthakìlìk inom weak a'lepma re, at agoromì hagisek welagarek mene nìkì'nogo omame logoilep. Mea o. 19Ati hak, an nen mokareke inoabùt weak mene inoe etage Peelsepùl atì omame ba mokareke inoabùt weak mene aike apùnì aike ina'la kìlìk were'ma henogo wulaksìkì lagì halok he, hit hinagoromì nen sa omame ba mokareke henogo wulaksìlì'lùgì akegep. Hinagoromì nen atì'nogo hagarì'lùgì atì ba, it en he,
Wene at Yesùt hesik egep atì re, kolo egep o, ìlùk ùkùm hinoba hou hak hagarì'lùgì o. 20Meneat he, an nen Ala omame atì ba mokareke oabùt weak mene atì henogo wulaksìkì lagì halok he, Ala awe a'ma hisegein atì arat hinoba hakok i waga o. 21Ap aike omame apik mene nen asike arìge nìmì'-nomok hogo hakìlìk aua kagalek logogin halok he, agarok yì mene tì mene obogat hano tegelek logogin o. 22Meneat he, ap aike at omame hake re, lek. At he, omame motok apik mene ap a'nogo aua ki wìrìk, ebe mabenetsìlìk, asike arìge oba hìpìrìk logogin mene amanogo telhì logolìk he, agarok yì mene tì mene amanogo waganogo motok it aike sùpùrogo wogisegein o.
23“Nen, sa nen ebe an werekwe agì'lek halok he, at atì an neperak weim palek meneat o. Nen, sa nen an neperak atogorinapì lago lek mene halok he, at atì nenat pùgùlogo wulaksìlì'logo o,” ìlùk yogoisasike.
“Mokareke oabùt weak mene apotkwe wagarek,” ìlùk yogoisasike wene
(Mat.12:43-45)
24Atì'nogo yogoisasikesik he, wene aike mel yogoisasike:
“Mokareke oabùt weak mene atì apùnì ina'la nen wùlùperesik he,
An naua komakwe logoik en wo'lakak he, ìlùk, set walogo logousak oba obùlùk herarìk, lei pùparekwe i motok le'ma nikerek nikerek he, heraterek motok lek en he, mel ikerek:
An naua ebalep welagì ba a'nogo napotkwe lìlìk kigin o, ìlùk wagarek. 25Wagaresik kikerek he, o a'nogo motok lelem wulagasogo tegelek were'ma ha wagaresik he, 26hobuk apotkwe wùlìbi lagaresik, mokareke aike at oabùt hake lek. At he, inoabùt motok weak mene inebe 7 nen inayoko lagaresik wogisek wìrìk, ap atì a'la kagaresik welagaikarek o. Atì'nogo kìlìk were'ma re, ap atì alep he, oabùt hano negen welagaike meneat he, hobuk oabùt motok weagat haga'lagarek o,” ìlùk yogoisasike.
“Sa a'la hai hakìlì'logo,” ìlùk yogoisasike wene
27Wene atì'nogo erat yogoisasikomo nen he, it apùnì apik amanogo mene, he aike nen ane hùkorogo Yesùt mel yogosike:
“Hat hagosa hebe takhapikesik eilak hùnethapike mene a'nogo a'la hai hakìkì logouak o,” ìlùk atì'nogo yogosikomo, 28at Yesùt en he, mel yogosike:
“At atì nek lek o. It aike Ala ane atì inasuk holìk higit hogo hagatì logogun halok he, ina'la hai apik hakìkì logouagat o,” ìlùk yogosike.
“Nit en hùthagagùkwe, elalin mene aike hagasin o,” ìlùk yogosukwama, Yesùt en oko yogoisasike wene
(Mat.12:38-42)
29Atì'nogo yogosikomo, apùnì motok apigat Yesùt oba atogosi wagaukwama, at en wene mel yogoisasike:
“Hit apùnì o yogotak welagep mene yoma hinoabùt weak enek hagatì lagep o. Hit en he,
Nit en hùthagagùkwe re, hat en elalin mene aike hagasin he, ìlùk, yogonetì lagep meneat he, an nebe hùthanuageip ìlùk, an nen elalin hùnogoat mene aike hagasigin motok lek o. We, at Yùnùt en apùnì hùthoagalùk elalinat hagasike atì hak enek an nen hobuk aike hagatenem hineileken neogoin o. 30At Yùnùt atì apùnì o Niniwe mene atoma wene hùthoagalùk ebe welagaike atì hak he, an abat ta'lasi wagagi a'nogo re, hit apùnì o yogotak welagep mene yoma nen nebe hùthanuagalùk welagì o. 31Hageat he, at he kain mene awi o i apùtmo higit pogot eroma walegat atoma nen at ap Salomo atì a'la motok kagalek logolìk hagatì lagaike mene asuk holigìlùk wagaike. Mene re, at Salomo atì mea negen. Meneat he, an yoma welagì yì nek he, esin nogo nen he, o elùgùn oba Ala nen apùnì ùkùm inoba hìgìk, kotìk, igin atì sat, at he kain atì melarìk he, hit apùnì o yogotak welagep mene yì mel yogohisegein:
Hit weak, hinekalì, ìlùk yogohisegein o. 32Nen, at Yùnùt atì nen it apùnì o Niniwe mene atoma Ala ane yogoisìkì lagaikomo re, inoabùt hebelarìk, yì weak tì weak hagatì lagaukwa mene heraksasukwa o. Mene re, at Yùnùt atì etage lek negenat o. We, an yoma welagì yì nek he, esinat nogo nen he, o elùgùn oba Ala nen apùnì ùkùm inoba hìgìk, ketik, igin atì sat he, apùnì o Niniwe mene atoma inebe melarìk, hit apùnì o yogotak welagep mene yì mel yogohisogoin:
Hit weak, hinekalì, ìlùk yogohisogoinat o,” ìlùk yogoisasike.
“Hinebe o lìa negen welagep atì ero hineileken atì nenat o,” ìlùk yogoisasike wene
(Mat.5:15, 6:22-23)
33Atì'nogo yogoisasikesik he,
“Apùnì aike re, esage kìalogo re, abùrare'ma hinagasogo hìgìk, sogoloak en sebelogo hìgìk, hagarek motok lek. At he, kìalogo re, apùnì ouma kìkì logolìk o lìa were'ma ineileken enagat hoagalùk he, esok telik oba hagarek. 34Ninebe hesik he, esage kìalek hake, nineileken atìat werek o. Hineileken atì hano halok he, hinebe abirat motok lìaat logogun o. Meneat he, hineileken atì weak halok he, hinebe atì o mùm hikakse'ma hake logogun o. 35Atì halok he, hina'la o lìa hake mene werek atì mùm asinogo ìlùk, hinoabùt hebelogo logoino. 36Nen, hit hinebe abirat he, o mùm hake aike lek, we, lìa motok enek welagep halok he, esage kìalaga logolìk hinoba yararathikerek hak, hinebe abirat lìa logogun o,” ìlùk yogoisasike.
Ap Parisi mene inom, Ala ane helai waganek yakùlisìkì lagaukwa mene inom, Yesùt en inekalì wasike wene
(Mat.23:1-36; Mrk.12:38-40)
37Yesùt en wene atì yakùlisiko were'ma, ap Parisi mene aike nen Yesùt mel yogosike:
“An were'ma sùpùrùk neperak na lùok en eme o,” ìlùk ayoko hesike. Ayoko hesikomo, lagaikesik aua kìlìk he, sùpùrùk nùogolùk hù'lagaukwa. 38At Yesùt eki bakwe horatì'legat sùpùrùk nagalùk hù'lagaikomo nen he, ap Parisi mene a'nogo nen eileken hìlìk he,
“Egi! Nayùk e!” ìlùk a'la nen wene palhike. 39Atì'nogo isikomo re, at ninoe Etagepogot Yesùt en mel yogosike:
“Hit ap Parisi mene hinageisoak atì mel, piring atì mel, we, etakwe nek hanorogo sobalhì lagep meneat he, a'lakwe apùnì inagarok hineki abusak helegesep mene atì mel, yì weak tì weak hagatesep mene atì mel, hina'la motok apik peserek werek atì kolo o! 40Eige! Hit atì hinebe kepù hagatì lagep. Ninogat etakwe hagarogo hinasike mene nenat, nina'la hagarogo hinasike lek nogo? At Ala nenat hagarogo hinasike akìgì. 41Halok he, hit mene yì mene tì mene piring a'la hìkì lagep mene atì, apùnì inagarok lek mene sùpùrogo wogisegep halok he, hit hesik yì mene tì mene obogat ebenakwe sobalek logou hak hano logogin o. 42Mene re, hit ap Parisi mene Ala nen weagathinabigin o. Hit en he, Ala ebe hinetaùken hutik welagaikarek atì mel, apùnì aike hesik higit hogo hagatarek mel, hagatì logousak werek kolegat he, atì'nogo hagatì'lek logolìk, labet eka hake mel, heite hake mel, su'li ka hake mel, hineki wenagasogo hinomolo ba asi waganem, omakeat aike Ala hesik hisìkì lagep atì, wene ebe abelma mene atì hano hagatì lagep meneat he, wene esin mene hagatì'lek heraksìkì lagep atì kolo o! 43Hit ap Parisi mene Ala nen weagathinabigin o. O apùnì Yahuri mene sapan egare'ma ap kaintek mene inobùlù'mo hit tak eilem-eilem hù'lasi kìgìk, nen, o pasar hagarek oba yì mene tì mene oko wanhare'ma atoma apùnì nen hai hanorogo wa'ninabuagalùk kìgìk, ìkì logou atì nek walok welagasep atì. 44Hit hinebe re, mel hake welagep. Apùnì wa'laganem kweangma salinaparesik, inetawì wekelogo hùlì hìgì'lek heraksagare'ma, apùnì inokot logolìk inesok en sebelogo hìlìk lagaikarek hak, hit atì'nogo weak werek kolegat, apùnì inokot logolìk hinom welagasep atì nen, Ala nen weagathinabigin o,” ìlùk yogoisasike.
45Atì'nogo yogoisasikomo re, ap Ala ane yakùlisìkì lagaike mene aike nen he, Yesùt mel yogosike:
“Noe. Hat egen atì nit ninomat ninekalì wathinegen hìgì!” ìlùk isikomo, 46at Yesùt en he:
“Hit ap Ala ane helal waganek yakùlisegesep mene yìrogo re, Ala nen weagathinabiginat o. Hit en he, wene ekin apik atì akìgì'legat, apùnì inoba hìkì logolìk, ekin mene atì hineki tùm omakìkwe leberisahùk logolìk inoba hìkì lagep yoma rì! 47Ap Ala ane yogoisìkì lagaukwa mene inoasukwa atì hit hinopalak enat inoasukwa. Nen, hit hinebe it en tagokwe logolìk, it atì inoak oba inetawì wekelogo hìbìl waganogo, o wùrogo hìkì lagep atì nen, Ala nen weagathinabigin o. 48Hinopalak en ap Ala ane yogoisìkì lagaukwa mene inoasukwa a'nogo, hit en inoak oba inetawì wekelogo hìbìl waganogo o warogo hìkì lagep atì re,
Ninopalak hagasukwa atì hìgìrat hagasukwa, ìlùk u hagat hagatì lagep atì. 49Atì'nogo hagatesep atì nen, at Ala a'la kagalek motok a'nogo nen ìkì logolìk,
An nen he, it ap an nane yogoisagarek mene mel, inayoko hìlìk laksa wagìrek mene mel, it apùnì aike inoba laksa waganem he, it en he, inebe he'nakìt inoatìk, he'nakìt yì aik tì aik hagarinapìk, ugun o, ìlùk isike higit hogoat, 50-51kweang pogot elalhike hùlì nen emakum Habel oe nen amep wulagasogo wasike nen he, pìkìt it ap Ala ane yogoisìkì lagaukwa mene inoarìk inoarìk, hùlì ap Sakaria Ala awì wùrìk hokolek, at ako warogo etu loletì lagaukwa ba hokolek, tùlem amep wulagasogo wasukwa atì hùlì, inamep pisike atì obogat hit apùnì yogotak welagep mene yì hinoba hegein o. 52Halok he, hit ap Ala ane helal waganek yakùlisegesep mene yì ouma kwe hùrogo kuogolùk walhagarek hak, it apùnì aike yì wene tì wene inelu asuogolùk walhikenem, hit en kunci telìlìk hesogo logolìk hinokawerek hinelu asuogolùk yakùlhì'lek logolìk, it aike yakùluogolùk ikenem, hit en he,
Yakùlusak lek o, ìlùk wenagisegesep atì nen Ala nen weagathinabigin o,” ìlùk atì'nogo yogoisalùk he, 53-54o a'nogo hebisalùk eta'ma wùlìbi lagaike. Wùlìbi lagaikomo re, it ap Ala ane helal waganek esewerek mene mel, Parisi mene mel, ina'mage at oba hìkì logolìk,
“At Yesùt atì ane igin oba wene eken hìlìk ebe wasuok,” ìlùk he, anema hùko wanhìk, hamùlùgat wanhìk, ìkì logolìk ineil wanhì lagaukwa.
Currently Selected:
LUKAT 11: LAIDNI
Highlight
Share
Copy
Want to have your highlights saved across all your devices? Sign up or sign in
