LUKAT 8
8
Hìmì Yesùt opolik nìkì logolìk, at hesik hagatì lagaukwa wene
1At Yesùt atì'nogo hagasikesik he, welagì'legat, hobuk Ala awe a'ma hisikerek wene a'nogo, o sili hùkokwe hamùlùkkwe yogoisìlìk nìkì lagaike. Yogoisìlìk nìkì logolìk, at agoromì mene inebe 12 en amanogo mel, 2it hìmì aike mokareke oabùt weak mene ina'la kìlì'mo henogo wulaksìgìk, inoba ou mene hagarinapìk, hageat hagarinapike mene aike mel, inom nìkì lagaukwa. Hìmì atem aike re, he Maria awì Maktala ìkì lagaukwa mene, alebat mokareke inoabùt weak mene inebe 7 nen a'la kìlìk were'ma, at Yesùt en henogo wulaksasike mene atì mel, 3nen, aike re, he Yohana ap kain Herotet agarok yì mene tì mene eki ba logolìk hagatì lagaike mene etage Kusa atì agwe mel, he Susana mel, nen, aike re, it hìmì he'nakit logolegat mel, uang it mene ba yì mene tì mene oko palogo Yesùt agoromì inomat leberisìlìk nìkì lagaukwa.
Ap aike awì heik lakhìlìk lagaike ìlùk oba lìrogo yogoisasike wene
(Mat.13:1-9; Mrk.4:1-9)
4At Yesùt o atoma were'ma, apùnì motok apik o ya ta nen, esa logolegat oba atogosi wagaukwama, at en wene oba lìrogo mel yogoisasike:
5“Ap aike yabu waganogo awì yaterek mene awì heik lakheigìlùk wùlìpike. Wùlìpikesik, heik lakhìlìk laganem he, eken aike kwe ebekalem pìlìk lagaike. Atì'nogo pikenem apùnì laga logolìk he, inesok en al lebelogo hìlìk lagaukwama re, sùe purogo nikerek mene wìrìk heleleng hogo nasike. 6Nen, eken aike re, helep talek oba pìlìk lagaike mene re, hepok hulelhikesik he, kweang amusu lek en pùk agaike. 7Nen, eken aike re, pakì ekele'ma pisike mene re, paki atì inom omakìkwe hulelhikesik, awì hano mene a'nogo pakì atì nen palogo pelapikomo kakil agaike. 8Nen, he'nakit he, kweang hanoma pìlìk lagaike mene re, hulelhikesik he, hùko arìk, ero lopok eken 100 nen ìrìk lagaike,” ìlùk yogoisasike. Atì'nogo yogoisìlìk ane hùkorogoat ìkì logolìk he,
“Hinasuk holusak halok he, hanorogo holini o,” ìlùk yogoisasike.
Yesùt en he, “Wene oba lìrogo yogohisìgìrek atì, ebe tì hesik,” ìlùk yogoisasike wene
(Mat.13:10-17; Mrk.4:10-12)
9Atì'nogo yogoisasikomo, at agoromì ane wanhì lagaukwa mene amanogo, at Yesùt mel yogosukwa:
“Hat en wene oba lìrogo yogonisegen atì, ebe kì'nogo mene hesik egen,” ìlùk yogosukwama, 10#Yes.6:9-10 at Yesùt en he, mel yogoisasike:
“Ala nen awe a'ma hisikerek wene atì, at a'la hinago welagaike mene atì, hit enek he, wene atì hinelu asuageip ìlùk pak hogo yogohisasak ìlùk, akasike meneat he, it apùnì aike atì re, at Ala nen he,
Ineileken hìkì logogun meneat he, tùkùm hogo hìkì logogun lek o. Nen, inasuk holhì logogun meneat he, tùkùm hogo hùthìkì logogun legat o,
ìlùk isike atì higit asuagalùk wene atì oba lìthìgìgat yogoisìkì lagì o,” ìlùk yogoisasike.
At Yesùt en “Ap aike heik lakhìlìk lagaike, ìlùk yogohisìgì a'nogo re, ebe yì'nogo,” ìlùk yogoisasike wene
(Mat.13:18-23; Mrk.4:13-20)
11Atì'nogo yogoisasikesik he, hobuk aike mel yogoisasike:
“Wene oba lìrogo yogohisìgì a'nogo ebe yì. Heik lakhìlìk lagaike ìgì a'nogo re, ebe Ala ane atìat o. 12Kwe ebekalem pisike atì ebe re, it apùnì aike Ala ane inasuk holharesik, eberogoat ìlùk wanhenem, Ala nen inebe telinabinogo ìlùk, Ibilit wagaresik he, wene ina'la nen henogo wolok lagarek atìat o. 13Nen, helep oba pisike mene atì ebe re, it apùnì aike Ala ane atì inasuk holharesik he, ina'la hai hakìkì logolìk wanharesigat he, inetaùkenma omaken yatì'lek en eberogoat ìlùk hamùlùgat enek akìlìk were'ma, weak hagasuagalùk ina'la kagali waganem he, arat kobok hogo heraksalùk wùlùparek atìat o. 14Nen, pakì api'mo pisike atì ebe re, it apùnì aike Ala ane atì inasuk holharesik enat ina'la nen he,
Eige. Nìkì'nogo hagasigin he, ìlùk, wenesùgì ebetìk,
Nagarok apik logoilep e, ìlùk ina'la ebetìk, kweangma mene ina'la hai hakasak mene oba ebetìk, egarek atì nen he, ina'la Ala ane atì eken wurik agì'lek lologo lek agarek atìat o. 15Nen, kweang hanoma pisike atì ebe re, it apùnì aike hano wene atì inasuk holharesik he, inetaùkenma motok tùkùm hogo helagaresik hebìgì'lek hesogo logolìk, eken apik ìterek atìat o,” ìlùk yogoisasike.
Esage oba lìrogo yogoisasike wene
(Mrk.4:21-25)
16Atì'nogo yogoisìlìk he, aike mel yogoisasike,
“Apùnì nen he, esage kìalogo re, sogoloak a'ma sebelogo hìgìk, nogo egarek oba a'ma hìgìk, egarek lek. Apùnì ouma kìkì logolìk lìa were'ma enagat hoagalùk he, esage esok telik oba legesogo hagarek. 17Atì'nogo hikenem, yì mene tì mene hinago welagarek mene atì, weinam agìk, wene ina'la hinago welagarek mene atì, sele'ma hukalogo hìgìk, igin 18atì nen he, wene hinasuk holhì lagep mene atì, hanorogo hùthìkì logoino o. It apùnì inagarok werek mene atì re, aike inom sabarogo wogisegein. Meneat he, it aike lek mene atì re, ina'la nen he,
Hamùlùgat ya elok werek, akìlì'lùgì mene atì telogo helegein o,” ìlùk yogoisasike.
“An nagosa nagoromì it yìat o,” ìlùk yogoisasike wene
(Mat.12:46-50; Mrk.3:31-35)
19Atì'nogo yogoisiko were'ma, at Yesùt agosa mel, agoromì mel, at oba wagaukwa mene re, apùnì apik inom werek en he, oba kusak lek haga'lagaike. 20Atì'nogo haga'lagaikomo re, it apùnì aike nen mel yogosukwa:
“Yesùt! Hat hagosa mel, hagoromì mel, herakhabìk wagaikasik olilu werek o,” ìlùk yogosukwama, 21at Yesùt en he, mel yogoisasike:
“An nagosa nagoromì atì re, apùnì Ala ane inasuk holharesik he, higit hogo hagatarek mene atìat o,” ìlùk yogoisasike.
YesĂąt en sogoi apik mene legethesike wene
(Mat.8:23-27; Mrk.4:35-41)
22Ineki aike sapùl he, at Yesùt ebe inom, agoromì ane wanhì lagaukwa mene amanogo inom, i so a'la kisukwasik he, mel yogoisasike:
“I aik ìlì bakwe wùlùbuok o,” ìlùk yogoisasikesik he, wùlùpukwa. 23Wùlìpì logolìk he, at Yesùt nogo isike. Nogo iko kolek, sogoi apik hunha wagaikomo, i ha'labu apik aga logolìk, i kesalogo re, so a'la kisikomo, so a'nogo wule'lak hogo pigìlùk isike. 24Atì'nogo hagasikomo, it amanogo nen, at Yesùt nogo ikenem eluguthìkì logolìk he, mel yogosukwa:
“Ninoe! Ninoe! Nit arat i logoin yoma,” ìlùk yogosukwama, at Yesùt eluk agaikesik he, sogoi mel, i ha'labu mel, wenagasikomo palarìk he, motok hapuk isike. 25Hapuk isikomo, at Yesùt en agoromì amanogo mel yogoisasike:
“Hinetaùken noba hìpìrìk welagep mene a'nogo, ka laguma nen ìkì lagep,” ìlùk, atì'nogo yogoisasikomo it inayùk agaukwasik, it-it ìkì logolìk he,
“Egi! Ap yì sa akegep. Sogoi mel, i ha'labu mel, at ane ba,
Lek ame, ikenem, ane hologo lek aga atì nayùk e,” ìlùk hogorasukwa.
Yesùt en ap o Kerasa mene aike mokareke oabùt weak mene a'la kìlìk were'ma henogo wulaksasike wene
(Mat.8:28-34; Mrk.5:1-20)
26Atì'nogo ìlùk, hobuk he, at Yesùt agoromì inom i Kalilea yekelek aìk ìlì bakwe so warogo o Kerasa wùlùpukwa. 27-29Wùlùpukwasik, aik oba wùlìbi lagaukwa hak, ap aike awì sili kota atì mene mokareke oabùt weak mene a'la kisikomo welagaike mene, at Yesùt oba wagaike. Ap atì hageat en mokareke oabùt weak mene ninhùp-nanhùp a'la kikenem, it apùnì aike nen eki esok posie omaken oba homatì lagaukwa meneat he, hele tilip-telap hogo laksìlìk, mokareke a'nogo nen wolok o leimo apùnì le'ma atoma laga lagaikesik he, hobuk su labere'lek alulukwaat, at aua loporogo welagì'lek omoula warek mene hisagarekkwe atoma motok logolìk Yesùt ebe waganem eileken lakhasikesik awe a'ma hù'lasi kìlìk ane hùkorogoat mel yogosike:
“Yesùt. Hat Ala Etagepogot aput yì, an nìkì'nogo haga'nabigìlùk wagen,” ìlùk yogotenem, at Yesùt en mokareke a'nogo wùlùbuagalùk yogosikomo, at a'nogo nen:
“Noe. Weaga'napùn o,” ìlùk ane lìok hogo yogosike. 30Atì'nogo yogosikomo re, at Yesùt en hinok wokhìkì logolìk he, mel yogosike:
“Hat hetage sa,” ìlùk yogosikomo, ap a'nogo mokareke inoabùt weak mene esa logolek a'la kìlìk welagaukwa atì nen he,
“Netage esa logolek u hak, Legiun,” ìlùk yogosike. 31Atì'nogo yogorìk he, it mokareke inoabùt weak mene amanogo henogo i kat wea'ma pelaksanogo ìlùk inane lìok hogo Yesùt yogosukwa. 32Ati sat, o atoma tom ùkùl obakwe wam motok apigat amisang wìlìk niko nen he, it mokareke inoabùt weak mene amanogo nen Yesùt mel yogosukwa:
“Wam a'loma a'la kalasi lagùkwe re, lakhinan o,” ìlùk, inane lìok hogo yogosukwa. Atì'nogo yogosukwama, at Yesùt en he,
“Ì o. Lani,” ìlùk, yogoisasikomo re, 33it mokareke inoabùt weak mene amanogo, ap a'nogo a'la nen henogo wùlìbi lagaukwasik, wam amanogo a'la kalasi lagaukwama re, motogat i kat oba nen lùrogo, i hùko yekele'ma pìlìk i lagaukwa. 34Atì'nogo haga'lagaikomo, it ap wam kalogo welagaukwa mene ineileken hasukwasik he, humusek yoko lagaukwasik, wene haga'lagaike mene a'nogo apùnì o sili hùkoma yogoisìgìk, hamùlù'mo yogoisìgìk, yogoisasukwa. 35Atì'nogo yogoisa lagaukwama re, it apùnì nen he,
“Nìkì'nogo haga'lagama nen ega,” ìlùk, ineileken huogolak Yesùt oba wagaukwa. Wagaukwa re, ap mokareke inoabùt weak mene a'la nen wùlìpike mene a'nogo epe hebelagaikesik asu laberogo Yesùt awe a'ma hùrek were'ma ineileken hasukwasik, inayùk agaukwa. 36Inayùk agaukwama re, it apùnì aike Yesùt en hagatenem ineileken hasukwa mene nen, mel yogoisasukwa:
“Ap mokareke oabùt weak mene a'la kìlìk welaga a'nogo tì'nogo hano hagate,” ìlùk pìlìngìrogo yogoisasukwa. 37Atì'nogo yogoisasukwama, it apùnì o kota Kerasa mene mel, o esakokwe mene mel, inebe obogat inayùk apik agaukwasik he, Yesùt mel yogosukwa:
“Yesùt. Hat hebe ninom yoma logousak lek. Lan o,” ìlùk yogosukwa. Atì'nogo yogosukwama, at Yesùt i so a'la kìlìk warogo re, apotkwe wagaike. 38Wesìilùk ikenem he, ap mokareke inoabùt weak mene a'la kìlì'mo henogo wulapike mene a'nogo nen, mel isike:
“Noe. Neperak nìkì logouok en, lùok o,” ìlùk, ane elageik ane Yesùt yogosikomo, at Yesùt en he,
“Lek o,” ìlùk aua lakhìkì logolìk he,
39“Haua lan o. Lìlìk he, Ala nen hagathape mene atì pìlìngìrogo yogoisìlìk nìkì logoino,” ìlùk, asuk warogo lakhesikomo ap a'nogo aua lagaikesik he,
“Yesùt en tì'nogo haga'nape o,” ìlùk, pìlìngìrogo it apùnì o kota atoma mene obogat yogoisìlìk nìkì lagaike.
Yesùt en Yairùt a'logo hagatìk, he aike amep lago motok welagaike mene hagatìk, isike wene
(Mat.9:18-26; Mrk.5:21-43)
40At Yesùt ebe i aik ìlì bakwe nen apotkwe wùlìbi wagaikomo re, it apùnì inebe apigat en, at ebe serogo welagaukwasi'mo nogo nen he, hai warogo wanhukwa. 41-42Atì'nogo wanhukwama, ap aike etage Yaìrùt, o apùnì Yahuri mene sapan egarek oba inoe kain mene, a'logo omakeat tago mene ebe ta'lagaikesik oba nen, mo lagagìk pìgìk iko kolek, umur 12 tahun haga'lagaike hak, ou en horogat wa'lasigìlùk ìkì lagaikomo, Yesùt oba wagaikesik awe a'ma eitep awì yagasogo hai watì logolìk he, mel yogosike:
“Noe. An naua lùok o,” ìlùk, ane elageik ane yogosike. Atì'nogo yogosikomo, Yesùt at eperak lùogolùk laganem he, apùnì motok apik opolik kerelek-hoporek lagaukwa. 43Laganem he, he aike amep lago motok werek kolek 12 tahun haga'lagaike mene, it aike nen hano hagasuagalùk inayoko hìkì lagaike meneat he, it en hano hagatì'lek werek kolek, amep a'nogo palagì'lek lago motok welagaikesik, 44apùnì apik amanogo laganem, Yesùt apotma lagaikesik he, asu elùgùn eki hakasike. Atì'nogo hakiko kolek aremnogoat amep a'nogo palagaike. 45Eki atì'nogo hakasikomo, at Yesùt en he, mel isike:
“Sa nen eki ha'niike he,” ìlùk isikomo it apùnì amanogo aike inane oba lopolhì'lek motok kamo isukwama, at Peterùt en he, mel yogosike:
“Noe! Apùnì motok apik kerelek-hoporek waga logolìk nogo nen he, hat hoba yìgìrogo wagaikama o,” ìlùk yogosike. 46Atì'nogo yogosikomo, at Yesùt en he, mel isike:
“Lek o. Apùnì aike nen ineki ha'neegama nen, an nomamerogo elalin hagarinapìrek a'nogo mene na'la nen apùnì aike inoba laga enagat hìgì o,” ìlùk yogosike. 47Yogosikomo, at he a'nogo a'la nen he,
“Arat hù'niike hìgì o,” ìlùk, ayuk agaikesik, oak lei'-leik Yesùt oba wìrìk he, eitep awì yagasogo awe a'ma kisikesik mel yogosike:
“An yì'nogo nen hasu neki hakìgì o. Atì'nogo hakiko kolek aremnogoat hano agìma yì,” ìlùk, apùnì amanogo ineilhanem motok pìlìngìrogo yogosike. 48Atì'nogo yogosikomo, at Yesùt en he, mel yogosike:
“Na'logo e! Hetaùken noba hipìrethegen atì nen hano agen o. Halok he, ha'la hanorogo lan o,” ìlùk lakhesike.
49Atì'nogo yogoto kolek aremnogoat he, o apùnì Yahuri mene sapan egarek oba inoe kain a'nogo aua nen agot aike yoko wagaikesik he, mel yogosike:
“Noe. Ha'logo a'nogo arat wa'lagama nen wagì o. Halok he, ninoe kain wene yakùlnesikerek mene arì, hobogomat heperak lùogolùk oba sabelusak lek o,” ìlùk yogosike. 50Atì'nogo yogosikomo re, at Yesùt asuk holhikesik he, kain a'nogo mel yogosike:
“Ha'la wenesùgì ebetùn o. Hetaùken noba hipìrethegen halok he, ha'logo atì hano asigin o,” ìlùk yogorìk yogorik he, 51Yaìrùt aua lagaukwa. Lagaukwasik he, apùnì he'nakit olilu logouagalùk yogoisìlìk he, Peterùt mel, Yohanet mel, Yakobùt mel, helekerek a'nogo opase agosa mel, inebe atem enek wogisek ouma kisike. 52Kisukwa hak he, apùnì motok apik helekerek a'nogo ware'ma logolìk he, ouak le agìk, inetaùken warìgìk, ikenem kìlìk he, at Yesùt en he, mel yogoisasike:
“Le aga hùk o. Helekerek atì wa'lagì'lek. We, nogo ìlì'logo,” ìlùk yogoisasikomo, 53it en he,
Helekerek atì arat wa'laga, ìlùk inelumo nogo nen he, Yesùt agato apik agaukwa. 54Agato apik agaukwama, at Yesùt en helekerek a'nogo eki hagasogo menhìkì logolìk he, mel yogosike:
“Na'logo e. Melame o!” ìlùk yogoto kolek aremnogoat he, 55areagùn wùlìpike mene hobuk kisikomo ebe arat eluk agaikesik melagaike. Melagaikomo, at Yesùt en yogoisìkì logolìk he,
“Apùrùk aike noak en wogo'ni o,” ìlùk yogoisasike. 56Atì'nogo yogoisasikomo, at helekerek a'nogo opase agosa nen he,
“Nayùk e!” ìlùk, hogorasukwa meneat he, at Yesùt en he, mel yogoisasike:
“Hagatenem hineileken neegep mene atì, apùnì aike motok yogoisagùp o,” ìlùk, inasuk wasike.
Currently Selected:
LUKAT 8: LAIDNI
Highlight
Share
Copy
Want to have your highlights saved across all your devices? Sign up or sign in
