LUKAT 7
7
Ap tentara mene inoe kain atìtìgeke mene Yesùt en ou hnganiko wene
(Mat.8:5-13)
1At Yesùt en apùnì apik amanogo wene atì'nogo obogat yogoisalùk he, o Kaperenagùm ki wagaike. 2At ki wagaikomo atoma ap tentara mene inoe kain aike atitigeke aike etaùken hutik mene oba ou motok weak en he, walasusak negen welagaike. 3Atì'nogo werek en, ap tentara mene a'nogo inoe kain Yesùt abok asuk holhikesik he, atitigeke a'nogo hagasi wesuagalùk, ap inalùgetek Yahuri mene aike yogoisìlìk he,
“Yesùt ha lani o,” isike. 4-5Atì'nogo isikomo, it amanogo Yesùt oba wagaukwasik he, inane keirogoat mel yogosukwa;
“At ap tentara mene inoe kain atì apùnì nit mene etawì'ninapìk, at en o nit sapan ogorek oba Wù'nisìgìk, hagateresi'mo atì re, at atitigeke mene atì ou hagasi lasak o,” ìlùk, atì'nogo yogosukwama re, 6Yesùt ebe inom lagaukwa. Ouma lagaukwasik he, kuogolùk horok hogo asi lagaukwa hak he, ap tentara mene inoe kain a'nogo nen agoromì aike wene Yesùt yogosi loagalùk laksa wagaike. Laksa wagaikomo, it amanogo nek Yesùt oba wìrìk he, mel yogosukwa:
“Noe. Nit ninoe nen he,
At esok alemarogo wesinogo. An ap yekeregat ma, at an naua ki wesusak meaat. 7Nen an nen, at oba lasak ìlùk akìgì legat. Meaat o. We, at ane nek healumo nen he, an natitigeke mene yì hano asigin o. 8An hogo re, nogogì kaintek inawe a'ma logolìk, inane holhìk, nen an nagoromì tentara mene nawe a'ma logolìk, nane holhìk, hagatoresi'mo re, an nen, at aike,
Lan o, ìlùk yogotì halok lagarek. Nen, aike,
Eme o, ìlùk yogotì halok he, wagaregat o. Nen, natitigeke aike,
Yì hagasin, ìlùk yogotì halok he, hagateregat o, ìlùk yogohesuagalùk lakhina wagama wago,” ìlùk yogosukwa. 9Yogosukwama, at Yesùt en he, mel isike:
“Ap atì nayùk e,” ìlùk, hogorarik he, elokwe hebek hogo apùnì apik opolik lagaukwa mene amanogo mel yogoisasike:
“Ap atì etaùken an noba hìpìrethike atì hake, it apùnì Isirael mene aike inetaùken atì'nogo hìpìrethikenem isìgìrek lek mene nayùk e,” ìlùk isike. 10Atì'nogo yogoisasikomo, it yoko wagaukwa amanogo inaua lagaukwa hak he, ap it inoe tentara mene atitigeke mene a'nogo arat hano agaikesik were'ma ineileken ha lagaukwa.
YesĂąt en yekerek aike o Nain mene warek were'ma eluguthesike wene
11Atì'nogo haga'lùk he, hobuk at Yesùt o sili etage Nain lagalùk laganem he, at agoromì ane wanhì lagaukwa mene amanogo mel, apùnì he'nakìt inebe motok apik mel, opolik lagaukwa. 12Laga lagaukwasik, leget pa'leget kwe ape palek oba asi lagaukwa hak he, yekerek aike ebe aligat tago mene agosa soge were'ma wa'lagaikomo re, apùnì o sili a'nogo mene inebe logolegat yekerek warek e yerogo wolok agosa inom wùlìbi waganem 13eileken lagisasike. Lagisìlìk he, ninoe Etagepogot en he, he soge a'nogo eileken hìlìk he, etawì arìk he, mel yogosike:
“Nerei. Le aga hùk o,” ìlùk yogosikesik he, 14yekerek warek e yerogo wolok wagaukwa a'nogo era'lu lìlìk he, eki hakasike. Eki atì'nogo hakikenem apùnì nen warek e ye'lùk wagaukwa mene amanogo melagaukwa. Melagaukwama re, at Yesùt en yekerek warek a'nogo yogotì logolìk he, mel isike:
“Naput yì! Heluk ame ìlùk yogohetì lagì o,” ìlùk yogosikomo re, 15yekerek wa'lagaike mene a'nogo eluk agaikesik hùrek logolìk ane isike. Ane isikomo re, Yesùt en yekerek a'nogo agosa wogosike. 16Atì'nogo hagasikomo, apùnì apik amanogo inayùk arìk he, Ala hogoratì logolìk, mel isukwa:
“Ap kain Ala ane yogonisìkì logogin mene aike ninekele'ma nen weinam aga yì! Ala nen againapùrì telninabigìlùk waga o!” ìlùk isukwa. 17Atì'nogo isukwasik he, wene haga'lagaike mene atì, o Yurea ya ta atoma nen pìkìt he, o esakokwe atoma Yesùt abok wolok wùlùpukwama wìagisike.
Yohanet ima pelaginapì lagaike mene a'nogo nen agoromì Yesùt oba laksa wagaike wene
(Mat.11:2-19)
18Abok wolok wùlùpukwama re, it at Yohanet agoromì ane wanhì lagaukwa mene amanogo nen, wene haga'lagaike mene a'nogo at Yohanet yogosukwama asuk holhìkesik he, at en agoromì inebe pìre waisasikomo wagaukwama re, 19mel yogoisasike:
“Ap aike wesigin ìkì lagaukwa a'nogo harat a? Ì a, at he, ap hùnogoat mene aike serogo logogun a, ìlùk yogosi lani o,” ìlùk, ninoe Etagepogot oba laksa wagaike. 20Laksa wagaikomo, Yesùt oba wagaukwasik he, mei yogosukwa:
“Ninoe. At Yohanet ima pelaginaperek mene a'nogo nen he,
Ap aike wesigin ìlùk ìkì lagaukwa a'nogo harat a? Ì a, at he, hùnogoat mene aike serogo logogun a, ìlùk, oba hinok wani lani, ìlùk lakhina wagama wago,” ìlùk yogosukwa. 21Atì'nogo yogosi wagaukwasik werek kolek atem sat he, at Yesùt en he, apùnì ou weak mene inom, heinet apik watì lagaukwa mene inom, hano hagarinapìk, mokareke oabùt weak mene ina'la kisikesik were'ma henogo wulaksìgìk, ineileken mùm mene hano asuagalùk hekenogo hagarinapìk, ìkì lagaikesik, 22Yohanet agoromì wagaukwa mene amanogo mel yogoisasike:
“Hit en he, an yì'nogo tì'nogo hagatenem hineileken nììgìk, wene ikenem hinasuk holhìk, egep mene atì, at Yohanet sekek hogo yogosi lano o. Ineileken mùm mene hekenogo hano agìk, inawe wùt warek mene kwe lagìk, inoba henako hake mene hagarinapenem hano agìk, inesako togùm mene huak hogo holhìk, warek mene inelugurinapìk, it aike inagarok lek mene hano wene yakùlisìgìk, ikenem hineileken neegep a'nogo sekek hogo yogosi lano. 23Yogorìk he,
Sa nen an abìt nììgì'lek logogin halok he, a'la hai hakìkì logogin o, ìlùk yogosi lane o,” ìlùk yogoisasike.
24Atì'nogo yogoisasikomo, it Yohanet en yoko laksa wagaike mene amanogo lagaukwama re, hobuk at Yesùt en apùnì logolek amanogo Yohanet abok mel yogoisasike:
“Hit he, o leimo apùnì le'ma atoma nena mene hineileken hùogolùk laga lagasip nogo. Heiteken pareken sogoi en hun hogo lagìk-wagìk ikenem hùogolùk laga lagasip a? 25Ì a, at he, nena mene hineileken hilogohik laga lagasip. Ap aike asu hano motok mene laberek were'ma hùogolùk laga lagasip a? Lakhani! Ap kaintek inaua logolìk halogat inasu hano mene labetìk, inagarok yì mene tì mene apik hesogo welagìk, egarek akìgì. 26Halok he, atoma nena mene hùogolùk laga lagasip. Ì a, at he, ap Ala ane yogoisagarek mene aike were'ma hùogolùk laga lagasip a? Eberogoat atìat o. An nen yogohisak. It ap Ala ane yogoisìkì lagaukwa mene aike welagaukwa meneat he, it atì inetage mea negen. Meneat he, at Yohanet atì nek he, etagewerek esinat o. 27#Mal.3:1 Wene at Ala nen mel isike:
Naput e. Hat hobuk kwe legeinkwe, hakwe ebela yakhagakì logouagalùk, ap aike ayoko hìlìk alebagìk lakhegein,
ìlùk isikomo helal waganogo hesukwa atì, ebe re, at Yohanet hesigat isike o. 28Halok he, an nen wene aike yì yogohisak. Apùnì obogat inagosalak en taginabìk wagaukwa meneat he, inetage lek enek. Meneat he, Yohanet atì nek he, etagewerek o. Meneat he, Ala awe a'ma hisikere'ma atoma, at Yohanet etage lek negen meneat he, it apùnì aike inetage lek mene atì inetagewerek negenat o,” ìlùk yogoisasike. 29Atì'nogo yogoisasikomo, apùnì logolek amanogo mel, pemerintah hesik uang kìno ìlìk atogorogo hagarek mene amanogo mel, at Yohanat en hageat ima pelaginapikomo nogo nen he, wene Yesùt en yogoisasike mene atì inasuk holhukwasik,
“Ala a'la nen akikerek mene atì re, higit motok o,” ìlùk isukwa. 30Atì'nogo isukwa meneat he, it ap Parisi mene mel it ap Ala ane helal waganek yakùlisìkì lagaukwa mene mel, enek he, Yohanet en ima pelaksoagalùk lagì'lek logolìk, Ala nen atì'nogo hagatì logouagalùk a'la akasike mene a'nogo inabìt en heraksìlìk welagaukwa.
31At Yesùt en wene aike yogoisìkì logolìk he,
“It apùnì o yogotak ya ba werek he, nena mene ba lìrogo yogohisak. Kì hake werek. 32It inebe re, yì eperak higit, Yekerùgì pasar oba oko wanhare'ma hùrek logolìk, inagaiya'lak inom inane lakhìgìk wakhìgìk ìkì logolìk,
Nit en etaì hit wathikùogolùk elùgùn wulapo meneat he, hit en hunike lagì'lek. Nen, le asuogolùk le wùnì elùgùn wulapo meneat he, hit en le ebe agì'legat, ìlùk egarek atì hagat hagarì'lùgì o. 33At Yohanet ima pelaginaperek mene wagaike atì re, sùpùrùk mel, anggur eken amusu mel, nìkì'lek wagaikesi'mo nogo nen he, hit en:
Mokareke oabùt weak mene a'la kikesik werek o, ìlùk ìkì lagagip. 34Meneat he, an abat ta'lasi wagagi a'nogo nek he, sùpùrùk mel, anggur eken amusu mel, yùgùnat nìlìk wagagisi'mo nogo nen he, hit en he,
Lakhani! Ap yì re, sùpùrùk mel, anggur eken amusu mel, apelalok weak nìkì logolìk he, ap pemerintah mene hesik uang kìno ìlìk wanharek mene mel, ap weak hagatarek mene mel, hùnethakìlìk niko yì hani? ìlùk yogonetì lagep. 35Atì'nogo meneat he, at Ala a'la kagalek logolìk hagaterek a'nogo, it aike nen hano akìlìk, atì'nogo higit hogo hagatì logogun halok, atì higit ìlùk hùthogoinat o,” ìlùk, yogoisasike.
He weak hagaterek mene aike nen amusu obasi hano mene YesĂąt esok oba wathesike wene
36At Yesùt en atì'nogo yogoisasikesik were'ma re, ap Parisi mene aike etage Simon, Yesùt eperak sùpùrùk at aua nùogolùk ayoko hesike. Ayoko hesikomo aua kìlìk eperak sùpùrùk nùogolùk, hù'lagaike. 37Hù'lagaikesik, sùpùrùk niko were'ma, he o sili atoma mene aike weak hagateresi'mo abok apùnì inelu mene, apùnì nen,
“Yesùt o a'li logolìk sùpùrùk nìlì'logo,” ìlùk isukwama asuk holhikesik he, amusu obasi hano mene oko apik palogo isoak helep etage pualam mene hagarek oba a'la hinago wolok wagaike. 38Wolok wagaikesik ouma kìlìk he, Yesùt esok okutmo apotma horok-horok wagaikesik he, atoma metek logolìk le aga lagaike. Le aganem eil amusu Yesùt esok oba pisikomo re, esi ba hobuk horasike. Horarik he, esok oba hai ape saluk wasikesik he, amusu obasi hano mene wolok wagaike a'nogo Yesùt esok oba wathesike. 39Atì'nogo hagatenem, ap Parisi mene nen,
“Yesùt, sùpùrùk neperak nùok,” ayoko hesike mene a'nogo a'la nen mel akasike,
“Ap yì Ala ane yogoisikerek mene logoilepma re,
He yì weak hagaterek mene nen haga'nape, ìlùk enagat hùtheilep,” ìlùk a'la akikenem, 40at Yesùt en he, mel yogosike:
“Simon. An wene aike yogohesigin,” ìlùk yogosikomo at en he,
“Noe. Yogonom o,” ìlùk yogosikomo, 41at Yesùt en he, mel yogosike:
“Ap inebe pìre mene, ap aike auang elama hesik wogisìkì lagaike mene nen wogisasikomo inoba palegeke welagaike. Aike uang hùko mene 500 ribu rupiah hake. Nen, aike 50 ribu rupiah hake inoba palek welagaike. 42Atì'nogo were'ma, it on oko wogosusak mea agaikomo re, uang wanhukwa mene halal waganek atì, at kain a'nogo nen terogo hebisìlìk he,
Welegat helegep o, ìlùk, yogoisasike. Atì'nogo hagasikomo re, ap inebe pìre aremnogo sa hak en inoe kain a'nogo etawìrasike akegen,” ìlùk yogosikomo, 43at Simon nen he,
“Atì ap aike uang apik negen oba palek welagaike meneat he,
Welegat helegen o, ìlùk yogosike atì nen, etawìrasike,” ìlùk yogosikomo re, at Yesùt en,
“Egen atìat o,” ìlùk yogosike. 44Atì'nogo yogosikesik he, at Yesùt elokwe hebek hogo, he a'nogo wogorìk he, mel yogosike:
“Simon. He yì heileken hegen a? Lek a. An hat haua ki wagì meneat he, hat en,
Hesok oba sobalin, ìlùk, i aike wo'neten lek. Meneat he, he yì nek he, eil amusu nesok oba pelakhìlìk he, esi ba ho'nape o. 45Nen, hat en hai hape saluk wa'napen legat o. Meneat he, he yì nek he, an ki wagì hùlì nen, nesok oba hai ape saluk wa'napo motok werek e. 46Nen, hat en amusu an nùkùl oba aike wathanhen lek meneat he, he yì nek he, amusu obasi hano mene nesok oba wathanhe o. 47Atì'nogo hagate atì nen he, an nen hat aike yogohesik. At he yì nen weak apigat hagaterek meneat he, at a'la nen he,
Yesùt en sagalogo legetsikomo, ìlùk hùkorogo etawì'nape atì ba enagat haga'laga o. It apùnì weak hamùlùgat hagarì'lùgì mene, Ala nen sagalogo legetsikenem, we hamùlùgat negen inetawìratarek o,” ìlùk yogosikesik he, 48at he a'nogo mel yogosike:
“Weak hagatì lagen mene atì, arat sagalogo legetsìgì o,” ìlùk yogosike. 49Atì'nogo yogosikomo, it apùnì Yesùt inom hùrek logolìk sùpùrùk nasukwa mene amanogo, it-it ìkì logolìk he, mel isukwa:
“Apùnì weak hagarì'lùgì mene sagalogo legetsìlì'logo yì, ebe sa hak en legetsìlì'logo akegep,” ìlùk iko kolek, 50at Yesùt en, he a'nogo yogotì logolìk he, mel yogosike:
“Hat hetaùken noba hìpìrethegen atì nen telhapì o. Halok he, ha'la hanorogo haua lan o,” ìlùk lakhesike.
Currently Selected:
LUKAT 7: LAIDNI
Highlight
Share
Copy
Want to have your highlights saved across all your devices? Sign up or sign in
