LUKAS 7

Yesus tentara komandan akerja bwemtam ipic ajaworomtewef

(Mat. 8:5-13)

1Barewen. Yesus atakam e ow aotawkurumefen. Ar masirin, kota Kapernaum afiwefen. 2Erasan ara, tentara komandan ipic, kerja bwemtam ipic aomomefen. Ar e ipic damos ajiomefen. E ipic nat, dam ajowef, wunam damir bafken aemamesefen. 3E komandan ipicam Yesus atakam jen ajiefen. Yesus atakam jen ajief masirin, ar Yahudi ducur ow Yesuspu atewosomefen. “Car e Yesus arasan bwenaw, wunam e dokerja bwemtam ipic dam baworomtam, janim mamanimporey.” Inim aeefen. 4Bare, e ow Yesus aenawomfes, wunam janim fak aanimfesen. “E komandan ipic, bare, ow akat ara. Inimas or eras aramat ipic bwemtamji. 5Aramat ipic e dasamat damos ajiomama. Aram e dasembahyang cem aeapomtamforow.” Inim aefesen.

6Bare, Yesus e ow akac aenfesen. Ar e cem sotop inim ajaremef ara, e komandan ipic, ajowow, Yesuspu atewosomefen. E ow masirin, e komandan ipic aratakam Yesus ajomatfesen. “Tuan. Dor or boemcimtew opok. Dor or awcawor opok. Inimas or e docem bwemfiwomiw asan opok. 7Inimasam ara, dor e obipu bwemenaw asan opok. O nat, atakamin atawey. E dokerja bwemtam ipic masirin, ajaworsitcema. 8Doram ow jirmec ji aemin, wunam dor e dotentara ow jirmec ajirimamin. Dor wun tentara ipic, ‘Baysosey,’ inim aecey, aramat ipic ajisoscema. Doram wun ipic, ‘Bwenawey,’ inim aecey, aramat ipicam aenawcema. Doram e dokerja bwemtam ipic, ‘Inim pok pwemey,’ inim aecey, bare aramat ipic inim pok aemcema.” Inim aeefen. 9Yesus inim atakam jen ajief masirin, ar e ipic junum aeefen. Ar e fa asep asoromfes ow arke, bin afiromefen. Aram atakam e ow aotawefen. “Jakaperey. Awamec ipic Allah basicim fak ipic ara. Dor e Israel ow aman, awamec ipic awcawor ow, bi bapor opokut.” Inim aeefen. 10E komandan atewosomef ow, e cem aofasiosfesen. Cem aofasiosfes masirin, ar e kerja bwemtam ipic asan akat aporfesen.

Yesus fwisma cowoc atiw aojaworomsumutumef

11Barewen. Ajofay ara, Yesus kota juwas Nain ajisosefen. Amamkawi owam, wun ow arkeam, akac ajisosfesen. 12Aramat ipic e kota fumi pagar jimasap sotop ajaref ara, ow damir ipic, cesen atowomisfesen. E ipic fwisma cowoc atiw cowokut arawen. E kota ow arkeam e cowoc akac ajarfesen. 13Tuhan e cowoc aporef, ar saw akat aoworporefen. Aram atakam e cowoc aotawefen. “Bwec arapok.” Inim aeefen. 14Aramat ipic masirin, e damir ipic koak amerkayiemefen. Aram e ko ban akurumefen. E ko atowomfes owam atukemfesen. Yesus masirin, atakam aotawefen. “Ata. Basitey.” Inim aeefen. 15E damir ipic masirin, asitapefen. Aram atakam aotawefen. Yesus masirin, e ipic, arosowoc aotetamefen. 16E ow takasam omar aefesen. Aram Allah asicimfesen. “Allah atakam botaw ipic awut, dawowoc emesitef. Ar Yesus ara.” Wunam, “Allah arow, akac aemama.” Inim aefesen. 17Barewen. Yesus an e Yudea capinmi samat takasam, e ak kayiapfes samat takasam, afufuosefen.

Yohanes Bwi Babwim Ipic, ow, Yesuspu atewosomef

(Mat. 11:2-19)

18Yohanes amamkawi ow, eras takas e Yohanes otawfesen. 19Aramat ipicam amamkawi ipic jamnuk ajateefen. Ar e ipic jamnuk Yesuspu atewosomefen. “‘Or e Allah atewenamamar ipic aranew? Dar wun ipic bwenaw manmok bofe aranew?’ Car Yesus inim jonow mamtowporey.” Inim aeefen. 20Bare e ow Yesuspu ameremfesen. Ameremfes masirin, atakam aramat ipic aotawfesen. “Yohanes Bwi Babwim Ipic, dar jonow or batowpor, atewenamamarow. ‘Or e Allah atewenamamar ipicnew? Dar wun ipic bwenaw manmok bofenew?’ Inim jonow or batowpor atewenamamarow.” Inim aefesen. 21E jofayam ara, Yesus dam ow arkeam, ajurusemfes ow arkeam, dat jak aman aemapa aefes ow arkeam, ajaworomtawa aeefen. Aram manmok kapi ow arkeam, e manmok aterema aeefen. 22Aramat ipic masirin, atakam e Yohanes atewenamef ipic jamnuk aotawefen. “Car baysosey, wunam e apormokomasam, e jen ajimokomasam, atakam Yohanes mamotawey.” “Manmok kapi ow, manmok atereymes. Bwey jini ow ajarmes. Penyakit kusta owam dam orom aememames. Jen biri ow jen ajimes. Damir ow ajaworsitmes. Ow e Atakam Akat e pok opok ow acacapiomames.” Inim mameey. 23“Bare, e do mamkawi bakorompim opok ow, asan akat aemapmes.” Yesus inim aeefen.

24E Yohanes atakam bajomattam ipic jamnuk ajisosfesen. Yesus masirin, e Yohanes atakam, e ow arke aotawefen. “Car e cem opok asan, ucim pok bapor ajisosfokom? Car fo firko bawawarim manmok batiw ajisosfokomnew? 25Ca nat, ucim pok bapor ajisosfokom? Pakaian akat ajimomef ipic bapor ajisosfokomnew? Jakaperey. Wun ow pakaian akatnakut ajimomames. Aram pokin pokin aomomames. E ow, bare raja cem aman aemapmes. 26Ca nat, ucim pok bapor ajisosfokom? Allah atakam botaw ipic bapor ajisosfokomnew? Owoman. Ca nat, jakaperey. Allah atakam botaw ow, kanim ara. E Yohanes nat, awut ara. 27E Alkitab e Yohanes inim atakam atawmar ara:

‘Jakaperey. Dor e doratemen ipic bap atewosomcimin. Or masirin, asep ara. Aramat ipic, e obwey asan akenemcema.’

E Alkitab inim atakam ara. 28Jakaperey. E Yohanes, bare awut ara. E wun cepes e jispetiwfes ow, kanim ara. E nat, e Allah Pemerintah Asan aemapmes kanimnakap ow, bare awut ara. E Yohanes masirin, kanim ara.” Yesus inim aeefen.

29Bare, e mami ow takasam, e pemerintah uang batawanimtam kerja owam, inim atakam jen ajifesen. Aram atakam aotawfesen. “Allah, bare tarowat araman.” Inim aefesen. Bap ara, Yohanes e ow bwi emcabwimefen. 30Bare, e Parisi owam, e Allah Jirmec mamememtam owam, e Yohanes bwi a babwim pwicaken. Allah nat, e ow bwi babwi, atakam emcasakamtiwefen. E ow nat, e atakam aopowfesen.

31Yesus, bare, atakam aotawefen. “Dor awaniemames ow awcawor inim, ucim atakam aotawcey? E ow ucimas awcaworaram? 32A ow, pasar asan bemap jiwi awcawor ara. E jiwi atakam awut aamjirimcemes. ‘Dar em car emekurumtamfenom. Ca nat, di badi opokut. Daram awan bwec abwecfom. Ca nat, bwec opokut.’ E jiwi inim aecemes. 33E Yohanes Bwi Babwim Ipic aenawef ara, ar amosam, anggur bwiam, ban opok. E nat, car atakam aotawmokom. ‘E ipic jak aman dat awap.’ Inim aemokom. 34E Asmat Anakat Ajaworemef Ipic aenawef nat, ar amosam, bwiam, anawiri. E nat, car atakam aotawmokom. ‘Jakaperey. E ipic amos paknam ipic ara. Aram jokmen bwi jayic ipic ara. Ar, pemerintah uang batawanimtam kerja owam, dosa owam, ajowow ipic ara.’ Inim aemokom. 35Allah bi binip nat, umuton cowok ara. E Allah atakam ji bwe ow, eras atakamnak apormes.” Yesus inim aeefen.

Yesus, Parisi ipic juwas Simon acem jaki ajitef

36Barewen. Parisi ipic cowok janim Yesus aanimefen. “Oram dey. E docem amos akac memen.” Inim aeefen. Yesus masirin, e ipic cem afiwefen. Aram amos memen aneypwikapefen. 37Bare, e kota ara, dosa cowoc aemapefen. E cowoc, Yesus, e Parisi ipic cem amos memen, atakam jen ajiefen. Ar masirin, ek botol minyak wangi epcom atowocenefen. 38E cowoc masirin, aramat ipic bweypu jine onok aneyotapefen. Aram bwec abwecefen. E abwec manem, Yesus e bwey aneypwipwitimtiwefen. Inimas e bwey boco arawen. Aram e bwey boco, e akus fin aerewefen. Aram e bwey ak aafopefen. E minyak wangiam, e bwey bak ton aokomnemefen. 39E Yesus janim aanimef Parisi ipic, eras aporef, ar bi binip aceceremefen. “A ipic, Allah atakam botaw ipic ayaw, ar e adam akurumaman cowoc amsom ara. Aram e cowoc aemawirias amsom ara. E cowoc, bare dosa cowoc ara.” Inim bi binip aceceremefen. 40Yesus masirin, atakam aramat ipic aotawefen. “Simon. Dor atakam cowok or botawmin.” Inim aeefen. Aramat ipic masirin, “Guru. Batawey.” Inim aeefen. 41Yesus masirin, baposomtew atakam e ipic aotawefen. “Uang aramat ipic cowok, uang, batowoptam ipic jamnuk, atetamefen. Ar dinar lima ratus ajiwar e wun uang batowoptam ipic atetamefen. Aram dinar lima puluh ajiwar e wun ipic atetamefen. 42Asep jofay nat, e ipic jamnuk takas, uang opoken. Inimas ar uang e uang aramat ipic bwemotetam asan opoken. E uang aramat ipic inimas aporef masirin, ‘Bare, car e uang inim tewetey.’ Inim aeefen. E uang aramat ipic damos awut bajiom ipic nat, ucim ipicam? E damos kanim inim ipic, ucim ipicam?” Inim aeefen. 43Simon masirin, “Dobinip ara, e uang awut atewetef ipic, damos awut e ipic ajiomef ara.” Inim aeefen. “E atakamnak ara.” Yesus inim aeefen. 44Yesus masirin, e cowoc bin afiriomefen. Aram atakam Simon aotawefen. “Or a cowoc apormemnew? Dor a ocem fiwemey. O nat, e dobwey bacicikim bwi, do batetam opokut. E cowoc nat, e abwec manem, e dobwey aneypwipwitimtiwan. Ar e dobwey boco, e afin, aerewan. 45Oram ak do bafop opokut. Dor a cem jisapey nat, e cowoc, e dobwey, ak bafop bakari opok aemama. 46Oram minyak e dokus bokomnem opokut. E cowoc nat, minyak wangi, e dobwey aokomneman. 47Inimas ara, oram jakaperey. E cowoc adosa awut akokorosma. Inimas ar damos awut dor ajimaman. E dosa kanim bakokoros ow nat, damos kanim ajiomcemes. Yesus inim aeefen. 48Aramat ipic masirin, atakam e cowoc aotawef. Dor e odosa akokoromosomtamamin.” Inim aeefen. 49E amos akac aemenfes ow, bare, atakam aramaman aamtawfesen. “A ca ipicam? Ar dosaut akokoromosomtamama.” Inim aefesen. 50Aramat ipic masirin, atakam, e cowoc aotawefen. “Or asicimamenem. Inimas or ajoremamem. Bare, oram asan akat baysosey.” Inim aeefen.

Currently Selected:

LUKAS 7: LAICNS

Highlight

Copy