LUKAS 6

Yesus mamkawi ow, Ses Ban Jo, gandum eke akokomtanfes

(Mat. 12:1-8; Mrk. 2:23-28)

1Barewen. Ses Ban Jo ara, Yesusam, amamkawi owam, gandum kebun ajarfesen. E amamkawi ow ajarfes ara, aram e gandum eke, ametemkokomtawfesen. Aram e eke ban airirimfes, wunam e eke aemenfesen. 2Wun Parisi ow nat, atakam aotawfesen. “E Ses Ban Jo aemamokomas ara, bare Allah Jirmec aopowmokom, E aemamokomas ucimaram?” Inim aefesen. 3Yesus masirin, “Car, e Daud aemefas, baca bwem opoknew? Aram, e akac aemfes owam, amosto aememfesen. 4Aramat ipic e kota juwas Nob aememef ara, aram erasan Allah cem afiwemefen. Afiwemef masirin, ar e Allah bipu atatitamfes amos atewenefen. Wunam ar e wun amos e amamkawi ow sey aseyetamefen. E amos nat, e Allah atakam mamtaw tugas ow amemenas arawen. Mami ow, e amos memenji opoken. Daragama jirmec inim atakam ara. 5E Asmat Anakat ajaworemef Ipic, bare e Ses Ban Jo aramat ipic aememama.” Inim aeefen.

Ban sipi ipic

(Mat. 12:9-14; Mrk. 3:1-6)

6Barewen. Wun Ses Ban Jo ara, Yesus sembahyang cem afiwemef, wunam atakam amememtamefen. Erasan ara, bo ban sipi ipic aemapefen. 7E Allah Jirmec mamememtam owam, e Parisi owam, Yesus, e ipic, e Ses Ban Jo, baworomtew epen, manmok asirimemfesen. Aram, “Yesus pwicakas aemama,” inim atakam botaw jak aserememfesen. 8Aramat ipic nat, e ow bi binip amsom arawen. Ar masirin, atakam e ban sipi ipic aotawefen. “Basitey. Or awamces ow takas bipu ememey.” Inim aeefen. Bare, e ipic asitef, wunam erasan aememefen. 9Yesusam atakam e ow aotawefen. “Dor jonow ca batowpor. Dar e Ses Ban Jo Jirmec ji aecom, dar ucimas emcom? Dar akatas bwem aranew? Pwicakas bwem aranew? Dar ow bajortew aranew? Ow bacatiw aranew?” Inim aeefen. 10Aramat ipic masirin, e fumi abwiricapfes ow, manmok a takas atiwefen. Ar masirin, atakam e ban sipi ipic aotawefen. “Ban bajoromey.” Inim aeefen. E ipic inimas aemef ara masirin, e ban ajaworemefen. 11E ow nat, jak amopnakut apwiapfesen. Aram atakam aramaman aamtawfesen. “Dar a Yesus ucim pok emcom?” Inim aefesen.

Yesus e batewosom ow dua belas ajiwar aeremtewef

(Mat. 10:1-4; Mrk. 3:13-19)

12Barewen. Jofay ara, Yesus, Allah janim manim, sikon op aaptometefen. Ar, e iram jo jirow, janim Allah aanimesmepen. 13Jo apuamesef ara masirin, aramat ipic, e amamkawi ow ajateefen. Aram ow dua belas ajiwar aeremtewefen. Ar e ow juwas “atakam botaw batewosom ow” aamemefen. 14E ow dua belas ajiwar, Simon ara. (Yesus, wun juwas Petrus e ipic aamefen.) Simon arewec juwas Andreas ara. Yakobus ara. Yohanes ara. Filipus ara. Bartolomeus ara. 15Matius ara. Tomas ara. Alfeus atiw juwas Yakub ara. Simon ara. (Ow, e Simon, agama fak ipic ara, inim atakam aotawfesen.) 16Yakobus atiw juwas Yudas ara. Yudas Iskariot ara. Inima. (Asep jofay ara, e Yudas, Yesus, jokmen ow aotasimemtamef arawen.)

Yesus atakam amememtamef

(Mat. 4:23-25)

17Barewen. Yesus, e ow akac aneyfesen. Aneyfes masirin, cawor capinmi asan aememfesen. E amamkawi ow arkenakutam akac aememfesen. Wun ow arkenakut e Yudea capinmiam, e kota Yerusalemam, e kota jamnuk juwas Tirusin Sidon jopir capinmiam, ewenawfesen. 18E ow, aramat ipic atakam jen bajiam, aramat ipic e asan pwicak ow baworomtawam, aenawfesen. Aramat ipic e dat jak aman owam ajaworomtawefen. 19Dam baworom fakasam e Yesus dam aewfisa aeefen. Inimas ar e dam ow takas ajaworomtawa aeefen. E ow arke takas inimas aporfes, wunam aramat ipic dam ban bakurum aemporfesen.

Asan akat owam, asan pwicak owam, atakam

(Mat. 5:1-12)

20Barewen. Yesus e amamkawi ow, manmok apemporef, wunam atakam aotawefen. “Ca pok opok ow, asan akat aemapcomokom. E caraja ipic, bare Allah ara. 21E ca wow amosto emapmokom ow, asan akat aemapcomokom. Asep jofay, bare, jak apitapcomokom. E ca wow bwec abwecmokom ow, asan akat aemapcomokom. Asep jofay, bare, uc aoccomokom. 22Wun ow car e Asmat Anakat Ajaworemef Ipic mamkawi ow aporcan, aram bifan afayomceman. Aram car aotewerosomceman. Aram cemew aatceman. Aram cajuwas pwicak aemcemes. Inimas e cajuwas boji opok aememcemes. Inimas aemcannew, bare car asan akat aemapcomokom. 23E ow arafasutmar, e Allah atakam botaw ow, inimas cowok aemfesen. Ca nat, jakaperey. Allah e onam op, asan akatnakut car atetamceman. Inimas ara, e ow inimas aemcan jofay, bare jak akat epcom mamsosopiey.”

24“Ca pok awut ow nat, ajurusapcomokom. Car bare, e cajak akatas emcatewetfokom. 25Ca wow jak apitapmokom ow, ajurusapcomokom. Asep jofay, amosto aememcomokom. Ca wow uc aocmokom ow, ajurusapcomokom. Asep jofay, jak pwicak aemapcomokom. Caram bwec abweccomokom. 26Ow takas atakam akat car aotawcannew, caram ajurusapcomokom. E ow arafasutmaram, atakam akat, e Allah atakam botaw suw ow, aotawfesen.”

E cajewew ow damos mamjiomey

(Mat. 5:38-48, 7:12)

27“E doratakam jen ajimokom owa. Jakaperey. E cajewew ow damos mamjiomey. E bifan afayomaman ow, asan akat mamomey. 28E car bajurusum jirmec ajirimceman ow, asan akat mamomey. Caram Allah, asan akat, e cemew aatman ow batetam, janim mamanimtamey. 29Ow, e poman ak apompocannew, or e poman akam mamofirimtamey. Ow, e obaju kemeja atewces, or e obaju kausam acuw bat arapok. 30E janim aaniman ow takas, pok mamtatamey. Ow e opok atewces, e pok botetam janim manim arapok. 31Car, ow, asan akat car bom akat apormokomnew, caram asan akat e ow mamomey.”

32“Car, damos e damos car ajiomaman ow cowok ajiomcokom, ow, car ow akat, inim atakam botaw arapen? Bare, dosa owam, e adamos ajiomames ow, damos ajiomames. 33Wunam, car, e car asan akat aomaman ow, asan akat aomcokom, ow, car ow akat, inim atakam botaw arapen? E dosa owam inimas cowok aemames. 34Wunam, car, pok, ow atetamcokom, wunam car e ow, pok, car botetam manmok atiwapcokom, ow, car ow akat atakam botaw arapen? Bare, dosa owam, pok, dosa ow atetamcemes, wunam e ow, inim awut pok botetam, manmok atiwapcemes. 35Allah e terima kasih atakam botaw opok owam, e dosa owam, asan akat aomama. Inimas ara, caram e cajewew ow damos mamjiomey. E ow asan akat mamomomey. Pok, ow mamtetamey. Wunam e ow, pok, car botetam, manmok batiwap arapok. Inimas aemcokom, Allah asan akatnakut car atetamceman. Caram e opnakut Allah atiperes aememcomokom. 36E caricipic, bare ow serow ipic ara. Caram ow serow, inim mamememey.”

Car ow e asalah, atakam basakamtiw arapok

(Mat. 7:1-5)

37“Caram, ow e asalah, atakam basakamtiw arapok. Allah masirin, e casalah atakam basakamtiw opok aemcema. Caram, ‘Or salah emeemfem,’ inim atakam wun ow botaw arapok. Allah masirin, ‘Or salah emeemfem,’ inim atakam car botawtotor opok aemceman. Ow salah car aemcannew, e salah, bi binip mamiwosomey. Allah masirin, e casalaham, bi binip ajiwosomcema. 38Pok, ow mamtetamey. Allah masirin, pok car aotetamceman. Aram ese awut pok epcom inim cimin atetamceman. E ese aman pok aotasisimnemcema. Aram e ese pok epcom akokoromwimcema. Car pok awutnew, pok kanimnew, ow atetamcokom, Allah inim awut pok aotetamceman.” Inim aeefen.

39Yesus baposomtew atakamam e ow aotawefen. “Manmok kapi ipic, wun manmok kapi ipic banfe bajimomatji open? Inimas aemces, e jamnuk takas jof akac aneyfifiapcemes araman. 40Mamemem ipic awut ara, wunam e amamememtam ipic kanim ara, bare inimas opok. E nat, e mamemem ow takas amememkurumces, aram e amamememtam ipic, awcawor aememcemes. 41Car ponowas kanimnakap, e cajowow ipic manmok aman apormokom. E nat, e camanmok aman balok, bapor opok aemamokom. Ucim inimasaram? 42Car e omanmok aman balok bapor opok aemamokom, wunam atakam e ojowow ipic aotawmokom, ‘Dor e omanmok ponowas bemosomtam.’ Car inim atakam botaw nat, ucimaram? Car pir bwe ow ara. E camanmok aman balok batakamemosomey. Wunam e cajowow ipic manmok ponowas kanimnakap bemosomtam, manmok akat atiwcomokom.”

Osam, e apecema ekeam, atakam

(Mat. 7:16-20, 12:33-35)

43“Os akat, eke pwicak bwempe asan opok. Wunam, os sakuwe, eke akat bwempe asan opok. 44Ow, e os eke aporces, ar e os, akat osnew, pwicak osnew, inimas aporcemes. Ow, e os eke aporces, ar e os, akat osnew, pwicak osnew, inimas aporcemes. Ow, os eke juwas ‘arā,’ fa epcom os kari bwemkomtew asan opok. Aram anggur eke, awor fa os bwemkomtew asan opok. 45Akat ow, e ajak aman momomas, bare akatas ara. Inimas ar akat pok aemames. Pwicak ow nat, e ajak aman momomas, bare pwicakas ara. Inimas pwicak pok aemames. Ow, e ajak aman omomamesas jipu atakam atawmes.”

Cem bweapom ipic jamnuk

(Mat. 7:24-27)

46“Car atakam dor aotawmenokom, ‘Tuhan, Tuhan.’ Inim aemenokom. E nat, car e atawmin atakam ji bwe opok aemamokom, ucimaram? 47Wun ow dor aenawomamenes, wunam doratakam jen ajimes. Aram e atakam ji aemes. E ow awcawor cacinam? Bare, dor eras atakam umuton car aotawmin. 48Ar cem bweapom ipic awcawor ara. Aramat ipic, e fasis amannakut ajirimakamnemefen. E fasis, e se komkom ajiwar aneyjirimapomefen. Wapu bwi awutnakut aemseefen. E bwi je awutam, e cem aapommenamefen. E nat, e ipic, e cem faknakut aeapomefen. Inimas e bwi je, e cem bwemwawarim asan opoken. 49Wun ow, doratakam jen ajimes. E ow nat, e atakam ji bwe opok aemes. E ow wun cem bweapom ipic awcawor ara. E ipic, fasis opok ceme se desen aeapomefen. E bwi je awut e cem aapommenamefen. E cem masirin, asarimneyjuwseefen. Aram daniwisnakut aemamesefen.” Yesus inim aeefen.

Currently Selected:

LUKAS 6: LAICNS

Highlight

Copy