LUKAS 5

Yesus, amamkawi ow aereremtawef

(Mat. 4:18-22; Mrk. 1:16-20)

1Barewen. Yesus jopir aememefen. Jopir aememef ara, ow arke Allah atakam jen baji, aramat ipic dam akakajumamtawfesen. E jopir bwi juwas Genesaret arawen. 2Ci jamnukam e jo pim aemsefesen. Aramat ipicam e ci aporefen. Bap ara, jim bapi ow, bwi aneykoremfesen. Aram e ajim acicikimfesen. 3Aramat ipic e wun ci asawuefen. E Simon ci arawen. Yesus, ow, e ci, jicowoc inim botpem, janim aanimefen. Ar masirin, e ci aman aneypwikapef, wunam atakam e ow amememtamefen.

4Ar atakam e ow arke aotawefen. Ar masirin, atakamam e Simon aotawefen. “E kaku asan jirseey, wunam e jim, enam bapitew, batewpumey.” Inim aeefen. 5Simon masirin, atep ajitefen. “Guru. Iram jo jirow ara, aemporkurumesmom. Daram jim enam bojuwames opok cowok. E nat, or jirmec ajirimamenem. Inimas dor jim bwi atewpumamin.” Inim aeefen. 6E ow eras aemfes masirin, enam arkenakut apitewfesen. E ajimam bapwipwikiken arawen. 7Bare, ajowow wun ci aemsefesen. Ar, e ow, e jim akac bajimtew bwenaw, banwe aefesen. E ow masirin, aenawfesen. E ci jamnuk, enam apitimkurumfesen. E ci masirin, bwi basimompuken aemsefesen. 8-10E Simon Petrusam, e akac aemfes owam, eras takas aporfesen. Inimas junum awut aefesen. E Sebedeus atiperes jamnuk juwas Yakobusam, Yohanesam, junum awut aefesen. Ar e Petrus kerja akac ow arawen. Bare, e Simon Petrus, Yesus bipu jine onok aneyotapefen. Ar masirin, atakam aotawefen. “Tuhan. Dor dosa ipic ara. Inimas or a dobipu arapok. Orop asan jisosey.” Inim aeefen. Yesus masirin, atakam Simon aotawefen. “Omar arapok. Wow jofay ajiwar aemamesor ara, or asmat apowtewawarcemem.” Inim aeefen. 11Bare, e ci wasan ajesjimtiwfesen. Aram e apok takas bakan ajifes, wunam Yesus ajamkawifesen.

Yesus penyakit kusta ipic ajaworomtewef

(Mat. 8:1-4; Mrk. 1:40-45)

12Barewen. Yesus, erasan kota cowok aememef, penyakit kusta ipic aenawefen. Aramat ipic e Yesus aporef, wunam abipu bi fop aneyjiapefen. Ar masirin, janim fak aanimefen. “Or faknakut ara. Or akat aporcem, or dam akat do batetam araman.” Inim aeefen. 13Yesus masirin, ban ajoromef, wunam e ipic dam ton atatiwefen. “Dor inimas akat ara. Or dam akat ememey.” Inim aeefen. Yesus inim atakam atawef masirin, e penyakit kusta, e ipic bakan asarimjiosefen. 14Yesusam jirmec ajirimefen. “Or aras atakam wun ow botaw arapok. O nat, e Allah atakam mamtaw tugas ipic akan akosey. Ar or baoworporcan. Or masirin, e Musa jirmec ajirimef pok, Allah tetamey. Eras or dam aememamem, inim baporomtamas ara.” Yesus inim aeefen. 15Bare, e asanin asanin, Yesus atakam an afufuosefen. Ow arkenakut, aratakam jen baji ajarewsia aefesen. Dam owam, aramat ipic, dam baworomtam ajarewsia aefesen. 16Aramat ipic nat, aotasiemef, wunam cem opok asan ajisosefen. Aram janim Allah aanimefen.

Yesus japow ipic ajaworomtewef

(Mat. 9:1-8; Mrk. 2:1-12)

17Barewen. Jofay ara, Yesus atakam amememtamefen. Parisi owam, Allah Jirmec mamememtam owam, erasan aemapfesen. E ow, e Galilea ow samat takasam, e Yudea ow samat takasam, e kota Yerusalem aewenawfesen. Tuhan, e dam ow baworomtaw fakas, e Yesus atetamawirien. 18Ow masirin, japow ipic e atepen epcom atowocenfesen. Ar e ipic e cem aman bafomiw, wunam Yesus bipu baneytatiw aemporfesen. 19Erasan nat, ow arkenakut aememfesen. Inimas ar e ipic bwemfomiw asan opoken. Ar masirin, e ipic e cem onewmak op atowotometfesen. Aram e onew jof afimapomfesen. Aram e ipic tepen epcom, e ow arke aman, ateremnemfesen. E Yesus bipu aneytatiwfesen. 20Yesus masirin, e ow a basicimnak aporef, wunam atakam aotawefen. “Dor e odosa akokoromosomtamamin.” Inim aeefen. 21E Allah Jirmec mamememtam owam, e Parisi owam, bi binip aceceremfesen. “E ipic cam? Ar Allah awcawor arawen. Inimas ar pwicak atakam awut atawma. Allah cowok dosa akokoromosomtamcema.” Inim bi binip aceceremfesen. 22Yesus e ow bi binip aceceremfesas aporef, wunam atakam aotawefen. “Car e bi binip aceceremamokomas ucimaram? 23E ton atakam, ucim atakamaramnew? ‘Dor e odosa akokoromosomtamamin,’ inim atakam aranew? ‘Basitey. Oram bajarey,’ inim atakam aranew? 24E Asmat Anakat Ajaworemef Ipic, awames capinmi ow dosa bakokoromosomtam fakas aomomamar araman. Dor car inimas baporkurum akat ara.” Inim aeefen. Aramat ipic masirin, atakam e japow ipic aotawefen. “Jakaperey. Basitey! E otepen batewey! Oram cema!” Inim aeefen. 25E ipic masirin, e ow bipu asarimsitefen. Ar e aemamesawiri tepen atewef, wunam acem ajisosefen. Aram Allah asicimefen. 26E ow takas, bare, junum awutnakut aefesen. Aram Allah asicimfesen. Omaram aefesen. “Dar wow akatnakut pok manmok atiwmom ara.” Inim aefesen.

Lewi, Yesus ajamkawief

(Mat. 9:9-13; Mrk. 2:13-17)

27Barewen. Eras aemkurumef ara, Yesus ajisosefen. Aram pemerintah uang batawanimtam kerja ipic juwas Lewi e uang batawanimtam cem aman aemapef aporefen. Aramat ipic masirin, atakam e ipic aotawefen. “Mamkawican.” Inim aeefen. 28Bare, e ipic asitef, wunam Yesus ajamkawiefen. Aram e apok takas bakan ajiosefen.

29Wunam, e Lewi, e acem, pokbwi awut, e Yesus aemtamefen. Pemerintah uang batawanimtam kerja ow arkeam, wun ow arkeam, e ow amos akac aanfesen. 30E Parisi owam, e arAllah Jirmec mamememtam owam, icim e Yesus mamkawi ow afesfesen. “Car, e pemerintah uang batawanimtam kerja owam, e dosa owam, amosam bwiam cowkon aanmokom ucimaram?” Inim aefesen. 31Yesus masirin, e ow atep ajitefen. “Dam akat ow, dokter janim manim opok aemcemes. E dam pwicak ow nat, dokter janim aanimcemes. 32Dor, tarowat ow, dosa bak bapayem bapenaw opok. Do nat, fasi ow, ay bi binip bacecerem bayte aapenawof.” Inim aeefen.

Amos pok bamase

(Mat. 9:14-17; Mrk. 2:18-22)

33Barewen. E ow, atakam, Yesus aotawfesen. “E Yohanes mamkawi ow, bar arke, amos pok amasecemes. Aram bar arke, janim Allah aanimcemes. E Parisi mamkawi owam inimas aemcemes. E omamkawi ow nat, amosam, bwiam, aancemes.” Inim aefesen. 34Yesus masirin, atakam e ow aotawefen. “Ay petew ipic e ajowow cowkon aemapmesnew, ow e ajowow amos bamase jirmec bajirimji open? 35Asep jofay nat, ow e ay petew ipic, e ajowow wasec aemtewcemes. E ajowow masirin, amos pok amasecemes.” Inim aeefen.

36Yesus baposomtew atakam e ow aotawefen. “Ow, ay baju bip bakamtew, wunam e bip, tarey baju ton bakakamimapom, inimas bwemporji opok. Ar inimas aemcesnew, ar e ay baju akamtewcemes. E nat, e bip e tarey baju awcawor opok aemamescema. 37Ow, ay anggur bwi, tarey picin bwi ese aman bowapomporji opok. Ow, ay anggur bwi, tarey picin bwi ese aman aowapomces, e ay anggur bwi, e picin ese ateremomiscema. E anggur bwiam aokoyameskurumcema. E picin eseam ananasiamescema. 38E nat, ow ay anggur bwi ay picin ese aman aowapomcemes. 39Ow tarey anggur bwi aances, ar ay anggur bwito opok aemcemes. ‘E tareyas akat ara.’ Inim aecemes.” Yesus inim aeefen.

Currently Selected:

LUKAS 5: LAICNS

Highlight

Copy