LUKAS 4

Iblis, Yesus, dosa bwem acajijimtawporef

(Mat. 4:1-11; Mrk. 1:12-13)

1-2Barewen. Yesus, Yordan jo ewfasiefen. E Roh Kudusam, e Yesus aomomkurumef arawen. E Roh Kudus masirin, e Yesus, cem opok asan, isi empat puluh ajiwar ajisomosefen. Erasan, Iblis, Yesus, dosa bwem acajijimtawporefen. Erasan aememawiri, Yesus, amos pok amaseemawirien. E isi empat puluh ajiwar aememkurumef masirin, aramat ipic amosto aememefen. 3Iblisam atakam aramat ipic aotawefen. “Or Allah atiwnew, awames ek, amos baworom, jirmec ajirimey.” Inim aeefen. 4Yesus masirin, “E Alkitab atakam ara, ‘Asmat ow tetakay mememas, ar amos pok memen cowok arapok.’ Inim aema.” Yesus inim aeefen.

5Iblis masirin, aramat ipic op asan atowotometefen. Aram e capinmiin capinmiin takas asarimporomtamefen. 6Aram atakam Yesus aotawefen. “Dor a capinmi takasam, arakatnakutas takasam, aomomamin. Dor aras, ow batetam akat aemcey, bare atetamcimin araman. Bare, do aras or batetam ara. 7Or, dor asicimcenem, aras takas aomomcemem.” Inim aeefen. 8Yesus masirin, “E Alkitab atakam ara, ‘E Tuhan orAllah ara. Oram aramat ipic basicimey. Ar cowok kerja bwemtamey.’ E Alkitab inim aema.” Inim aeefen.

9Iblis masirin, Yesus, Yerusalem ajisomosef, wunam ar aramat ipic e Allah cem e opnakut onew pwinew atomettewapomefen. Aram atakam aotawefen. “Or Allah atiwnew, or e cenes juneyey. 10Bare, e Alkitab atakam, ‘Allah amalaikat, or manmok batiwem, jirmec ajirimcema.’ 11Wunam, ‘E malaikat, ban or atowomcemenes. E obwey, ek bapomotasin.’ E Alkitab inim atakam ara.” Iblis inim aeefen. 12Yesus masirin, “E Alkitab atakam ara, ‘E Tuhan or Allah ara. Oram aramat ipic bwempor arapok,’ Inim aema.” Yesus inim aeefen. 13Bare, e Iblis, Yesus dosa bwem acajijimtawkurumporef masirin, ar e Yesus bakan ajiosefen. Ar nat, asep jofay, asan akat aporcow, ar e Yesus dosa bwem bocajimtewporen.

Yesus Galilea capinmi aofasienef

(Mat. 4:12-17; Mrk. 1:14-15)

14Barewen. Yesus, e Roh fakas epcom, Galilea capinmi aofasienefen. E capinmi ow takas, ar atakam atawfesen. 15Aramat ipicam, e ow asembahyang cem aman, atakam, ow amememtamefen. E ow takasam, aramat ipic, ow akat cowok, atakam atawfesen.

Nasaret ow Yesus aotpemfes

(Mat. 13:53-58; Mrk. 6:1-6)

16Aramat ipic, kota Nasaret aenawefen. Bap ara, ar erasan sur aotemefen. Aramat ipic, e Ses Ban Jo, e sembahyang cem, ajiwapa ajimepen. Bare, e Ses Ban Joam, ar e cem aojiwapefen. Aram Alkitab baca bwemtam asitefen. 17E sembahyang cem manmok batiw ipic, e Allah atakam botaw ipic juwas Yesaya tulis aeef kitab, e Yesus atetamefen. Yesus masirin, e buku aparamomef, wunam atakam cowok apowtewefen. E atakam ara:

18-19“Tuhan Roh, dor akac aemaman. Aramat ipic, e Atakam Akat, e pok opok ow bacacapiom atewemfan.

Aramat ipic, atakam botaw atewenamfan. ‘Ow car taw aatfan. E nat, aojisoscomokom. E ca manmok kapi ow, manmok atereycomokom. Tuhan e dar asan akat aomcemarow tahun, bare emeenawef.’ Tuhan inim atakam botaw dor atewemfan.

Owam asan pwicak e wun ow aomomames. Tuhan nat, dor e asan pwicak ow, asan akat momom atewemfan.”

Inim atakam baca aemtamefen.

20Yesus masirin, e kitab akapimtiwef, wunam e sembahyang cem manmok batiw ipic aotetamefen. Aotetamef masirin, aneypwikapefen. E sembahyang cem aman emapfes ow takas, manmok, aramat ipic asirimapomfesen. 21Aramat ipicam atakam e ow aotawefen. “Dor wow e jen ajimokom Alkitab atakam jipu aemamin.” Inim aeefen. 22E ow takas masirin, “Bare, aramat ipic atakamnak ara.” Inim aefesen. Aram e atakam akat cowok atawef, junum awut aefesen. “Aramat ipic nat, Yusuf atiw aranew?” Inim aefesen. 23Yesus masirin, atakam, e ow aotawefen. “Caram inim atakam dor aotawcemenokom araman: ‘Dokter. Dam orma jaworemey. E Kapernaum aemfemas, atakam jen ajifom. Arasan nat, bare ocapinmi ara. Oram eras arasan emey.’ Inim aecemenokom. 24Atakamnak ara, asamat ow, Allah atakam botaw ipic basicim opok aemcemes. 25Dor atakamnak car aotawmin. Elia ememef ara, e Israel capinmi fwisma cepes arke aemapfesen. Tuhan tiga setengah ajiwar te opok arawen. E capinmi ow takasam amosto awutnakut aemapfesen. 26Allah nat, e Elia, Sidon capinmi kota juwas Sarfat fwisma cowocpu atewosomefen. Ar, Elia, wun owpu batewosom opoken. 27Wunam, e Elia ememef ara, penyakit kusta ow arke aememfesen. E dam akat aoemenfes ow nat, e Siria capinmi ipic juwas Naaman cowok arawen.” Inim aeefen. 28E sembahyang cem aman aemapfes ow, inim atakam jen ajifes, ar jak amopnakut aemapfesen. 29Aram awarimsitfes, wunam e Yesus e kota cesen aotpepemisimfesen. E kota bare, sikon op arawen. E ow e Yesus e sikon op fatarpu ajimocenfesen. Ar aramat ipic, erasan bajumnem aememfesen. 30Aramat ipic nat, e ow wowoc atereyenef, wunam ajisosefen.

Dat, jipic cowok jak aman aemamesef

(Mrk. 1:21-28)

31Yesus masirin, Galilea capinmi kota juwas Kapernaum ajisosefen. Ses Ban Jo ara, ar atakam amememtamefen. 32E owam, e amememtamef atakam, faknakut aporfesen. Inimas junum awut aefesen. 33E sembahyang cem aman, dat jak aman emamesef ipic aemapefen. Aram atakam awut afakaytawefen. 34“Yesus. Or Nasaret ipic ara. Or ucim pok emcarowem? Or da bafakamkurum arapen? Or nomsom. Or e Allah atewnemef tarowat ipic ara.” Inim aeefen. 35Yesus nat, jirmec e dat ajirimefen. “Jokona. Oram e ipic jak aman ewfisey.” Inim aeefen. E dat masirin, e ipic e ow wowoc, cenes aneyjiwitiwefen. Aram e ipic jak aman ewfisefen. Aram e ipic bajurusumapom opok cowok arawen. 36E ow takasam, junum awut aefesen. Aram atakam aamtawfesen. “Inim atakam ucim inimarama? Aramat ipic atakam faknakut ipic ara. Inimas ar jirmec e dat ajirimama. E dat masirin, afismes.” Inim aefesen. 37Bare, e capinmi ara, e asanin asanin ow, aramat ipic atakam atawfesen.

Yesus dam ow arke ajaworomtawef

(Mat. 8:14-17; Mrk. 1:29-34)

38Barewen. Aramat ipic asitef, wunam e sembahyang cem afisefen. Aram Simon cem afiwefen. E Simon anapwec dam awutnakut aemamesefen. E owam e Yesus e cowoc dam baworomtam janim aanimfesen. 39Aramat ipic e cowoc ak akajiemef, wunam e dam amopas bakari jirmec ajirimefen. Bare, e cowoc dam ajufumapefen. Aram asarimsitef, wunam amos pok e ow atetamefen.

40Barewen. Jo atief ara, ow, e ajowow dam ow, Yesuspu atowocenfesen. E ow cīncīn damas arawen. Aramat ipic masirin, ban e dam ow dam ton atatiwa inim aeefen. Ar e ow ajaworomtewa aeefen. 41Wunam, dat, ow arke jak aman aewwarimfisfesen. Aram atakam afakaytawfesen. “Or Allah atiw awamcem ara!” Inim aefesen. Aramat ipic nat, jiman e dat aafefen. “Car atakam arapok.” Inim aeefen. Aramat ipic, e dat, ar Allah atiw amsom aporefen.

Yesus e Yudea capinmi asan arke acacapiomef

(Mrk. 1:35-39)

42Jo apuef ara, aramat ipic, e kota bakan ajiosefen. Aram cem opok asan ajisosefen. E ow arke nat, aramat ipic apowporfesen. Ar aramat ipicpu aenfesen. Aenfes masirin, akemomfesen. Aramat ipic wun asan baysosasin. 43Aramat ipic nat, atakam e ow aotawefen. “Dor, e Allah Pemerintah Atakam Akat, e wun kota takas botaw aemin. Allah dor inimas bwem, atewenamfan.” Inim aeefen. 44Bare, aramat ipic e Yudea capinmi sembahyang cem arke aman acacapioma aeefen.

Currently Selected:

LUKAS 4: LAICNS

Highlight

Copy