LUKAS 3

Yohanes Bwi Babwim Ipic acacapiomef

(Mat. 3:1-12; Mrk. 1:1-8; Yoh. 1:19-28)

1Barewen. Kaisar Tiberius raja awut tahun lima belas ajiwar aememawirien. Pontius Pilatusam e Yudea capinmi gubernur ipic arawen. Herodesam e Galilea capinmi raja kanim arawen. Arewec Filipus masirin, e Ituria capinmiam, e Trakonitis capinmiam, raja kanim arawen. Lisaniasam, e Abilene capinmi raja kanim arawen. 2Hanasam, Kayafasam, Allah atakam mamtaw tugas ow awut arawen. E ow inim ememfes ara, Sakaria atiw juwas Yohanes, cem opok asan aemapefen. Allaham, e Yohanes, aratakam bacacapiomtam, jirmec ajirimefen. 3E Yohanes masirin, e Yordan jo capinmi takas ajarefen. Aram acacapiomefen. “Caram e cadosa takas bak bapayemtotorey. Ow masirin, bwi car babwimtotorcan. Inimas Allah e cadosa akokoromosomtamceman.” Inim aeefen. 4Eras, e Allah atakam botaw ipic juwas Yesaya tulis aeapomefas jipu cowok ara. Bare, aramat ipic inim tulis aeapomef:

“Jipic cowok, cem opok asan atakam afakaytawcema. ‘E Tuhan ajarcow bokotpu mamkenemtiwey. E bokotpuam tarowata.

5E sikon asan fop takas akapiaptotorcema. E sikon awut takasam, e sikon kanim takasam, apacayneytotorcema.

E fasi asan takas, tarowat aemamescema. E bwey asan junum takas, cawor aemamescema.

6Asmat takasam e Allah e ow ajortewcemaras aporcemes.’ E ipic inim aecema.”

Yesaya inim tulis aeapomefen.

7Ow arkenakut e Yohanes bwi a babwim ajukusirenawfesen. Aramat ipic masirin, atakam e ow aotawefen. “Amer jiwinakasa. Car e Allah ajurusumcowas omar baysos atakam ca otawfan? 8Jakaperey. Car e dosaas bak apayemamokomnew, bare akatas mamemey. Caram, ‘Abraham darakut araman,’ inim bi binip bacecerem arapok. Jakaperey. Allah, awamses ek, Abraham urpis baworomem, inim fakas aomomamar araman. 9Bare, wow, seysi, os tamow sotopnakap aemapma. Jipic cowok e eke akat bape opok os amatiwcema. Aram e os jismak asapimapomcema.” Yohanes inim aeefen.

10E ow arke masirin, jonow Yohanes atowporfesen. “Da nat, ucim akatas emcom?” Inim aefesen. 11Aramat ipic masirin, atep ajitefen. “E baju jamnuk epcom ow, baju opok ow sey baseyeces. Wunam e amos epcom ow, inimasam baemces.” Inim aeefen. 12Pemerintah uang batawanimtam kerja owam, Yohanes bwi a babwim aenawomfesen. Aram atakam, aramat ipic aotawfesen. “Guru. Dar ucim akatas emcom?” Inim aefesen. 13Aramat ipic masirin, “Car e pemerintah jirmec car ajirimfan uang cowok batawanimtamey. Bakakayim arapok.” Inim aeefen. 14Tentara owam jonow atowporfesen. “Da nat, ucim akatas emcom?” Inim aefesen. Aramat ipic masirin, “Kawey pok, ban bacajijimtaw arapok. Kawey pok batew, suw atakam botaw arapok. E cagajias takas jak akat inim mamomomatey.” Inim aeefen.

15Barewen. Ow arke e Yohanes jirey aefesen. “E Yohanes, e Allah aeremtewef ipic aranew.” Inim bi binip aceceremfesen. 16Yohanes masirin, atakam e ow takas aotawefen. “Dor bwi car abwimamin. E dofa asoromcan ipic nat, ow awut ara. Do kanim ara. Inimas dor e aramat ipic sandal bwemsurumtam asan opok. Aramat ipic, Roh Kudus e cajak afimimtamtotorceman. Aram e cajak aman pwicakas aurumtiwcema inim cimin ara. 17Aramat ipic e of e po aemapomama. Ar amosnakin bafomnemam, e amos cem batowoneyam, aememama. Ar masirin, e apem, jismak afamtiwcema. E jismak, bare bwemsapiames asan opok.” Inim aeefen.

18Inimas ara, aramat ipic wun atjen arke e ow aomefen. Aram e Atakam Akat e ow acacapiomefen. 19Yohanes, e raja kanim juwas Herodes, e Herodes e arepwec arem aemefas aporefen. Aram e Herodes aemawiri dosa arkeam aporefen. Inimas ar e Herodes jiman aafefen. 20Herodes masirin, wun dosaam aokayimefen. E dosa ara, ar Yohanes e penjara cem aman ajiwtewapomefen.

Yohanes, Yesus, bwi abwimef

(Mat. 3:13-17; Mrk. 1:9-11)

21Bap ara nat, Yohanes, erasan aememfes ow takas, bwi abwimefen. E ow takas bwi abwimef masirin, ar Yesusam bwi abwimefen. Yesus, Allah janim aanimef ara, e onam op amuapefen. 22Roh Kudus masirin, pari dam cimin, Yesus dam ton aneyapefen. Atakamam e onam op aewneyefen. “Or dotiw ara. Dor or damos ajiomamin. E aemamemas, bare akat ara.” Inim aeefen.

Yesus arafas bajucucumiras

(Mat. 1:1-17)

23Barewen. Yesus e bapnak kerja aemef, aramat ipic arumur, tahun tiga puluh ajiwarnew aememefen. Ow, e Yesus, e Yusuf atiw inim arawen. E Yusuf masirin, Eli atiw arawen. 24E Eli, Matat atiw arawen. E Matat, Lewi atiw arawen. E Lewi, Malki atiw arawen. E Malki, Yanai atiw arawen. E Yanai, Yusuf atiw arawen. 25E Yusuf, Matica atiw arawen. E Matica, Amos atiw arawen. E Amos, Nahum atiw arawen. E Nahum, Hesli atiw arawen. E Hesli, Nagai atiw arawen. 26E Nagai, Maat atiw arawen. E Maat, Matica atiw arawen. E Matica, Simei atiw arawen. E Simei, Yosek atiw arawen. E Yosek, Yoda atiw arawen. 27E Yoda, Yohanan atiw arawen. E Yohanan, Resa atiw arawen. E Resa, Serubabel atiw arawen. E Serubabel, Sealtiel atiw arawen. E Sealtiel, Neri atiw arawen. 28E Neri, Malki atiw arawen. E Malki, Adi atiw arawen. E Adi, Kosam atiw arawen. E Kosam, Elmadam atiw arawen. E Elmadam, Er atiw arawen. 29E Er, Yesua atiw arawen. E Yesua, Elieser atiw arawen. E Elieser, Yorim atiw arawen. E Yorim, Matat atiw arawen. E Matat, Lewi atiw arawen. 30E Lewi, Simeon atiw arawen. E Simeon, Yehuda atiw arawen. E Yehuda, Yusuf atiw arawen. E Yusuf, Yonan atiw arawen. E Yonan, Elyakim atiw arawen. 31E Elyakim, Melea atiw arawen. E Melea, Mina atiw arawen. E Mina, Matata atiw arawen. E Matata, Natan atiw arawen. E Natan, Daud atiw arawen. 32E Daud, Isai atiw arawen. E Isai, Obed atiw arawen. E Obed, Boas atiw arawen. E Boas, Salmon atiw arawen. E Salmon, Nahason atiw arawen. 33E Nahason, Aminadab atiw arawen. E Aminadab, Admin atiw arawen. E Admin, Arni atiw arawen. E Arni, Hesron atiw arewen. E Hesron, Peres atiw arawen. E Peres, Yehuda atiw arawen. 34E Yehuda, Yakub atiw arawen. E Yakub, Ishak atiw arawen. E Ishak, Abraham atiw arawen. E Abraham, Terah atiw arawen. E Terah, Nahor atiw arawen. 35E Nahor, Serug atiw arawen. E Serug, Rehu atiw arawen. E Rehu, Peleg atiw arawen. E Peleg, Eber atiw arawen. E Eber, Salmon atiw arawen. 36E Salmon, Kenan atiw arawen. E Kenan, Arpaksad atiw arawen. E Arpaksad, Sem atiw arawen. E Sem, Nuh atiw arawen. E Nuh, Lamek atiw arawen. 37E Lamek, Metusalah atiw arawen. E Metusalah, Henok atiw arawen. E Henok, Yared atiw arawen. E Yared, Mahalaleel atiw arawen. E Mahalaleel, Kenan atiw arawen. 38E Kenan, Enos atis arawen. E Enos, Set atiw arawen. E Set, Adam atiw arawen. E Adam, Allah atiw arawen. Inima.

Currently Selected:

LUKAS 3: LAICNS

Highlight

Copy