LUKAS 2

Yesus ajisamesef

(Mat. 1:18-25)

1Barewen. E jofay ara, Kaisar Agustus, e capinmi ow takas, juwas sensus surat bweapom, jirmec ajirimefen. 2E Kirenius e Siria capinmi gubernur ipic aememef arawen. Er e bapnak sensus arawen. 3Ow takasam, arop kota aporsipor, juwas surat bweapom ajisostotorfesen.

4Yusufam, Daud urpis arawen. Inimas ar Galilea capinmi kota juwas Nasaret ewjisosef, wunam Yudea capinmi kota juwas Betlehem ajisosefen. 5Ametnak ara, Daudam e kota Betlehem ajisamesefen. Yusufam, e batewet aemef cowoc juwas Mariaam, juwas, e sensus surat bweapom arawen. E cowoc, bare jak epcom arawen. 6Erasan aemapfes, aramat cowoc abapeap jofay aenawefen. 7Aram betiw jiwi jipicut ajispetiwefen. Ar e aramat ipic, picin biram ajiktiwefen. Aram aramat ipic binatang aramos peti aman atatiwefen. E pasanggrahan cem, asan opok cowok aporefen.

Domba manmok batiw ow

8E capinmiam domba manmok batiw ow, e fumin asan aemapfesen. Inim ara, ar e adomba takas manmok atiwapfesen. 9Tuhan malaikatam e ow bipu asarimjisomefen. Tuhan sereasam e ow fumi aseremtiwefen. E owam omar awutnakut aemfesen. 10E malaikat masirin, atakam e ow aotawefen. “Omar arapok. Dor atakam akat car botawmin. E atakam, bare jak akatas ara. Ow takas e atakam jen ajices, aram jak akat aememcemes. 11Wow ara e caBajortew Ipic, e Daud akota aman emejisamesor. Aramat ipic e Alah aeremtewef ipic ara. Aram Tuhan ara. 12Car esepen jiwi cowok apowtewcomokom. E jiwi, picin biram aman awames. E jiwi, binatang aramos peti aman awames. Inimas aporcokom, car e atawmin atakam, atakamnak aporcomokom.” E malaikat inim aeefen. 13Wun onam op malaikat arkenakutam, e malaikat akac asarimjisfesen. Aram Allah asicimfesen:

14“Ow e opnakut Allah basicimkurumces. E Allah akat apormar ow, jak akat baemapces.”

Inim aefesen.

15Barewen. E malaikat arke, e ow bakan ajiosfes, wunam onam op aoaptometfesen. E domba manmok batiw ow masirin, atakam aramaman aamtawfesen. “Dey bare! Dar Betlehem jisosmoc. E aemoras, bapormoc— e Tuhan atakam dar aotawarowas ara.” Inim aefesen. 16Ar masirin, asarimjisosfes, wunam ar e Mariaam, e Yusufam, e binatang amos peti aman aemamesef jiwiam, apowtewfesen. 17E ow e jiwi aporfesen. Aporfes masirin, ar e jiwi jen ajifes atakam, e ow aotawfesen. 18E atakam jen ajifes ow takas masirin, e domba manmok batiw ow atakam, junum awut aefesen. 19E Maria nat, eras takas bi binipin acowomopawirien. Aram e atakam, bi binip awut aceceremawirien. 20E domba manmok batiw owam, arop asan aojisosfesen. E jen ajifesasam, e aporfesasam, bare akat cowok arawen. Inimas aram Allah basicim awutnakut aemfesen. Eras takas e malaikat atakam jipu cowok arawen.

21E jiwi, jo delapan ajiwar aemamesef, ow, aramat ipic sunat aemfesen. E jofay aram juwas Yesus aamfesen. Malaikat e juwas bap atakam aotawef jipu ara— e Maria jak basuap opok aemapef arawen.

Yusufam, Mariaam, Yesus e Allah cem atowomiwfes

22Barewen. E Yusufam, Mariaam, e orom boemem jofay aenawefen. E orom boememas, e Musa surat aeapomef Jirmec jipu arawen. E Yusufam, e Mariaam, e jiwi, Tuhan batetam aememfesen. Inimas ara Yesus e Yerusalem ajisomosfesen. 23Eram e Tuhan Jirmec kitab jipu ara. “E betiw ower jiwi takas, Tuhan aras ara.” E Tuhan Jirmec inim ara. 24E Yusufam, Mariaam, pok, Tuhan bacatitam aememfesen. Eram e Tuhan Jirmec jipu ara. “Sey jamnuknew, pari jiwi jamnuknew, inim pok mamcatitamey.” E Tuhan Jirmec inim ara.

25Barewen. E Yerusalem, jipic juwas Simeon aemapefen. Aramat ipic, jipic tarowat arawen. Aram agama mamkawi fak ipic arawen. Aram e Israel bojurus opok emcow jofay, manmok atiwapawirien. E Roh Kudusam, e ipic akac aemawirien. 26Bap ara, e Roh kudus, atakam aramat ipic aotawefen. “Or e Tuhan aeremtewef ipic bap aporcemem. Or masirin, damir asep aafcemem.” Inim aeefen. 27E Roh Kudusam, aramat ipic, e Allah cem bafiw, bi binip atetamefen. Inimas ara, ar e cem afiwefen. Yesus arisepes masirin, e jiwi atowomiwfesen. Ar e Allah Jirmec jipu bwemas arawen. 28E Simeon masirin, e jiwi, ban co ajukumtewef, wunam Allah asicimefen:

29“Tuhan. E okerja bwemtam ipic, bare asan akat damir baafcow. E bap atakam atawfemas jipu cowok ara.

30E atewemfem Bajortew Ipic, bare, manmok atiwmin ara.

31Or e Bajortew Ipic, e samat takas bipu aeremtewfem.

32Aramat Ipic e Yahudi opok ow asereas ara. Ar bokotpu e ow aporomtamcema.

Aramat ipic emeenawef. Inimas ara, ow e orow Israel asicimcemes.”

Simeon inim aeefen. 33E jiwi aricipicam, arosowocam, e Simeon aotawef atakam takas, junum aefesen. 34Simeon masirin, Allah, e ow asan akat batetam, janim aanimefen. Aram atakam, e jiwi arosowoc Maria, aotawefen. “Jakaperey. Allah, awames jiwi, wun Israel ow arke bakoromnem aeremtewef. Aram a jiwi, wun Israel ow arke basumutumem, aeremtewef. A jiwi, Allah arakatas baporomtam ipic aememcema. Ow arkeam, atakam pwicak, aramat ipic aotawcemes. 35Inimas ara, ow e ow abi binip takas aporcemes. Oram jak pwicak aememcemem. Ar parang e ojak bamitapom inim cimin ara.” Simeon inim aeefen.

36Barewen. Allah atakam botaw cowoc juwas Hana erasan aememefen. Ar Asyer samat ipic juwas Fanuel apores arawen. Ar akmatnakut arawen. Bap ara, ar ay cowoc ememef, ar ower ajuwutefen. Aram armipiccin tahun tujuh ajiwar aemapawirisen. 37Ar masirin, fwisma cowoc, arumur tahun delapan puluh empat ajiwar aemapawirien. Aram e Allah cem bofis opoken. Ar jokam, iramam, Allah asicimawirien. Aram janim Allah aanimawirien. Bar arke ara, ar amos pok amaseawirien. 38E ow erasan ememfes ara, aramat cowoc e owpu aomocenef, wunam “terima kasih” atakam Allah aotawefen. Aram, e jiwi, atakam jirow, ow aotawefen. E aratakam jen ajifes ow, e Allah, Yerusalem ow ajortewcow jofay manmok batiwap ow arawen.

39Barewen. Yesus arisepes, e Tuhan Jirmec ji aekurumfes, aram arop Galilea capinmi kota juwas Nasaret aojisosfesen. 40E jiwiam sur aotemefen. Aram jak fak aememefen. Aram bi binip umuton aceceremefen. Allaham, aramat ipic damos ajiomefen.

Yesus umur tahun dua belas ajiwar ara, ar Allah cem ajisosef

41Barewen. Yesus arisepes, e tahunin tahunin, e Bakamsow Pokbwi mamem, Yerusalem ajisosa ajimpesen. 42Yesusam umur tahun dua belas ajiwar aememef, aramat ow erasan ajisosfesen. E pokbwi ajamema ajimpesas ara. 43E pokbwi acifes masirin, e arisepes acem bafasi, bowsec aememfesen. E jiwi Yesus nat, Yerusalem inim aememefen. Arisepesam bapor opoken. 44Ar e Yesus e ajamjarfes ow akac inim arawen. Inimas ara, ar bar cowok ajarfes, wunam ar aramat ipic e ajowowpuam, e amsom owpuam, apowporfesen. 45Aram aramat ipic bapowtew opok aporfesen. Inimas ar a bopowpor, Yerusalem aofasiosfesen. 46Bar mamincop ajiwar ara masirin, ar aramat ipic e Allah cem aman apowtewfesen. Aramat ipic e Allah atakam mamememtam ow aman aemapefen. Aram e ow aratakam jen baji, wunam jonow a batowpor, inim aemapefen. 47E Yesus aratakam jen ajifes ow, aramat ipic bi binip foronakut aporfesen. Ajonow batowporasam akat cowok aporfesen. Inimas ar junum awut aefesen. 48Arisepes aramat ipic bi aporfes, wunam junum awutnakut aefesen. Arosowoc masirin, atakam aotawefen. “Ata. Or e aemarowemas ucimaram? Diwicin, dar jak bini, or apowporenom.” Inim aeefen. 49Aramat ipic masirin, atakam aotawefen. “Car e apowporenokom ucimaram? Dor e doricipic cem aman bemap akat araman. Car inimas camsom opoknew?” Inim aeefen. 50Arisepes nat, e aotawef atakam amsom opoken.

51Barewen. Aramat ipic e arisepes e Nasaret akac aojisosfesen. Aram arisepes atakam ji aeefen. Arosowocam eras takas bi binipin acowomopawirien. 52Yesusam bi binip umuton kayimin akayimawirien. Ar Allah jakam, asmat jakam, akat kayimin akayimawirien. Aram ow awutut aememefen.

Currently Selected:

LUKAS 2: LAICNS

Highlight

Copy