LUKAS 1
1
1Teofilus akatenem. Ow arke, e Allah dawowoc aemawirias, tulis aeapomfes. 2Wun ow, e bapnak aemawiriasam, e jepen aemawiriasam, manmok abwiawiris. Aram, e atakam, wun ow acacapiomfes. E wun atakam jen ajifes ow, e atakam tulis aeapomfes. 3Doram e bapasam, e jepenasam, aoworporkurumof. Inimas ara, dor e atakam tulis or bweapomkurumtam, bi binip aceceremof. 4Er, e amememawirim atakam, atakamnak aporkurumcememas ara.
Malaikat e Yohanes Bwi Babwim Ipic ajisamescowas, atakam aotawef
5Barewen. E Yudea capinmi ara, raja ipic juwas Herodes aememefen. E jofayam Allah atakam mamtaw tugas ipicam juwas Sakaria aememefen. E Sakaria e Allah atakam mamtaw tugas samat juwas Abia mamkawi ipic arawen. Aremam juwas Elisabet arawen. Aramat cowoc Harun urpis arawen. 6Allah e jipicin cowoc tarowatnakut aporefen. Ar Tuhan jirmecam, Tuhan atakamam, ji aefes cowok arawen. Kawey ow e jipicin cowoc, atakam pwicak bwemotaw asan opoken. 7Elisabetam ema cowoc aemapefen. Inimas e ow jiwi opoken. E cowocam, jipicam, akmat aemapfesen.
8-9Jofay ara, Sakaria, ar akac Allah atakam mamtaw tugas ow, e tugas afiwfesen. E Allah atakam mamtaw tugas ow, ek kanim aneyjiwitiwtotora ajimpesen. Eras, e wun Allah atakam mamtaw tugas ipic, e Tuhan cem bafiw, wunam pinim akat pok jis bafam, aeremtewa ajimpesen. E jofay, bare Sakaria aeremtewfesen. Inimas ara, aramat ipic, e tugas, Allah bipu aememefen. 10E pinim akat pok jis bafam jam ara, e ow arke, janim Allah manim, e cesen aememfesen. 11Bare, Tuhan malaikat cowok e Sakaria bipu ajisomefen. Ar e pinim akat pok jis bafam jowsepu ajisomefen. 12E Sakaria e malaikat aporef, wunam ajurusemefen. Aram omar aeefen. 13E malaikat nat, atakam aotawefen. “Sakaria. Omar arapok. Allah e janim aanimawirimas jen ajima. E orem Elisabet e otiw ajispetiwcema. Oram aramat ipic juwas Yohanes aamcemem. 14Oram jak akat aememcemem. Aramat ipic ajisamescow, ow arkeam jak akat aememcemes. 15Tuhanam aramat ipic ow awut aporcema. E aramat ipic anggur bwiam, wun asesak bwiam, ban opok cowok aememcema. Ar arosowoc jak aman ewomiscow, Roh Kudus, aramat ipic aomomkurumcema. 16Aramat ipicam, Israel ow arke, Tuhanpu bin afirimtewcema. Tuhan, bare e ow arAllah ara. 17Aramat ipic bap ajarcema. E Tuhan masirin, asep ajarcema. Amet ara, Elia, Allah Roham, fakasam, aomomefen. Bare, e Yohanes, e Allah Roham, e fakasam, aomomcema. Aramat ipic, e ducur owam, e jiwiam, bi binip cowkon bocecerem amememtamcema. Aram e atakam bopow ow, ow tarowat memem bi binip bacecerem amememtamcema. Aram atakam, Tuhan arow, aotawcema. ‘E Tuhan aenawcowas, manmok mamsirimey.’ Inim aecema.” E malaikat inim aeefen.
18Sakaria masirin, atakam e malaikat aotawefen. “Dor, e aotawmenemas, atakamnaknew, atakamnak opoknew, baporkurum ucim inimaramnew? Dor akmat ipic araman. Doremam akmat cowoc araman.” Inim aeefen. 19E malaikat masirin, atep ajitefen. “Dor Gabriel ara. Doram Allah kerja bwemtam ipic ara. Aramat ipic, a atakam akat, or botaw atewnemaman. 20Oram jakaperey. E atawmin atakam, asep jofay, inim jipu aemcema. Or ara nat, e atakam, atakamnak opok inim ara. Inimas ara, or okor aememcemem. Or atakam bwemtaw asan opok aememcemem— e atawmin atakam inim jipu aemcow jofay ajiwara.” E malaikat inim aeefen.
21E ow arkeam, Sakaria bajis, manmok tareynakut asirimemfesen. Bare, aramat ipic e Allah cem aman ajiwkamiemefen. Inimas e ow junum aefesen. 22Aramat ipic masirin, ajisefen. E nat, ar atakam bwemtaw asan opoken. E ow arke masirin, aramat ipic, e Allah cem aman, pok cowok desen aporef aporfesen. Aramat ipicam, ban desen ajojoromefen. Aram okor ipic aememefen.
23Barewen. Aramat ipic e Allah atakam mamtaw tugas aemkurumef jofay aenawefen. Ar masirin, e acem ajisosefen. 24Asep jofay ara masirin, arem Elisabet jak asuapefen. E Elisabetam pir lima ajiwar cesen bajisow opok arawen. Aram atakam aotawefen. 25“Bare, Tuhan inim asan akat atetamfan. Inimas ow bi do bofayom opok aemcemenes.” Inim aeefen.
Malaikat e Yesus ajisamescowas, atakam aotawef
26Barewen. E Elisabet pir enam ajiwar jak epcom aemapefen. Allah e malaikat juwas Gabriel e Galilea capinmi kota juwas Nasaret atewnemefen. 27Ar e Gabriel, cemen maman amsom opok cowoc juwas Mariapu, atewnemefen. Aramat cowoc jipic juwas Yusuf bajuwut aememefen. E Yusuf, Daud urpis arawen. 28E malaikatam e Maria cem afiwef, wunam atakam aotawefen. “Selamat. Or Tuhan damos ajiomaman cowoc ara. Aramat ipicam asan akat or aomaman.” Inim aeefen. 29Aramat cowoc nat, inim atakam jen ajief, wunam bi binip arke aceceremefen. “Inim selamat atakam ucimasam?” Inim bi binip aceceremefen. 30E malaikat masirin, atakam aramat cowoc aotawefen. “Maria. Omar arapok. Allah or damos ajiomaman. 31Oram jak asuapcemem. Oram ower jiwi ajispetiwcemem. Oram e jiwi juwas Yesus aamcemem. 32Aramat ipic ow awutut aememcema. Ow, aramat ipic, atakam aotawcemes. ‘Ar e opnakut Allah atiw ara.’ Inim aecemes. Ametnak ara, aramat ipic arafasutmar, raja ipic aememef. Tuhan Allah, aramat ipic inim cimin raja ipic atewemcema. 33Aramat ipic jirmec, e Yakub urpis aatamjirimawarcema. Aram jirmec bajirim, bakari opok aemcema.” Inim aeefen.
34E Mariaam, atakam e malaikat aotawefen. “E atawmem atakam ucimaram? Dor ower epcom opok.” Inim aeefen. 35E malaikat masirin, atep ajitefen. “E Roh Kudus or aneyomceman. E opnakut Allah afakas or aomomceman. Inimas ara, e ajispetiwcem jiwi, jiwi tarowat aememcema. Owam atakam aotawcemes, ‘E jiwi Allah atiw ara.’ Inim aecemes. 36Oram jakaperey. E orosowoc Elisabet akmat cowoc ara. E nat, ar jipic jiwi jak aman awames. Ow e cowoc ema cowoc atakam atawawiris. E nat, ar pir enam ajiwar jak epcom aemapma. 37Allah, bare e pokin pokin takas aomomkurumamar ara.” E malaikat inim aeefen. 38Maria masirin, atakam aotawefen. “Bare. Dor Tuhan akerja bwemtam cowoc awapey ara. E atakam atawmemas, baemcow.” Inim aeefen.
Maria e Sakariain Elisabet cem jaki ajitef
39Barewen. Asep jofay ara masirin, Maria asitefen. Aram Yudea capinmi sikon kota cowok asarimjarefen. 40Erasan ara, ar Sakaria cem afiwef, wunam selamat atakam Elisabet aotawefen. 41E Elisabet e Maria selamat atakam jen ajief, e ajak aman jiwi aamesninikiefen. E Roh Kudusam e Elisabet aomomkurumefen. 42E Elisabet masirin, atakam awutut e Maria aotawefen. “Allah asan akatnakut or aomaman. Ar e wun cepes takas asan akat kanim inim aomama. Aram e ajispetiwcem jiwi, asan akatnakut aomcema. 43E doTuhan arosowoc aenawomaman. Inimas junum aemin. 44Oram, ‘Selamat,’ inim aemenem ara, e dojak aman jiwi, jak akat aemamesma. Inimas ar aamesninikima. 45E Tuhan atakam or aotawfanas, inim jipu cowok aemcema. Oram inim atakam asicimfem cowok ara. Inimas or jak akat aememamem.” E Elisabet inim aeefen.
Maria, Tuhan asicimef
46Barewen. Maria atakam atawefen:
“Tuhan, bare awutut ara.
47Allah doBajortew Ipic ara. Inimas do jak akat ara.
48Aramat ipic e akerja bwemtam cowoc kanim, manmok atiwemef.
Wow jofay ajiwar emamesor ara, e asmat siin asices ow, dor asan akat cowoc, atakam aotawawarcemenes.
49E Faknakut Ipic, awutnakutas aemfan.
Aram Tarowat Ipic ara.
50Aramat ipic, e arasicimames ow, serow ajiomcema— e asmat siin asimes ow ara.
51Aramat ipic, afaknakutas aporomtamcema. Aram e arma atawsicimfes ow, apacamosomef.
52Aramat ipic e jirmec fak ow ajumnemcema. Aram e kanim ow op atomettewapomcema.
53Aramat ipic, e jak bapitap opok ow, pok akat jak apitimapomcema.
Aram e pok awut ow, desen atewosomcema.
54-55Abrahamam, e arurpisam, darafasutmar ara. Allah, serow e ow batamomawar, atayi aeef.
Aramat ipic e atayi aeefas bi binip acomomama. Inimas ara, ar akerja bwemtam Israel ow, akac aemcema.”
Maria inim aeefen. 56Bare, e Maria e Elisabet cem pir mamincop ajiwar akac aemapfes, wunam arop cem aofasiefen.
Yohanes Bwi Babwim Ipic ajisamesef
57Barewen. E Elisabet jak bapeap jofay aenawefen. Aram jipicut ajispetiwefen. 58Tuhan saw akat e cowoc aoworporefen. Acem sotop owam, ajowowam, inim atakam jen ajifesen. Aram e cowoc jak akat akac aemapfesen. 59E jiwi ajispetiwef masirin, isi delapan ajiwar aemamesefen. Wunam e ow e jiwi sunat bwem aenawfesen. Aram e jiwi juwas Sakaria, aricipic arwat bam, aememfesen. 60Arosowoc nat, atakam aotawefen. “Inim arapok. Ajuwas Yohanes baemamescow.” Inim aeefen. 61E ow masirin, “E ojowow nat, inim juwas opok cowok.” Inim aefesen. 62E ow masirin, ban e jiwi aricipic ajojoromfesen. Er e jiwi juwas bam jonow batowporas arawen. 63Aramat ipic masirin, batu tulis janim aanimef, wunam inim atakam tulis aeapomefen. “Ajuwas Yohanes ara.” Inim aeefen. Bare, e ow takas junum aefesen. 64E Sakariaam atakam akan aotawefen. E akomen atakam aofimtewefen. Aram Allah asicimefen. 65E acem sotop ow takas omar aefesen. E Yudea capinmi sikon asan aemapfes ow takasam inim atakam cowok aotawfesen. 66Inim atakam jen ajifes ow takasam, e atakam bi binip awut aceceremfesen. Aram atakam aotawfesen. “A jiwi, ucim jiwi ememcow?” Inim aefesen. Ar, Tuhan, asan akat e jiwi aomef aporfes arawen.
Sakaria, Tuhan asicimef
67Barewen. Roh Kudus e jiwi aricipic juwas Sakaria aomomkurumefen. E Sakaria masirin, Allah atakam aotawefen:
68“Dor e Israel ow aTuhan Allah asicimamin.
Aramat ipic, arow, akac aemcema. Aram arow ajortewcema.
69Aramat ipic, fak Bajortew Ipic atewemtamcemarow. E ipic, akerja bwemtam ipic juwas Daud urpis ara.
70Ametnak ara, aramat ipic inim atakam e aratakam botaw ow aotawefen. E ow masirin, e atakam, wun ow aotawfesen.
71Aramat ipic, e dajewew ow akumimosomcema, wunam dar ajortewcemarow. Aram, dar, e dabifan afayomamarowos ow afakas, asurumtamcemarow. Ar inim atayi aeefen.
72Aramat ipic, e darafasutmar serow bom, atakam aotawefen. Aram e aeef atayi akat, bi binip acomomcema.
73Ar e atayi darafas juwas Abraham faknakut aeefen.
74E atayi ara, ar, dar, e dajewew ow afakas asurumtamcemarow. Inimas dar, omar jak opok, aramat ipic kerja bwemtam aemcomom.
75Inimasam ara, dar ow tarowatam, ow akatam, aememcomom, wunam e abipu kerja aatamemtamawarcomom.
76Ata. Ow, pr e opnakut Allah aratakam botaw ipic memem, atakam aotawcemes.
Oram, Tuhan abwey asan bakenemapom, bap ajarcemem.
77Or, bi binip, Tuhan arow atetamcemem. ‘Tuhan dar ajortewcemarow,’ inim bi binip e ow atetamcemem.
E bajortewas, bare dadosa bakokoromosom ara.
78Allah aserowas, bare awutnakut ara. Inimas aramat ipic eras takas aemcema. E Bajortew Ipic, bare e jopok cimin ara. Ar e op e dadampu akorneyemcema.
79Aram serenakut, e jiwic aman emapmes ow, aseremapomcema. E ow e damir omar ow ara. Aram e asan akat bokotpu bajar amememtamcemarow.”
Sakaria inim aeefen.
80Barewen. E jiwi sur aotemefen. Aram jak fak aememefen. Aram e ow opok asan aemapawiri— e Israel ow bipu ajisemef jofay ajiwar ara.
Currently Selected:
LUKAS 1: LAICNS
Highlight
Share
Copy
Want to have your highlights saved across all your devices? Sign up or sign in
LAI 1985
