LUKAS 8

Yesus ajamkawifes cepes

1Yesus eras aemkurumef masirin, ar bafafay opoken. Ar e wun kota arkeam, e wun samat arkeam, fumi abwiritjarefen. Aramat ipic e Allah Pemerintah Atakam Akat acacapiomefen. E amamkawi ow dua belas ajiwaram akac aemfesen. 2Wun cepesam akac aemfesen. Bap ara, dat e cepes jak aman aemaptotorfesen. E cepesam dam aememfesen. Yesus nat, e cepes ajaworomtawefen. E wun cowoc juwas Maria arawen. Ar wun juwas Magdalena arawen. Bap ara, dat tujuh ajiwar e cowoc jak aman ewfisfesen. 3Wun cowoc masirin, juwas Yohanes arawen. Ar Kusa arem arawen. E Kusa, e Herodes pok manmok batiw ipic arawen. Wun cowoc masirin, juwas Susana arawen. Wun cepesam arke arawen. E cepes, e awun pok, e Yesusam, e amamkawi owam, atatamfesen.

Eke bajijimirsam baposomtew atakam

(Mat. 13:1-9; Mrk. 4:1-9)

4Ow, kota arke, aramat ipicpu ewenawfesen. E ow arkenakutam ajarewsiemfesen. E aramat ipicam baposomtew atakam e ow aotawefen. 5“Kebun kerja bwem ipic, eke bajijimirsam ajisefen. E eke ajijimiref ara, wun e bwey asanpu aneyjuamestotorefen. Ow e eke bwey acawuemfesen. Sok masirin, e eke anakurumfesen. 6Wun eke masirin, ek capinmi asanpu aneyjuamestotorefen. E capinmi nat, boco opoken. Inimas e eke ajittotoref, wunam sa asatotorefen. 7Wun eke masirin, fa epcom akan aman aneyjuamestotorefen. E eke akanam, e fa epcom akanam, akac awaniefen. E fa epcom akan nat, e eke akan apwirimopefen. Aram e eke akan asanamimapomefen. 8Wun eke masirin, capinmi akat asanpu aneyjuamestotorefen. Aram ajittotoref, wunam e eke aporsipor, wun eke seratus ajiwar apeteptotorefen.” Yesus inim aeefen. Yesus inim aeef masirin, atakam afakaytewefen. “Jen fo ow, a atakam jen bajices.” Inim aeefen. 9E amamkawi ow masirin, jonow, e aramat ipic atowporfesen. “A baposomtew atakam, ucimas awcaworaram?” Inim aefesen. 10Aramat ipic masirin, atakam aotawefen. “E Allah Pemerintah aenawcow jofay atakam, bare amannakut atakam ara. E amannakut atakam jen bajikurum, bare caras ara. Do nat, baposomtew atakamin, e wun ow aotawmin. E ow e atakam apormes. E nat, ar baporkurumasin. Aram atakam jen ajimes. E nat, ar jen bajikurumasin.”

Yesus e baposomtew atakam umuton aotawef

(Mat. 13:18-23; Mrk. 4:13-20)

11“A baposomtew atakam inimas awcawor ara: E eke, bare e Allah atakam inim awcawor ara. 12E bwey asan aneyjuamestotoref eke, e atakam jen ajicemes ow inim awcawor ara. E ow e atakam jen ajices, e Iblis e owpu aenawomcema. Aram, e ow, e bi binip aceceremames atakam, atewcema. E ow, e Bajortew Ipic atakam basicimasin. Aram bajoremasin. 13E ek capinmi aneyjuamestotoref eke masirin, e atakam jen ajicemes wun ow inim awcawor ara. E ow e atakam jen ajices, aram jak akat aememcemes. Aram bimi batorow opok eke awcawor ara. Aram jipinnakap asicimcemes. E Iblis e ow dosa bwem acajijimtawporcema. E ow masirin, akoromcemes. 14E fa epcom akan aman aneyjuamestotoref eke masirin, e atakam jen ajices wun ow inim awcawor ara. Asep jofay e ow awames capinmi fa jakayas bi binip awut aceceremcemes. Aram pok arke batat jak aseremomcemes. Inimas ar e Allah atakam bi binip acawucemes. Aram Allah kerja bwemtamkurum opok aemcemes. 15E capinmi akat aneyjuamestotoref eke masirin, e atakam jen ajices wun ow inim awcawor ara. Ar ow tarowatam, ow akatam, aememcemes. Ar e atakam bi binip acowomopcemes. Aram bakorpi opok aecemes. Inimas ar jak jirow epcom Tuhan kerja akat aemtamcemes.”

Pelita baposomtew atakam

(Mrk. 4:21-25)

16“Ow pelita ateremapomces, ar e pelita, ember aman bwemkapimapom asan opok. Aram e pelita, tempat tidur caman bwemjiwtewapom asan opok. E ow nat, e pelita, op asan atewapomcemes. Er e cem afiwces ow, pelita sereas baporas ara. 17E bacukumapomas takas, umuton atewapomcemes. E curuwas takasam, umuton aemapcemes. (E baposomtew atakam takas inim cowok ara.) 18Inimas ara, e jen ajimokomas pimicima. E atakam jen ajikurumces ow, wun atakamam jen aojicemes. E arakam jen bajikurum opok ow nat, ‘Dor e atakam jen kanim ajimin.’ Inim aetotorcemes. E nat, e jen ajifesasam binip aanimcemes.” Yesus inim aeefen.

Yesus arosowocam, arewcewesam, atakam

(Mat. 12:46-50; Mrk. 3:31-35)

19Barewen. Yesus arosowocam, arewcewesam, aramat ipic aomocenfesen. Erasan nat, ow arke aememfesen. Inimas ar, aramat ipic, mamemjiwkawiem asan opoken. 20Ow masirin, atakam Yesus aotawfesen. “Orosowocam, orewcewesam, cesen awamces. Ar obi boworporen.” Inim aefesen. 21Aramat ipic nat, “Wun ow Allah atakam jen ajimes, wunam e atakam ji aemes. E ow, bare dorisepesam, dorewcewesam ara.” Inim aeefen.

Yesus jon awut akarimef

(Mat. 8:23-27; Mrk. 4:35-41)

22Barewen. Jofay ara, aramat ipicam, amamkawi owam, ci asawufesen. Aramat ipic masirin, atakam e ow aotawefen. “E poman ajirmoc.” Inim aeefen. Bare, aram anajuwfesen. 23E poman apijirfes ara, Yesus e ci aman isi apwitamesefen. Jon awutut masirin, awumenamefen. Waam e ci asawuefen. Inimas aram asan pwicakut aemsefesen. 24E amamkawi ow masirin, Yesus ameromfes, wunam ajitimfesen. “Guru! Guru! Dar bwi damir aafcomom openow.” Inim aefesen. Bare, aramat ipic ajitefen. Ar jirmec e foam, e wa awutam, ajirimefen. Bare e foam, e waam, akarisefesen. 25Aramat ipic masirin, atakam, e ow aotawefen. “Car dor basicim opok, ucimaram?” Inim aeefen. E ow masirin, omar aefesen. Aram junum aefesen. Aram atakam aramaman aamtawfesen. “A ca ipicam Ar e foam e bwiam, jirmec ajirimama, wunam ar aratakam ji aemes.” Inim aefesen.

Yesus, Gerasa ipic jak aman aemapfes dat aotewerisimef

(Mat. 8:28-34; Mrk. 5:1-20)

26Barewen. Yesusam, amamkawi owam, Gerasa capinmi ajirtayfesen. E Gerasa capinmi e Galilea capinmi awumin ara. 27Aramat ipic asowkuefen. Asowkuef masirin, jipic cowok e Yesus biamnuk aemamtewefen. E ipic jak aman, bare dat arke arawen. Tarey bwiut e ipic dam fi aemapawirien. Aram cem aman bemap opoken. Ar awerem asan aemapawirien. 28E ipic Yesus bi aporef, ar jen ajiefen. Aram Yesus bipu bi fop aneyjiapefen. Atakamam afakaytewefen. “Yesus. Or e opnakut Allah atiw ara. Or ucim pok emcenem? Dor janim or aanimamin. Or do bajurusum arapok.” Inim aeefen. 29E datam, e Yesus, ar e ipic jak aman bafis, jirmec ajirimef aporefen. Inimas ar inim atakam afakaytawefen. (Ametnak ara, bar arke, e dat, e ipic aomoma aeefen. Inimas ara, owam, e ipic, manmok atiwapawirisen. Aram e ipic rantau manam ajikapomfesen. E ipic nat, a manam pok takas apwipwikimefen. E datam, e ipic cem opok asan acicirimocenefen.) 30Bare, Yesus jonow e ipic atowporefen. “Or ucim ipic juwasam?” Inim aeefen. Bare, e ipic jak aman dat arke arawen. Inimas ar atep ajitefen. “Dojuwas ‘Arke’.” Inim aeefen. 31E dat masirin, janim fak Yesus aanimfesen. “Or dar e jursumec ow siksa asan baysos, jirmec bajirim arapok.” Inim aefesen.

32Bare, e capinmi ara, o cesa arke, e sikon fop, pok aanfesen. E dat masirin, e o dam aman bafiwaptotor, janim Yesus aanimfesen. Yesus masirin, “Bare, inima.” Inim aeefen. 33Bare, e dat arke, e ipic jak aman awarimwisfesen. Aram e o dam aman awarimfiwtotorfesen. E o arke masirin, e emtow inim sikon fop akukusayneyfesen. Aram bwi akan aakpua inim aefesen. Aram bwi damir aaffesen. 34E o cesa manmok batiw ow inimas aporfesen. Inimas aporfes masirin, omar ajisosfesen. Aram eras e kota owam, e kampung aemapfes owam, atakam aotawfesen. 35E ow masirin, eras bapor asayosfesen. Ar Yesuspu ameromfesen. Aram e dat e jak awarimwisfes ipic, Yesus bipu bemap aporfesen. E ipic pakaian epcomam, bi binip epcomam, aporfesen. E ow inimas aporfes, aram omar aefesen. 36Yesus, e dat jak aman aemapawiris ipic, bare emcajortewefen. Eras manmok abwifes ow, e atakam, e aenawfes ow, aotawfesen. 37E Gerasa capinmi ow takas omar awutnakut aefesen. Inimas ar Yesus bakan a bajiapom janim aanimfesen. Bare, Yesus ci asawuefen. Aram banajuw aememefen. 38E dat e jak aman awarimwisfes ipicam, e Yesus bamuw, janim aanimefen. Yesus nat, e ipic baysos jirmec ajirimefen. 39“Or e ocem jisosey. Allah awutnakutas or aemtamaman. Eras atakam mamotawey.” Inim aeefen. E ipic masirin, ajisosefen. Ar, e Yesus e awutnakut ar aemtamefas, atakam, e kota ow takas acacapiomefen.

Yesus, Yairus apores ajaworomsumutumef

(Mat. 9:18-26; Mrk. 5:21-43)

40Barewen. Yesus e poman aojirtayefen. Ow takasam aramat ipic manmok asirimapfesen. Inimas e ow arke e aramat ipic atewfesen. 41Sembahyang cem kepala ipicam juwas Yairus aenawefen. Aramat ipic, Yesus bipu jine onok aneyotapefen. Aram Yesus e acem bwenaw, janim fak aanimefen. 42E ipic, cowoc jiwi cowoknakap arawen. E jiwi arumur tahun dua belas ajiwar arawen. Ar e jiwi damir badamirafken aporefen. E Yesus ajaref ara, e ow arke, e adam akakajumamtawfesen.

43Wun cowocam cen es tahun dua belas ajiwar batayu opok aememefen. Owam e cowoc e dam bwemjaworomtew asan opok cowok arawen. 44E cowoc, bare Yesus e bak ajammerkawiemefen. Ar masirin, e aramat ipic baju bip, ban akurumtewefen. Bare, e cowoc es asarimtayuefen. 45E Yesusam atakam aotawefen. “Dor ban ca kurumtewman?” Inim aeefen. E ow takas nat, apacintotorfesen. Petrus masirin, “Guru. E ow arke ofumi abwiricimomamenes. Aram dam akakajumamtawmenes.” Inim aeefen. 46Yesus masirin, “Ow cowok ban akurumtewman. Ow dam baworomtew fakas e dodam afisma. Dor inimas apormin ara.” Inim aeefen. 47E cowoc masirin, Yesus e aemefas amsom aporefen. Aram omar dam tetete aeefen. Ar masirin, aenawefen. Aenawef, Yesus bipu bi fop aneyjiapefen. Aram ucimas Yesus ban akurumtewef, atakam, e ow takas bipu aotawefen. Aram e adam asarimjaworemefasam atakam aotawefen. 48Aramat ipic masirin, atakam aotawefen. “Ata. Or asicimamenem. Inimas or dam ajaworemamem. Bare, or asan akat baysosey.” Inim aeefen.

49Yesus atakam cowocemtawmepaw, e sembahyang cem kepala ipic cem cowkon aemapef ipic, aenawefen. “Opores, bare damir emcaafor. Oram e Guru bojurusum arapok.” Inim aeefen. 50E Yesus nat, inim atakam jen ajief, wunam atakam aotawefen. “Oram omar arapok. Allah basicim cowoka. E jiwi aojaworsitcema.” Inim aeefen. 51Aramat ipic, Yairus e cem ajaremef ara, ar e wun ow, e cem bafiw acuw aatefen. Ar nat, e Petrusam, e Yohanesam, e Yakobusam, e jiwi aricipicam arosowocam, acuw bat opok arawen. 52Erasan ow takas e jiwi bwec awut abwecfesen. Aramat ipic nat, atakam aotawefen. “Bwec arapok. E jiwi damir opok. Ar isi.” Inim aeefen. 53E ow masirin, aramat ipic uc aomocfesen. Ar e jiwi damir emcaafef aporfes ara. 54Aramat ipic nat, e jiwi ban acapimomefen. Aram atakam awut aotawefen. “Ata. Basitey.” Inim aeefen. 55E jiwi masirin, aojaworsitefen. Aram asarimsitemefen. Yesus masirin, amos e jiwi batetam, jirmec ajirimefen. 56E jiwi arisepes, bare junum aefesen. Aramat ipic nat, jirmec e ow ajirimefen. “Car eras atakam wun ow botaw arapok.” Inim aeefen.

Currently Selected:

LUKAS 8: LAICNS

Highlight

Copy