LUKAS 9

Yesus e amamkawi ow dua belas ajiwar atewosomef

(Mat. 10:5-15; Mrk. 6:7-13)

1Barewen. Yesus e amamkawi ow dua belas ajiwar ajateefen. Aram dat takas bakumimosom fakas e ow atetamefen. Aram dam ow baworomtaw fakas, e ow atetamefen. 2Ar e ow e Allah Pemerintah atakam bacacapiom atewosomefen. Aram e ow e dam ow baworomtaw atewosomefen. 3Aram atakam e ow aotawefen. “Ajisoscokom, pok atawcokom. Onokpoknew, esenew, uangnew, atawcokom. Baju jamnukam atewcokom. 4Car cem afiwemcokom, e cem inim mamememey— e capinmi bakan ajioscokom jofay ajiwara. 5Wun samat car batowomiw opok aporcokomnew, caram e samat bakan mamjiosey, wunam atakam e ow mamotawey. ‘Car da batowomiw opok aemamokom. Inimas salah aemamokom.’ Inim mameey.” Yesus inim aeefen. 6Bare, e ow ajisosfesen. Ar e samat arke fumi abwiritjarfesen. Ar e Atakam Akat e asan takas acacapiomfesen. Aram e asan takas dam ow ajaworomtawfesen.

Herodes bi binip arke aceceremef

(Mat. 14:1-12; Mrk. 6:14-29)

7-8Barewen. E raja kanim juwas Herodes, Yesus aemawirias takas, atakam jen ajiefen. Wun ow atakam, “Yohanes emeojaworsitef.” Inim aefesen. Wun ow masirin, “Elia emeojisemef.” Inim aefesen. Wun ow masirin, “Ametnak Allah atakam botaw ipic emeojaworsitef.” Inim aefesen. Inimas ara, e Herodes bi binip arke aceceremefen. 9Aram atakam aotawefen. “Dor Yohanes kus emesakamtiwof. Awamec ipic nat, ca ipicam? Dor, ar e awut aemamaras, atakam jen ajia aemin.” Inim aeefen. Aram e Yesus bi bapor aemporefen.

Yesus, amos, ow lima ribu ajiwar atatamef

(Mat. 14:13-21; Mrk. 6:30-44; Yoh. 6:1-14)

10Barewen. E Yesus atakam botaw atewosomef ow aofasifesen. Aram e aemfesas, atakam aramat ipic aotawfesen. Aramat ipic masirin, e ow atewefen. Aram kota Betsaidapu arop ajisosfesen. 11E ow arke nat, inimas aporfes, wunam aramat ipic fa asep asoromfesen. Aramat ipic masirin, e ow arke aotewefen. Aram e Allah Pemerintah atakam e ow aotawefen. Aram, e dam ow ajaworomtawefen. 12Bare, jo atiefen. E amamkawi ow dua belas ajiwar masirin, Yesuspu aapenfesen. “Arasan cem opok asan ara. Oram e ow e sotop cemsanam, e sotop kebun asanam, baysos jirmec ajirimey. Ar isi bwes asan bapowtetces. Aram amos pok bajitinces.” Inim aefesen. 13Aramat ipic nat, atakam e amamkawi ow aotawefen. “Car amos pok e ow tetamey.” Inim aeefen. E ow masirin, “Dar amos bokor lima ajiwaram, enam jamnukam, inimnakap awomcom. Da nat, a ow arkeut amos bajittameran baysos arapen?” Inim aefesen. 14Erasan aememfes ow nat, lima ribu ajiwarnew arawen. Aramat ipicam atakam e amamkawi ow aotawefen. “E ow asan cowok aniapa, asan cowok aniapa, inim baeces. Ar ow lima puluh ajiwarnew asan cowok aniapa, inim baeces. Caram inim jirmec ajirimey.” Inim aeefen. 15E amamkawi ow masirin, inimas cowok aemfesen. Aram e ow animapoma, animapoma, inim aefesen. 16Aramat ipic masirin, e amos bokor lima ajiwaram, e enam jamnukam, atewefen. Aram manmok onam op atiwefen. Aram terimah kasih atakam aotawefen. Terima kasih atakam aotawef masirin, e amos, e ow arke baseyamtam, e amamkawi ow atatamefen. 17Bare, e ow takas e pok aanfesen. Aram jak anapitaptotorfesen. Ar masirin, e daeremtiwfes pok, ese dua belas ajiwar aowapomfesen.

Petrus, Yesus e Allah aeremtewef ipic aporef

(Mat. 6:13-19; Mrk. 8:27-29)

18Barewen. Jofay ara, Yesus janim Allah arop aanimefen. E amamkawi owam, aramat ipic akac aemapfesen. Aramat ipic masirin, jonow e ow atowefen. “Do ca ipicam? E ow arke ucim atakam atawmes?” Inim aeefen. 19E ow masirin, “Wun ow atakam, or Yohanes Bwi Babwim ipic ara. Wun ow masirin, or Elia ara. Wun ow masirin, ametnak Allah atakam botaw ipic emeojaworsitefen. Or e ipic araman.” Inim aefesen. 20Aramat ipic masirin, atakam e ow aotawefen. “Ca nat, ucim bi binipam. Do ca jipicam?” Inim aeefen. Petrus masirin, “Or e Allah Aeremtewef Ipic ara.” Inim aeefen.

Yesus, e adamir baf joam, e abojaworsit joam, atakam aotawef

(Mat. 16:21-28; Mrk. 8:31–9:1)

21Barewen. Yesus inim atakam wun ow botaw arapok, jirmec fak ajirimefen. 22Inimas ar atakam aotawefen. “E Asmat Anakat Ajaworemef Ipic bajurusem awutut aemcema. E ducur owam, e Allah atakam mamtaw tugas ow awutam, e Allah Jirmec mamememtam owam, e ipic aotpemcemes. Owam e ipic acatiwcemes. Bar mamincop ara masirin, Allah e ipic aojaworomsumutumcema.” Inim aeefen. 23Aramat ipic masirin, atakam e ow takas aotawefen. “Ow do mamkawi akat aecenes, ar aropas bi binip bacecerem arapok. Aram arop salib batawtotorces, wunam bajamkawicenes. 24Ow, bajorem, jak aserememces, aram bajorem opokut aemcemes. Wun ow nat, kerja dor aemtamcemenes. E ow inim tugas aman damir aafces, aram ajoremcemes. 25Ow, awames capinmi pok takas atatkurumcesnew, e nat aram bajorem opok aemcesnew, bare ar asan akat bwememap asan opok. 26Dor e Asmat Anakat Ajaworemef Ipic awamcey ara. Ow do namke akayapcesam, ar e atawmin atakam namke akayapcesam, doram e ow namke aememcinim— e aofasineycey jofay ara. Doricipicam, e malaikat tarowatam, e arakatnakutas dor atatamcemenes. Aofasineycey, dor e akatnakutas epcom aneycimin. 27Dor atakamnak car aotawmin. Wun awamces ow, e Allah Pemerintah aporcemes. Ar e jofay ajiwar damir baf opok aemcemes.” Inim aeefen.

Yesus wun bi aojaworemef

(Mat. 18:1-8; Mrk. 9:2-8)

28Yesus inim atakam aotawef masirin, bar delapan ajiwarnew inim aemapefen. Bar delapan ajiwarnew aemapef, aram janim Allah manim, sikon op aaptometefen. Ar e Petrusam, e Yohanesam, e Yakobusam, atowotometefen. 29Aramat ipic janim Allah aanimef ara, wun bi ajaworemefen. Apakaianam den fwesak cowok, tarawu aemefen. 30-31Jipic jamnukam serenakutas aman ajisemfesen. Ar atakam e aramat ipic aamtawfesen. Er Musaam, Eliaam, arawen. Ar e Yesus e Yerusalem damir aafcowas, atakam aotawfesen. Allaham, e Yesus damir baf, atakam bap emcasakamtiwef arawen. 32Bare, e Petrusam, e akac aemapfes owam, isi manmok awutnakut aemapfesen. Aojitfes nat, ar Yesus arakatnakutasam, e cowkon ememfes ipic jamnuk arakatnakutasam, aporfesen. 33E ipic jamnuk, e Yesus bakan bajios ememfes ara, e Petrus, atakam aramat ipic aotawefen. “Guru. Dar arasan aememamom, bare akat cowok ara. Dar puk cem mamincop car bweapomtam akat ara. Wun cowok or. Wun cowok musa. E wun cowok masirin, Elia.” Inim aeefen. E atawef atakam nat, amsom opoken. 34Inim atakam cowoctawmep jak fwesak aenawtepefen. Aram e ow apwirimomefen. E Musain Elia masirin, e jak fwesak afiwfesen. Bare, erasan aememfes ow, omar aefesen. 35Atakamam e jak fwesak akoreyisimefen. “Awamec ipic dotiw ara. E ipic aeremtewof. Aratakam jen pajiey.” Inim atakam jen ajifesen. 36Inim atakam jen ajifes masirin, ar Yesus arop aememef aporfesen. E amamkawi owam jokon ajiemfesen. E jofay ara, ar e aporfesas, atakam kawey ow botaw opok cowok arawen.

Yesus, jiwi jak aman aemapef dat aotewerisimef

(Mat. 17:14-18; Mrk. 9:14-17)

37Barewen. To ara, ar e sikon akorneyfesen. Akorneyfes masirin, ow arke e Yesus bi jamnuk aemamtewfesen. 38E ow arke aman, jipic cowok atakam awut aotawefen. “Guru. Dor janim or aanimamin. Or e dotiw baporey. E dojiwi cowok ara. 39Jakaperey. Dat cowok e jiwi aomomcema. E datam jen asarimjicema, wunam ar e jiwi jis apimcema. Inimas e jiwi bwe besep aarsamwisimcema. E dat e jiwi bakan baji pwicaken. E nat, bakan ajicow, ar e jiwi bap ajurusumkurumcema. 40Doram e omamkawi ow, e jiwi jak aman dat botewerisim, janim aanimof. E ow nat, e dat bwemotewerisim asan opok.” Inim aeefen. 41Yesus masirin, atakam aotawefen. “Car do basicim opok awaniemamokom ow ara. Caram ow fasi ara. Dor car akac ucim jofay ajiwar aoememcey. Dor jak jirow ca bom, ucim jofay ajiwararam? Bare, e otiw arasan towotnawey.” Inim aeefen. 42E jiwi Yesuspu aenef ara, dat e jiwi cenes aneyjiwitiwefen. Aram e jiwi jis apimefen. Yesus masirin, jirmec fak e dat ajirimefen. Inimas Yesus e jiwi ajaworomtewefen. Aram e jiwi, aricipic atetamefen. 43E ow takasam e Allah faknakutas junum aefesen.

Yesus e damir aafcowas atakam aootawef

(Mat. 17:22-23; Mrk. 9:30-32)

Barewen. E ow takas e Yesus aemawirias takas junum aefes ara, aramat ipic, atakam, a amamkawi ow aotawefen. 44“E aotawmin atakam jen foa. Jipic cowok e Asmat Anakat Ajaworemef Ipic e jokmen ow aotasimemtamcema.” Inim aeefen. 45Yesus nat, e atakam umutonnak botaw opok aemefen. E ow, e atakam jen bajiasin arawen. Inimas ara, e ow e atakam jen bajikurum opoken. Aram e atakam jonow batowpor omar aefesen.

Ow awut cam?

(Mat. 18:1-5; Mrk. 9:33-37)

46Barewen. E Yesus amamkawi ow atakam aamtawfesen. “E awamcom ow, awutnak ca owaram?” Inim aefesen. 47Yesus nat, e ow bi binip amsomen. Inimas ara, aramat ipic jiwi kanim atewefen. Ar e jiwi adampu atewemefen. 48Ar masirin, atakam, e ow, aotawefen. “Ow damos dor ajiomcenes, wunam ar awamec jiwi dor atowomiwtamcemenes, bare, e ow doram atowomiwcemenes. E dor atowomiwcemenes ow, e dor atewenamfan ipicam atowomiwcemes.” Inim aeefen.

Yesus mamkawi opok ipic, dat aotewerisimef

(Mrk. 9:38-40)

49Barewen. Yohanes atakam aotawefen. “Guru. Dar jipic cowok aporfom. E ipic, e ojuwas ajitewef, wunam ow jak aman dat aotewerisimef. E ipic nat, dar mamkawi ipic opok aporfom. Inimas dar e ipic eras bwem bakari, jirmec ajirimfom.” Inim aeefen. 50Yesus nat, atakam aramat ipic aotawefen. “E ipic, eras bakari, jirmec bajirim arapok. E owen ca bamo opok ow, bare cajowow ara.” Inim aeefen.

Samaria capinmi samat cowok, Yesus, cem batowomiw opok

51Barewen. E Yesus onam op baptomet jofay sotop aenawefen. Yesus masirin, Yerusalem baysos atakam asakamtiwefen. 52Aram atakam botawtam ow bap atewosomefen. E ow masirin, Yesus isi mamses asan janim manim, Samaria capinmi samat cowok ajisosfesen. 53E samat nat, e aramat ipic Yerusalem bin jiemef aporfesen. Inimas ar aramat ipic batowomiw pwicaken. 54E amamkawi ow jamnuk juwas Yakobusam, Yohanesam, inimas aporfes, wunam atakam aotawfesen. “Tuhan. Or, dar, jismak e onam op baney, wunam e ow bafamtiw, inim jirmec bajirim, akat open?” Inim aefesen. 55Aramat ipic masirin, e ipic jamnuk bin afiromef, wunam jiman aafefen. 56Bare, ar takas wun samat acemsan ajisosfesen.

Yesus mamkawi ow

(Mat. 8:19-22)

57Aramat ow ajarfes ara, jipic cowok atakam Yesus otawefen. “E asanin asanin jisoscem, doram or ajamkawiawarcimin araman.” Inim aeefen. 58Yesus masirin, atakam, e ipic aotawefen. “E wasan juwur, co epcom. E sokam co epcom. E Asmat Anakat Ajaworemef Ipic nat, memames cem opok.” Inim aeefen. 59Yesusam atakam wun ipic aotawefen. “Mamkawican.” Inim aeefen. E ipic masirin, “Dor e doricipic se batakamwuapom.” Inim aeefen. 60Aramat ipic nat, “E damir ow, e wun damir ow se arma bawuapomces. O nat, baysosey. Or e Allah Pemerintah atakam bacacapiomey.” Inim aeefen. 61Wun ipicam atakam aotawefen. “Dor or ajamkawicimin. Do not, docem ow, do baysos, atakam batakamotaw.” Inim aeefen. 62Yesus masirin, “Ow, cesa pok bataweapom ememces masirin, capinmi mananasim perkakas ban osomces, wunam asamanam ajiawarces, ar Allah Pemerintah kerja bwemtam, bare awcawor opok.” Inim aeefen.

Currently Selected:

LUKAS 9: LAICNS

Highlight

Copy