Marakusi 9

1Nauliꞌ wopiꞌi Iesu, “Nipehádingi maroꞌa apa to Kuhángáꞌákou deꞌe: ara i oloꞌmi to tiꞌara ina mate hangko tiꞌara mani moita kamakuasaꞌna Pueꞌ Ala hai kahaweꞌna popárentáNa.”#9:1 To natunggái Iesu ieneꞌ ia miꞌi: 1) katebálikiáNa i buluꞌ to mewaliꞌ haminggu hangko ionoꞌ (básá Matiu 17:1-8; 2 Peturuꞌ 1:16-18). 2) pearóNa hangko i kapate (básá Roma 1:4), ba 3) pengkaoreꞌNa lao i surugáꞌ (básá Lukasi 24:50-51; Suro 1:9) hai pendáuluna Inao to Magasaꞌ (básá Suro 2:1-4).

Iesu rapomahile i wongko buluꞌ

(Mat. 17:1-13; Luk. 9:28-36)

2Ini alona hangko ionoꞌ, Iesu moánti Peturuꞌ, Iakobu hai Iohane ádina, mempanaiꞌheꞌ lao i wongko buluꞌ to mapángkáꞌ.#9:2 buluꞌ to mapángkáꞌ: Tiꞌara piꞌi taisá buluꞌ apa to natunggái ieneꞌ. Babilaꞌ buluꞌ Hermon, to rekeꞌ-rekeꞌna hampuloꞌ hai hahioꞌ kilómete hangko i kótá Kaisarea Pilipi. (Básá Marakusi 8:27.) Buluꞌ iti 2750 mete lábi kamapángkáꞌna. Mewaliꞌ hira peá, tiꞌara ara tauna ntániꞌna. Ionoꞌ tebáliki miꞌi lenggeꞌna Iesu mewaliꞌ meawaꞌ.#9:2 lenggeꞌna Iesu mewaliꞌ meawaꞌ: To raita topeguruna Iesu, peawaꞌNa hai kamakuasaꞌNa to ara i Hia hangko tiꞌara mani mopálehi surugáꞌ mai i duniáꞌ mewaliꞌ tauna, hai to Naꞌala huleꞌ i pesuleꞌNa lao i surugáꞌ. Básá Pilipi 2:6-7. 3WaruꞌNa mewaliꞌ bulá hai mengkilaꞌ; tiꞌara ara hadua tauna i duniáꞌ deꞌe to peisá mobahoꞌi badu duuꞌna noꞌonoꞌ pengkilaꞌna. 4Hangkaꞌ-hangkaꞌ perái topeguruNa moitaheꞌ rodua nabiꞌ to molaluita hai Iesu.#9:4 Mampolaluitaheꞌ mokana i “pesuwuꞌá” Iesu, ia miꞌi kaꞌina mateNa, katueꞌNa huleꞌ hai peoreꞌNa (básá Lukasi 9:31). Nabiꞌ to rodua iti ia miꞌi Musa hai Eliá.#9:4 Musa hai Eliá: Musa to moukiꞌ áturána Pueꞌ, hai Eliá to mosulewátái nabi-nabiꞌ to moukiꞌ handaꞌ i Pototowiá to Sae. I buluꞌ iti, tiꞌara peá ukiꞌraꞌ, agáiáná Musa hai Eliá haduduáraꞌ to mosabiki kaꞌIesuna miꞌi Datu Topehómpóꞌ. 5Hangko ionoꞌ, nauliꞌ Peturuꞌ i Iesu, “Guru. Maroꞌa ntepuꞌu kihádi kitaꞌ arakeꞌ ieneꞌ. Rángina kibábehi tálu wuaꞌna bambaruꞌ: hambuaꞌ i Hio Pueꞌ, hambuaꞌ i Musa, hai hambuaꞌ woꞌo i Eliá.” 6Katoꞌuána, tiꞌara nahádiá Peturuꞌ apa to nauliꞌ ánti kamalááꞌna.

7Hangkaꞌ-hangkaꞌ perái, napótóꞌheꞌ gawu.#9:7 Gawu ia miꞌi tandaꞌ kaꞌárána Pueꞌ Ala i oloꞌraꞌ tauna. Básá Pesuwuꞌá 13:21-22; 16:10; 19:9; 24:15-18; 34:5; 40:34-38; Rárá Penómbá 16:2; Poimbaꞌ 9:15-22; 11:25; 1 Datu-datu 8:10-11 hai Sura Petóiá 97:2. Hangko i lalu gawu iti, rahádi miꞌi wambaꞌ to manguliꞌ, “Deꞌe miꞌi ÁnáꞌKuꞌ to Kupokaꞌahiꞌ.#9:7 Laluita iti hibali hai apa to nauliꞌ Pueꞌ Ala tempóna Iesu rariu. (Básá Marakusi 1:11.) Nipehádingi miꞌi laluitaNa!”

8Upu onoꞌ, rapepeita riꞌi, tiꞌara piꞌi ara tauna ntániꞌna hingkakani hai hira; Iesu perái haduduáNa. 9Pendáuluraꞌ hangko i wongko buluꞌ iti, nahángáꞌáheꞌ Iesu, “Ineeꞌ sieruꞌ niuliꞌ-uliꞌ i heáná peá apa to niꞌita ininá, ane tiꞌara mani Ánáꞌ Mánusiá rapopearó hangko i kapate.”

10HawaꞌNa iti rapeuláꞌi mpuꞌu. Tiꞌara rapolaluita i heáná peá apa to mewaliꞌ iti, agáiáná mombekuneꞌ-kuneꞌheꞌ apa tunggáiána Iesu manguliꞌ kaꞌina mearóNa huleꞌ hangko i kapate.#9:10 Tiꞌara raisá toIahudiꞌ, tepasuaꞌ topegurunaheꞌ Iesu, Datu Topehómpóꞌ ina rapopeahiahiꞌ haneꞌi rapapate. To raisá, Pueꞌ Ala ina mopatueꞌ huleꞌ tauna hangko i kapate i kahópóꞌána duniáꞌ. Básá Danieli 12:2; Iohane 11:24. 11Mekuneꞌheꞌ i Iesu, rauliꞌ, “Wuliangkaiꞌ. Mouláꞌ paturoꞌraꞌ guru agama, nabiꞌ Eliá hangaa-ngaa haweꞌ ioru,#9:11 Básá Maleaki 3:1; 4:5. hangko haweꞌ riꞌi Datu Topehómpóꞌ. Noumbá riꞌi haneꞌi noꞌonoꞌ?”

12-13Nahánikiheꞌ Iesu, “Toꞌu to rapaturoꞌákou iti. Eliá hangaa-ngaa haweꞌ ioru, láwiꞌ ia to mopatimama upu-upuna. Hai Kuhángáꞌákou, haweꞌ miꞌi nabiꞌ Eliá,#9:12-13 To natunggái Iesu deꞌe ia miꞌi Iohane Toperiu. Básá Matiu 17:13. hai rapopeahiahiꞌ tauna mouláꞌ peundeꞌáraꞌ, nodo to teukiꞌ i lalu Sura Magasaꞌ. Agáiáná noumbá Ánáꞌ Mánusiá? Moapa riꞌi haneꞌi teukiꞌ i lalu Sura Magasaꞌ, Ia woꞌo ina molámbiꞌ handaꞌ kapári hai ina rapakóiꞌ tauna.”#9:12-13 Ánáꞌ Mánusiá… ina molámbiꞌ handaꞌ kapári…: Básá Iesaia 49:7a; 53:3-4; Sura Petóiá 22:6; 118:22.

Iesu mopakauriꞌ hadua ánángkóiꞌ to napesuaꞌi setáꞌ

(Mat. 17:14-21; Luk. 9:37-43)

14I tempó iti, Iesu hai topeguruNa to tálu mesuleꞌmoheꞌ hangko i wongko buluꞌ lao mampohidupaꞌá topeguruNa to ntániꞌna. Kahaweꞌraꞌ ionoꞌ, raita handaꞌ tauna to motolelingi topeguruNa, hai bahangapaheꞌ guru agama tangaꞌraꞌ mombeheheꞌ hai topeguruna Iesu iti. 15Karaitána tauna to handaꞌ Iesu iti, tingkáráꞌheꞌ hai melangkaheꞌ lao mampohidupaꞌá. 16Mekuneꞌ Iesu i hira, “Apa to nipombeheheꞌi hai topeguruNgkuꞌ?”#9:16 Apa to nipombeheheꞌi hai topeguruNgkuꞌ? ba: Apa to nipombeheheꞌi hai guru-guru agama?

17Hadua hangko i tauna to handaꞌ iti manguliꞌ, “Guru! Deꞌe wongkódóꞌá ánáꞌkuꞌ kuánti bona Nupakauriꞌ. Ia tiꞌara peisá molaluita láwiꞌ napesuaꞌi tokadake. 18Ane napesuaꞌi tokadake, madungká i tampoꞌ, mobireꞌ ngángána, mangkukuꞌ bágána, hai matodoꞌ wátána. Kupembiáꞌ miꞌi i topeguruMu bona mampopesuwuꞌheꞌ tokadake iti, agáiáná tiꞌara rabuku.”

19Mewaliꞌ nahángáꞌáheꞌ Iesu, “Ee, noumbárakou noeneꞌ? Moapa riꞌi haneꞌi tiꞌara manikou mepoinálái? Hangapa mani kamaruena ina hingkakaniAꞌ hai kómu? Hangapa mani kamaruena hangaa-ngaa sabaraꞌAꞌ i kómu hangko mepoináláirakou? Ánti mai ánángkóiꞌ iti!”

20Raꞌánti mpuꞌu miꞌi ánángkóiꞌ iti i Iesu. Kanaitána tokadake iti Iesu, ia mampoporidiꞌ-ridiꞌ wátána ánángkóiꞌ iti duuꞌna madungká mengkakanduli, hai mobireꞌ ngángána. 21Mekuneꞌ Iesu i umána ánángkóiꞌ iti, Nauliꞌ, “Hangapa miꞌi kamaruena pantódihána?”

Nauliꞌ umána, “Hangko i kaꞌánángkóiꞌána mani. 22Handaꞌ kánina tokadake modungká wátána i lalu api ba i lalu uwai, láwiꞌ napoinao napapate. Ane Nubuku, Guru, kupembiáꞌ bona Nupokaꞌahiꞌangkaiꞌ hai Nutulungi wongkaiꞌkaa!”

23Nauliꞌ Iesu, “Moapa riꞌi haneꞌi nuꞌuliꞌ ‘Ane Nubuku?’ Upu-upu peisá mewaliꞌ i tauna to mepoinálái.”#9:23 Tiꞌara natunggái Iesu upu-upu to rapembiáꞌ tauna i Pueꞌ Ala ina Nabukeki, agáiáná upu-upu to hiolaꞌ hai peundeꞌána Pueꞌ Ala. (Básá Marakusi 14:36; Iohane 14:12-14; 1 Iohane 5:14-15.)

24Nahániki umána ánángkóiꞌ iti napasimbuku, “Mepoináláiaꞌ i Hio, Pueꞌ! Nutulungiaꞌ wongkódóꞌá, láwiꞌ kódóꞌ deꞌe makuraꞌ mani pepoináláingkuꞌ.”

25Kanaitána Iesu handaꞌ tauna melangka ina hirámpu, Ia mokámbáróá tokadake iti, Nauliꞌ, “Ee, tokadake to mepabongoꞌ hai mepabebeꞌ! Mesuwuꞌmokoꞌ hangko i ánángkóiꞌ deꞌe, hai ineeꞌmokoꞌ mesuaꞌ huleꞌ.” 26Monganga-nganga tokadake, mampoporidiꞌ-ridiꞌ ánángkóiꞌ iti, haneꞌi mesuwuꞌ miꞌi. I pesuwuꞌna tokadake, ánángkóiꞌ iti tiꞌara piꞌi mokale-kale, nodo miꞌi to mate, onoꞌ miꞌi haneꞌi handaꞌ tauna manguliꞌ, “Mate miꞌi!” 27Agáiáná Iesu motibaaꞌ taena hai Napopearó. Mearó mpuꞌu miꞌi ánángkóiꞌ iti láwiꞌ nalalu miꞌi!

28Hangko ionoꞌ, Iesu hai topeguruNa mesuaꞌheꞌ i lalu hambuaꞌ támbi. Kapesuaꞌraꞌ, mekuneꞌmoheꞌ topeguruNa i Hia, rauliꞌ, “Guru. Moapa riꞌi haneꞌi tiꞌara kibuku mampopesuwuꞌ tokadake iti ininá?”

29Nahánikiheꞌ, “Tokadake to noꞌonoꞌ kamaróhóna, tiꞌara peisá niwura ntooꞌ peá noꞌonoꞌ. Hangaa-ngaa nipekakaeá riꞌi i Pueꞌ Ala.”

Karongkánina Iesu mampolaluita kana i kaꞌina mateNa

(Mat. 17:22-23; Luk. 9:43-45)

30Iesu hai topeguruNa pohuꞌmoheꞌ hangko i Kaisarea Pilipi, mopaliliu polumaoraꞌ i tampoꞌ Galilea. Tunggáiána Iesu bona tiꞌara raisá tauna to handaꞌ iumbá kalaoáNa, 31láwiꞌ i tempó iti, Napoinao peá mopaturoꞌ topeguruNa. Nahángáꞌáheꞌ, “Ánáꞌ Mánusiá ina rapehuhuꞌá i taeraꞌ tauna, ina rahuku mate, agáiáná i katáluna alona, Ia ina tueꞌ huleꞌ.” 32Agáiáná topeguruNaheꞌ tiꞌara moisá tunggáiána laluitana Iesu iti, hai tiꞌaraheꞌ woꞌo pebáiꞌ mekuneꞌ i Hia.

Heáná to mengkaiwóiꞌ, hira miꞌi to mahile tueꞌraꞌ

(Mat. 18:1-5; Luk. 9:46-48)

33Iesu hai topeguruNa haweꞌ mpuꞌumoheꞌ i wánuá Kapenau. Tempóraꞌ ara i lalu támbi, mekuneꞌ miꞌi Iesu i topeguruNaheꞌ, Nauliꞌ, “Apa to nipolaluita oaꞌ i tangaꞌ rárá ininá?” 34Agáiáná tiꞌaraheꞌ mehániꞌ, láwiꞌ to rapolaluita i tangaꞌ rárá, heáná hangko i oloꞌraꞌ to melumbuꞌ kamahilena tueꞌna. 35Mewaliꞌ, mehoda miꞌi Iesu hai mokióꞌ topeguruNa to hampuloꞌ hai rodua, haneꞌi Nahángáꞌáheꞌ, “Heáná to mampoinao bona tepaireáꞌá hangko i oloꞌmi, hangaa-ngaa mengkaiwóiꞌ ntepuꞌu hai mewaliꞌ topokádipurá upu-upu tauna.” 36Roo onoꞌ, Ia moala hadua ánángkóiꞌ, Napopeángkáꞌ i tangaꞌraꞌ, Nakápui, haneꞌi Nahángáꞌáheꞌ topeguruNa, Nauliꞌ, 37“Heáná to motarima hadua tauna i lalu hangaꞌKuꞌ, tepasuaꞌ tauna to i wóiꞌ tueꞌna nodo ánángkóiꞌ deꞌe, lempóna Kódóꞌ miꞌi to natarima. Hai heáná to motarimaꞌAꞌ, tiꞌara Kódóꞌ peá to natarima, agáiáná motarima miꞌi woꞌo Pueꞌ Ala to mohuoꞌAꞌ mai.”

38Roo onoꞌ, nauliꞌ Iohane, “Guru. Ara kiꞌita hadua tauna to mampopesuwuꞌ setáꞌ i lalu hangaꞌMu, agáiáná kikóntó láwiꞌ ia tiꞌara hangko i kaiꞌ.”

39Nauliꞌ Iesu, “Ineeꞌ nikóntó, láwiꞌ tauna to mobábehi tandaꞌ kuasaꞌ i lalu hangaꞌKuꞌ, tiꞌara ina peisá mampoewaliáꞌAꞌ. 40Tauna to tiꞌarakeꞌ moewaꞌ, hira miꞌi to hingkakani hai kitaꞌ. 41Toꞌu to Kuꞌuliꞌ, hai Kuhángáꞌákou: heáná peá to motulungikou ánti peuláꞌmi i Datu Topehómpóꞌ, kehapiꞌ hamangku peá uwai ntooꞌ naweꞌikou ánti peuláꞌmi i Datu Topehómpóꞌ, ia ina molámbiꞌ háwángina hangko i bábehiána to maroꞌa.

42Agáiáná heáná to mopakanawoꞌ hadua tauna to mengkaiwóiꞌ tueꞌna nodo ánángkóiꞌ deꞌe, álána tiꞌara piꞌi mepoinálái i Kódóꞌ, ina rumihi ntepuꞌu pehukuna Pueꞌ Ala i tauna iti. Rángina miꞌi watu pogiliá to mahile ratóe i tambólóna hai ia ratibe i lalu tahiꞌ.

43Maroꞌa-roꞌakou bona ineeꞌkou madósá. Ane rápáꞌna taemu hambali moántikoꞌ mobábehi dósá, nubóhóki pemiꞌi. Maroꞌa mani hambali peá taemu, asalaꞌ molámbiꞌkoꞌ katueꞌ to maroꞌa hingkakani hai Pueꞌ Ala,#9:42-47 Iesu mopakeꞌ ngkóráꞌ to melumbuꞌ (hiperbole) bona taisá noumbá kamatimina dósá i peitána Pueꞌ Ala. Peisákeꞌ madósá moliu apa to tabábehi, to taita, hai to tapekiri. Tiꞌarakeꞌ paraluu mobóhóki taentaꞌ ba bitintaꞌ, agáiáná to taparaluu ntepuꞌu, mowehángi dósá hangko i laluntaꞌ. haneꞌi rombali taemu, agáiáná kahópóꞌána ratibekoꞌ i lalu naraka. Ionoꞌ ara api to roreꞌ oaꞌ.#9:43 naraka: Básá to teukiꞌ i Kahirámpuá Laluita. [ 44Ionoꞌ, api roreꞌ oaꞌ, hai uliꞌ tiꞌara ina mate.]#9:44 I surana Marakusi lalu básá Iunani to sae ntepuꞌu, wátiꞌ ka-44 deꞌe hai wátiꞌ ka-46 tiꞌara teukiꞌ, agáiáná teukiꞌ i handaꞌ sura to raukiꞌ huleꞌ i bókóꞌ. 45Ane rápáꞌna bitimu hambali moántikoꞌ mobábehi dósá, nubóhóki pemiꞌi. Maroꞌa mani hambali peá bitimu, asalaꞌ molámbiꞌkoꞌ katueꞌ to maroꞌa hingkakani hai Pueꞌ Ala, haneꞌi rombali bitimu, agáiáná kahópóꞌána ratibekoꞌ i lalu naraka. [ 46Ionoꞌ, api roreꞌ oaꞌ, hai uliꞌ tiꞌara ina mate.] 47Hai ane rápáꞌna mátámu hambali moántikoꞌ mobábehi dósá, nudungkiki pemiꞌi. Maroꞌa mani hambali peá mátámu, asalaꞌ mewaliꞌkoꞌ taunána Pueꞌ Ala i lalu popárentáNa, haneꞌi rombali mátámu, agáiáná kahópóꞌána ratibekoꞌ i lalu naraka. 48Ionoꞌ, api roreꞌ oaꞌ, hai uliꞌ tiꞌara ina mate.

49Mouláꞌ Paturoꞌna Musa, upu-upu pandeꞌ to rapopenómbá i Pueꞌ Ala hangaa-ngaa rapamagasaꞌ hai bure.#9:49 rapamagasaꞌ hai bure: Básá Áturá Menómbá 2:13. Noꞌonoꞌ woꞌo upu-upu tauna hangaa-ngaa mantódihá kapári nodo to rapamagasaꞌ hai api. 50Bure mobunduꞌ ntepuꞌu. Agáiáná ane matáweá miꞌi, peisá paꞌi rapamabure huleꞌ? Noꞌonoꞌ woꞌo, kómu to meuláꞌ i Kódóꞌ hangaa-ngaa mobunduꞌkou oaꞌ nodo bure. Lempóna, ineeꞌ nipatodáhi pepoináláimi mewaliꞌ maledeꞌ, hai hangaa-ngaa mohintuwuꞌkou oaꞌ hadua hai hadua.”

Currently Selected:

Marakusi 9: NTBEP

Highlight

Copy