Marakusi 10
10
Iesu mampolaluita ádá pohamboko hai ádá pogááꞌ
(Mat. 19:1-9)
1Iesu hai topeguruNa pohuꞌmoheꞌ mopálehi wánuá Kapenau#10:1 Básá Marakusi 9:33. laoheꞌ i tampoꞌ Iudá, agáiáná moliuheꞌ i tampoꞌ to ara tándáꞌ i hambali uwai Iarade.#10:1 ToIahudiꞌ tiꞌara mohintuwuꞌ hai toSamaria, mewaliꞌ ane toIahudiꞌ lao hangko i tampoꞌ Galilea haweꞌ i tampoꞌ Iudá, biásá rongkaniheꞌ mengkalimba i uwai Iarade. (Peita peta.) Handaꞌ ntepuꞌu tauna to haweꞌ motolelingi Iesu, hai Ia mopaturoꞌheꞌ nodo biásána. 2Araheꞌ bahangapa toParisi to haweꞌ mampeliꞌ kamanawoꞌána Iesu. Mewaliꞌ mekuneꞌheꞌ, “Mouláꞌ áturá ágámántaꞌ, peisá paꞌi tobaleilo mampogááka toinána?”#10:2 Araheꞌ toIahudiꞌ to mampekiri hampákáꞌ peá álásá tobaleilo peisá mogááꞌ hai toinána, ia miꞌi ane toinána mebualosi. Araheꞌ woꞌo to mampekiri peisáheꞌ mogááꞌ ane mampopengaa álásá, rápáꞌna, ane toti pandeꞌna. ToParisi mohárungá ara tauna to ina mosalaꞌi Iesu ánti pehániꞌNa, agáiáná Iesu mopakanótóáheꞌ apa tunggáiána Pueꞌ Ala i katoꞌu-toꞌuána.
3Nauliꞌ Iesu, “Párentá apa to naweꞌikou nabiꞌ Musa?”
4Rahániki toParisi, “Musa mopaliu tobaleilo mampogááka toinána, asalaꞌ nabábehi sieruꞌ sura pogááꞌ.”#10:4 Básá Pohuleki 24:1-4.
5Nauliꞌ Iesu, “Musa moukiꞌ párentá iti ánti kamatuꞌana lalumi. 6Agáiáná hangko i pewaliꞌána duniáꞌ, nodo to teukiꞌ i lalu Sura Magasaꞌ: ‘I tempóna Pueꞌ Ala mampopewaliꞌ tauna, Ia mampopewaliꞌheꞌ tobaleilo hai towawine.#10:6 Básá Pewaliꞌána 1:27; 5:1-2. I toIahudiꞌ, ane ara rombuaꞌ wátiꞌ to montaniꞌ lempóna, to rapaioru ia miꞌi wátiꞌ to sae ntepuꞌu. Mewaliꞌ ina rapokana pehániꞌna Iesu láwiꞌ Napakeꞌ wátiꞌ hangko i Pewaliꞌána. 7Onoꞌ miꞌi haneꞌi hadua tobaleilo hangaa-ngaa mopálehi umána hai inána, haneꞌi tueꞌ hingkakani hai toinána, 8bona to rodua iti mewaliꞌheꞌ hawátá-wátá.’#10:7-8 Básá Pewaliꞌána 2:24. Mewaliꞌ, i peitána Pueꞌ Ala, tohamboko tiꞌarapoheꞌ rodua, agáiáná mewaliꞌmoheꞌ nodo to hadua. 9Onoꞌ miꞌi haneꞌi Kuhángáꞌáꞌákou, heáná to napahintuwuꞌ miꞌi Pueꞌ Ala, tiꞌara mpuꞌu peisá napopogááꞌ tauna.”
10Roo onoꞌ, Iesu hai topeguruNa mesuaꞌheꞌ i lalu támbi. Tangaꞌraꞌ ionoꞌ, mekuneꞌ wopaheꞌ topeguruNa i Hia kana i ádá pogááꞌ.
11Nahángáꞌáheꞌ Iesu, “Tobaleilo to mampogááka toinána hai mampotoina towawine to ntániꞌna, lempóna mobualosi toinána to rungu-runguna. 12Noꞌonoꞌ woꞌo towawine to mampogááka toámána haneꞌi mohamboko wopiꞌi hai tobaleilo ntániꞌna, ia woꞌo mobualosi toámána to rungu-runguna.”#10:12 Pueꞌ Ala mokáhihiꞌ pogááꞌ. Básá Maleaki 2:16.
Iesu mowátiꞌ ánángkóiꞌ
(Mat. 19:13-15; Luk. 18:15-17)
13Hangkani tempó, araheꞌ tauna to moánti ánáꞌraꞌ i Iesu bona Napekamaꞌheꞌ hai Nawátiꞌheꞌ. Agáiáná topeguruNa mokámbáróáheꞌ tauna iti. 14Kanaitána Iesu apa to rabábehi topeguruNa, Nakabukoꞌiheꞌ, Nauliꞌ, “Nipatodáhimoheꞌ ánángkóiꞌ iti mai i Kódóꞌ. Ineeꞌheꞌ nikóntó, láwiꞌ tauna to nodo ánángkóiꞌ deꞌe ina mewaliꞌheꞌ taunána Pueꞌ Ala i lalu popárentáNa. 15Toꞌu ntepuꞌu laluitaNgkuꞌ deꞌe: Pueꞌ Ala ina mepárentá i laluraꞌ tauna to mopaisarenga katueꞌraꞌ i Hia, nodo ánángkóiꞌ to mopaisarenga katueꞌna i tosaena.”#10:15 Popárentána Pueꞌ Ala mewaliꞌ deꞌe-deꞌe láwiꞌ Ia mepárentá i laluntaꞌ, hai ina mewaliꞌ láwiꞌ Ia ina mepárentá i surugáꞌ duuꞌna i rue-ruena. 16KarooNa molaluita noꞌonoꞌ, Nakápuimoheꞌ ánángkóiꞌ iti, Napágá wuáꞌraꞌ haneꞌiheꞌ Nawátiꞌ.
Maꞌángkárá ntepuꞌu topebuku mewaliꞌ taunána Pueꞌ Ala
(Mat. 19:16-26; Luk. 18:18-27)
17Kaꞌina pohuꞌna Iesu hai topeguruNa mopaliliu polumaoraꞌ, haweꞌ wopiꞌi hadua tauna to melangka lao i Iesu. Liliu molingkudu i bitiNa haneꞌi mekuneꞌ, nauliꞌ, “Guru to maroꞌa. Apa to hangaa-ngaa kubábehi bona molámbiꞌaꞌ katueꞌ to maroꞌa to tiꞌara mokahópóꞌá?”
18Nauliꞌ Iesu, “Moapa riꞌi haneꞌi nuꞌuliꞌ Kódóꞌ deꞌe tauna to maroꞌaꞌAꞌ? Tiꞌara ara hadua tauna to maroꞌa, bateꞌna peá Pueꞌ Ala. 19{Agáiáná ina Kuhániki pekuneꞌmu.} Nuisá miꞌi hawaꞌ to teukiꞌ i lalu Hawaꞌna Musa: ‘Ineeꞌ mepapate, ineeꞌ mebualosi, ineeꞌ manako, ineeꞌ mosabiki dongkoꞌ, ineeꞌ mebagiuꞌ, hai nubiláꞌ inámu hai umámu.’ ”#10:19 Básá Pesuwuꞌá 20:12-16. Ara hampákáꞌ hawaꞌ to tiꞌara nakábelái Iesu, láwiꞌ Naisá tauna iti tetakaꞌ i párewána. (Básá Pesuwuꞌá 20:17.)
20Nauliꞌ tauna iti, “Guru. Upu-upu hawaꞌ iti, ambiꞌna miꞌi kupeuláꞌi hangko i kamaleheꞌkuꞌ mani.”
21Agáiáná Iesu mampeita tauna iti hai Napokaꞌahiꞌ ntepuꞌu, onoꞌ miꞌi haneꞌi Nahángáꞌá, “Ara mani hampákáꞌ to hangaa-ngaa nubábehi. Mesuleꞌmokoꞌ sieruꞌ mampobaluꞌ párewámu, hai dóiꞌ hólóna nugáláꞌ-gáláꞌáheꞌ tauna to meahiahiꞌ tueꞌraꞌ.#10:21 nugáláꞌ-gáláꞌáheꞌ tauna to meahiahiꞌ tueꞌraꞌ: Hawaꞌ iti tiꞌara paraluu rapeuláꞌi upu-upu tauna to pebuku. Naisá miꞌi Iesu, tauna iti moundeꞌ morámpu párewá, tiꞌara pohintuwuꞌna hai Pueꞌ Ala to napaioru, mole iti riꞌi to hangaa-ngaa tapekiri oaꞌ. Básá woꞌo Pilipi 3:6. Ane nubábehiꞌi noꞌonoꞌ, ina mahile háwángina to nulámbiꞌ i lalu surugáꞌ. Roo onoꞌ, maimokoꞌ meuláꞌ i Kódóꞌ.”
22Kanahádina tauna to pebuku iti laluitana Iesu, masusa laluna haneꞌi pohuꞌ, láwiꞌ handaꞌ ntepuꞌu tampoꞌna hai párewána.
23Iesu motótói topeguruNa to meángkáꞌheꞌ mantoleli, haneꞌi Nahángáꞌáheꞌ, “Maꞌángkárá ntepuꞌu tauna to pebuku mewaliꞌ taunána Pueꞌ Ala i lalu popárentáNa.”#10:23 mewaliꞌ taunána Pueꞌ Ala i lalu popárentáNa - Ara bahangapa lempóna: “mengkoruꞌ i Pueꞌ Ala”, ba “molámbiꞌ katueꞌ to maroꞌa to tiꞌara mokahópóꞌá” ba “mesuaꞌ i surugáꞌ”. 24Rapotingkáráꞌ topeguruNa mohádi laluitaNa iti {láwiꞌ rapekiri tauna mewaliꞌ topebuku ánti pewátiꞌna Pueꞌ Ala},#10:24 Básá Sura Petóiá 128; Sura Paturoꞌ 10:22. mewaliꞌ Nahángáꞌá wopaheꞌ Iesu, “ÁnáꞌKuꞌ, maꞌángkárá ntepuꞌu mewaliꞌ taunána Pueꞌ Ala i lalu popárentáNa. 25Madoli mani hambaꞌa untá mesuaꞌ i lalu kalolu daru, haneꞌi topebuku mewaliꞌ taunána Pueꞌ Ala i lalu popárentáNa.”
26Karahádina peá topeguruNa laluitana Iesu, rapotingkáráꞌ ntepuꞌu haneꞌi rauliꞌ, “Ee! Ane maꞌángkárá tauna to pebuku mewaliꞌ taunána Pueꞌ Ala, apa mani tauna ntániꞌna! Heáná paꞌi to nabuku molámbiꞌ katueꞌ to maroꞌa to tiꞌara mokahópóꞌá?”#10:26 molámbiꞌ katueꞌ to maroꞌa to tiꞌara mokahópóꞌá - I lalu básá Iunani: rahómpóki. Handaꞌ laluita to hibali lempóna. Rápáꞌna, básá to teukiꞌ i wóiꞌna wátiꞌna ka-23.
27Natótóiheꞌ Iesu haneꞌi Nauliꞌ, “Tiꞌara ara to peisá nabábehi tauna bona mewaliꞌheꞌ taunána Pueꞌ Ala. Agáiáná Pueꞌ Ala peá to peisá mohómpóki dósá tauna, láwiꞌ upu-upuna Nabuku Nabábehi.”
28Mekuneꞌ miꞌi Peturuꞌ, nauliꞌ, “Noumbámongkaiꞌ? Kipálehi miꞌi hinángkáꞌna bona meuláꞌangkaiꞌ i Hio.”
29Nauliꞌ Iesu, “Bona niꞌisá: heáná to mopálehi halaluna, inána ba umána, ánáꞌna ba támbina, ba hinoena, ánti peuláꞌna i Kódóꞌ hai ánti Ngkóráꞌ Marasa, 30bateꞌna ina molámbiꞌ háwángina to mahile. I duniáꞌ deꞌe ia ina molámbiꞌ hangatu kánina kahandaꞌna támbina, halaluna, inána, ánáꞌna, hinoena,#10:30 Pueꞌ Ala mowátiꞌkeꞌ noꞌonoꞌ moliu pohintuwuꞌtaꞌ hai toSarani ntániꞌna. Rápáꞌna, básá Marakusi 3:31-35; Suro 2:44-45; 4:32-37; Roma 16:13; 1 Timotiu 5:1-2. hai ina molámbiꞌ woꞌo pepopeahiahiꞌ. Agáiáná i alo to ina haweꞌ, bateꞌna ina molámbiꞌ katueꞌ to maroꞌa to tiꞌara mokahópóꞌá. 31Handaꞌ tauna to tepaioruá miꞌi tueꞌraꞌ deꞌe-deꞌe, ina mewaliꞌ to tepaibókóka i alo to ina haweꞌ. Hai handaꞌ woꞌo tauna to tepaibókóka tueꞌraꞌ deꞌe-deꞌe, ina mewaliꞌ to tepaioruá i alo to ina haweꞌ.”#10:31 To natunggái Iesu, topeguruNa ina molámbiꞌheꞌ katueꞌ to maroꞌa to tiꞌara mokahópóꞌá. Hira topopeká hai toperóróꞌ ásele, to rarekeꞌ tauna to i wóiꞌ tueꞌraꞌ. Agáiáná ina mewaliꞌheꞌ to tepaioruá. Agáiáná tauna to rarekeꞌ to i reá nodo topebuku iti, ina tepaibókóka, lempóna: tiꞌaraheꞌ ina molámbiꞌ katueꞌ to maroꞌa to tiꞌara mokahópóꞌá, ane tiꞌaraheꞌ mehárungá i Pueꞌ Ala.
Iesu mampolaluita wopiꞌi kana i kaꞌina mateNa
(Mat. 20:17-19; Luk. 18:31-34)
32Iesu hai topeguruNa mopaliliu polumaoraꞌ lao i Ierusale, hai tempó iti, Iesu molumao ioru {láwiꞌ nodo to rapahumpeꞌ}.#10:32 Iesu molumao ioru: Iesu biásá molumao hingkakani hai tauna, agáiáná deꞌe-deꞌe Ia molumao ioru láwiꞌ Naisá kaꞌina mateNa i Ierusale, hai Natunggái lao ionoꞌ. Básá Lukasi 9:51. Básá woꞌo Iesaia 50:7. Tingkáráꞌheꞌ topeguruNa, hai tauna to handaꞌ to meuláꞌ i bókóꞌ malááꞌheꞌ.#10:32 Tiꞌara teukiꞌ álásáraꞌ topeguruna Iesu rapotingkáráꞌ, ba tauna ntániꞌna malááꞌ. Babilaꞌ Iesu maniiꞌ-niiꞌ mampekiri upu-upu to ina mewaliꞌ i Hai, ba rapekiri topeguruNa tiꞌara maroꞌa ane Iesu lao i Ierusale, láwiꞌ raisá tadulako-tadulakoraꞌ toIahudiꞌ moewaꞌ Iesu. Nakióꞌ wopaheꞌ Iesu topeguruNa to hampuloꞌ hai rodua Napataniꞌheꞌ haneꞌi Napahaweꞌáheꞌ apa to hangaa-ngaa ina mewaliꞌ i Hia. 33Nauliꞌ, “Nipehádingi maroꞌa! Deꞌe-deꞌe, tangaꞌtaꞌ lao i Ierusale. Ionoꞌ miꞌi Ánáꞌ Mánusiá ina rahuhuꞌ i kapalaꞌ-kapalaꞌ tadulako menómbá hai guru-guru agama, hai ina rabutusi bona rahuku mate. Roo onoꞌ, ina rahuhuꞌ i tauna to tiꞌaraheꞌ toIahudiꞌ. 34Ina rapopohalaꞌ-halaꞌ, ratitinuduhi, rahepe hai gulaꞌ, haneꞌi rapapate. Agáiáná i katáluna alona, Ia ina tueꞌ huleꞌ.”
Tauna to mengkaiwóiꞌ, hira miꞌi to mahile tueꞌraꞌ i peitána Pueꞌ Ala
(Mat. 20:20-28)
35Iakobu hai Iohane ánáꞌna Sebedeu laomoheꞌ mengkahungkuꞌ i Iesu, haneꞌi rauliꞌ, “Guru. Ara hampákáꞌ to kipoinao kipembiáꞌ i Hio.”
36Nauliꞌ Iesu, “Apa to nipembiáꞌ i Kódóꞌ?”
37Rahániki, “Ane mewaliꞌKoꞌ Datu to meawaꞌ, Nupaliuangkaiꞌ mehoda hai mepárentá hingkakani hai Io, hadua tándáꞌ i kuánáMu, hadua tándáꞌ i kabeoꞌMu.”#10:37 Topeguruna Iesu tiꞌara mani moisá tunggáiána Iesu lao i Ierusale. Pekiriraꞌ pekiri ngkáduniáꞌ mani. (Básá woꞌo Marakusi 8:32; 9:32; 10:35-37.)
38Nahángáꞌáheꞌ Iesu, “Kómu, tiꞌara niꞌisá apa to nipembiáꞌ. Nibuku paꞌi mantódihá kapári to hangaa-ngaa Kutódihá? Nibuku paꞌi mantódihá to ina Kutódihá?”#10:38 Nibuku paꞌi mantódihá kapári to ina Kutódihá? - I lalu básá Iunani: Nibuku paꞌi mainu hangko i mangku to hangaa-ngaa Kupainui? Hibali lempóna hai: Nibuku paꞌi rariu hai periuNgkuꞌ?
39Rahániki Iakobu hai Iohane, “Kibuku!”#10:39 Tiꞌara raisá Iakobu hai Iohane apa to natunggái Iesu. Iakobu ina rabóhóki tambólóna i Ierusale (básá Suro 12:2), hai Iohane ina marue ratarungku i puló Patmos. (Básá Pampetudeꞌá 1:9.)
Nauliꞌ Iesu, “Toꞌu, hangaa-ngaa nitódihá kapári nodo to ina Kutódihá. 40Agáiáná tiꞌara Kódóꞌ to mopakanótó heáná to ina mehoda tándáꞌ i kuánáNgkuꞌ hai heáná tándáꞌ i kabeoꞌKuꞌ. Pueꞌ Ala riꞌi to ina mopakanótó heáná tauna to ina mehoda ionoꞌ.”
41I karahádina topeguruNa to hampuloꞌ pembiáꞌraꞌ Iakobu hai Iohane iti, mabukoꞌmoheꞌ, 42Onoꞌ miꞌi haneꞌi Iesu mokióꞌ upu-upu topeguruNa, Nahángáꞌáheꞌ, “Niꞌisánto tauna to tiꞌara moisá Pueꞌ Ala, masodoheꞌ ane mopárentá tauna, hai tauna to mapángkáꞌ lántiꞌraꞌ iti pakaheꞌ mopasimbuku tauna bona mampeuláꞌi hawaꞌraꞌ. 43Agáiáná kómu, ineeꞌkou noꞌonoꞌ! Heáná to mampoinao bona i reá tueꞌna, hangaa-ngaa mewaliꞌ sieruꞌ hadua topekádipurá. 44Hai heáná to mampoinao bona tepaioruá, hangaa-ngaa mewaliꞌ sieruꞌ hawiꞌ i upu-upu tauna. 45Mogalo woꞌo Ánáꞌ Mánusiá mai i duniáꞌ deꞌe tiꞌara mewaliꞌ topohawaꞌ, agáiáná bona mewaliꞌ hawiꞌ, hai ina mohuhuꞌ wátáNa rapapate bona handaꞌ tauna peisá Nahómpóki hangko i huku dósáraꞌ.”#10:45 Wátiꞌ iti ntóáꞌna surana Marakusi.
Iesu mopakauriꞌ Batimeu
(Mat. 20:29-34; Luk. 18:35-43)
46I polumaoraꞌ lao i Ierusale, Iesu hai topeguruNa haweꞌheꞌ i kótá Ieriko.#10:46 kótá Ieriko: telámbiꞌ rekeꞌ-rekeꞌna uwalu kilómete tándáꞌ i katámpuá alo hangko i uwai Iarade, hai rompuloꞌ hai iba kilómete i wongko tándáꞌ i mata alo hangko i Ierusale. Kapohuꞌraꞌ hangko i kótá iti, handaꞌ tauna meuláꞌ i hira.#10:46 Laoheꞌ woꞌo i Ierusale bona mamposusaiheꞌ Posusa Paska. I wiwi rárá, mehoda hadua tauna to bilo topembiáꞌ-mbiáꞌ. Hangaꞌna Batimeu, lempóna: ánáꞌna Timeu. 47Kanahádina Batimeu Iesu toNasare moliu, mekióꞌ-kióꞌ miꞌi, nauliꞌ, “Iesu, pemuleꞌána Datu Daudiꞌ!#10:47 pemuleꞌána Datu Daudiꞌ: Laluita iti molempónga toMásehi, ba Datu Topehómpóꞌ láwiꞌ ara miꞌi to nadándi Pueꞌ Ala to ina mopárentái kadatuána Datu Daudiꞌ haweꞌ i rue-ruena. Básá to teukiꞌ i Kahirámpuá Laluita. Nupokaꞌahiꞌaꞌ, wongkódóꞌá!”
48Handaꞌ tauna mokabukoꞌi, rauliꞌ, “Maniiꞌkoꞌ!”
Agáiáná tobilo iti mekióꞌ-kióꞌ peá napasimbuku, nauliꞌ, “Pemuleꞌána Datu Daudiꞌ, Nupokaꞌahiꞌaꞌ wongkódóꞌá!”
49Mengkaroo miꞌi Iesu, Nauliꞌ, “Nikióꞌ mai!”
Rakióꞌ mpuꞌu miꞌi tobilo iti haneꞌi rahángáꞌá, “Nupatinda lalumu! Meángkáꞌmokoꞌ, láwiꞌ Nakióꞌmokoꞌ!”
50Meángkáꞌ miꞌi tobilo iti, mowálentáha kumbána, haneꞌi manggagu lao i Iesu. 51Napekuneꞌ Iesu i hia, “Apa to nuꞌundeꞌ Kubábehi i hio?”
Nahániki tobilo iti, “Guru. Kuꞌundeꞌ bona meitaꞌaꞌ!”
52Nauliꞌ Iesu, “Laomokoꞌ, láwiꞌ ánti pepoináláimu i Kódóꞌ haneꞌikoꞌ mauriꞌ!” Ia kásáliu meita, haneꞌi meuláꞌ i Iesu.
Currently Selected:
Marakusi 10: NTBEP
Highlight
Share
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
