LUKAS 13

1Era bare takaam, owe, atakam, Yesus aesimtamesen. “Galilea owe, pak, Allah ataetiitames ere, Pilatus, era owe atatiie.” Emes atakam aesimesen. 2Yesus arawa, “Tabimak binip ere, ‘Galilea owe, dosa daytu, wanam wan Galilea owe dosa daytu apok. Erarawa era owe emes ajirisemes.’ Tare emes bimak binip atetarammakam apaye? 3Baporay! Emes apok. Tare dosa bamakem apok aemtakam, ere tanom takes emes taka atatiiteman. 4Wanam, era Siloam oupnak tame andaepurimomse, owe 18 andaetamesteteresen. Me tabimak binip ere, ‘Era owe dosa daytu, wanam wan Yerusalem owe dosa daytu apok.’ Tare emes bimak binip atetarammakam apaye? 5Baporay! Emes apok. Tare dosa bamakem apok aemtakam, ere tanom takes emes taka akamiamestemakam.” Yesus emes atakam aesimen.

Eek bapeomtep apok wus baetaa atakam

6Yesus arawa, emes baetaa atakam akoretame. “Jipit taka wus juas ‘ara’ aemomen. Era wus aanggur kebun waut aememen. Era bare, armat ipit era wus, eek apaye basiepor andaen. Era wus ere, eek apoknak aporen. 7Armat ipit arawa, atakam, era anggur kebun karai baetam ipit, akoromen. ‘Baporey! Tahun bamintep, dere era wus juas ‘ara’, eek ape basiepor, andaea ajio. Me, eek apoknak apora ajio. Era wus ere, bambi apa ememomem? Bamatiiey,’ Emes atakam aesimen. 8Era kebun karai baetam ipit ere, ‘Dot! Era wus, ara tahun taka, emes baememporto. Dere era wuspu wapose ato batakamdanaesumtii. Denom, era wus bajaorom pak, era wus bapanpu ato batakamtaetii. 9Era ajinaoto tahun, eek apeomtepto, ere akot are. Me, eek bapeomtep apok aemto, bamatiitas.’ Emes atakam aesimen.” Yesus emes baetaa atakam akoretamen.

Yesus, asemak sait taot, Yahudi Owe Samayen Bare ajaoromtaere atakam

10Emesare, Yahudi Owe Samayen Bare ere, Yesus Yahudi owe samayen tame bomon atakam aememtamen. 11Era asan ere, taot taka aemapen. Bii era taot tahun 18 aemomaaririn. Me biiam era taot asan pota aemapomaaririn. Erarawa are asemak saitnak. Are imtuu baemewasit asan apok. 12Emesare, Yesus era taot aporen. Are era taot ajaten. Ajaterawa, atakam akoromen. “Wore asan pota baemap apok.” Emes atakam aesimen. 13Armat Ipitam ban era taot damo ten ataetiien. Era taot arawa, imtuu ametewasiemen. Are Allah tere aeomen. 14Me Yahudi owe samayen tame kapar ipit ere, jak ambap apumapen. Are Yesus era asan pota taot, Yahudi Owe Samayen Bare, damo ajaoromtaere aporen. Are atakam era asan aememes owe tanane akoromen. “Karai bare, ere poman ban taka. Tare damo bajaorom, era bare poman ban taka andaeay. Tare ere, Yahudi owe Samayen Bare damo bajaorom bandae bas.” Emes atakam aesimen. 15Tuhan arawa, atakam era ipit akoromen. “Pir bae owee! Yahudi Owe Samayen Bare ere, tare takes, tasapi apaye, takeledai apaye, tima pak asusurumteteremakam. Tanom binatang tasan atoomjisemakam. Are bwi bandam atoomdaeemakam. 16Ara aemema taot, ere Abraham wurpis. Bii Kapar Ipit ere, ara taot tahun 18 Ajikapaarir. Emesare, Dere ara taot Yahudi Owe Samayen Bare asurumtammin.” Emes atakam aesimen. 17Emes atakam akore ere, era atakam ajamkorames owe takes, damke akemesen. Emesare, owe takesam Yesus akotnak aeme pak apores, wanam jak akot aememesen.

Kutukoser eek baetaa atakam

(Mat. 13:31-32; Mrk. 4:30-32)

18Armat Ipit arawa, atakam akoren. “Allah owe aobaomep awar wama pakem? Dere Allah owe aobaomep awar pak, wama atakam okoretey? 19Are kutukoser eek awar. Jipit taka era eek ataerto, wanam akebun ajapomto, ere akene ajittem. Anom wus daytu ajitemtem. Sakaoam to era kem aetemas.” Emes atakam aesimen.

Roti eek baetaa atakam

(Mat. 13:33)

20Armat Ipit arawa, atakam akoren. “Dere Allah owe aobaomep awar, wama tamen pak okoretey? 21Are roti eek awar. Taot taka roti eek ataeren. Are tepung daytu ataeren. Ararawa, era roti eek anama tepung takan ambetemtiien. Erarawa era tepung takes apepepietemeten.” Yesus emes atakam aesimen.

Sata Jimsap atakam

(Mat. 7:13-14, 21-23)

22Emesare. Yesus Yerusalem bin ajiemen. Are era waut kotaiin ajarema ajaien. Are samaniin samaniin tamsan ajarema ajaien. Are era owe atakam aememtama ajaien. 23Jipit takaam Armat Ipit ajateporen. “Tuhan! Era ajoremtas owe, janderes ape?” Emes atakam aesimen. Armat Ipit arawa, atakam era owe akoromen. 24“Era satu jimsap bajii, jati daytu aeeay. Emesare, tanom deatakam jane pajiay. Owe tanane era jimsap bajii aempormas apok. 25Tame armat ipit awasitto, wanam era jimsap akapimapomto, tare era tasan aememtemakam. Tanom era jimsap akokomtemakam, wanam atakam akoromtemakam. ‘Dot! Era jimsap dara paimtamaro.’ Emes atakam aesimtemakam. Armat ipit ere, atep ajitteman. ‘Tare demsam apok. Tare ete asana ajinaomakam?’ Emes atakam aesimteman. 26Tararawa, ‘Dare amos anama bwi wore takan etedom. Wonom atakam datapirmi ateememtamem.’ Emes atakam aesimtemakam. 27Armat ipit ere, atakam tara aokoromteman. ‘Tare ere, demsam apok. Tare dosa baemaar owe, tarare. Tanom doememtey asan baemem bas. Tanom baesosay.’ Emes atakam aesimteman. 28Era bare tare Abrahamam, Ishakam, Yakubam, Allah atakam bakoretam owe takesam, Allah Ai Tapirmi baemap aportemakam. Me, Allah tare tasane ambirimjisimteman. Emes aportakam, tare bate ambatetemakam. Tanom damo jende atawuomtemakam. 29Owe, era tapirmiin tapirmiin aejinaotemas. Are Allah Ai Tapirmi, amos banda andaepakiaptemas. 30Baporay! Wan juas apok owe, juas aptam owe aoememtemas. Wan juas aptam oweam, juas apok owe aoememtemas.” Yesus emes atakam aesimen.

Yesus Yerusalem owe aemaaris pak, jak pota aememe atakam

(Mat. 23:27-39)

31Emesare. Era bare taka, Parisi owe, Yesuspu ambaromes, wanam atakam, Armat Ipit akoromesen. “Wore wan asan aesosey. Are asan baemem bas. Herodes, Wora batatiien.” Emes atakam aesimesen. 32Yesus arawa, atakam era owe akoromen. “Tare era boreni ipit aesosay. Tare deatakam era potet batutum ipit aesimtamay. ‘Yesusam, “Dere waaam, toam, owe jak bomon bii ambirimjisimtemin. Denom damo pota owe ajaoromtaertemin. Joon ere, dekarai pak aetiikoromtemin.” Emes atakam aesima.’ Emes atakam armat ipit aesimtamani. 33Emesare, Dere waaam, toam, joonam, aoesostemin. Owe, Allah atakam bakoretam ipit wan asan batatii bas. Yerusalem taka are.

34Yerusalem owee! Allah aatakam bakoretam owe tara ambirimema ajaie. Tare ere, era owe atatiia ajimakam. Tanom eka era owe asampirima ajimakam. Ajomo arsoot ajii era jaro bomon ajanimapomum. Denom bare tanane tarereis emes tamen bajanimapom jak aseseroma ajaio. Tararawa, emes pota ajiekem. 35Emesare, Allah tara bojamemem apok aemtem. Asep bare tare atakam akoretemakam. ‘Tuhan, asan akot, aotaendaemmar Ipit baemto!’ Emes atakam aesimtemakam. Tare ere, era bare ajiire debi bopor apok aemtemakam. Yesus emes atakam aesimen.”

Currently Selected:

LUKAS 13: LAIASC

Highlight

Copy