LUKAS 12

Pir bae owe atakam

(Mat. 10:26-27)

1Era pak aemes ere, owe tananenak ajarisiemesen. Are bai armamon ajamjipipiramesen. Yesusam atakam abajamkai owe, bonak akoromen. “Tare era Parisi owe aroti eek turuar. Era owe pir aemas pak, ere roti eek tamen are. 2Emesare, owe batukumtii pak takes baso aoportemas. Oweam era tiruu atakam takes jane ajiekoromtemas. 3Are era jiiti damon akorekem atakam, jokam jane aojitemas. Oweam, era kamar bomon tiruu atakam akorekem, era ajarisiaptas owe bipu atakam aofaketaatemas.”

Dare ombare wama owe bartam atakam

(Mat. 10:28-31)

4“Ara aemapakam owee! Baporay! Asamot owe, owe atatiitemas. Me, are owe atatiitas, are era owe baemeojurusum asan apok. Emesare, tare asamot owe ombare bas. 5Dere ere, tare ombare bamar Ipit atakam tara akorommin. Era Ipit owe atatiito, Are era owe neraka bomon bakoromtukum fiak pak aptam. Atakamnak tara akoretammin. Era Ipit ombare ambaray. 6Owe iri sakao koser ban taka, uang sen jamnuknak ajitinemas. Allah ere, era sakao takes bimak binip bajanimem apoknak aemum. 7Allah, takuus fini bajititimar tair. Emesare, tare ombare bas. Tare anakotnak. Me sakao tanane ere, anakot apok.”

Yesus atakam, owe bipu bakore atakam

(Mat. 10:32-33, 12:32, 10:19-20)

8“Baporay! Owe wan owe bipu atakam akoretas apaye, ‘Dere Yesus bajamkai,’ emes atakam aesimtas apaye, ere Asamot Anakot Ajaoreme Ipit, Allah amalaikat tanane bipu atakam akoretem. ‘Ara owe dos,’ emes atakam aesimtem. 9Me, owe wan owe bipu atakam akoretas apaye, ‘Yesus demsam apok,’ emes atakam aesimtas apaye, ere denom Allah amalaikat tanane bipu atakam akoretemin, ‘Ara owe dos apok,’ emes atakam aesimtemin. 10Owe, Asamot Anakot Ajaoreme Ipit atakam pota akoromtas, Allah era dosa bimak binip ajanimemtamtem. Me, owe tame atakam Allah Jip akoromtas, ere Allah era dosa bimak binip bajanimemtam apoknak aemtem. 11Owe, tare tasamayen tame bomon atakam basakamtii owe bipu apaye, kapar owe bipu apaye, owe aomepmas owe bipu apaye, atatapimtaatan, era atep ajittakam atakam, bimak binip jirao bas. Era atakam akoretakam pakam, bimak binip jirao bas. 12Me Allah Jip ere, era bare taka, era akoretakam atakam, bimak binip tara aememtamteman.” Yesus emes atakam aesimen.

Pak daytu ipit jandakor aememe atakam

13Emesare. Era owe tanane bomon, jipit taka, atakam, Yesus akoromen. “Guru! Derepot, daritipit dambir aeme beken ajiamse pak, sai dera basaietam, atakam basakamtamey.” Emes atakam aesimen. 14Yesus ere, atakam era ipit, akoromen. “Dere taatakam basakamtii ipit anama tapak basai ipit, tao taemoman?” Emes atakam aesimen. 15Yesus arawa, atakam era owe aokoromen. “Turuar! Pak senomemtakam. Pak daytu baemomem, ere, era pak armat ipit owe jiine baememaar pak apok.” Emes atakam aesimen. 16Ere, Armat Ipit baetaa atakam era owe akoretamen. “Jipit taka pak tananenaken. Are akebun pak daytinaken. 17Armat ipit arawa, bimak binipam atetaramen. ‘Dere wama pak emtey? Dekebun pak bataapom tame, ere daytu apok.’ Emes bimak binip atetaramen. 18Armat ipit arawa, atakam akoren. ‘Dere depak bataapom tame takes atietiitemin. Derarawa tame daytu tanane aoeapomtemin. Ere, dere degandum eek takesam, depakam, era tame bomon ataapomtemin. 19Era pak aemkoromterawa, dere dejak bomon atakam akoretemin. “Dere pak tanane. Era pak tahuniin aemompaartemin. Emesare, dere kais andaartemin. Dere amos anama bwi bambi andaartemin. Denom jak akot aemapaartemin.” Emes atakam aesimtemin.’ Era ipit emes atakam aesimen. 20Allah ere, atakam era ipit akoromen. ‘Wore bimak binip apok ipit. Waa eam ere, wore dambir aemtemarem. Era akenemaarim pak, tao taettas?’ Emes atakam aesimen. 21Emesare, wan owe apak tanane aemomemmas. Me, are Allah era akot apormar pak tanane baemomem apok. Emes owe, era baetaa atakam akoremin atakam awar aemmas.” Yesus emes atakam aesimen.

Allah jiirey baeem atakam

(Mat. 6:25-34)

22Yesus arawa, atakam abajamkai owe aokoromen. “Emesare, tanom baporay! Era andetakam banda pak, tare jafer baemem pak erare. Me, era andetakam pak, bimak binip jirao bas. Tanom tadamo ajiimomemtakam pakaian, bimak binip jirao bas.

23Jatiaptam baemem, ere anakotnak pak erare. Banda pak ere anakotnak pak apok. Asamot damo, ere anakotnak. Pakaian ere, anakotnak pak apok. 24Me sakao juas irmi baporay. Are pak akene bajapom apok. Are amos bajow apok. Are pak bataapom tame apaye, wan pak tame apaye, ere apok. Allah ere, pak era sakao atetamum. Emesare, tare anakotnak. Me sakao ere, anakotnak apok. 25Owe, pak bimak binip jirao atetaramtas apaye, are adambir aemtas bare, bare takakope baemeotasimem asan apok. 26Tare era kosernak pak baemeem asan apok apormakam apaye, tare ere wan pak wama bimak binip jirao tetarammakam? 27Tanom era taar esakam banamek bapeomeporay. Are karai apok. Are pakaian bakekem apok. Tare ere, raja Salomo banamek bapeomeporay, Are akotnak pak tanane aemomen. Armat ipit ere, pakaian era taar esakam emes akotnak tamen, bajiimomem apoknaken. 28Emesare, era wasen pak, waa aemanses. Asep barerawa, owe era pak jisimak ambomtiitemas. Allah ere, era pak akotnak aemapome. Emesare, Armat Ipit pakaian tara atetamteman— tare Dera bamesem apok oweam are. 29Tanom era andetakam pak bimak binip daytu bas. Tanom era pak jak pota bas. 30Me Allah amsam apok owe takes, era pak bimak binip daytu atetaramemas. Emesare, Taritipit era andetakam pak takesam, era ajiimomemtakam pakaian takesam, ere amsam. 31Tare ere, Allah tara baomep bimak binip daytu atetaramay. Allah rawa, wan pak takes tara atetamteman.”

Pak Surga oup bajaresisim atakam

(Mat. 6:19-21)

32Me Dera ajamkaimankum owe bamintepe! Ombare bas. Taritipit aobaomep tapirmi akot pak, tara batetam akoten. 33Tare tapak, uang buumtaetay. Tare era uang arawa, era asan pota owe atetamay. Tanom tajiine aptam uang ese tamen asieteteray. Me taanakot pak, Surga oup tame ataapomteteray. Me pak baemepakapios asan apok. Wosom oweam era pak setep baemebesem asan apok. Penamam era pak baemesesakam asan apok. 34Emesare, tare tapak bataapom asan, tajak anom era asan aemapmakam.

Banamek basirapaar atakam

35“Tanom banamek asirapaaray. Me pakaianam emes ajiimomaaray. Me tapelitaam emes basaramapaartas. 36Tanom bambi karai baetam owe emes tamen aememaaray. Era bambi karai baetam owe akarai armat ipit ooreysai pakambwi tame aesosen. Era owe, armat ipit bafasie banamek asirapesen. Are afasito, wanam era jimsap akokomto, era owerawa era jimsap ametepaimtamtemas. 37Me armat ipit afasito, wanam abambi karai baetam owe are banamek basirap aporto, ere era bambi karai baetam owe asan akot aemaptemas. Atakamnak, armat ipit, pak batoomattam ipit emes pakaian ajiimemomtem. Are era owe amos banda baemap atakam akoretam. Ararawa, banda pak era owe atoomattamtem. 38Era karai armat ipit eam apaye, eamnak apaye, emes andaeto, wanam abambi karai baetam owe banamek basirap aporto, ere era owe asan akot are. 39Baporay! Tame armat ipit wosom ipit bajinao jam amsam ere, are banamek ataiapem. Ere wosom ipit, era tame jii bajii-ombar. 40Tanom banamek emes asirapay. Tare, ‘Asamot Anakot Ajaoreme Ipit waa bandae apok,’ emes bimak binip atetaramtakam ere, era bare Armat Ipit andaetem.” Yesus emes atakam aesimen.

Karai baetam owe atakam

(Mat. 24:45-51)

41Petrus arawa, “Tuhan! Era akoremarem baetaa atakam, da taka ape? Owe takes ape?” Emes atakam aesimen. 42Me Tuhan arawa, “Era anakot karai baetam ipitam, era bimak binip aptam karai baetam ipitam, wama ipitim? Me akarai armat ipit, era ipit, akarai owe kapar ipit ataemomtem. Me wan karai baetam owe, amos banda aemapa ajitas, era ipitam, banda pak, era owe asaietama ajitem. 43Me karai armat ipit aofasito, wanam akarai baetam ipit emes pak baem aporto, era karai baetam ipit asan akot aemaptem. 44Atakamnak, era karai armat ipit, era ipit, aapak takes banamek batai ataemomtem. 45Me, karai baetam ipit bimak binip atetaramto, ‘Me dekarai armat ipit fef bofasi apok,’ emes bimak binip atetaramto, wanam are wan karai baetam oweam, karai baetam tapesam, wusup ateto, wanam paknam andeto, wanam bir bwi banda jaytu aememto, 46ere, era bare karai armat ipit aofasitem. Me karai baetam ipitam bimak binip atetaramtem. ‘Era karai armat waa bofasi apok apeno.’ Emes atakam aesimtem. Emesare, era bare taka karai armat ipit aofasitem. Are karai baetam ipit atatiitem, Are era ipit Allah atakam ji apok owe asan ataapomtem. 47Karai baetam ipit, era karai armat ipit atakam jane bambi ajito, wanam are era pak bakenem apokam, atakam ji bae apokam, emes aemto, era karai armat ipit era ipit wusup daytinak atetem. 48Me, era karai armat ipit atakam amsam apok ipit, wusup bata aemto, era karai armat ipit, era ipit wusup kope atetem. Allah, daytu pak, wan owe atetamto, Are daytu pak, atakam era owe aojanimtem. Allaham banamek batai pak daytu wan owe atetamto, Are era pak banamek batai anakot atakam ajanimtem.”

Ara tapirmi, owe bajamfaimam tapirmi apok atakam

(Mat. 10:34-36)

49“Dere ara tapirmi jisimak bamomtii andaeo. Era jisimak ambitito ere, Dere jak akotnak. 50Owe Dera ajurusumtemanis. Era pak aemtanis bare ajiire, Dere jak potanak aemememin. 51Tanom, ‘Yesus, ara tapirmi, owe bakipimamtaer tapirmi baemapom andae,’ emes bimak binip atetarammakam apeno. Dere ere, emes pak baem bandae apok. Dere ara tapirmi, owe atakam bajamkoram tapirmi, aemapommin. 52Waa bare ajiire aemansar, tame taka, owe ban taka atakam ajamkoramtemas. Owe bamintep, era ajoo owe jamnuk ajamomtemas. Era ajoo owe jamnukam, era owe bamintep ajamomtemas. 53Aritipitam andep ajamomtem. Me andepam aritipit ajamomtem. Arsootam aparais ajamomtem. Me aparaisam arsoot ajamomtem. Arsakam anin ajamomtem. Me aninam arsak ajamomtem.” Yesus emes atakam aesimen.

Allah waa aemmar pak bimak binip batetaram atakam

(Mat. 16:2-3)

54Emesare. Yesus atakam era owe tanane aokoromen. “Tare era ju basapiendae asan, jaka bandae aportakam, tare, ‘Te oandaetem,’ emes atakam ameteesimemakam. Emesare, are era pak aemtem. 55Wanam, tare bui era selatan aefufumtinaomto aportakam, ‘Waa ju ambap oaememaartem,’ emes atakam aesimemakam. Emesare, are era pak aemtem. 56Pir bae owee! Tare ara tapirmi pakam, wonamo oup pakam, tamsam. Tare ere, Allah waa aemmar pak tamsam apok, wama tamenem?”

Taowentakam owe bakipimtaer atakam

(Mat. 5:25-26)

57“Tanom akot pak baem, atakam tama basakamtii apok, wama tamenem? 58Owe atakam tara akoretamtan, ‘Wore emes pota pak aemem,’ emes atakam aesimtan apaye, wanam are tare pemerintah bipu atomastan apaye, ere tare era waut era owe akipimtaerporay. Era owe, tare, jaos atakam basakamtii ipit bipu ban batapimtaer-ombar. Era jaos atakam basakamtii ipitam tare era polisi owe bootasimemomtam-ombar. Era polisi oweam tare era buji tame bataejiim-ombar. 59Atakamnak! Tare era buji tame bomon aemapaartemakam— ere tapota pak aemekem pak ambotamkoromtakam bare ajiire are.” Yesus emes atakam aesimen.

Currently Selected:

LUKAS 12: LAIASC

Highlight

Copy