LUKAS 14

Yesus, damo bore ipit, Yahudi Owe Samayen Bare ajaoromtaere atakam

1Emesare. Yahudi Owe Samayen Bare taka ere, Yesus, Parisi kapar ipit taka atame, amos takan banda, aesosen. Me era asan aemapes owe, banamek Yesus asirompesen. 2Emesare, damo bore ipit Yesus abipu aememen. 3Yesusam Musa Basakamtam Atakam baememtam owe anama Parisi owe ajateporen. “Yahudi Owe Samayen Bare, asan pota owe damo baoromtam, Musa Basakamtam Atakam bataetiostam pak apaye? Apok apaye?” Emes atakam aesimen. 4Me owe ere, atakam apoknak aemapesen. Yesus arawa, era damo bore ipit ban ajimompen. Are era ipit ajaoromtaeren. 5Yesus arawa, atakam era owe akoromen. “Tare takes, tarereis apaye, tasapi apaye, Yahudi Owe Samayen Bare, kakote take bwi ajurpuutas apaye, tare ere, are fef apuutaeremakam.” Emes atakam aesimen. 6Era owe ere, aatakam atep baemejit asan apoken.

Womba baemetemtem bas atakam

7Yesusam, era pakambwi bajameem owe aporen. Erarawa are baetaa atakam era owe akoromen. 8“Owe tare oorey bajuut pakambwi takan banda ajatetan, tare era juas aptam owe asan baemap bas. Era ajatetan ipit wan juas aptam owe ajate apeno. Tararawa, juas apok owe emes apeno. 9Me tara ajatetan ipit, tabipu bamaromem-ombar. ‘Wore bawasitey. Ara aemema ipit ara asan baemapto.’ Are emes atakam tara bakorom-ombar. Emes atakam tara aokoromtan, tare era pota asan aemaptemakam. Wanam damke akemtemakam. 10Emesare, owe tare pakambwi takan banda ajatetan, era pota asan aemapay. Era tame armat ipit arawa, atakam tara bokorom ambaromemteman apeno. “Dip! Era juas aptam owe daytu asan aemapey.” Emes atakam aesimteman apeno. Erarawa are tare era wan pakambwi bajameem owe takes bipu tere aeomteman. 11Allah era amba baemetemtem owe damke akamemomtem. Me, are era amba baemetemtem apok owe atemtemtem.” Yesus emes atakam aesimen. 12Yesusam atakam era amos takan banda ajate ipit aokoromen. “Wore pakambwi jok aemtem apaye, pakambwi eam aemtem apaye, wojoo owe bajate bas. Worepotaisam, woreotaisam, wotame setep oweam, bajate bas. Me wan wotame setep owe, pak daytu owe apeno. Era oweam bajate bas. Era owe biti wora bojie-ombar. 13Me, wore pakambwi aemtem, era pak apok oweam, era kam oweam, era bai wajie oweam, era banamek kapie oweam, emes owe taka ajatey. 14Era owe biti wora baemejie asan apok. Erarawa wore asan akot aemaptemarem. Turunak owe ajaorwasittas bare, Allah biti wora ajiteman.” Emes atakam aesimen.

Pakambwi daytu baetaa atakam

(Mat. 22:1-10)

15Era amos takan ande ipit taka era atakam jane ajie ere, are atakam Yesus akoromen. “Allah Ai Tapirmi amos andetas owe, ere asan akotnak.” Emes atakam aesimen. 16Yesus ere, atakam era ipit akoromen. “Era bare ere, jipit taka, pakambwi daytinak aemen. Are owe tanane ajaten. 17Era pakambwi setep kope apore, are akarai baetam ipit, ajate owe atakam baesimtam, ambirimemomen. ‘Tanom de! Pakambwi pak emefaafamapomkoromarom, emes atakam aesimey.’ Emes atakam aesimen. 18Era ajate owe takes ere, pir aemteteresen. Era bonak ipit, atakam era karai baetam ipit akoromen. ‘Dere tapirmi ajitito. Dere era tapirmi basiepor baesos aemin. Dere era pakambwi bajinao apok. Emes atakam aesimtamey.’ Emes atakam aesimen. 19Me wan ajate ipitam atakam akoromen. ‘Dere sapi ban amnuk ajitito. Dere era sapi baempor aemin. Dere bajinao apok. Emes atakam aesimtamey.’ Emes atakam aesimen. 20Me wan ajate ipitam atakam akoromen. ‘Dere petae japen ajiiemmin. Erarawa dere baemejinao asan apok.’ Emes atakam aesimen. 21Me karai baetam ipit arawa, aofasien. Are emes atakam era karai armat ipit akoromen. Me tame armat ipit arawa, jak ambap apumapen. Are atakam akarai baetam ipit akoromen. ‘Wore ara aemansa kota daytu bokot takesam, era koser bokot takesam, aesosey, wanam era pak apok oweam, era kam oweam, era banamek kapie oweam, era damo bore oweam, ara asan atoomtinaoey.’ Emes atakam aesimen. 22Era karai baetam ipit aofasie, wanam atakam aokoromen. ‘Dot! Era akorearem atakam, ere emeemey. Me, wotame, baemap asan aosinta.’ Emes atakam aesimen. 23Me tame armat ipit arawa, atakam, era karai baetam ipit aokoromen. ‘Wonom te! Me kota tasan bokotam, era wasen bokotam, aesosey. Era asan owe, detame bajii, atakam fiak akoromey. Dere detame, owe tananenak bapitap akot.’ 24Wore deatakam jane pajiey. Bonak ajateo owe, depakambwi pak banda apoknak aemtemas. Emes atakam aesimen. Emes atakam aesimen.” Yesus emes baetaa atakam akoromen.

Yesus bajamkai owe baemem atakam

(Mat. 10:37-38)

25Emesare. Owe tananenak Yesus takan aemjaresen. Armat Ipitam era owe, bimin awaiome, wanam atakam akoromen. 26“Jipit taka Dera bajamkai akot aporto, are daytinak Dera bafaimtan. Are Dera ambaromemtan apaye, wanam daytinak era aritipitam, arsootam, aremoam, arereisam, arepotaisam, areotaisam, ataratapesam, afaimto apaye, ere are debajamkai ipit baemeemem asan apok. Wanam adamo daytinak afaimto, are debajamkai ipit, baemeemem asan apok. 27Owe asalib bataateter apok aemtas, wanam Dera bajamkai apok aemtas, ere are debajamkai owe baemeemem asan apok. 28Emesare, tare tame daytu baeapom aememtakam, tare ato takampakiapmakam, wanam era tame baeapomkorom pak bajit uang, tanane apaye ato takampormakam. 29Tare emes baem apok aemtakam, wanam era tame fesis ajirimdaemkoromtakam, tare era tame baemeeapom asan apok are. Era pak aportas owerawa, wote tara asawuomteman. 30Are atakam akoremas. ‘Ara aemema ipit tame fesis etejirimapome. Me, are era tame baemeeapomkorom asan apok.’ Emes atakam aesimmas. 31Wanam raja ipit, wan raja ipit jii bajamom aemto, are ato takamdaepakiapem. Wanam bimak binip atetaramum. Me atentara owe 10.000. Era jii bajamom ajinaoto raja ipit atentara owe ere, 20.000. Emes aporto, are bimak binip atetaramum. ‘Dere era raja bakumimosom apaye? Apok apaye?’ Emes bimak binip ato takamtetaramum. 32Apok aporto, are wan raja setep apok aporto, are atakam bakorepor owe era rajapu ambirimemomum. ‘Dere pai bae akot. Dere wore wama pak tetamtey?’ Emes atakam aesimum. 33Emesamare, owe, apak takes beken bajios apok aemtas, are Dera bajamkai owe baemeemem asan apok.”

Jame apok garam atakam

(Mat. 5:13; Mrk. 9:50)

34“Garam ere akot. Me, garam jame apok aemamesto, owe era garam jame pak boemapom asan apok. 35Me pota garam, ere pak akene bajaorom pak apok. Are wan pak akene bajaorom pak bartam pak apok. Owe era garam akoromosomemas. Emesare, jane fero owe ara atakam jane bajitas.” Yesus emes atakam aesimen.

Currently Selected:

LUKAS 14: LAIASC

Highlight

Copy