LUKAS 15

Apakapiose domba baetaa atakam

(Mat. 18:12-14)

1Emesare. Pemerintah uang bataajanimtam karai owe takesam, era Yahudi agama pak tai aooes owe takesam, Yesus aatakam jane bajie, Armat Ipitpu ambaromesen. 2Me Parisi owe anama Musa Basakamtam Atakam baememtam owe itim akemesen. “Ara aemema Ipit ere daagama pak tai aooes owe, ‘De! De!’ ajietaaem, wanam Are era owe amos takan andemas.” Emes atakam aesimesen. 3Emesare, Armat Ipit, emes baetaa atakam, era owe akoretamen. 4“Me tare wan ipit taka, domba 100 baemomem apaye, wanam domba taka apakapiosto apaye, are era wan domba 99 era tame apok asan beken ajiosem. Ararawa, era apakapiose domba bandimarpor aesosem. Are era domba andimarkoromum. Wanam andimartaerto, aofasim. 5Era domba andimartaerto ere, sep andatoomem. Are jak akot aememem. 6Me atame aofasito, are ajoo oweam, atame setep oweam, ajatem. Ararawa, atakam akorem. ‘Me dedomba apakapiosar. Dere ere, andimartaerey. Tanom de! Jak akot aememamo.’ Emes atakam aesimum. 7Emesare, dosa ipit taka apaye, dosa taot taka apaye, adosa ambakemto wanam Allah atakam ji aeto, ere era Surga oup owe, jak akotnak aemememas. Turu owe ere, dosa baem apok. Era Surga oup owe, turu owe 99 aportas, ere are jak akot kope emes aamememas.”

Apakapiose uang baetaa atakam

8“Wanam, taot, uang perak 10 baemomem apaye, wanam taka apakapiosto apaye, ere are pelita ambimapomum, wanam era tame sapu ajaiosomum. Are era uang andimarporkoromum. Emesare, are kais banda apok. Andimartaerto ararawa, kais andem. 9Andimartaerto, are era ajoo oweam, atame setep oweam, ajatem. Atakamam akorem. ‘Dere era apakapiosar uang perak andimartaerey. Tanom de! Jak akot aememamo.’ Emes atakam aesimum. 10Emesamare, dosa ipit taka apaye, dosa taot taka apaye, adosa ambakemto wanam Allah atakam ji aeto, ere Allah amalaikat takes jak akot aememtemas.” Yesus emes atakam aesimen.

Jii apakapiose baetaa atakam

11Yesus arawa, atakam aokoretamen. “Jipit taka, oorey ji jamnuken. 12Me aykun ipit atakam aritipit akoromen. ‘Dot! Dere atoomemtey pak bataet. Era pak sai asaietaman.’ Emes atakam aesimen. 13Bare bamintep ararawa, era aykun ipit era aapak takes akenemapome, wanam setep apok tapirmi aesosen. Erapu ere, are asan pota pak aeme, wanam aapak takes awumemen. 14Are pak apok aememen. Era baream, era tapirmi amos janderesen. Era tapirmi oweam, amosto daytinak aemapesen. Me armat ipitam, amosto dambir baemken aemapen. 15Ararawa, era tapirmi ipit karai aetamen. Era ipit, armat ipit, awo taso tanane, amos bandam karai, era kebun ambirimemomen. 16Armat ipit, era wo taso aamos bimisi, jak bandatukuapor aememen. Are emes amosto aemema ajaieam, owe ere, banda pak ara otetampora bajie apoken. 17Wanam armat ipit bimak binip baso atetaramen. Are atakam akoremen. ‘Me deritipit karai baetam owe tanane, ere amos daytu andemas. Are amos andaeremtiimas. Dere ere, arapu amosto dambi aemmin. 18Emesare, dere awasittemin, wanam deritipitpu aesostemin. Denom armat ipit atakam akoromtemin. “Dot! Dere dosa wora aemo. Denom dosa Allah aemo. 19Emesare, wore, ‘Ara aemema ipit detii,’ emes atakam bokore bas. Dere emes asan akot, awar apok. Dere wokarai baetam ipitajie emes tamen aeman.” Emes atakam aesimtemin.’ Emes atakam aesimen.

20Emesare, armat ipit awasite, wanam aritipitpu aesosen. Armat ipit setep apok aememe, aritipit andep aporen. Are andep seekot aoorporen. Are andeppu akukendae, wanam batir ajipirtaeren. Are ake afapien. 21Me andep arawa, atakam akoromen. ‘Dot! Dere dosa wora aemo. Denom dosa Allah aemo. Emesare, wore, “Ara aemema ipit detii,” emes atakam bokore bas. Dere emes asan akot awar apok.’ Emes atakam aesimen. 22,23Me aritipit ere, atakam akarai baetam owe akoromen, ‘Era akotnak baju bataeray, wanam detii ajiimemomtamay. Betanam ajiimapomay. Sendalam abai ajiimapomay. Era pak andamaarum sapi jii bataeray wanam batatiiay. Fefar! Dare pakambwi aemamo. Jak akot aememamo. 24Dere detii dambir aeme tamen are. Me, aemeta. Are apakapiose. Me, aofasie.’ Emes atakam aesimen. Emesare, era owe jak akot aememesen.

25“Emesare. Era biiti ipit kebun taoemen. Are aofasiendaen. Tame setep ambaremerawa, korontan di andimes, jane ajien. 26Armat ipit arawa, karai baetam ipit ajaten. Are ajateporen. ‘Are apa pakem?’ Emes atakam aesimen. 27Era karai baetam ipit arawa, ‘Woreot ere, asan akot afasiar. Me wuritipit emes apora, ararawa pak andamaarum sapi jii atatiiar.’ Emes atakam aesimen. 28Era biiti ipit ere, jak ambap aememen. Are era tame bajii potan. Aritipit arawa, ajisen. Are era ipit, era tame bajii, atakam fiak ajanimen. 29Era ipit ere, atakam aritipit akoromen. ‘Baporey! Dere tahun tanane, karai, wora aetamaaru. Denom woatakam baoo apoknak aemaaru. Wore ere, dere dejoo owe pakambwi baemtam kambing jii takakopeam, dera batetam apoknak. 30Me, wondep era atetamem pak era banamo pimare tapes ajatejaimosomkorome. Wonom era amos andamaarum sapi jii, era ipit atatiitamarem!’ Emes atakam aesimen. 31Aritipit arawa, ‘Detii! Wore dere takan aemaarinim. Me depak takesam wopak. 32Dare woreot dambir aeme tamen are. Me, aemeta. Apakapiose. Me, aofasie. Emesare, dare pakambwi baemam, jak akot baememam, ere akotnak.’ Emes atakam aesimen.” Yesus emes baetaa atakam akoretamen.

Currently Selected:

LUKAS 15: LAIASC

Highlight

Copy