YOHANES 17

Yesus, abajamkai owe, atakam Allah ajanimtame atakam

1Yesus emes atakam akorerawa, banamek wonamo oup apemtemeteme. Are atakam akorome. “Dot! Era atakam akorem bare, ere eteemansa. Wore Wondep akotipitnak aememe atemtemey. Erarawa Wondep, woakotipit aememem, atemtemtem. 2Wore wan owe Wondep bajamkai atakam asakamtamem. Wonom Wondep era jiinenak baememaar, era owe batetam, akot ajiem. Erarawa Wonom asamot owe takes atakam basakamtamkorom fiak pak Wondep atetamem. 3Me Wore Allah anakot, ere Wo taka are. Derarawa, era ambirimemomenim ipit juas Yesus Kristus. Wan owe, Woraye deraye amsam. Emesare, era owe jiinenak atoomemas. 4Dere era atakam asakamtamenim karai, eteekoromo. Erarawa Dere era Woakotipitnak aememem ara aemansa tapirmi owe bipu atemtemo. 5Dot! Bonaknak ere, Dare ara tapirmi bakenemtii apok aemom, Wore Dera batemtem pak wobipu aporomem. Waaam, Dera batemtem wobipu emes taka ooemey.

6Wore ara aemansa tapirmi wan owe Dera bajamkai atakam asakamtamem. Era owe woowe aememes, wanam Wore era owe Dera bajamkai atakam asakamtamem. Derarawa, woatakam era owe aememtamo. Era oweam woatakam ji aees. 7Era aemomemmin pak takesam, era akoremin atakam takesam, ere era atetamenim pak taka are. Era oweam emes apormas. 8Denom era akoromenim atakam era owe akoretamo. Era oweam era atakam jane ajies. Are Dere Wopu aendaeo, emes atakam atakamnak apores. Are Wore Dera ambirimemomenim, emes atakam eemnak apores.

9Denom era owe atakam Wora ajanimtammin. Era owe woowe. Worarawa, era owe Dera atetamenim. Wan owe ere, Wore amsam apok. Dere era owe atakam Wora bajanim apok. 10Me deowe takes, anom woowe. Me woowe takes, anom deowe. Era owe akot pak aememas. Erarawa are Dera atemtemenis apormas. 11Dere ara aemansa tapirmi boemap apok aemtemin. Era owe ere, ara aemansa tapirmi aemapmas. Dere Wopu aofasitemin. Dot, turunak Ipit akotnak! Wore fiak Ipit. Wonom wofiak pak Dera atetamenim. Emesare, Wore era owe banamek ataiomey. Erarawa era owe, bimak binip taka atetaramtemas— Dare bimak binip taka atetarammarom bimak binip emes tamena. 12Emesare, Wore wofiak pak atetamenim. Erarawa Dere era owe takan aemapaaru, Dere era owe banamek ataiomaaru. Denom era owe ajuumaaru. Era owerawa, bapakapios apok aemes. Jipit takakope apakapiostem. Ere danais aemamesto ipit are. Era pak Alkitab atakam jipu. 13Emesare, Dere Wora ambarommin. Dere jak akotnak. Denom era owe dejak akotnak emes tamen baemapom, akot ajimin. Dere ara atakam akoremin ere, Dere ara aemansa tapirmi aemapmin are. 14Denom woatakam era owe akoretamo. Dere ere, ara aemansa tapirmi pak bajamkai apok. Era oweam ara aemansa tapirmi pak bajamkai apok. Erarawa ara aemansa tapirmi ajamkaimas owe, bifane era owe afeomemas. 15Dere Wore era owe, era Surga oup tapirmi ainam batoomtemet, emes atakam Wora bajanim apok. Dere ere, Wore Asan pota Ipit bakikim atakam Wora ajanimmin. Are era owe bajurusum-ombar. 16Dere ara aemansa tapirmi aipit apok. Era oweam ara aemansa tapirmi aowe apok. 17Era owe woatakam jane bajitas. Worarawa, era owe woatakam ji baekorom, jak akot aseseremtamey. Woatakam, ere atakamnak. 18Wore Dere ara aemansa tapirmi ambirimemomenim. Denom era owe ara aemansa tapirmi samaniin samaniin, era aemenim pak emes tamen ambirimemomo. 19Dere woatakam ji aemin. Era pak era owe asan akot boem are. Anom era owe woatakam ji baekorom are.

20Dere atakam ara owe taka Wora bajanim apok. Wan oweam ara owe aatakam jane ajitemas. Wanam Dera ambesemtemanis. Derarawa, era owe atakamam Wora ajanimtammin. 21Dot! Era owe takes bimak binip takan batetaramtas. Woraye Deraye taka. Anom taka Dara baememtaroas. Emes aemtaroas, Wore amsam apok owe, Wore Dera ambirimemomenim, emes atakam eemnak aportemas. 22Woraye Deraye taka aememomum. Emesare, Dera batemtem atetamenim pak era oweam atetamo. Ere, are taka daoememomum tamen baemem are. 23Denom, era oweam, taka aememmarom. Woraye Deraye taka aememamum. Ere, era oweam takanak baemem are. Emes aememtas, Wore amsam apok owe, Wore Dera ambirimemomenim, emes atakam atakamnak aportemas. Are, Wore Dera ajamkaimanis owe afaimmarem, aportemas— Wore Dera afaimmanim tamen are.

24Bonaknak ere, Dare ara tapirmi bakenemtii apok ere, Wore Dera afaimenim. Erarawa Wore akotipitnak pak atetamenim. Wan owe Dera ajamkaimanis, Wonom era owe, Dera atetamenim. Denom era owe Dera batemtem pak bapor, akot ajimin. Emesare, Dare era owe era aemaptey asan takan baemap, akot ajimin. 25Dot turunak Ipit akotnak! Ara aemansa tapirmi owe Wore amsam apok. Dere ere, Wore demsam. Wore Dera ataendaemenim. Me Dera ajamkaimanis oweam emes atakam atakamnak apores. 26Wore Dera afaimmanim. Denom era owe emes tamen armamon bajamfaimam, akot ajimin. Denom, era oweam, owe taka tamen baemem, akot ajimin. Emesare, Dere wojuas baso era owe aporomtamo. Denom wojuas baso era owe aoporomtamtemin.” Yesus emes atakam aesime.”

Currently Selected:

YOHANES 17: LAIASC

Highlight

Copy