YOHANES 16

1“Dere ara atakam takes tara akorommin, tare dera bajamkai bamompim-ombar. 2Oweam tare Yahudi owe samayen tame bajii atii ateteman. Aamsekunaoto bare, are tara atatiiteterteman. Me tara atatiitetertan owerawa, emes bimak binip atetaramtemas. ‘Allah era aemmarom pak akot aporem.’ Emes atakam aesimtemas. 3Era owe ere, Deritipit amsam apok. Are Dere amsam apok. Erarawa are era pak aemtemas. 4Emesare, Dere ara atakam tara akorommin. Wanam asep bare, owe era pak tara aemtan, tanom bimak binip ajanimomemtemakam. ‘Emesare, Yesus emes atakam dare etekoromero.’ Emes bimak binip ajanimomemtemakam. Bonak ere, takan aemapom. Erarawa Dere ara atakam tara bakorom apok aemo.”

Allah Jip aemto pak atakam

5Emesare, Dere era ambirimemomen Ipitpu fef aoesostemin. Me, tanom, ‘Ete asan aesostem?’ Emes bajie, apoknak are. 6Me, tararawa jak potanak aemapmakam. Tare Dere baesos atakam apormakam are. 7Atakamnak, Dere aesostey, asan akot tara baemtam are. Dere baesos apok aemtey, era Pi Bajat Ipit bandae apok aemtem. Me, aesostey, Dere Armat Ipit tadamopu ambirimemomtemin. 8Ara aemansa tapirmi owe atakam akoremas, ‘Dosa owe wama oweem? Danom era pak damsam. Turu owe wama oweem? Danom era pak damsam. Allah, owe ajurusumto pak, emes atakamam damsam.’ Emes atakam aesimemas. Me, are amsam apok. Era Pi Bajat Ipit andaeto, era owe basonak aporomtamtem. 9Era owe Dera bamesem apok. Erarawa are dosa owe. 10Derarawa, turunak Ipit. Erarawa Dere Deritipitpu aoesostemin. Aesostey, tare debi bopor apok aemtemankum. 11Allaham, ara aemansa tapirmi aomepmar ipit bajurusum atakam emesakamtiie. Erarawa Allah era jokoman owe takesam ajurusumtem. Emesare, era Ipit era pak takes, ara aemansa tapirmi owe, baso aporomtamtem.

12Denom wan atakam tanane tara bakorom, akot ajimin. Tare ere, waa era atakam jane baemejie asan apok. 13Me, Allah Jip, atakamnak baememtam Ipit. Armat Ipit andaeto, era atakamnak takes baso tara aporomtamteman. Armat Ipitam apa atakam bakore apok aemtem. Me, era jane ajito atakam, aokoretem. Are era asep bare ajinaotas pakam, atakam tara akoromteman. 14Armat Ipit dokoremin atakam, atakam baso tara akoromteman. Ararawa, Dera atemteman, tara aporomtamteman. 15Dere Deritipit atakam takes aokoretemin. Erarawa Dere atakam tara akorommin, ‘Allah Jip, era akoremin atakam, tara aememtamteman.’ Emes atakam aesimmin.

16“Emesare, bare arke apok tare debi bapor apok aemtemankum. Wanam wan bare arke apok, tare debi aoportemankum.” Yesus emes atakam aesime. 17Me wan Armat Ipit bajamkai owerawa, “Armat Ipit era atakam dara akorommaro, ere wama tamenem? Aatakamam, ‘Bare arke apok tare debi bopor apok aemtemankum. Wanam wan bare arke apok, tare debi aoportemankum.’ Wanam, ‘Deritipitpu aesostemin.’ Emes atakam aesima. 18Era, ‘Bare arke apok,’ atakam ere, wama tamenem? Dare era akoremar atakam damsam apok.” Emes atakam aesimes.

19Yesusam era owe ara bajatepor aememes apore. Ararawa, “Tarmamon ajamjateampormakam, ere apa pakem? Era akoremin atakam, ‘Bare arke apok, tare debi bopor apok aemtemankum. Wanam, wan bare arke apok, tare debi aoportemankum,’ emes atakam ajamjateampormakame? 20Atakamnak, tanom bate ambatetemakam. Ara aemansa tapirmi owerawa, jak akot aememtemas. Tare jak pota aememtemakam. Me, asep bare, tare jak akot aoememtemakam. 21Taot jaambitimapto, are jak pota. Are era ajiristo pak, setepkope aporem. Me, are era jii ajisipetiito, are era bajiris pak bimak binip ajanimapem. Are jii ajisamesto aportem, wanam jak akot aoemapem. 22Tanom emes tamen are. Tare waa jak pota aemapmakam. Me, Dere tabi aoportemin. Tararawa, jak akot aoemaptemakam. Oweam tajak akot pak baemetaer asan apok. 23Era baream, tare Dera bojatepor apok aemtemankum. Atakamnak, tare Dera bajamkai owe aememmakam are. Erarawa tare atakam Deritipit ajanimtakam, Armat Ipit era ajanimtakam pak takes aemtamteman. 24Tare debajamkai owe aememmakam are. Me, waa ajiiream, tare pak atakam Allah bajanim apoknak. Atakam Allah ajanimaaray. Allahrawa, era ajanimtakam pak tara aemtamteman. Erarawa tanom jak akotnak aememtemakam.”

Yesus ara aemansa tapirmi pak akumimosome atakam

25“Emesare, Dera ara atakam, baetaa atakam, tara akoromaarin. Era aamsekunaoto bare ere, Dere baetaa atakam tara bakorom apok aemtemin. Derarawa, Deritipit atakam, basonak, tara akoretamtemin. 26Era bare aamsekunaoto, Dere atakam Deritipit tara bojanimtam apok aemtemin. Tanom Dera bajamkai owe aememmakam are. Tare era pak bapor, wanam atakam Deritipit tamba ajanimtemakam. 27Emesare, tare Dera afaimmankum. Denom Allahpu aendaeo. Tanom emes atakam eemnak aporekem. Erarawa, Deritipitam tara afaimeman. 28Dere Deritipitpu aendaeo, wanam ara aemansa tapirmi andaeo. Derarawa, ara aemansa tapirmi beken ajiostemin. Denom Deritipitpu aoesostemin.” Yesus emes atakam aesime.

29Me Yesus bajamkai oweam atakam akoromes. “Emesare. Wore waa atakam baso akoremarem. Wore baetaa atakam bakore apok aemmarem. 30Wonom womsam takes. Oweam Wora bojatepor aememtas, Wonom abimak binip womsam. Erarawa owe Wora bojatepor apok. Dare emes apormarom, wanam Wore Allahpu aendaem atakam eemnak apormarom.” Emes atakam aesimes.

31Yesus arawa, “Tare waa eemnak Dera bamesemkorom ape? 32Aamsekunaoto bare, owe tara awumtiiteman. Tanom oweo aememayekem, tame apatostemakam. Tare beken Dera ajiemomtemankum. Emesare, era baream setepkope asisimara, Dere ere, depa baemap apok. Deritipit Dere takan aemapmamum. 33Ara akorommin atakam, ere tare ji baem jak baporetoomem are. Tare Dera ajamkaienkum. Erarawa ombare bas. Tare ara aemansa tapirmi aemapmakam, owe tara ajurusumteman. Dere ere, ara aemansa tapirmi pak etekumimosomo. Erarawa jak fiak aememay.” Yesus emes atakam aesime.

Currently Selected:

YOHANES 16: LAIASC

Highlight

Copy