YOHANES 18

Jokoman owe Yesus ajipirtaeres atakam

(Mat. 26:47-56; Mrk. 14:43-50; Luk. 22:47-53)

1Yesus emes atakam akorerawa, Aare, abajamkai oweam, ju kope juas Kidron poman aokorjires. Era asan eek aptam wus kebunpu are. Armat Ipitam, abajamkai oweam, era kebunpu ambaremes. 2Bonak ere, Yesusam, abajamkai oweam, erapu takan aemjara ajaies. Erarawa Yesus era jokoman owe aotasimemomtamto ipit juas Yudas, erapu amsam. 3Me Allah Tame pak baem owe daytu anama Parisi owe Allah Tame banamek batai owe, atakam asakamtames. Me Yudas arawa, era banamek batai owe anama tentara owe tanane era kebunpu bonak ajaromatmape. Era owe, lentera tananeam, sese tananeam, fero pak tananeam, emes atoomemteteres. 4Yesusam era owe ara aemtas pak takes amsam. Erarawa Yesus ajise, wanam atakam era owe akorome. “Tare ta ipita dimarmakam?” Emes atakam aesime. 5Era owerawa, “Dare Nasaret ipit juas Yesus andimarmarom.” Emes atakam aesimes. Yesus arawa, “Dere ara aememey,” emes atakam aesime. Emesare, Yesus era jokoman owe aotasimemomtamto ipit juas Yudas, era owe ajamememe. 6,7Me Yesusam, “Dere ara aememey,” emes atakam aesime ere, era owe aotasies, wanam bap andaebuanses. Erarawa Armat Ipit era owe aojatepore. “Tare ta ipita dimarmakam?” Emes atakam aesime. Era owerawa, “Dare Nasaret ipit juas Yesus andimarmarom.” Emes atakam aesimes. 8Yesusam, “Dere atakam emeesimey. Dere ara aememey. Tare Dera andimarmankum apaye, ara ajamkaimanis owe, emes baesostas.” Emes atakam aesime. 9Bonak ere, Yesus atakam Allah akorome, “Era atetamenim owe bapakapios apoknak aemes,” emes atakam aesime. Erarawa Are, “Ara ajamkaimanis owe baesostas,” ere, era bonak akore atakam jipu.

10Me Simon Petrusam jii warim jirao atoome. Are era warim asumtaere, wanam are Allah Tame pak baem ipit daytu abambi karai baetam ipit bo poman janemak asakamdaeme. Era bambi karai baetam ipit juas Malkus. 11Yesusam atakam Petrus akorome. “Era warim ese bomon aoeapomey. Deritipit, Dere emes bajirisem, atakam asakamtiie. Wobimak binip ere, ‘Yesus emes bajurusum pota,’ emes bimak binip atetarammarem apaye?” Yesus emes atakam aesime.

Yesus, Hanas bipu aememe atakam

12Emesare, tentara oweam, akapar ipitam, Allah Tame banamek batai oweam, Yesus ajipirtaeres. Are Yesus ban banam ajikapomes. 13Are Yesus, Hanas bipu atomases. Are Hanas, Kayafas anapot apores. Era tahun ere, Kayafas, Allah Tame pak baem ipit daytu aememe. 14Me Kayafasam bonaknak atakam akore, “Jipit taka, are owe takes dambir atemtamto, wanam era dasaman owe takes dambir batem apok, ere akot.” Emes atakam akore.

Petrus, Yesus apatime atakam

(Mat. 26:69-70; Mrk. 14:66-68; Luk. 22:55-57)

15Simon Petrusam, wan Yesus bajamkai ipit takaam, Yesus fe asaramemis. Emesare, Allah Tame pak baem ipit daytu, era wan Yesus bajamkai ipit amsam. Erarawa era ipit, Yesus Allah Tame pak baem ipit daytu tamsan tiri bomon, takan ajamjiieme. 16Me Petrus ere, tasan aememe. Are jimsappu aememe. Me Allah Tame pak baem ipit daytu wan Yesus bajamkai ipit amsam. Me Yesus bajamkai ipit tasan ajise. Are atakam era jimsap banamek batai taot akorome. Ararawa, Petrus atoomjiie. 17Era jimsap banamek batai taot, atakam Petrus akorome. “Wonom era ipit abajamkai ipit worare apaye?” Emes atakam aesime. Me Petrus ere, “Sii! Dere emes apok.” Emes atakam aesime. 18Era tame karai baetam oweam, Allah Tame banamek batai oweam, damo jufu aememes. Erarawa are jis atookomes. Are jisis jisnam ajies. Me Petrusam era owe jisnam takan ajies.

Allah Tame pak baem ipit daytu Yesus ajatepore atakam

(Mat. 26:69-70; Mrk. 14:66-68; Luk. 22:55-57)

19Emesare, Allah Tame pak baem ipit daytu, Yesus ajatepore. Are abajamkai oweam, era aememtame atakamam, Yesus ajatepore. 20Yesus arawa, atep ajite. “Dere atakam owe bipu baso akoreaaru. Denom ju afaafeaarir, era Yahudi owe samayen tame bomonam, Allah Tame bomonam, atakam akoreaaru. Era asan Yahudi owe takes bajarisiap asan. Denom tiruu atakam bakore apoknak. 21Wore Dera ajatepormanim ere, wama tamenem? Deatakam jane ajiaaris owe ajateporay. Era owe era akoreaaru atakam amsam.” Yesus emes atakam aesime. 22Yesus emes atakam akorerawa, era asan aememe Allah Tame banamek batai ipit, Yesus aake apakame. Era ipitam, “Wore Allah Tame pak baem ipit daytu emes atep apa jitmarem?” Emes atakam aesime. 23Yesus arawa, “Dere pota atakam pakoreminaye, wonom era pota atakam baso ooesimtamman. Me, Dere akot atakam pakoreminaye, wore deake apa pakammanim?” Emes atakam aesime.

24Emesare, Hanas, owe Yesus ban banam aptam, Kayafaspu batoomtin, atakam asakamtame. Me Kayafas, Allah Tame pak baem ipit daytu.

Petrus, Yesus aopatime atakam

(Mat. 26:71-75; Mrk. 14:69-72; Luk. 22:58-62)

25Emesare. Simon Petrus, era jisis jisnam taojimape, wan oweam armat ipit ajatepores. “Wonom ara aemema ipit bajamkai ipit apaye?” Emes atakam aesimes. Me Petrus ere, apatime. “Dere emes apok.” Emes atakam aesime. 26Me Allah Tame pak baem ipit daytu akarai baetam ipit taka, erapu aememe. Are Petrus janemak asakamdaeme ipit ajoo ipit. Are atakam akorome. “Me kebunpu ere, dere wore Yesus takan aememismarem aporismin apaye?” Emes atakam aesime. 27Me Petrus ere, aopatime. Aopatimerawa, ajomo ipit atakam akore.

Yesus, Pilatus bipu aememe atakam

(Mat. 27:1-2; Mrk. 15:1-5; Luk. 23:1-5)

28Emesare, era Yahudi owe, Yesus, Kayafas tame atoomjises. Wanam are Armat Ipit gubernur tame atoomtines. Ere tomitimar. Me Yahudi owe ere, era tame bajii apok. Are Paskah Bare Pakambwi pak banda, akot ajies. Erarawa are aagama karao pak baem, potan. 29Me Pilatusam emes apore. Armat ipit arawa, tasan ajise, wanam atakam era owe akorome. “Ara aemema ipit wama pota pak eme? Tare wama atakam koremakam?” Emes atakam aesime. 30Era owerawa, “Ara Ipit pota pak baem apok ere, dare wora baemeotasimemomtam asan apok.” Emes atakam aesimes. 31Me Pilatus arawa, “Tanom era Ipit bataeray. Wanam apota pak aeme, tabasakamtam atakam jipu, atakam tamba ajamsakamamay.” Emes atakam aesime. Me Yahudi owe ere, atakam Pilatus akoromes. “Me dare Yahudi owe, owe batatii atakam basakamtii, ere karao.” Emes atakam aesimes. 32Bonakam, Yesus atakam akore, “Dere emes dambir atemtemin,” emes atakam aesime. Era owe aemes pak arawa, Yesus akore atakam jipu. 33Emesare, Pilatus atame aojiie. Ararawa, Yesus ajate. Are Armat Ipit ajatepore. “Wore Yahudi owe araja ipit ape?” Emes atakam aesime. 34Yesus arawa, “Era ajatepormanim ere, wobimak binip atakam apaye? Owe deatakam wora bakorom apaye?” Emes atakam aesime. 35Me Pilatusam, “Dere Yahudi ipit apok. Wosaman oweam, Allah Tame pak baem owe daytuam, Wore dera aotasimemomtamanis. Wore apa pak emem?” Emes atakam aesime. 36Yesusam, “Dere ara aemansa tapirmi owe baomep ipit apok. Dere ara aemansa tapirmi owe baomep ipit aememo ere, dekarai baetam owe jii etejamomares. Owe Dere era Yahudi owe baotasimemomtam-ombar. Dere ere, ara aemansa tapirmi owe baomep owe emes tamen apok.” Emes atakam aesime. 37Pilatus arawa, “Wore ere, raja ipit apaye?” Emes atakam aesime. Yesusam, “Wore Dere raja ipit atakam akorommanim, ere atakamnak. Dere, atakamnak, owe bakorom, ara aemansa tapirmi andaeo. Dere atakamnak, owe bakorom ajisamso. Era atakamnakto aememmas owe deatakam jane ajimas.” Emes atakam aesime. 38Me Pilatus ere, “Atakamnak ere, wama tamenem?” Emes atakam aesime.

Owe Yesus batatii ajamsakamamtiies atakam

Me Pilatus emes atakam akorerawa, are tasan aojise. Are atakam Yahudi owe akorome. “Dere ara aemema Ipit jokoman pak baem apok apormin. 39Tahuniin tahuniin, era Paskah Pakambwi Bare ere, dere buji tame bomon baemap ipit taka, tara asurumtama ajaio. Ere tatarai pak jipu. Tare ere, dere Yahudi owe Raja ipit tara basurumjisimtam, akot ape?” Emes atakam aesime. 40Era owerawa atakam afaketaaes. “Wore ara aemema Ipit basurumjisimtas bas. Me, Barabas asurumjisimtamey.” Emes atakam aesimes. Era Barabas ere, pak tasa baetaa ipit.

Currently Selected:

YOHANES 18: LAIASC

Highlight

Copy