AEMAARIS PAK 4

Petrus anama Yohanes, Yahudi Agama Atakam Basakamtii Owe bipu aemememis atakam

1,2Emesare. Petrus anama Yohanes, atakam era ajarisiemes owe aememtamemisen. “Yesus ajaorwasite. Erarawa era dambir oweam ajaorwasittemas.” Emes atakam aesimemisen. Are atakam akoreemis, Allah Tame pak baem oweam, Allah Tame polisi Kapar ipitam, Saduki oweam, ambaromesen. Are era atakam aporesen. Emesare are jak ambap aememesen. 3Era owerawa, era Yesus atakam bakoretam bamirimemom ipit amnuk ban akimomesen. Are ju jiiti apores, erarawa era ipit amnuk buji tame bomon ajitaapomesen. Are ajoferawa, era buji tame bomon aemapemisen. 4Me Petrus anama Yohanes, aatakam jane ajies owe damon, wan owe tanane Yesus eemnak ambesemkoromesen. Era Yesus ambesemes owe kaiema kaiema ajiesen. Are oorey owe takes, 5.000 ajiire apaye aememesen.

5Emesare. Ajoferawa, Yahudi agama Atakam Basakamtii Owe daytuam, Yahudi duturu oweam, Musa Basakamtam Atakam baememtam oweam, Yerusalem ajarisiapesen. 6Allah Tame pak baem ipit daytu juas Hanasam, Kayafasam, Yohanesam, Aleksandaram, Allah Tame pak baem ipit daytu asamane owe takesam, era asan ajarisiapesen. 7Are era Yesus atakam bakoretam bamirimemom ipit amnuk, waut asumemes, wanam ajateporesen. “Era aemekem pak, era fiak pak, tao tetamen? Ara aemekem atakam tao sakamtamen?” Emes atakam aesimesen. 8Emesare, Allah Jip Petrus aoemomemkoromen. Erarawa Petrus era owe atep ajiten. “Aemapakam kapar owee, duturu owee! 9Dare era kam ipit asan akot aemomum. Tararawa, era ajaoreme fiak pak, waa dara ajatepormaroakam. 10Emesare, Nasaret Ipit juas Yesus Kristus afiak pak, era kam ipit ajaoromtaere. Tare, Yesus, salib wus oup atatopomekem. Allah ere, Yesus ajaoromwasumtume. Emesare, Yesus afiak pak, kam ipit ajaoromtaere. Tare ara aememmakam owe takesam, Israel owe takesam, emes atakam jane pajiekoromay. 11Alkitabam:

‘Tame baeapom owe, eka taka pota aporekem, wanam era eka aeremtiiekem. Era eka ere, tame eka anakotnak aemanse.’

Emes atakam akorem. Era eka, ere Yesus. 12Wan ipit asamot owe baemejortaer asan apok. Allah, wan ara aemansa tapirmi ipit, asamot bajortaer ipit bataemom apok.” Petrus emes atakam aesimen.

13Petrusam, Yohanesam, jak fiak owe araren. Ararawa, sekolah daytu bae apoknak owe araren. Are bambi owe taka araren. Era atakam basakamtii owe emes apores, wanam jinim aeesen. Are era ipit amnuk, Yesus ajamkaiaarimis owe aporesen. 14Era ajaoreme ipitam era ipit amnuk takan aememesen. Era owe apores arawa, are atep baemejit asan apoken. 15Era owe era ipit amnuk atakam basakamtii owe asan bajis atakam asakamtamesen. Ararawa, armamon atakam ajamkoramesen. 16“Dare era ipit amnuk wama pak emtam? Atakamnak, are jinim bae pak daytinak aemes. Era Yerusalem owe takesam, emes atakam jane emejies. Danom emes pak baemepatim asan apok. 17Dare era ipit amnuk Yesus atakam wan owe bokoretam atii atomamo. Wan owe era atakam jane bajie-ombar.” Emes atakam aesimesen. 18Emesare, era owe, era ipit amnuk ajates, wanam atakam akoromesen. “Tare Yesus atakam bokore bas. Tare era atakam wan owe boememtam bas.” Emes atakam aesimesen. 19Me Petrus anama Yohanes ere, atep ajitemisen. “Allah, dare taatakam ji bae, wanam aatakam baoo, emes akot ape? Bimak binip tamba atetaramporay. 20Dararawa, era aporaarum pakam, jane ajiaarum atakamam, atakam owe bakoretam baemekariem asan apok.” Emes atakam aesimemisen. 21,22Era ipit ajaoreme, ere jinim bae pak eraren. Are umur tahun 40am, wan tahun bakaimam, emes ajiireen. Era owe tanane era pak aporesen. Erarawa Allah tere aeomesen. Era atakam basakamtii owerawa, era owe ombare aememesen. Erarawa are era ipit amnuk bambi jokoman atakam akoromes, wanam asurumesen. Are era ipit amnuk baemejurusum asan apoken.

Yesus eemnak bamesemkorom owe atakam Allah ajanimes atakam

23Era owe, Petrus anama Yohanes, asurumemes arawa, era ipit amnuk ajoo owepu aoesosemisen. Wanam, are Allah Tame pak baem owe daytuam, duturu oweam, era akoromes atakam, ajoo owe aesimtamemisen. 24Era owe emes atakam jane ajies arawa, jak takan, atakam Allah Ajanimesen. “Tuhan! Wore wonamo oupam, tapirmiam, itimbup bwiam, era pakiin pakiin takesam, akenemapomkoromem. 25Wore darerokor juas Daut, atakam bakoretam, atakam asakamtamem. Are wobambi karai baetam ipit. Allah Jipam, Daut, emes atakam bimak binip atetamen:

‘Era Yahudi apok saman, jokoman atakam apa jamkorames? Era oweam, bambi atakam apa jamsakamamtiies?

26Tapirmi raja owe jii bajamom akukuramtiies. Kapar oweam ajarisiemes. Are Tuhanam, era Aeremtaere Ipitam, jii bajamom aememes.’

Daut emes atakam aeapomen. 27Atakamnak, Herodesam, Pontius Pilatusam, era Yahudi apok samanam, Israel owe takesam, ara aemanse kota ajarisiemes. Are Yesus bajurusum akukuramtiies. Emesare, Yesus, wobambi karai baetam turunak Ipit. Wore era Ipit aeremtaerem. 28Era owe, bonak atakam asakamtiiem pak baem, ajarisiemes. Emesare, Wore fiak. Wore emes baem akot aporem. Emesare, emes atakam basakamtii, ere wopak erare. 29Tuhan! Waa ere, Wore era akorammas jokoman atakam baporey. Wore wobambi karai baetam owe, woatakam bakoretam jak fiak atetamey. 30Wonom, wofiak pak ajamporomey, wanam damo pota owe ajamjaoromtaaey. Me wobambi karai baetam turunak Ipit, ere Yesus are. Wore Armat Ipit afiak pak atetamaro. Erarawa dare jinim bae pak aemtemarom.” Yesus bajamkai owe emes atakam ajanimesen. 31Emes atakam ajanimes arawa, era ajarisiapes tame awawarimen. Allah Jipam era owe aemomemkoromen. Era owerawa, Allah atakam, jak fiak aptam akoromesen.

Yesus eemnak bamesemkorom owe, asan akot aemapes atakam

32Yesus eemnak ambesemkoromes owe takes jak takan aemomesen. Era owe, “Ara pak depak,” emes bajie apoknaken. Me, era pak takes takan aemomesen. 33Era Yesus atakam bakoretam bamirimemom owe, Tuhan Yesus ajaorwasite atakam, ateman fiaknak atamesen. Allaham era owe asan akotnak atetamen. 34Era owe aememes, pak apok owe, tamen apoknaken. Tapirmi armat owe takesam, tame armat owe takesam, era pak uang aouumamtaera ajiaarisin. Wanam era uang ataera ajiaaris, 35erarawa era Yesus atakam bakoretam bamirimemom owe baipu ataetiia ajiaaris. Era Yesus atakam bakoretam bamirimemom owerawa, era uang, pak apok owe asaietama ajiaaris.

36Lewi ipit takaam juas Yusuf emes aemen. Are Siprus tapirmi ajisamse ipit araren. Era Yesus atakam bakoretam bamirimemom owe, era ipit, wan juas Barnabas aemesen. “Barnabas” daatakam jow bauumamtaer, “Owe jak fiak baem ipit”in. 37Armat ipitam tapirmi aemomen. Are tapirmi, uang aouumamtaere, wanam era uang Yesus atakam bakoretam bamirimemom owe baipu ataetiien.

Currently Selected:

AEMAARIS PAK 4: LAIASC

Highlight

Copy