AEMAARIS PAK 3

Kam ipit ajaoreme atakam

1Emesare. Bare taka, Petrus anama Yohanes, Allah Tame aesosemisen. Are poro jam 3 atakam Allah bajanim aren. 2Era asan are, owe, kam ipit atoomes aporemisen. Era ipit jak bomon aemomjise, aemape kam taka aren. Juiin afaafeaarir era owe era ipit Allah Tame jimsappu, emes taka ataapoma ajiaarisin. Era jimsap juas “Akot”. Era kam ipit arawa, Allah Tame bajii, owe uang atakam ajanima ajiaaririn. 3Armat ipit, Petrus anama Yohanes, Allah Tame ajiiemis apore, wanam uang atakam ajanimen. 4Petrus anama Yohanes, banamek era ipit aooromemisen. Atakamam akoromemisen. “Banamek dara apeomeporaro.” Emes atakam aesimemisen. 5Era kam ipit arawa, era ipit amnuk banamek apeompen. Are era owe pak ara batetam, emes jiraoemen. 6Petrus arawa, atakam aokoromen. “Dere uang apoknak aememey. Ara aemomey pak, wora batetam aemin. Emesare, Yesus Kristus Nasaret ipit. Are wodamo bajaoromtam fiak pak aoemome. Erarawa wore bajarey.” Petrus emes atakam aesimen. 7Petrus arawa, era kam ipit abo ban ajimompe, wanam awasimemomen. Emesare, era kam ipit, akamtanam, bai komaneam, fiak ameteememen. 8Are asopieme, wanam atawejaren. Ararawa, Petrus anama Yohanes, Allah Tame takan ajiiesen. Are aemjaren. Are asoosojaren. Are Allah tere aeomen. 9Emesare, era owe takes, era ipit ajaream, Allah tere aeomeam, banamek asiromesen. 10Era ipit, Allah Tame jimsap juas “Akot,” uang atakam ajanima ajiaarir ipit aporesen. Are era ipit, aeme pak apores wanam jinim daytu aeesen. Are okone akamimapesen. 11Era ipit Petrus anama Yohanes, batir ajipiren. Era owe takesam, era owe baminteppu ametefojomesen. Era asan, tameko juas “Salomo”en. Emesare, era owe takes jinim daytinak aeesen.

Petrus, Allah Tame bomon atakam akoretame atakam

12Petrus emes aporerawa, atakam akoromen. “Ara aememakam Israel owee! Tare ara aemema ipit era aemar pak, jinim apa eemakam? Tare banamek apa sirommaroakam? Tare da fiak pak apaye, da akot pak apaye, era ipit ajaoromtaermarom, emes are peno. 13Allah, Abrahamam, Ishakam, Yakubam, darfais duturu oweam, ere are aAllah. Allaham abambi karai baetam Ipit oup atamsemtame. Era Ipit Yesus are. Tare era Ipit Pilatus aotasimemomtamekem. Pilatus arawa, era Ipit basurumtam atakam asakamtiie. Tare ere, era Ipit Pilatus bipu apatimekem. 14Era Ipit, ere turunakam, akotnakam, aememe. Me, tare ere, Armat Ipit apatimekem. Tararawa, Pilatus owe batatii ipit taka, tara basurumtam, atakam ajanimekem. 15Wanam tare jiinenak batetam Ipit atatiiekem. Allah ere, era Ipit ajaoromwasumtume. Danom era pak aporom. 16Emesare, era kam ipit Yesus eemnak ambesemkoroma. Erarawa Yesus era ipit fiak aemtama. Tanom era ipit apormakam. Era ipit tamsam. Are Yesus eemnak ambesemkoroma. Erarawa Yesus era ipit damo turu tabipu aemtama.

17Ara aememakam owee! Tanom, takapar oweam, jane ajiemekem. Erarawa tare pota pak Yesus aemekem. Dere emes apormin. 18Bonaknak ere, Allah, atakam, aatakam bakoretam owe, akoretamen. ‘Era Aeremtaere Ipit ajirisemtem.’ Emes atakam aesimen. Era oweam emes atakam owe aokoretamesen. Japen ere, Allah era atakam aokoretam atakam jipu aemkorome. 19Emesare tanom dosa ambakemteteray. Wanam Allah atakam ji aeay. Tanom Allahpu awaiemteteray. Allahrawa, tadosa akokomosomtamteman. 20Erarawa Tuhan jak akot pak atetamteman. Are Yesus aotaendaemtem. Bonaknak ere, Are Armat Ipit aeremtaeren. 21Yesusam era Surga oup atotakamemaptem— Allah era pak takes, ai pak aoemto bare ajiire. Bonak ere, Allah emes atakam, aatakam bakoretam turu owe, akoretamen. Era owerawa, emes atakam owe aokoretamesen. 22Musaam emes atakam akoren. ‘Emesare, Allah taTuhan. Armat Ipit, aatakam bakoretam ipit, tara ataendaemtamteman. Denom Allah atakam bakoretam ipit. Era ipitam de tamen aememtem. Anom taipit. Emesare, tanom aatakam takes jane ajikoromay. 23Wan owe Allah atakam bakoretam ipit atakam ji bae apok aemtemas. Allahrawa, era owe Allah aowe bomon apakapimosomtem.’ Musa emes atakam aeapomen. 24Era bonaknak Allah atakam akoretames owe takes, waa apormas pak, emesare atakam emeokoretamesen. Bonak atakam bakoretam ipit juas Samuel. Me wan atakam bakoretam owerawa, asepen. 25Emesare, tare Allah atakam bakoretam owe arurupis. Allaham ataaji era darfais owe aeetamen. Are atakam Abraham akoromen. ‘Era wururupis andakaimaartas owe, asan akot, era saman takes aoemtemas.’ Emes atakam aesimen. Era ataaji aee atakam, ere ta ataaji. 26Emesare, Allah, abambi karai baetam Ipit ajaoromwasumtume. Are Armat Ipit tare tadosa beak sos basotam atakamtaendaeme. Era pak tare asan akot batetam pak.” Petrus emes atakam aesimen.

Currently Selected:

AEMAARIS PAK 3: LAIASC

Highlight

Copy