AEMAARIS PAK 5

Ananias anama Safira atakam

1Jipit taka ere, juas Ananiasen. Aremo juas Safiraen. Armat ipit, atapirmi, uang jow aouumtaeren. 2Me wan uang aotaeten. Are wan uang arawa, era Yesus atakam bakoretam bamirimemom owe atetamen. Aremoam emes pak amsamen. 3Petrus ere, atakam akoromen. “Ananias! Bii Kapar Ipit wojak bomon baemomem wama tamen tetammarem? Wore era tapirmi aouumtaetarem uang, wan aotasimapomarem. Erarawa wore pote atakam Allah Jip akoromarem. 4Bonak ere, ara tapirmi uang bouumamtaet apok aemapaarim, era tapirmi wopak. Wanam era tapirmi uang aouumamtaetarem, era uang wopak. Wojak bomon emes pak baem atakam apa sakamtiimarem? Wore era pote atakam asamot owe bakorom apok. Wore pote atakam Allah akoromarem.” Emes atakam aesimen. 5Emesare, Ananias emes atakam jane ajie takarawa, andaebuanse, wanam dambir akanen. Emes atakam jane ajies owe takes arawa, ombare daytinak aememesen. 6Emesare. Ai owe era tame ajiies, wanam era dambir ipit, kain banam ajikesen. Are atoomjises, wanam awuapomesen.

7Emesare. Aremoam jam bamintep aemaperawa, are tame ajiiemen. Are era armo ipit dambir aeme bapor apoken. 8Petrus arawa, atakam era taot akoromen. “Atakam baesimtaman. Tare ara tapirmi uang jow aouumtaettakam, emes uang harga ape?” Emes atakam aesimen. Era taot arawa, “Ijee, emes uang are harga.” Emes atakam aesimen. 9Petrus arawa, “Wore wormotin, Allah Jip baempor, atakam jak takan apa sakamamtiimankum? Wormo awuapomares owe bap aomatisa. Anom wora atoomjistemanis.” Emes atakam aesimen. 10Erarawa, era taot Petrus baipu ametejoadaeanse, wanam dambir akanen. Era ai owerawa, atame ajiiesen. Are era taot dambir aeme apores, wanam tasan atoomjisesen. Are armo ipit dasman takan awuapomesen. 11Emesare, Yesus basitim bajarisiap owe takesam, emes atakam jane ajies owe takesam, ombare daytinak aememesen.

Jinim bae pak atakam

12Emesare. Era Yesus atakam bakoretam bamirimemom owe jinim bae pak tanane era owe bipu aemesen. Yesus bamesem owe takesam Salomo tameko ajarisiapa ajiesen. 13Era bambi oweam, era owe asitimesen. Erarawa, are era owe takan baemap ombare aememesen. 14Tuhan eemnak bamesemkorom oweam akakaimesen. Oorey oweam, tapesam, tananenaken. 15Erarawa owe, damo pota owe tanane era bokotpu atoomjises, wanam ise baes pak tenam, atapini tenam, ataetiiesen. Are, Petrus era asan aemjarto, ajip era damo pota owe damo ten baporendaemes, emes jak aseseromesen. 16Era Yerusalem dasman saman owe tananeam andaesen. Are era damo oweam, ajak bomon bii ajiia ajies oweam, atoomtinesen. Emesare, era owe takes ajaoremesen.

Owe Yesus atakam bakoretam bamirimemom owe ajurusumes atakam

17Emesare. Allah Tame pak baem ipit daytuam, abajamkai owe takesam, awasitesen. Are Saduki bajamkai owe takesen. Emesare, are bet daytinak aememesen. 18Are era Yesus atakam bakoretam bamirimemom owe ajipirtaeres, wanam pemerintah buji tame bomon ataejiimesen. 19Eam arawa, Tuhan malaikat, era buji jimsap apaimjime, wanam are era Yesus atakam bakoretam bamirimemom owe aotoomjisen. Are atakam akoromen. 20“Tare te! Allah Tame ajiiemay. Era ai jiinenak atakam takes, era owe akoretamkoromay.” Emes atakam aesimen. 21Emesare, era Yesus atakam bakoretam bamirimemom owe, era atakam jane ajies, wanam Allah Tame tomnak ajiiemesen. Are Yesus atakam aememtamesen. Emesare, Allah Tame pak baem ipit daytuam, abajamkai owe takesam, ambaremesen. Are era atakam basakamtii oweam, era Israel duturu owe takesam, ajarisisimesen. Ararawa, owe, buji tame bomon aemapes Yesus atakam bakoretam bamirimemom owe bataer, atakam asakamtamesen. 22Polisirawa, era buji tame ambaremesen. Are era Yesus atakam bakoretam bamirimemom owe abi apok aporesen. Ararawa, aofasies, wanam atakam akoresen. 23“Era buji tame jimsap takes kunci fiaknak aporarom. Era banamek batai oweam era jimsap takes bap aememares aporarom. Me, era jimsap apaimarom, era tame bomon, owe apoknak aporarom.” Emes atakam aesimesen. 24Allah Tame polisi kapar ipitam, Allah Tame pak baem owe daytuam, emes atakam jane ajiesen. Ararawa, era Yesus atakam bakoretam bamirimemom owe, ete asan paesosesaye, emes bimak binip daytu atetaramesen. 25Jipit takarawa, ambaromen. Are atakam era owe akoromen. “Era buji tame ataejiimekem owe, Allah Tame bomon aomatisa. Are owe atakam aememtammas.” Emes atakam aesimen.

26Emesare, era kapar ipitam, apolisi oweam, aesosesen. Are era Yesus atakam bakoretam bamirimemom owe ataeresen. Me, are era owe tanane, eka adamo basampirim, ombare aememesen. Erarawa are era Yesus atakam bakoretam bamirimemom owe soro ataeresen. 27Are era Yesus atakam bakoretam bamirimemom owe era Yahudi agama atakam basakamtii owe bipu atoomtinesen. Allah Tame pak baem ipit dayturawa, era owe aoorporen. 28“Dare tare Yesus akore atakam baememtam, atii daytinak etetatamom. Tararawa, taatakam, era Yerusalem takes etefufumomasekem. Tare atakam akoretamekem, ‘Allah Tame pak baem ipit daytuam, abajamkai owe takesam, Yesus aotatiies.’ Emes atakam aesimekem.” Allah Tame pak baem ipit daytu emes atakam aesimen. 29Petrusam, wan Yesus atakam bakoretam bamirimemom oweam, atep ajitesen. “Dare Allah atakam ji bae akot taka. Dare asamot owe atakam ji bae apok. 30Tare Yesus wus oup atatopomekem. Erarawa tare Armat Ipit atatiiekem. Darfais aAllah ere, Armat Ipit ajaoromwasumtume. 31Allaham, dosa bamakemam, Allah atakam ji baeam, bimak binip era Israel owe batetam akoten. Are era owe dosa bimak binip bajanimemtam akoten. Emesare Are Yesus abo poman ataeme. 32Dare era pak ateman atammarom owe darare. Allah Jipam era pak ateman batam arare. Allaham, aJip, aatakam ji bae owe atetame.” Emes atakam aesimesen. 33Era atakam basakamtii owe ere, emes atakam jane ajiesen. Emesare, are damtan daytinak aememesen. Are era Yesus atakam bakoretam bamirimemom owe batatii atakam akoresen.

34Me, Parisi ipit taka juas Gamaliel, Musa Basakamtam Atakam baememtam ipitin. Owe takes era ipit asitimaarisin. Emesare, armat ipit era Yahudi agama atakam basakamtii owe bipu awasite, wanam, “Era Yesus atakam bakoretam bamirimemom owe asepmepi atoomjisay.” Emes atakam aesimen. 35Ararawa, atakam era atakam basakamtii owe akoromen. “Ara aemapamakam Israel owee! Ara aememares owe aemtakam pak, turuar. 36Bonaknak, ere Teudas asieme. Wanam, ‘Dere juas aptam ipit,’ emes atakam aesime. Oorey oweam 400 ajiire apaye, era ipit ajamkaies. Erarawa, wan owe era ipit atatiies. Abajamkai oweam takes apatakuoses. Emesare, are apakapioses. 37Asep arawa, Galilea ipit juas Yudas asieme. Era sensus aemes bare are. Armat ipit, owe tanane ara bajamkai atatapimtaa ajie. Me, wan oweam armat ipit atatiies. Abajamkai oweam takes apatakuoses. 38Derarawa, waa ara aemansar pak, atakam, tara baesimtam aemin. Tare era owe bambi aporomay. Tare era owe baem bas. Aoememtammas atakamam, aoemas pakam, asamot owe pak apaye, amba apakapiostem. 39Me, Allah pak apaye, tare era owe baemekumimosom asan apok. Tare Allahjie jokoman aemam apeno.” Gamaliel emes atakam aesimen. Emesare, era atakam basakamtii owe, aatakam jane ajiesen. 40Ararawa, era Yesus atakam bakoretam bamirimemom owe ajatesen. Are wusup ates, wanam atakam asakamtamesen. “Tare Yesus akore atakam, owe bokoretam basnak.” Emes atakam aesimesen. Are era owe ambirimemomesen. 41Emesare, era Yesus atakam bakoretam bamirimemom owe, era Yahudi agama Atakam Basakamtii Owe asan afasiosesen. Bonak ere, Allah era Yesus atakam bakoretam bamirimemom owe, turu owe aporen. Erarawa Are era owe Yesus karai baetam, wanam bajirisem, emes atakam akukuretiien. Era Yesus atakam bakoretam bamirimemom oweam emes aporesen. Ararawa, jak akot aememesen. 42Are juiin afaafeaarir, Allah Tame bomonam, tamenak bomonam, Yesus Kristus atakam akoretama ajiaarisin. Are Allah Akot Atakam akoretama ajiaarisin.

Currently Selected:

AEMAARIS PAK 5: LAIASC

Highlight

Copy