San Lucas 7
7
Jesús beonie nu riben sina gue nu lo gue ca soldadoha
(Mt. 8:5-13; Jn. 4:43-54)
1Dequide uluxa unne Jesús len ca benni rudo nagacani gue nu ruleꞌe nna diattebe lheꞌesi Capernaum. 2Lheꞌe yiesiha nua do ttu soldado gue Roma ancana nu banani ttu gayua (100) ca soldado. Ttu benni riben sina gue nua, nu racaxxattinna gueniha nna chiba ratti nua tena ranina. 3Atti bienini nu lo gue ca soldadoha nu rá ca benni rinnecana gue nu runi Jesús, udhelhattebana ttulhe ca nu teru elha rieni guecani gue ca benni Israel sencana ruegu lo Jesús qui tsie eyonie nu raniha. 4Ca unnuha nna güiattebacana guayúcana Jesús. Tsitsiba useꞌecana bencana ruegu loe, rácane:
—Unbiyuuha nna ralhabana unlu na yuda, 5cumu lana raquinna gue ca benni gueri-na, chiguaba bedona ttu yoꞌo atta ritupatu rudhetitu ca tisa gue Tata Do Iyyabaaha lhe.
6Jesús diattebe len ca unnuha, ttiaca atti chi deoba isíne atta do yoꞌo gue nu anca nu lo gue ca soldadoha nna udhelhatteba nu loha ca nu seꞌe tsee lenna güiacana guayúcana Jesús rácane:
—Aní rá nu lo gue ca soldado-na: Tata, bittu ichacha iquilu quia, cumu neti nna bittu elha ralha gaꞌalu lheꞌe yoꞌo quia-ni. 7De unnuha nna nuarca niba lä beaxtia ita cuinaga neti ettetsadua lolu. Lu nna suntteba unne uná, beaca, nu riben sina quia-na nna eyacattebana. 8Cumu neti nna ancaguaba nu rudo tisa gue ca nu rinnabiacana neti, anáguaba rinnabiaguaba ca soldado quia-na lhe. Atti rpea ttu ca unná: “Güia nía”, tsiabunna, atti rpea attuna: “Utá nii”, gua ritabana. Atti runia mandadu nu riben lo sina quia-na bixa unna unba nua nu upea na.
9Atti bienin Jesús nu rá nua nna bebanbanie gue nua. Laniala bodequi loe re ca benni dia denalha:
—Neti nna gualíbatia ria: Niba ttu ca benni quia anca benni Israel bittu chi guattiꞌaya ria tsitsi leni atti ria le unbiyuu-ni.
10Atti besin ca nu güia guanne len Jesús lheꞌe yoꞌo gue nu loha nna biláquinna nucala beaca nu riben sinaha.
Jesús benie beacani xiꞌini ttu nuila bidabi
11Läga bicaga bisá dequide nu uca-ni, Jesús diattebe lheꞌe ttu yiesi te láni Naín. Diaguaba lanie ca benni rudheti ca tisa ruleꞌe lhe ixe tsitsia adí benni lhe. 12Atti chi bisíne gaxxaba roꞌo puerta du roꞌo yiesiha, nía bilánie ca benni diacana güecatsi ttu nu yatti. Nan gue uncuiti uttiha nna ancana nuila bidabi, tturu nua xiꞌinni do. Ca benni gue yiesiha nna ixerucana dia lencan nuilaha. 13Atti biláni Jesús nuilaha nna guatúatteba lee nua, nianna re na:
—Bittu cueslu.
14Laniala nna ubigue, guattane roꞌo atta xua nu yattiha. Ca nu nujacan unnuha nna uledattebacana. Jesús nna unnettebe re nu yattiha:
—Uncuiti, lu rulisa, guadha.
15Lania nna uncuiti chi uttiha nna beacattebinna guadhattebana udona, atti udulottebana unnena. Jesús botettebe na len nan gueniha. 16Iyába ca nu seꞌe nía nna usixxattaquinna atti ulequi xencana Tata Do Iyyabaaha rácana:
—Ucaxxeba ttu profeta ra xxeni leni len riꞌi.
Ráguabacana:
—Bisíaba Tata Do Iyyabaaha len riꞌi qui aca lanie ca benni guee-ni.
17Itúba lo yu gue Judea lhe lheꞌe adí ca yiesi seꞌe biꞌa dhacaba nía lhe udá tisa gue nu beni Jesús.
Juan biꞌini rugadi indaha raca lebi una tseebi gue Jesús
(Mt. 11:2-19)
18Ca benni rudheti ca tisa ruleꞌe Juan biꞌini rugadi indaha, utixxiꞌaquinbi biꞌiniha gue iyába nu run Jesús. Laniala nna uxbi chupa ca biꞌiniha, 19nianna udhelhabi ca biꞌiniha sannaba tisa tseecabi Jesús gácabi Benniha gansi cuine nua benni chi gaꞌanani Tata Do Iyyabaaha isía, si cuedabacabi attu benni subi, aca. 20Atti chi bisína ca benni udhelha Juan atta du Jesús, ráttebacabi Benniha:
—Juan biꞌini rugadi ca benni inda udhelhabi riꞌitu len cuinalu qui innába tisatu lu: “¿Si cuinalu nua Benni chi gaꞌanani Tata Do Iyyabaaha isía? ¿Si cuedabatu attu benni subi aca?”
21Snaba lania beoni Jesús ixe tsitsia ca benni rani yuꞌu ixe loba isagüe, ca nu raca cuerpu guecani lhe ca nu yuꞌu be xxegüi lheꞌe cuerpu guecani lhe ixe tsitsiaguaba ca nu xua loni benie biláquinna lhe. 22Laniala becabi Jesús re ca biꞌiniha:
—Gualeyya nna gualquixxiꞌani Juan gue nu chi begüiale runia, gue nu chi bieninle lhe. Gualgás na: “Ca nu xua loquinna riláquinna ca nu xi-na ridacana lhe ca nu raca cuerpu guecani nu anca attiba yiesusu te láni lepra reacacana lhe ca nu cuesu-na rienquinna lhe ca nu yatti-na reacaquinna lhe ca benni bittu te guecani chi runacana ca tisa tsee gue gaxasná rodilá Tata Do Iyyabaaha ca benni lhe.” 23Carbáru ca benni bittu rudhequicani ria lecani neti lo niꞌa gue nu riláquinna runia.
24Atti chi güequi ca benni udhelha Juan, udulotteba Jesús utixxiꞌenie ca benni seꞌe nía gue Juan. Nianna re:
—Atti biríale diale güegüia Juan lo yu bisiha, ¿gasná anca benni ribedale ilenle? ¿Si ribedabale ilenle ttu unbiyuu bittu du tsitsi len nu rulaba leni attiba ttu yittixtila dia dedaaba len be-na? 25Gansi läba anía anca, ¿núla biríale begüiale? ¿Si biríale qui ugüiale ttu unbiyuu nucu xo tsee gueni nu daca yaxi? Lebiꞌi nna gua yubale, ca nu nucu xo tsee guequinna lhe ca nu seꞌe redí baa nu reꞌoba lecani lhe lheꞌe yoꞌo lagüi atta sia ca nu rinnabia xenin liba siacana. 26¿Núla nua biríale begüiale ganna? ¿Si ttu benni anca profeta? Neti ria le gualíba. Juan ancabi biꞌini ra xxenru lebi atti ttu benni anca profeta. 27Gue Juan-ni nua rinne Tata Do Iyyabaaha lo ca sitsi guee-na atta rulise Xiꞌinie re Benniha:
Neti idhelha ttu benni nneruna lolu qui quixxiꞌana ca tisa quia-ni.
Biꞌiniha idhalbi neda guelu.#7:27 Malaquías 3:1
28Neti ria, delo iyá ca benni chi uli yies lo yu-ni, läga chi biría ttu profeta ra xxenru leni atti Juan biꞌini rugadi inda-na. Ttiaca benni bittu anque benni ra xxeni leni sela ca benni rinnabia Tata Do Iyyabaaha, benniha la anque nu ra xxenru lee atti Juan.
29Iyába ca benni bienin ca tisa-ni, axta ca güequixa ridí belhi deyya Roma lhe boquinna iquicani gualíba tseeba anca neda gue Tata Do Iyyabaaha, denua nna begadi Juan cana inda. 30Ttiaca ca nu fariseo lencana ca nu ruleꞌe nu rá lo ca ley bocaꞌana Moisés, uluꞌula niꞌacani nu raca le Tata Do Iyyabaaha unie len lacana, läga uca lecani ugadi Juan cana inda. 31Jesús re:
—¿Nú nua ttu innía anca attiba ca benni seꞌe nnanna? ¿Nú nua ttu ruleꞌe tu roꞌoba attiba lacana? 32Lacana ancacana attiba ca unto ribía atta raca iꞌiya-na, ribesiꞌen loescani rácana: “Chi becuestu ca pipi guetu-ni nna bittu beyaꞌale. Chiguaba bilhatu nu rulha ca benni gue ca nu yatti-na lebiꞌi nna bittuguaba uresle.” 33Cumu bisía Juan biꞌini rugadi inda-na, bittu robi ttaxtila, bittuguaba riꞌiyabi vinu lhe lebiꞌi nna rálale: “Nu xxegüihaba du leni unná.” 34Bisíaya, neti Benni unbiyuu daa iyyabaaha, riꞌa roa nna lebiꞌi nna rálale: “Unbiyuu-ni nna ancana ttu nu riꞌa roxxatta, ttu nu do tsee len ca güequixa-na lhe len ca nu te tulha guecani lhe.” 35Ttiaca atti rilenri gaxasná run ca xiꞌini Tata Do Iyyabaaha, lania nna ritedeenri, elha rieni rapa Tata Do Iyyabaaha nua rapa ca biꞌiniha.
Jesús güie lheꞌe yoꞌo gue Simón nu anca fariseo
36Ttu fariseo unnabana lo Jesús tsie go etta len lana. Atti uteꞌe lheꞌe yoꞌo gue fariseo-ni nna udottebe roꞌo mexaha go etta. 37Lheꞌesiha nua do ttu nuila daa tisa gueni ancana nu requi satsa. Atti bina nuilaha do Jesús go etta lheꞌe yoꞌo gue fariseo-ni nna güiattebana leni ttu cantito ancana leni ttu iyya tsee nu te láni alabastro, sa ttittina seti rure xixxi. 38Lana nna ribestsitsiana urena atta seꞌe ca niꞌa Jesús. Len inda ribesnaba utína ca niꞌa Benniha, len itsiquiniha nna bodibisna ca niꞌa Benniha, betságuaba loni ca niꞌe lhe bedona ca niꞌe seti lhe. 39Atti biláni fariseo nu uxna Jesús lheꞌe yoꞌo gueniha nna belabatteba leni rána: “Gansi gualíga anca unbiyuu-ni ttu profeta, lania nna guate daabinna nú nuila unná rudaxxuna ca niꞌani, gue bi runi unná lhe cumu unná nna nuila runi nu satsa bunna.” 40Laniala nna rá Jesús:
—Simóni, raca lasia upea lu ttu tisa.
Lana nna rána:
—Unne Maestro.
41Laniala rá Jesús:
—Useꞌe chupa ca nu daa belhi gue la ttuba unbiyuu ribequi belhiha. Ttuna dana belhi gue lhiaxa gayu gayua (500) sá sina, attuna nna dana belhi gue lhiaxa medi gayua (50) sá sina. 42Nianna niba ttucana bittu te guecani qui quixacana. Nu beaca gueni belhiha nna uxíbana elha xen lasi gue irupabacana. Nnanna nna gus sanga neti, ¿nú delo irupa ca nua racaruquinna gue benni uxí elha xen lasi guecaniha?
43Simón nna becabina rána:
—Neti racatia nna nu uxína elha xen lasi gue xxenru belhi dana.
Jesús re na:
—Gualíbinlu tseeba becabilu.
44Laniala nna bodequi loe begüie nuilaha, nianna ráttebe Simón:
—¿Gua rilenlu nuila-na? Neti atti utaꞌaya lheꞌe yoꞌo guelhi, lu nna bittu bennalu inda qui eyari niꞌaya, ttiaca nuila-ni nna utína ca niꞌaya-ni leni inda uresna, nianna bodibisna cana leni itsiquini. 45Lu nna läga betsá lolu neti, ttiaca nuila-ni nna atti utaꞌalia lheꞌe yoꞌo guelhi bittu redí leni rutsá loni niꞌaya. 46Bittuguaba utabilu seti iquia lhe. Nuila-ni nna chi utabina seti rure xixxi ca niꞌaya-ni. 47Denuala nna rpea lu, nuila-ni nna racaxxattinna quia. Cumu de chi te elha xen lasi gue ixeru ca nu lä anca tsee chi benna ttiaca nu lattirba elha xen lasi ridía gueni nna lattirguaba raquinna quia.
48Jesús nna re nuilaha:
—Chiba uxía elha xen lasi gue ca nu lä anca tsee chi benlu-na.
49Adí ca nu sia go etta roꞌo mexaha nna udulottebacana unnaba tisa loescani rácana:
—¿Nú anca unní nna ridíguabana elha xen lasi gue ca nu lä anca tsee run benni lo Tata Do Iyyabaaha?
50Ttiaca Jesús unnerle adí re nuilaha:
—De güia lelu Tata Do Iyyabaaha nuarca chi ulálu lo tulha guelu. Xen su lelu beyya lislu.
Currently Selected:
San Lucas 7: zaq
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
