San Lucas 8

Ca nuila sela ca benni deno Jesús

1Dequide lania nna diatteba Jesús lheꞌe iyába ca yiesi seꞌe ca nía, lheꞌe ca lheꞌesi lhe, rixxiꞌe ca tisa tsee gue gaxasná rinnabia Tata Do Iyyabaaha. Iyába tsiꞌinu (12) ca biꞌini rudheti ca tisa ruleꞌe diacabi len lee. 2Diaguaba ttulhe ca nuila ca nu bebea Jesús be xxegüi yuꞌu lheꞌe cuerpu guecani lhe ca nu uyuꞌu isagüe chi beaca lhe. Len ca unní sela María biꞌini teeguaba lábi Magdalena biꞌini bería gasi (7) be xxegüi lheꞌe cuerpu guebi, 3Juana nuila gue unbiyuu lá Chuza nu baninna iyába nu te gue Herodes lhe, Susana lhe, ixerba adí ca nuila lhe. Lacana nna nu anca guebacani bedaxxucana qui biyoꞌo nu reasani Jesús lanie ca biꞌini tsiꞌinu (12) rudheti ca tisa ruleꞌe.

Ejemplu gue ttu benni rudelha xua xuxtila

(Mt. 13:1-9; Mr. 4:1-9)

4Ixe tsitsia benni daa lheꞌe ixeru ca yiesi güiacana atta do Jesús. Lee nna utixxiꞌattebanie cana ttu ejemplu, re cana:

5—Ttu benni güiana güedelha xua xuxtila lo yu gueniha. Atti diana rudelhana xuaha nna ttulhe ca xuaha nna binnaque lo neda. Ca nu rite lo nedaha nna beleabacana iqui ca xuaha, nianna ca binni-naba utocana ca xuaha. 6A ttulhe ca xuaha nna binnaque atta seꞌe iyya, ttiaca atti beꞌeyu ca xuaha nna ubisbaque, cumu de bittu lhupa te atta seꞌe ca iyyaha. 7A ttulhe ca xuaha nna biyinnaque lheꞌe atta daa ca ya yitsi. Ca ya yitsiha nna ttuba bixencana len xuaha, denua nna nuarca betsenquinna ca xuaha. 8Adí ca xuaha nna binnaque lo yu tsee. Larcala nna bixenbaque, ttu ttu gayuatteba xua bete ttu ttu iqui ca xuaha.

Uluxaba unne Jesús ca tisa-ni nna unnettebe idisa re:

—Atta gua rudo nagale gue nu ria, gualun duelha qui sadú lele.

9Ca biꞌini rudheti ca tisa ruleꞌe Jesús unnaba tisacabi Benniha bixa dia le ejemplu utixxiꞌe. 10Jesús re cabi:

—Lebiꞌi nna gua runba Tata Do Iyyabaaha qui sadú lele gue gaxasná rinnabie, nu bittu ritedaani ca benni. Ttiaca adí benni nna leni ca ejemplu liba rinnea rulisa cana, qui masquiba tticaxa rugüiacana, bittu iláquinna, masquiguaba tticaxa rudo nagacani bittu sadú lecani.

11’Aníba dia le ejemplu-ni innána: Xua xuxtilaha nna anque tisa gue Tata Do Iyyabaaha. 12Ca xua binna lo nedaha nna ancaque attiba ca benni rienini ca tisa gue Tata Do Iyyabaaha, ttiaca nu xxegüiha nna risinttebana raleana ca tisaha lheꞌe lastoocani qui bittu tsia lecani, anía nna bittu lhácana. 13Ca xua binna atta seꞌe ca iyyaha nna ancaque attiba ca benni, atti rienquinna ca tisa-na attulade reꞌo lecani recabicana udaxxucana neda gue Tata Do Iyyabaaha. Ttiaca cumu läga beꞌan tsitsi ca tisaha lheꞌe lastoocani, nuarca läga isá ria lecani. Larcala atti risía ratecana ruyúcana ttu elha disa nna readi gattebacana lo neda gue Tata Do Iyyabaaha. 14Ca xua xuxtila biyinna lheꞌe yitsiha nna ancaque attiba ca benni rienini ca tisa-ni, ttiaca nu richacha iquicani gue nu anca gue yies lo yu-ni lhe gue nu ridá lecani acacana nu gattaru guecani lhe gue edí baacana nu te yies lo yu-ni lhe bittu rugüelhan cana tseꞌe tsitsicana lo neda gue Tata Do Iyyabaaha. 15Ttiaca ca xua binna lo yu tseeha nna ancaque ca benni nu itú iqui itú lecani rienquinna ca tisa-na, rigúa tseecana nu rá benna lheꞌe lastoocani lhe. Denua nna riseꞌetsitsicana lhe satíaba seꞌecana runcana nu anca tsee lhe.

Ejemplu gue ttu gui rudani lheꞌe ttu yoꞌo

(Mr. 4:21-25)

16’Ni ttu benni bittu rugalhana ttu gui, lenla nna udaxxuna ttu bixa uttodhina iqui nua, niguaba lä rudúna nua xan cama gueniha lhe. Lugar quiba unnuha nna udolana nua ttu atta yadha qui udani nua gue ca benni gaꞌa lheꞌe yoꞌoha. 17Cumu tsa lägabi te ttu bixa te gatsi, lä tsanni lobana, niguaba lä caa ttu nu raca sigá, la isíaba sá atti iríana lolia qui una iyá benni na.

18’Larcala nna tsitsi gualdo nagale gue nu rieninle. Cumu ca benni rudo nagacani itú iqui itú lecani gue nu ria, Tata Do Iyyabaaha unie sadúru lecani adí, ttiaca ca benni bittu raca lecani iyienquinna gue nu ria nna axtala nu racaquinna yucana, itúa.

Nan gue Jesús len ca betsie reguilacane

(Mt. 12:46-50; Mr. 3:31-35)

19Nan gue Jesús lenbi ca betsi Benniha bisíncabi atta due. Ttiaca bittu uca isíncabi axtaga atta du Jesús cumu ya de re benni seꞌe nía. 20Laniala utixxiꞌaquinna Jesús rácane:

—Ni nan gueluha lenbi ca betsiluha seꞌe lheꞌeliꞌa gue yoꞌo-ni. Lacabi nna raca lecabi inne lencabi lu.

21Jesús becabie re:

—Ca benni rudo nagacani ca tisa gue Tata Do Iyyabaaha, nianna runcana nu rá ca tisa-na, ca unná liba anca nan quia lhe betsia lhe.

Jesús benie bebe si ttu iyya be idí

(Mt. 8:23-27; Mr. 4:35-41)

22Ttu sá nna utaꞌa Jesús lenie ca biꞌini rudheti ca tisa ruleꞌe lheꞌe ttu barco. Nianna, re ca biꞌiniha:

—Tteri daca attu ladu gue inda-ni.

Laniala nna diattebaque. 23Ttiaca laca dia lenque barcoha lo indaha nna lee nna uttaꞌadhittebe. Attirba chi bisía ttu iyya be idí lo indattooha, barcoha nna udulotteba nua bisána inda. Denua nna ruxunnina gueque tsettique lheꞌe indaha. 24Laniala nna guadibáncabi Jesús rácabi Benniha:

—¡Maestro! ¡Maestro! ¡Chi rettiri lheꞌe inda-ni!

Jesús guadhattebe bedhaca dise beha lhe nu ridulí lo indaha lhe ca unnuha nna bebetteba lecani, síba beacatteba. 25Nianna, re ca biꞌini rudheti ca tisa ruleꞌe:

—¿Gala guagaꞌale nu rále dequi chi ria lele neti?

Tu rasbaquinbi lhe rebanbaquinbi lhe rá loescabi:

—¿Nú benni biꞌini du-ni, lee nna runie mandadu be-na lhe indattoo-na lhe, ca unná nna rudocana tisa guee?

Jesús beonie ttu unbiyuu yuꞌu be xxegüi lheꞌe cuerpu gueni

(Mt. 8:28-34; Mr. 5:1-20)

26Laque nna bisínque len barcoha axtaba lo yu gue yiesi Gadara. Unnuha rena attu ladu gue roꞌo indattoo re roꞌo yu gue Galilea. 27Atti chi guadi Jesús lo barcoha nna biríatteba ttu unbiyuu beaca lasni lheꞌe yiesiha yuꞌu be xxegüi lheꞌe cuerpu gueni guatsána Benniha. Unbiyuuha nna isá chi uca bittu rucu xoni, niguaba lä ridorna lheꞌe yoꞌo lhe. Atta seꞌe ca baa gue ca nu yattihaba reꞌan-na. 28Ttiaca atti bilenna Jesús, bedútteba xibini lo Benniha, atti uresiꞌattebana idisa rána:

—¡Bittu ettegaꞌa guelu len neti, Jesús, Xiꞌini Tata Dios Benni do iyyabaaha! ¡Rinnaba lolu bittu unnalu elha disa quia!

29Aníaba rá unbiyuuha cumu runi Jesús be xxegüiha mandadu eríana lheꞌe cuerpu gueniha. Be xxegüiha nna tsaba chi belháninna nua. Masquiba ruxxica ca benni niꞌa náni leni cadena qui raca rapacan na, ttiaca lana nna rutseꞌe loban ca nua, atti ribeatteba be xxegüiha na riana lo yu bisi atta nuttu benni seꞌe. 30Jesús unnaba tise na re na:

—¿Bi lálu?

Unnuha nna becabina rána:

—Legiónba lá neti.

Aníaba rána lana cumu ixe tsitsia ca be xxegüiha utaꞌa lheꞌe cuerpu gueni. 31Ca be xxegüiha nna unnabacana lo Jesús qui bittu udelhe cana atta lexúaha. 32Lati iꞌiya do nía requi ixeru ca cutsi rilacana nu gocana. Ca be xxegüiha nna bencana ruegu lo Jesús qui etaꞌacana lheꞌe ca cutsiha. Lee nna begüeelhabe cana. 33Ca be xxegüiha nna beríattebacana lheꞌe cuerpu gue unbiyuuha qui betaꞌacana lheꞌe ca cutsiha. Ca cutsiha nna bigaattebacana bitoetticana roꞌo belhaꞌa daa nía biyinnacana lheꞌe indattooha. Níaba utti ca nua de gopicana inda.

34Ca nu rapa ca cutsiha nna atti begüiacana nu ucaha nna bigaattebacana deyyacana guattixxiꞌaquinna ca benni seꞌe lheꞌe yiesiha, ca benni seꞌe lheꞌe ca ranchuha lhe gue nu ucaha. 35Ca benni bina nu rá ca nua nna biríattebacana diacana güegüia nu ucaha. Atti bisíncana atta du Jesús, níaba biláquinna unbiyuu bería ca be xxegüiha lheꞌe cuerpu gueniha dona lo Jesús, chi nucu xoni lhe chi bedoenna nibisa lhe. Lacana nna usbaquinna. 36Ca benni biláni nu ucaha nna utixxiꞌaquinna cana gue gaxasná uca beaca unbiyuu uyuꞌu ca be xxegüi lheꞌe cuerpu gueniha. 37Laniala nna iyába ca benni seꞌe lo yu gue yiesi Gadara bencana ruegu lo Jesús qui eríe atta seꞌecanaha, de rasixxattaquinna. Anía uca nna beopitteba Jesús lo barcoha qui bede nía. 38Unbiyuu bería ca be xxegüi lheꞌe cuerpu gueniha nna unnabana lo Jesús ugüelhe na tsiana len Benniha. Ttiaca Jesús benie na mandadu eyyaꞌana. Nianna, re na:

39—Bequi beyya lheꞌe yoꞌo gueluha, utixxiꞌen ca benni datíalu gue nu chi ben Tata Do Iyyabaaha lenlu.

Unbiyuuha nna bequittebana deyyana. Itúba lheꞌe yiesiha deyyana rixxiꞌana gue milagru xxeni beni Jesús len lana.

Jesús beonie ttu nuila, benie beaquin xiꞌin Jairo lhe

(Mt. 9:18-26; Mr. 5:21-43)

40Atti bequi Jesús besine attu libe daca attu ladu gue indattooha nna ruꞌu tsitsia le ca benni seꞌe nía, cumu iyábacana chi ribedacane. 41Unnuhaba raca nna atti bisína ttu unbiyuu lá Jairo atta du Jesús. Unnuha ancana nu baninna yoꞌo atta rudheti ca benni Israel ca tisa gue Tata Do Iyyabaaha. Lana nna bedútteba xibini lo Jesús runna ruegu lo Benniha tsie lheꞌe yoꞌo gueniha, 42cumu xiꞌiniunnániha nu tturbana doenna chiba ratti nua tena. Unnuha nna chi anquinna tsiꞌinu (12) ida.

Atti yuꞌu Jesús neda die lheꞌe yoꞌo gue Jairo nna ca benni denocan Benniha nna attulade ruquícane.

43Len ca benni dia len Jesús, dia ttu nuila. Ttu dialiiba ritsigana. Lana nna chi uca tsiꞌinu (12) ida ratena nua. Chiguaba bea nu te gueni bennitti lona len ca nu run ramedi lhe ttiaca ni ttu ca nua bittu udácana eyoncan na. 44Nuila-ni nna ubigana daca cuꞌe Jesús qui utanana roꞌo xo Benniha. Snaba lania nna udú si nu ritsigana. 45Laniala nna unne Jesús re:

—¿Núnna utanana roꞌo xoa?

Cumu iyába ca benni rácana dequi läga lacana utanacana roꞌo xo Benniha, nuarca unne Pedro [lenbi adí ca biꞌiniha] rácabi:

—Maestro, iyába ca benni seꞌe-ni rientsacan lu, ruquícan lu lhe, nianna gua rárlu: “¿Núnna betettanana roꞌo xoa?”

46Ttiaca Jesús ttu rábe:

—Nuxa ttule unná chi bettettanana roꞌo xoa, cumu neti nna utedaatia beoni elha ra xxen le quia-ni ttu benni.

47Atti biyú nuilaha chi guanni lo nu bennaha, bisínttebana rixidinina bedú xibini lo Jesús. Laniala nna utixxiꞌana aníba lo iyába ca benni seꞌe nía bixa gue utanana roꞌo xo Jesús, utixxiꞌana gue snaba lania beacana lhe. 48Jesús nna ráttebe nuilaha:

—Xiꞌini, cumu de güia lelu guadába eyonia lu, nuarca beacalu. Xen su lee beyya.

49Sa duba Jesús rinnee atti chi bisía ttu nu daa lheꞌe yoꞌo gue Jairo utixxiꞌenna nua rán na:

—Nuca utti xiꞌinluha. Bitturu utsitsinlu Maestro-na.

50Atti bienini Jesús nu rá nua nna, unnettebe re Jairo:

—Bittu gasinlu. Suntteba güia lelu neti, xiꞌiniunnáluha nna güeyacaba nua.

51Atti chi bisíne lheꞌe yoꞌoha nna tsa bittu begüeelhe nuxarua gaꞌa len lee, suntterba Pedro nna Jacobo nna Juan nna tata nan gue nuiltoha nna. 52Iyába ca benni seꞌe nía ribescana lhe seꞌe siꞌicana lhe gue nuiltoha. Ttiaca Jesús nna unnee re:

—Bittu cuesle. Läga utti unná. Tiꞌedhi bunna.

53Ca benni seꞌe nía nna bedacalaquinna gue Benniha, cumu gua yubacana chiba utti nua. 54Ttiaca Jesús, bedaxxuttebe ná nuilatoha, atti unnettebe idisa re:

—¡Nuilato, guadha!

55Unnuha nna beacattebinna snaba lania guadhana. Jesús nna benttebe mandadu ugüecana nua etta gona.

56Ca tata nan gue nuilatoha nna rebantsitsiaquinna seꞌecana, ttiaca Jesús benie mandadu re cana, tsa nuttu nu quixxiꞌaquinna gue nu ucaha.

Currently Selected:

San Lucas 8: zaq

Highlight

Copy