San Lucas 6

Jesús anque Benni bananie sá redí le ca benni Israel

(Mt. 12:1-8; Mr. 2:23-28)

1Ttu sá atti redí le ca benni Israel, utee Jesús die yuꞌe neda lheꞌe ca yu atta te ca xua xuxtila. Ca benni rudheti ca tisa ruleꞌe nna uchecuttebacabi iqui ca xuaha, atti uxubitteba las nácabi benniha qui utocabi. 2Nianna ttulhe ca fariseo nna rácana:

—¿Biaca runle nu bittu gaꞌana unri la sá redí leri riꞌi ca benni Israel?

3Jesús becabie re cana:

—¿Si bittuba chi belabale lo ca yitsi gue Tata Do Iyyabaaha atta rixxiꞌa gue nu beni David ttu libe atti utunbi lenbi ca nu dia lenbiha? 4David nna utaꞌabi lheꞌe yotu gue Tata Do Iyyabaaha, guaxxíbi ca ttaxtila chi anca leꞌa gue Benniha sia nía qui utobi, begüeebi ca benni dia lenbiha lhe. Labi nna läga dica gobi ca ttaxtilaha, cumu sunruba ca bixxudiha gaꞌana gocabi benniha.#6:4 1 Samuel 21:3-6

5Ráguabe cana:

—Neti Benni unbiyuu daa iyyabaaha anca benni banani sá redí leri-ni.

Jesús beonie ná unbiyuu nu ubisiꞌa ttu lhaꞌa nániha

(Mt. 12:9-14; Mr. 3:1-6)

6Attu sá atti redí le ca benni Israel, utaꞌatteba Jesús lheꞌe yoꞌo atta rudheti ca benni Israel ca tisa gue Tata Do Iyyabaaha. Lee nna udulottebe beleꞌenie ca benni seꞌe nía. Níaguaba du ttu unbiyuu xi ná derechu gueni. 7Ca nu ruleꞌe nu rá lo ca ley bocaꞌana Moisés lhe ca fariseo lhe ridunocana Jesús gansi güeyonie nua sá redí lecaniha qui te roꞌocani udelhiyyacane. 8Ttiaca lee nna yuxeabe bixa racaquinna. Nianna re unbiyuu nu ubisiꞌa nániha:

—Udulí nna udú salhe-ni.

Unbiyuuha nna udulíttebana udúna salheha. 9Laniala nna rá Jesús ca benni seꞌe nía:

—Neti nna innába tisa le: ¿Bi gaꞌana lo ca ley bocaꞌana Moisés unri sá redí leri riꞌi ca benni Israel? ¿Si unri nu anca tsee, aca? ¿Si unri nu lä anca tsee, aca? ¿Si odilári ttu benni lo elhuttiha, aca? ¿Si ugüelhari nua gattina, aca?

10Begüiabe lo iyába ca nu seꞌe sabiꞌaba atta due nna ráttebe unbiyuuha:

—Belhí nálu.

Unbiyuuha nna belítteba náni, nianna beacattebana. 11Ttiaca ca fariseo lencana ca nu ruleꞌe nu rá lo ca ley bocaꞌana Moisés nna bisaꞌaxxattaquinna nianna udulottebacana unnaba tisa loescani gue bixa anca nu uncana leni Jesús.

Jesús becuee tsiꞌinu (12) ca benni iche ca tisa guee

(Mt. 10:1-4; Mr. 3:13-19)

12Laniaguaba nua güia Jesús lo ttu lhilhi güenne leni Tata Do Iyyabaaha. Níaba udoe betú elaba rinnee len Benniha. 13Atti guaniha nna uxie ca benni rudheti ca tisa ruleꞌe, nianna becuee tsiꞌinu (12) ca biꞌiniha. Lacabi nua begüee lácabi apóstol. 14Aní lá ca biꞌiniha: Simón biꞌini begüee lábi Pedro, Andrés betsi Simón lhe Jacobo lhe Juan lhe Felipe lhe Bartolomé lhe 15Mateo lhe Tomás lhe Jacobo xiꞌin Alfeo lhe Simón biꞌini teequinna lábi Zelote lhe 16Judas betsi Jacobo lhe Judas Iscariote nu betena Jesús las ná ca nu betticana Benniha lhe.

Jesús ruleꞌenie ixe tsitsia ca benni

(Mt. 4:23-25)

17Atti beadi Jesús lo lhilhiha lenie ca biꞌiniha nna. Níaba ulede lo ttu latsi lenie ca benni rudheti ca tisa ruleꞌe. Ixeru ca benni deno Benniha seꞌe nía, ca benni seꞌe lheꞌe yiesi Jerusalén lhe ca benni seꞌe itúba lo yu gue Judea lhe ca benni seꞌe lheꞌesi lá Sidón lhe lheꞌesi lá Tiro lhe ca nu seꞌe roꞌo indattooha. Ca benni-ni nna bisíncana nía qui iyienquinna nu ruleꞌe Jesús, qui eyonie ca nu raniha lhe. 18Reacaguaba ca benni ruyúxxatta elha disa yuꞌu be xxegüi lheꞌe cuerpu guecani lhe. 19Iyába ca benni runcana duelha canacana roꞌo xo Jesús, cumu leni elha ra xxeni lee guee reonie iyába ca nu raniha.

Jesús re ca benni: Carbárule lhe carusiꞌirule lhe

(Mt. 5:1-12)

20Jesús begüiattebe lo ca benni rudheti ca tisa ruleꞌe, nianna re ca biꞌiniha:

—Carbárule, lebiꞌi ca benni bittu te gueni, cumu lebiꞌi ancale benni innabia Tata Do Iyyabaaha.

21’Carbárule, lebiꞌi ca benni seꞌele ritunle nnanna cumu isía sá atti elarenle de gole. Carbárule lebiꞌi ca benni seꞌele ribesle, cumu chi isía sá atti edáquinle.

22’Carbárule, atti usia le ca benni le, atti bitturu ulabicana le lhe atti bitturu aca uyúcan le lhe. Carbárule atti cuꞌu niꞌacan le attiba ttu nu runi nu lä anca tsee lo niꞌa gue de ria lele neti Benni unbiyuu daa iyyabaaha. 23Gualedacani la sá atti satele aná, gualebequi itta lele lhe cumu xxeni anca nu tsee dhíle iyyabaaha. Cumu anáguaba ben ca benniola gue ca unná, bittu uca uyúcana ca benni uca profeta gue Tata Do Iyyabaaha.

24’Ttiaca carusiꞌirule lebiꞌi ca benni te gueni, cumu sunruba ni yies lo yu-ni seꞌele xen su lasi.

25’Carusiꞌirule lebiꞌi ca benni yiela rábale nnanna cumu chi isía sá atti ttunle.

’Carusiꞌirule lebiꞌi ca benni seꞌele redaquinle nnanna cumu chi isía sá atti ixxá roꞌole.

26’Carusiꞌirule lebiꞌi ca nu iyába benni rinne tseecana guele, cumu anába ben ca benniola gue ca unná len ca nu ben lecani rácana dequi ucacana profeta gue Tata Do Iyyabaaha.

Aquinle gue ca nu lä raca uyúcan le

(Mt. 5:38-48; 7:12)

27’Ttiaca lebiꞌi ca benni rienini nu ria-ni nna neti rpea le: Aquinle gue ca nu bittu raca uyúcan le-na, lhatsiru gualudú lele len ca nu rutía di lecan le-na lhe. 28Gualinnaba len Tata Do Iyyabaaha qui salía tseena ca nu riguecana iquile-na, gualnnaba len Tata Do Iyyabaaha aca lanie ca nu rudhaca güecan le-na lhe. 29Gansi nuxa ugüena ttu ladu xxagalu, odequilu attu ladu qui ugüena, nuxa cuana gabana guelha begüeeguabana mixa guelha. 30Nuxaba bixa innában lu nna begüee nua nu rinnabana, nuxa cuana ttu bixa guelu nna bittu ennabal nua. 31Gualun len ca benni gaxasná raca lele uncana len lebiꞌi.

32’Cumu gansi sunruba ca nu racaquinna guele-na raquinle guecani, lania nna tsa lägabi balaꞌana rele gue nu runle. ¿Läba ganna anáguaba run ca nu run nu bittu anca tsee-na? Racaguabaquinna gue ca nu rácani guecani. 33Gansi sunruba len ca nu run tsee len lebiꞌi run tseele, lägabi balaꞌana rele gue nu runle, cumu anáguaba run ca nu run nu lä anca tsee-na. 34Gansi rute gannale nu te guele suntteba len ca nu ribedale odequican guele, lägabi balaꞌana rele gue nu runleha. Cumu anáguaba run ca nu run nu lä anca tsee-na len adí ca nu runi nu lä anca tsee-na, de runcana gosiꞌiba ca unna guecani. 35Lebiꞌi nna nu unlale nna: Aquinle gue ca nu bittu raca uyúcan le-na, un tseele lencana lhe gualute ganna nu rinnabacana, bittu aquinle utecana ttu bixa lenle de bete gannale guecani. Análiba nna dhíle ttu elha tsee xeni lhe acale xiꞌin Tata Dios Benni do Iyyabaaha lhe cumu Benna anque Benni tsee len ca nu lä du ta lequinna lhe len ca nu bittu rute xquixaru len Ben-na lhe. 36Gualaca benni ratúa leni attiba Tata gueri do iyyabaaha anque Benni ratúa lee.

Bittu cuale balaꞌana gue benni

(Mt. 7:1-5)

37’Bittu oquinna iquile anca benni nu te tulha gueni qui bittu oquinna iqui Tata Do Iyyabaaha ancale nu te tulha gueni. Bittu udelha iyyale benni, qui bittu udelha iyya Tata Do Iyyabaaha le. Gualdhí elha xen lasi, qui dhi Tata Do Iyyabaaha elha xen lasi guele. 38Gualute len benni subi nu reasaquinna Tata Do Iyyabaaha gotebe guele. Lee nna gurixxibiabe lhatsiru guele, uquí tsutsue uxtal guele lhe ucuibie na lhe udobinie loni eyonne guele, cumu attiba rurixxibiabale rutele, aníaguaba ebixxibia edíle.

39Jesús utixxiꞌenie cana ttu ejemplu, nianna re cana:

—¿Si guaca gue ttu nu xua loni nneruna lo attu nu xua loni? ¿Läba ganna irpaba ca nua itoetticana lheꞌe belea? 40Nu rudhetiha nna läga anca nua nu yuru atti benni anca maestro gueniha, ttiaca nu udona leni aquinna gansi chi beꞌeyuna uquinna lania nna acabana attiba benni beleꞌenna na.

41’¿Biaca ridolu rugüialu libitsu yuꞌu lheꞌe iyya lo betsilha, nianna bittu retábinlu gue yaga yuꞌu lheꞌe iyya lolha? 42¿Bi roꞌolu te gálu betsiluha: “Betsia, begüeelha cueaya libitsu yuꞌu lheꞌe iyya lolha”, inqui lu nna bittu ritedeenlu análi de xxeni anca yaga yuꞌu lheꞌe iyya lolha? ¡Lu ancalu nu ni lo ni tisaba runi dequi ancalu nu runi nu anca tsee! Ulequixa yaga yuꞌu lheꞌe iyya lolha qui ilá tseenlu cuequilu libitsu yuꞌu lheꞌe iyya lo betsilha.

Nu run benni ruleꞌe lo nuxa ancana

(Mt. 7:15-20)

43’Lägabi yaga tsee te ribía nu lä anca tsee gueni, lä caguaba yaga nu bittu anca tsee cuia nu tsee gueni lhe. 44Cua ttu ttu yaga nna nu ribía loniha rixxiꞌa bixa yaga nua. Bittuguaba relhida benni igu lo ca ya yitsi-na lhe lä redíguabari besuli lo ca yitsi rigaa-na lhe. 45Benni du lhatsiru leniha nna tseeba rinnena, cumu rinnebana nu tsee re lheꞌe lastooni. Benni lä du tsee leniha nna nu bittu anca tseeguaba rinnena, rinneba nua nu bittu anca tsee re lheꞌe lastooni. Cumu nu re lheꞌe lastooba benni riría roꞌoni.

Nu guate chupa ca benni bedo yoꞌo

(Mt. 7:24-27)

46’¿Biaca neti rále Benni bananie riꞌitu, nianna bittu runle nu rpea le? 47Neti quixxiꞌatia le gaxasná anca ca benni risía len neti, ca nu rienquinna ca tisa quia-ni nna rudocana tisa runcana nu rá ca tisa-na. 48Unnuha ancana attiba unbiyuu nu atti udulona bedona ttu yoꞌo nna deꞌaxaba ucheꞌenna axta lhiꞌu, lenla uttixxana cimientu gue yoꞌoha lo iyya ttaꞌa. Atti bisía bixeni yooha nna inda nna guatsuꞌuttebana itú iqui itú leni cuꞌe yoꞌoha, ttiaca ni lä udána uttána nua, cumu tsitsiba anca cimientu gue nua xua lo iyya ttaꞌaha. 49Ttiaca benni rieninna nu ria, nianna bittu rudona tisa unna atti ria, lana ancana attiba ttu unbiyuu bedo yoꞌo gueni atta re cuenta yuba, nianna bittu ucheꞌenna qui quixxana cimientu gue nua. Bixenba yooha nna inda nna guatsuꞌuttebana itú iqui itú leni cuꞌe yoꞌoha. Unnuha nna ubixxi lobana, tsaba biseꞌe lo itúbana.

Currently Selected:

San Lucas 6: zaq

Highlight

Copy