Mateo 5

Jesús mö'ösa'otjö yöawina wene

1Ba̧jekwadö jo̧ba ökömanö ichajadönö edö, Jesúsma mö'ösa'o önöchinobe. Ja̧danö, jobe nöchajo̧ öbamatenama, iteda öba̧ja̧di̧ waisachadö jo̧ba ö̧bobekwö tjichinobe. 2Jejenö tjichibiökwe, Jesúsma jobadönö öba̧ja̧dinobe, baikwö:

3—Do̧'wo̧ luwo̧nö usulasedösa jö̧ba̧lö omukwatadöma, isabenö tjo̧'wo̧ ösöwanö tjö̧jakwedö, Dios la'aka luwo̧ ö̧jakwa̧ tjö̧jakobetjö̧.

4Tjo̧'wo̧ tjo̧achö budekwadöma isabenö tjo̧'wo̧ ösöwanö tjö̧jakwedö, tjo̧'wo̧ tjo̧achajabetjö tjo̧'wo̧ ösöwachibanö tjö̧jakobetjö̧.

5Aaa, otiwöködösa jö̧ba̧lö omukwatadöma, isabenö tjo̧'wo̧ ösöwanö tjö̧jakwedö, Diosma jobadönö böjȩ iyakobetjö̧.

6Jwaikwöda sulabe jwii̧ Dios ösödi̧ jawa isakwadöma, isabenö tjo̧'wo̧ ösöwanö tjö̧jakwedö, Dios öba a'otjö sulabe jwibadö tjö̧jakobetjö̧.

7Jojodönö lȩlö̧jinö edadöma, isabenö tjo̧'wo̧ ösöwanö tjö̧jakwedö, Diosma jobadönö lȩlö̧jinö edakobetjö̧.

8Tjomajadenö sulabenö omukwatöködöma, isabenö tjo̧'wo̧ ösöwanö tjö̧jakwedö, jobadöma Diosnö tjedakobetjö̧.

9Jojodö tjömöledökwö wene jwiinö tjö̧jobö isakwadöma, isabenö tjo̧'wo̧ ösöwanö tjö̧jakwedö, jobadönö Dios i̧tji̧mu ötjabikobetjö̧.

10Otiwanö ja̧bö tjö̧jobetjö̧ ju'wedö usula tjemawinö ja̧tjawö̧ma, isabenö tjo̧'wo̧ ösöwanö tjö̧jakwedö, Dios la'aka luwo̧ ö̧jakwa̧ tjö̧jakobetjö̧—

jö̧ba̧lö yöawinobe Jesúsma.

11-12Tupakwö yöawinobe Jesúsma:

—Ötjönö kwösödaduwiawö̧ ju'wedö ökwödönö sulabenö otjenama, ja̧danö usula kwemawaduwinö ja̧tjenama, ja̧danö sulabenö ja̧köbaduwököjayonö sulabenö ja̧köbaduwaja̧ omöna yötjawenama, kwo̧'wo̧ ösöwaduwachibanö jwiinö kwo̧'wo̧ ösöwanö kwö̧jaduwo chömöledö, mölejȩbetjö Diosma isabenö otiwa jawa iyakobetjö̧. Jau chömöledö, kwöwaisaduwa, ökwödönö sulabenö tjöpöjödi̧danö damötjö ji̧nadö Dios yöawi̧ yöbawadönöbi tjöpöjödinobe, ¿jö̧tö? Ja̧danö, ju'wibi kwöwaisaduwobö jo̧be, jobadö damötjö otiwanö ja̧bö ji̧nadö Diostjö otiwa jawa tjemi̧danö ökwödöbi bakwainö kwemaduwakwedöja—

jö̧ba̧lö yöawinobe Jesúsma.

Ökwödöma sayudanö, ja̧danö dejewa'yu̧danö ichejekwadöja böjȩtjöma, jö̧ba̧lö Jesús wanedö yöawina wene

13Tupakwö wanedö yöawinobe Jesúsma:

—Chömöledö, sayu kwakwawa söinö pjaati̧danö, ökwödöma böjȩ jojodö tjö'da̧de ja̧nö pjakataduwo. Jau chömöledö, meyuwökönö kwö̧jaduwo, baikwö yötawa: Sayuma kwöwaisaduwa, sayu meyuwachibitjö̧ma, mikwawökö ji̧, ja̧danö yemidanö o̧toböma jwii̧, ¿jö̧tö? Jejenö meyuwitjö̧ma, ikwö lotjena, ja̧danö jojodö tjö̧jatena, ¿jö̧tö? 14Ja̧danö, ökwödöma dejewa'yu̧danö ichejekwadöja böjȩtjöma, otiwanö ja̧bö ja̧nö kwidejataduwo jö̧ba̧lö. Kwöwaisaduwa chömöledö, comunidad mö'ösa'o wa̧pekwa'otjö tjotiditjö̧ma, otiwanö öwawobe, ja̧danö tojawa jwii̧, ¿jö̧tö? 15Ja̧danö, jojodö dejewa'yu̧ tjönötedenama, ¿wi̧lȩyu̧ teebe tjujunenaji̧? Junöködö, mesasöte wame junadö, okobe deinö o̧do okwa ju̧kwadö otiwanö tjedobö, ¿jö̧tö? 16Ökwödöbi ja̧danö chömöledö. Ökwödö böjȩ jojodö tjö'da̧de ja̧nö, otiwanö ja̧bö ja̧nö kwidejataduwo, okobe deinö otiwanö ja̧bö kwö̧jaduwi̧ tjedakobetjö̧, ja̧danö jejenö edö, okobe deinö mölejȩbe jo̧ kwabe'doduwinö tjösödakobetjö̧—

jö̧ba̧lö yöawinobe Jesúsma.

Dios weina Moisés iwȩyudina jawa Jesús yöawina wene

17Tupakwö yöawinobe Jesúsma:

—Chömöledö, omukwatökönaduwi, Aaa, Jesúsma Dios weina Moisés iwȩyudinabi, ju'wedö Dios yöawi̧ yöbawadö tjiwȩyudinabi söbebö loobö ichajabe, jö̧ba̧lö. Ja̧ jawa söbebö loto jö̧ba̧löma chichijökötö chömöledö, okobe jwiinö ja̧ tjiwȩyudina jawa badekwachinö ja̧tobö chichijatö. 18Isabenö yötawaduwakwö chömöledö, böjȩbi, mölejȩbi ina ja̧yi, ja̧ tjiwȩyudina jawatjö ja'yubebi söbebö lotjökakobe, okobe jwiinö tjiwȩyudinama badekwachenanö kabatö. 19Jo̧kwajabetjö̧, tjiwȩyudina jawatjö bakwöta jawabi jelo̧, Aaa, mikwawökö ji̧ jö̧ba̧lö ujunibitjö̧ma, ja̧danö ju'wedöbi tjujunibobö öba̧ja̧ditjö̧ma, Dios la'aka luwo̧ ö̧jakwa̧ jojodötjö baikwönönö bo̧, jö̧ba̧lö ötjabikobe jo̧banö. Jo̧kwaijayonö bakwo̧ tjiwȩyudina jawa ja̧itjö̧ma, ja̧danö ja̧ jawa jweinö öba̧ja̧ditjö̧ma, Dios yöbawö ö̧jena jojodötjö bajalekwönönö bo̧, jö̧ba̧lö ötjabikobe. 20Jau chömöledö, baikwö yötawaduwakwö: Ökwödöma fariseo ötjabiwö̧ ja̧bö tjö̧ji̧tjö, ja̧danö Moisés iwȩyudina ba̧ja̧dadö ja̧bö tjö̧ji̧tjö ökwödöma bajalekwönönö sulabenö ja̧bökönö jwaikwöda otiwanö ja̧bö kwö̧jaduwökötjö̧ma, la'akatjöda Dios la'aka luwo̧ ö̧jakwa̧ tekachaduwökena—

jö̧ba̧lö yöawinobe.

Jojodönö kwabö loawa jawa Jesús yöawina wene

21Tupakwö yöawinobe Jesúsma:

—Ökwödöma kwa̧ja̧kwinaduwobe da'dödöminenö weinama, jojodönö kwabö lobökönaduwi, ja̧danö, jojonö kwabö loköbitjö̧ma, lȩekwa jo̧be jö̧ba̧lö weinama kwa̧ja̧kwinaduwobe, ¿jö̧tö? 22Jo̧kwaijayonö jemi bajalekwönönö baikwö yötawaduwakwö ötjöma chömöledö: Sule kwömöledöso̧nö kwabö loköbitjö̧damaökö, kwömöledöso̧nö kwölabitjö̧bi, lȩekwa jo̧be jö̧ba̧lö. Ja̧danö, kwömöledöso̧nö sulabenö yöka̧litjö̧ma, lȩekwa luwedö tjöba a'o kwö̧jena, ja̧danö kwömöledöso̧nö wajwibo̧ja, mikwawö̧kö̧ja jö̧ba̧lö yöka̧litjö̧ma, ökwöla nöolatjö Dios lȩebakwa̧tjö kwemena, jö̧ba̧lö yötawaduwakwö.

23Jo̧kwajabetjö̧, baikwö wetaduwakwö: Diosnö iyawa kwiyaduwenama, jobe Diosnö juwö iyawapjo ö'öbönö jamatö kwomukwatibitjö̧ma, Aaa, chömöledöso̧nö sulabenö ja̧binasa, jö̧ba̧lö kwomukwatibitjö̧ma, 24Diosnö kwiyakwa̧ jawa junibö, abönö kwömöledöso̧ ö̧jobekwö 'ya̧wi, jo̧bakwö wene kwujuna̧li̧ma otidö loköbobö, ja̧danö jemi ikenada Diosnö kwiyo—

jö̧ba̧lö yöawinobe Jesúsma.

25Tupakwö yöawinobe Jesúsma,

—Sulabenö ja̧köbiökwe kwömöledöso̧ lȩekwa luwo̧ ö̧jobekwö öibitjö̧ma, ö̧jobekwö ina kwi̧'yonö jo̧bakwö wene kwujuna̧li̧ otidö loköbo, lȩekwa luwo̧ öba a'otjö sulabenö ja̧köbaja̧ yöawapji jö̧ba̧lö, ja̧danö lȩekwa luwo̧ ökwönö do̧atobö guardia jojonö weapji jö̧ba̧lö, ja̧danö ka̧lena kwö̧bobö tjödapji jö̧ba̧lö. 26Ja̧danö, isabenö yötawaduwakwö, jejenö ökwönö ka̧lena tjöditjö̧ma, jobe kwö̧bakobe, okobe jwiinö balada kwimidobö lȩekwa luwo̧ wei̧danö kwimidenanö kabatö—

jö̧ba̧lö yöawinobe Jesúsma.

Tji̧lȩkwa̧muböködönö ja̧kwawa jawa Jesús yöawina wene

27Tupakwö yöawinobe Jesúsma:

—Ökwödöma weawa kwa̧ja̧kwinaduwobe, kwi̧lȩkwa̧muböködökwöma ja̧bökönaduwi jö̧ba̧lö laebi̧ weawama, ¿jö̧tö? 28Jo̧kwaijayonö babema jemi bajalekwönönö baikwö yötawaduwakwö ötjöma chömöledö: Sule kwi̧lȩkwa̧muböködökwö kwö̧jitjö̧damaökö, bakwo̧ ilekwobökujunö edö, Aaa, isujunö chö̧jowe, jö̧ba̧lö omukwatitjö̧ma, omajadenö ilekwobökujunö ida̧ökö ö̧jajabe. 29Jo̧kwajabetjö̧ baikwö wanedö yötawaduwakwö chömöledö: Kwöbajale otiwale sulabenö Dios weökö jawa ja̧köbobö weitjö̧ma, jale kelekwö loköbo. Jau chömöledö, kwiteba'o jawa jwiinö kwö̧jijayonö o̧penönö otiwena, okobe jwiinö kwiteba'o jawakwö ökwöla nöolanö kwö̧japji jö̧ba̧lö. 30Ja̧danö, kwömamu, kwöwaisobekwöchobesamu sulabenö Dios weökö jawa ja̧köbobö weitjö̧ma, ja̧mu bulatö loköbo. Jau chömöledö, kwiteba'o jawa jwiinö kwö̧jijayonö o̧penönö otiwena, okobe jwiinö kwiteba'o jawakwö ökwöla nöolanö kwö̧japji jö̧ba̧lö—.

Jejenö yöawinobe Jesúsma, okobe jwiinö Dios weökö jawa ja̧köbaduwobö weitjöma 'da̧bachibö kakatibaduwo jö̧ba̧lö.

31Tupakwö yöawinobe Jesúsma:

—Ju'wi weawabi laebobe. Bakwo̧ ilekwonö kaatibobö jö̧a̧litjö̧ma, kaatibakwawa wȩyukwöja ilekwonö iyö, wainö kabatibo̧, jö̧ba̧lö laebobe, ¿jö̧tö? 32Jo̧kwaijayonö, babema baikwö yötawaduwakwö chömöledö: Bakwo̧ iteda ilekwo sulabenö jelo̧kwö jö̧jököjayonö jobujunö kaatibitjö̧ma, jilekwebö̧kö̧kwö jö̧jobö ja̧obe ilekwonö, ja̧danö kaatibinokonö ilekwo bajibanö emo̧ma, jelo̧ ilekwonö ö̧jobe—

jö̧ba̧lö yöawinobe Jesúsma.

Okobe jwiinö yöka̧laduwi̧ma, jweinö yökawaduwo, jö̧ba̧lö Jesús yöawina wene

33Tupakwö yöawinobe Jesúsma:

—Chömöledö, kwa̧ja̧kwinaduwobe, da'dödöminenö weinama, ja̧köbakwa̧ yöbawö kwujunitjö̧ma, yöbawö kwujunajöködanöma ja̧köbaduwa, jö̧ba̧lö. Ja̧danö, okobe jwiinö yöbawö kwujunaja̧ma, Dios öba a'otjö ja'yubebi junibökönö ja̧bi, jö̧ba̧lö weina kwa̧ja̧kwinaduwobe, ¿jö̧tö? 34Jo̧kwaijayonö, baikwö wetaduwakwö chömöledö: Jweinö ja̧köbaduwakwa̧ yökawaduwo, ju'wi jaye wanedö yöbawö junökönö. Baikwö yötawa: Yöbawökönaduwi, mölejȩ isabenö ji̧danö baikwö isabenö ja̧takwa̧ yöbawö chujuna jö̧ba̧löma. Jau chömöledö, mölejȩma, Dios wa̧nö yöawemi, jo̧kwajabetjö̧ mölejȩ wanedöma yöbawö kwujunaduwoko. 35Ja̧danö, yöbawökönaduwi, Aaa, böjȩ isabenö ji̧danö, baikwö isabenö ja̧takwa̧ yöbawö chujuna jö̧ba̧löma. Jau chömöledö, böjȩma Dios ömasapiya wana̧lemi, jo̧kwaobetjö̧ böjȩ wanedöma yöbawö kwujunaduwoko. Ja̧danö yöbawökönaduwi, Aaa, Jerusalén comunidad isabenö ji̧danö, baikwö isabenö ja̧takwa̧ yöbawö chujuna jö̧ba̧löma. Jau chömöledö, Jerusalénma, inesö la'aka luwo̧ ö̧jakwemi, jo̧kwajabetjö̧ Jerusalénnö wanedöma yöbawö kwujunaduwoko.

36Ja̧danö, ju'wibi yöbawökönaduwi chömöledö, Aaa, chuu isabenö ji̧danö, baikwö isabenö ja̧takwa̧ yöbawö chujuna jö̧ba̧löma. Jau chömöledö, ökwödöma juluwöködöja, kwöwö'yebi balewö loköbaduwoböma, yȩinö baiboböbi, dewinö baiboböbi juluwöködöja, jo̧kwajabetjö̧ kwuubi wanedöma yöbawö kwujunaduwoko. 37Jau chömöledö, ju'wi jaye wanedö yöbawökönö, jweinö ja̧köbaduwakwa̧da yökawaduwo. Jau, ja̧takwo̧sa jö̧ba̧lö yökawitjö̧ma, yökawaja̧danö ja̧bi, ja̧danö ja̧tökakwo̧sa jö̧ba̧lö yökawitjö̧ma, ja̧bökönuwi. Jau chömöledö, ju'wi jaye wanedö yöbawö junawama, Diostjöma ichökö ji̧. Awetjatjö ichi̧—

jö̧ba̧lö yöawinobe Jesúsma.

Ju'wedö sulabenö ja̧tjaja̧danö balekwa mikwama ja̧bökönaduwi, jö̧ba̧lö Jesús yöawina wene

38Tupakwö yöawinobe Jesúsma:

—Chömöledö, weawa kwa̧ja̧kwinaduwobe, bakwo̧ sulabenö ja̧aja̧danö, balekwa mikwa jo̧banö lȩekwa jo̧be. Jelo̧ öbajale 'dainö kwaitjö̧ma, balekwa mikwa öbajale 'dainö ja̧bö lȩekwa jo̧be, ja̧danö jelo̧ o'ye paduwibanö doitjö̧ma, balekwa mikwa o'ye paduwibanö ja̧bö lȩekwa jo̧be, jö̧ba̧lö weawa kwa̧ja̧kwinaduwobe, ¿jö̧tö? 39Jo̧kwaijayonö, wainö wetaduwakwö chömöledö baikwö: Sulabenö ja̧badönö kwölabikwawaduwoko jö̧ba̧lö. Jelo̧ kwibekasa'wonö 'bȩitjö̧ma, jalachibi bakwachobesa'wobi 'bȩobö, balekwa mikwama jo̧banö 'bȩköboko. 40Ja̧danö, jelo̧ lȩekwa luwo̧ öba a'otjö kwökamisi 'döebobö isakwitjö̧ma, ja̧bi, wamesado̧bi kwiyonö. 41Ja̧danö, guardia jojo itea bakwöta kilómetro kwe'ewobö weitjö̧ma, dötölataja kilómetro öpöjödökönö kwe'ewo. 42Ja̧danö, ökwönö abeba̧lo̧nö a̧'dȩlökönö kwiyo, ja̧danö jelo̧ kwöbalewobö aebitjö̧ma, öpöjödökönö kwöbalewo—

jö̧ba̧lö yöawinobe Jesúsma, jwaikwöda otiwanöda jojodönö ja̧köbaduwo jö̧ba̧lö.

Kwöpöjojodönö kwösödaduwo, jö̧ba̧lö Jesús yöawina wene

43Tupakwö yöawinobe Jesúsma:

—Yötjawi̧ kwa̧ja̧kwinaduwobe chömöledö, kwömöledö kwipjeanö ju̧kwadönö kwösödo, jo̧kwaijayonö kwöpöjojodönö kwöpöjödo, jö̧ba̧lö yötjawi̧ kwa̧ja̧kwinaduwobe, ¿jö̧tö? 44Jo̧kwaijayonö, baikwö yötawaduwakwö chömöledö: Kwöpöjojodönöbi kwösödaduwo, ja̧danö usula kwemawobö ja̧badönö Diosnö akebaduwo, jö̧ba̧lö yötawaduwakwö. 45Jejenö ja̧köbaduwo, mölejȩbe jo̧ kwabe'doduwi i̧tji̧mu otiwanö ja̧bö tjö̧ji̧danö otiwanö ja̧bö kwö̧jaduwakobetjö̧. Jau chömöledö, kwabe'doduwima, sulabedönöbi, otiwadönöbi pjabatö bakweminö möle jawo̧nö idejatobö webo̧, ¿jö̧tö? Ja̧danö, sulabenö ja̧badönöbi, otiwanö ja̧badönöbi pjabatö, ojwiyo o̧bobö webo̧, ¿jö̧tö? Jau chömöledö, kwabe'doduwima okobe deinö jojodönö pjabato̧. 46Ja̧danö, baikwö yötawaduwakwö chömöledö: Sule ökwödönö ösödadönöda kwösödaduwitjö̧ma, ¿tajawedö kwösödaduwi̧ omukwatö Dios ökwödönö iyobö chömöledö? Jau chömöledö, sule ökwödönö ösödadönöda kwösödaduwitjö̧ma sulabedö la'aka luwo̧ itea balada emadö tjösödi̧tjö bajalekwönönö kwösödaduwökena, jobadöbi jobadönö ösödadönö ösödadö chömöledö. 47Ja̧danö chömöledö, sule kwömöledöduwinöda debawö dokwa akebaduwitjö̧ma, ¿ju'wedö ja̧tji̧tjö bajalekwönönö ja̧köbaduwenaji̧? Diosnö öpöjödadöbi jejenö ja̧badö chömöledö. Ökwödönö weti̧ma sule kwömöledönöda kwösödaduwo jö̧ba̧löma wetökö chömöledö. Kwöpöjojodönöbi kwösödaduwobö wetaduwakwö. 48Jau chömöledö, kwabe'doduwi mölejȩbe jo̧ Diosma, bakwainö otiwanö ja̧bo̧, jo̧kwajabetjö̧ ökwödö jo̧ba i̧tji̧mubi bakwainö otiwanö ja̧bö kwö̧jaduwo—

jö̧ba̧lö yöawinobe Jesúsma.

Currently Selected:

Mateo 5: WPC

Highlight

Copy